« Chwézi dépi jòdi-a ki moun zòt lé sèvi »

1. Pou nou ni vré bonè-a, kisa fòk nou fè, é poutji ? (Izayi 48:17, 18).

PAPA-NOU Jéova ki an sièl-la enmen nou anpil. Sa i lé, sé ki nou ni an bèl lavi jòdi-a épi dèmen (Ékl. 3:12, 13). Jéova kréyé nou épi kapasité ki èstwòdinè. Men i pa ba nou kapasité-a di dirijé kònou nou menm, é i pa ba nou non pli dwa désidé sa ki bien épi sa ki mal (Ékl. 8:9 ; Jér. 10:23). I sav ki pou nou ni vré bonè-a, nou bizwen sèvi’y épi fè sa i ka mandé nou (li Izayi 48:17, 18).

2. Kisa Satan lé fè nou kwè, é kisa Jéova li menm fè pou montré i ka manti ?

² Satan lé fè nou kwè nou pé ni tjè-kontan san Jéova, é ki nou kapab dirijé kònou nou menm (Jén. 3:4, 5). Pou montré Satan sé an mantè, Jéova kité lézòm dirijé kòyo tou sèl pandan an tan. É sa nou ka konstaté, sé ki lè lézòm ka dominé, sé konsékans-lan mové menm. Pa an lòt bò, adan Labib-la, ni an patjé ègzanp nonm épi fanm ki té ni an bèl lavi pas yo té ka sèvi Jéova. Pli bèl lègzanp nou ni sé ta Jézikri. Pou koumansé, annou ègzaminé rézon ki fè i chwézi sèvi Jéova. Apré, nou ké wè poutji Papa-nou ki an sièl-la mérité nou adoré’y. Pou fini, nou ké viré asou yonn-dé rézon ki fè nou chwézi sèvi Jéova.

POUTJI JÉZI CHWÉZI SÈVI JÉOVA

3. Kisa Satan pwopozé Jézi, é ki chwa Jézi fè ?

³ Lè i té asou latè, Jézi té pou chwézi ki moun i té ké sèvi. Titak tan apré batenm-li, Satan pwopozé’y tout wayòm monn-lan si i té ka adoré’y an sèl fwa. Men Jézi réponn li : « Sòti douvan mwen Satan ! Pas mi sa ki matjé : “Sé Jéova Bondié’w ou pou adoré, é sé li yonn ou pou ba an sèvis sakré.” » (Mat. 4:8-10). Poutji Jézi fè chwa-tala ? Annou wè yonn-dé rézon.

4-5. Pou ki rézon Jézi chwézi sèvi Jéova ?

⁴ Prèmié rézon ki fè Jézi chwézi sèvi Jéova, sé pas i enmen’y. Pou vré, i ni ba Jéova an lanmou ki fò éti ayen pé pa brennen (Jan 14:31). Jézi ka sèvi’y osi pas i sav Jéova mérité sa (Jan 8:28, 29 ; Rév. 4:11). I sav Papa’y sé Sous lavi-a, i pé fè’y konfians é anplis di sa i donan (Sòm 33:4 ; 36:9 ; Jak 1:17). Jéova toujou di’y lavérité, é sé li ki ba’y tousa i ni (Jan 1:14). Men Satan, li, sé an mantè ki voras épi égoyis. Si lézòm ka mò, sé fòt-li (Jan 8:44). Jézi té sav tousa, kifè sa pa janmen vini an lèspri’y fè kon Satan, viré do ba Jéova (Fil. 2:5-8).

⁵ An lòt rézon ankò kifè Jézi chwézi sèvi Jéova, sé pas i té sav ki sèvis fidèl-li té ké ba yenki bon rézilta (Ébré 12:2). I té sav ki gras a fidélité’y i té ké rann non Papa’y sen épi ba solision-an pou péché épi lanmò disparèt.

POUTJI JÉOVA MÉRITÉ NOU ADORÉ’Y

6-7. a) Jòdi-jou, poutji an patjé moun pa ka sèvi Jéova ? b) Poutji Jéova mérité nou adoré’y ?

⁶ Jòdi-jou, si i ni an patjé moun ki pa ka sèvi Jéova, sé pas yo pòkò dékouvè bèl kalité i ni, é tousa i fè ba yo. Lapòt Pòl préché Atèn ba moun ki té adan ka-tala osi (Akt 17:19, 20, 30, 34).

⁷ Pòl èsplitjé sé Aténien-an, ki vré Bondié-a « ka ba tout moun lavi-a, é souf-la, é tout bagay ». Apré i di : « Sé li ki fè si nou ni lavi, si nou pé boujé é si nou ka ègzisté. » Jéova sé Kréyatè-a. É « i koumansé épi an sèl nonm pou fè tout sé nasion-an ». Kidonk, i mérité nou adoré’y (Akt 17:25, 26, 28).

8. Kisa Jéova pé ké janmen fè ? Èsplitjé.

⁸ Davwè Jéova sé Kréyatè-a, sé Gran Mèt linivè-a, i té pé fòsé lézòm sèvi’y. Men i pé ké janmen fè sa. Okontrè, i ka ba nou prèv i ka ègzisté, é prèv i enmen nou chak la épi tandrès. Sa i lé, sé ki an maksimòm moun vini zanmi’y pou létèrnité (1 Tim. 2:3, 4). Sé poutji Jéova fòwmé sèvitè’y pou ansénié sé moun-lan sé bon bagay-la i ké fè ba limanité, é koumanniè i ké fè’y (Mat. 10:11-13 ; 28:19, 20). Anplis, i mété lasanblé an plas, épi i ba nou bèrjé ki enmen nou é ki ka pran swen di nou (Akt 20:28).

9. Ki manniè Jéova montré i ni lanmou ba tout moun ?

⁹ Lanmou Jéova ni ba lézòm èstwòdinè. Ou ka wè lanmou-tala èspésialman adan manniè i ka aji épi moun ka rifizé kwè i ka ègzisté. Katjilé asou sa : Pandan milié lanné, anlo moun désidé ba pwòp kòyo sa ki bien épi sa ki mal, olié yo obéyi Jéova. Magré sa, épi bonté, Jéova ba yo sa yo té bizwen pou viv, é menm pou yo pwofité di lavi (Mat. 5:44, 45 ; Akt 14:16, 17). Gras a li, yo pé ni zanmi épi lafanmi ki enmen yo, yo pé élivé timanmay, yo pé travay épi pran plézi adan sa yo ka fè épi dé lanmen-yo (Sòm 127:3 ; Ékl. 2:24). Sa ka montré an manniè klè ki Papa-nou ki an sièl-la enmen tout moun (Ègz. 34:6). Aprézan, annou wè yonn-dé rézon ki fè nou chwézi sèvi Jéova, épi annou wè yonn-dé bienfè nou ka trapé lè nou ka fè sa.

POUTJI NOU CHWÉZI SÈVI JÉOVA

10. a) Ki prèmié rézon ka fè ki nou chwézi sèvi Jéova ? (Matié 22:37). b) Koumanniè Jéova montré i té pasian épi’w ? (Sòm 103:13, 14).

¹⁰ Kon Jézi, prèmié rézon ka fè ki nou chwézi sèvi Jéova, sé pas nou enmen’y épi tout tjè-nou (li Matié 22:37). Lè nou ka katjilé asou bèl kalité’y, sa ka ba nou anvi vini obò’y. Pa ègzanp, annou palé di pasians i ka pran épi nou. Lè sé Izrayélit-la té ka dézobéyi, Jéova té ka sipliyé yo konsa : « Souplé, rivini é ladjé mové konduit-zòt ! » (Jér. 18:11). I ka sonjé nou péchè, i ka sonjé sé lapousiè nou yé (li Sòm 103:13, 14). Lè’w ka médité asou pasians-li épi asou dòt kalité ka rann li si bèl, ès ou pa anvi sèvi’y pou toujou ?

11. Pou ki rézon ankò nou chwézi sèvi Jéova ?

¹¹ Si nou chwézi sèvi Jéova, sé osi pas nou sav sé bon bagay-la pou nou fè (Mat. 4:10). Anplis, nou sav ki sèvis fidèl la nou ka fè, ka ba bon rézilta. Lè nou ka sèvi Papa-nou Jéova, nou ka réjwi tjè’y, nou ka fè pa ta nou pou rann non’y sen, épi nou ka ba laprèv Diab-la sé an mantè. Pou fini, chwézi sèvi Jéova jòdi-a, ka ba nou posibilité sèvi’y pou létèrnité ! (Jan 17:3).

12-13. Kisa nou pé aprann di lavi Jane épi Pam ?

¹² Sa posib ni anpil lanmou ba Jéova dépi nou timanmay. É lanmou-tala pé vini ankò pli fò lanné apré lanné. Annou palé di 2 sè yo ka kriyé Jane épi Pama. Lè yo koumansé étidié Bib-la, yonn té ni wonzan, é lòt la té ni dizan. Lé paran-yo pa té lé étidié Labib, men yo pèwmèt tifi-yo frékanté sé Témwen-an, sèlman si yo té ka kontinié ay Légliz épi yo lé wikenn. Jane ka èsplitjé : « Sa man étidié adan Labib épi sé Témwen-an, endé mwen rézisté douvan présion kanmarad lékòl té ka fè anlè mwen. Kifè, man pa jen menyen ladwòg, é man pa jen ni mové konduit sèksièl. »

¹³ Alafen jénès-yo, sé 2 sè-a vini pwoklamatris. Plita, yo vini pionié toupandan yo té ka otjipé di paran-yo ki té pran laj. Lè i ka viré-sonjé sa yo viv, mi sa Jane ka di : « Man aprann ki Jéova ka pran swen di zanmi’y épi fidélité. É kon 2 Timoté 2:19 ka di, “Jéova konnèt moun ki ta’y”. » Vérité vré, Jéova ka pran swen di moun ki chwézi enmen’y épi sèvi’y !

14. Koumanniè nou pé défann Jéova épi pawòl-nou èk aksion-nou ? (gadé sé zimaj-la osi).

¹⁴ Nou lé tout moun sav ki tout mové bagay yo di asou Bondié pa vré. Imajinen : Ou ni an bon zanmi ki ni bon tjè, ki donan, épi ki ni konpasion ba lézòt. An jou, ou ka tann an moun di, i séléra épi malonnèt. Kisa ou ké fè ? Ou ké défann li ! Satan épi moun i ka enfliyansé ka éséyé sali non Jéova épi mansonj. Menm manniè-a, nou ka réyaji épi fòs pou défann Jéova épi di lavérité anlè’y (Sòm 34:1 ; Iza. 43:10). Sé konsa nou ka montré nou chwézi enmen é sèvi Jéova, épi pawòl-nou, men osi épi aksion-nou.

15. Ki bienfè Pòl trapé lè i fè chanjman adan lavi’y ? (Filipien 3:7, 8).

¹⁵ Nou paré fè chanjman adan lavi-nou pou fè Jéova plézi, ouben pou fè plis adan sèvis-li. Sé sa lapòt Pòl fè. Pou suiv Kris-la é sèvi Jéova, i ladjé gwo pozision-an i té ni adan rèlijion juif la (Gal. 1:14). Pandan lavi’y, Pòl trapé anpil bénédision, é i risivwè bèl privilèj-la gouvèné épi Jézi an sièl-la. I pa janmen rigrété désizion i pran di sèvi Jéova. Si nou pran menm désizion-an, nou non pli, nou pé ké janmen rigrété (li Filipien 3:7, 8).

16. Kisa listwa Julia ka aprann nou ? (gadé sé zimaj-la osi).

¹⁶ Si nou ka ba Jéova prèmié plas-la adan lavi-nou, nou ké trapé bénédision jòdi-a, é dèmen tou. Annou palé di an sè-nou yo ka kriyé Julia. Lè i té timanmay, i té ka chanté adan koral Légliz-li a. I té ka chanté tèlman bien, ki an chantè pwofésionnèl koumansé ba’y an fòwmasion pou i vini chantèz pwofésionnèl tou. Lamenm, Julia vini an mapipi adan chanté é i koumansé fè prèstasion adan gwo sal konsè. I té ka pran lison mizik adan an gran lékòl, lè an zélèv klas-la palé’y di Bondié épi montré’y ki non’y sé té Jéova. Tibren plita, i koumansé étidié Labib 2 fwa adan simenn-lan. Apré sa, i désidé ba Jéova tan’y épi lafòs-li, pasé i fè an kariè adan lamizik. Sa pa té an chwa ki té fasil. I ka èsplitjé : « Anlo moun té ka di mwen sa té domaj pa sèvi don-an man té ni. Men mwen, man té lé ba Jéova tout tan-mwen. » Trantan plita, kisa i ka pansé di chwa-a i fè a ? I ka réponn : « Man ni lapé an tjè-mwen é man asiré Jéova ké ba mwen tousa man anvi dèmen » (Sòm 145:16).

KONTINIÉ SÈVI JÉOVA

17. Sa lapòt Pòl di parapòt a lafen monn-tala, kisa sa lé di ba moun ki chwézi sèvi Bondié é ba moun ki pòkò désidé fè’y ?

¹⁷ Lafen monn-tala ka rivé épi balan. Pòl matjé : « Ankò “an ti zizing tan” é “moun-lan ki pou vini ké rivé, é i pé ké tadé” » (Ébré 10:37). Kisa sa lé di ? I pa rété anpil tan ba sé moun-lan ki pòkò désidé sèvi Jéova (1 Kor. 7:29). Men pou nou ki za chwézi sèvi Jéova, sa lé di ki léprèv-nou ké diré sèlman « an ti zizing tan ».

18. Kisa Jézi épi Jéova ka ankourajé nou fè ?

¹⁸ Jézi ankourajé moun ki té ka kouté’y vini disip-li, men osi kontinié suiv li (Mat. 16:24). Sé poutji, si nou ka sèvi Jéova dépi an patjé lanné, fo nou désidé pa ladjé. Jéova lé nou travay rèd pou toujou viv annakò épi chwa-a nou fè di sèvi’y. Pétèt sa pé ké fasil, men nou ké trapé bon bénédision, é sa, dépi aprézan ! (Sòm 35:27).

19. Kisa nou pé aprann di sa ki rivé Gino ?

¹⁹ Yonn-dé moun ka pansé ki sèvi Jéova ka mandé twòp sakrifis. Wou ki jenn, ès ou ni lenprésion ou ka pèd an bagay pas ou ka sèvi Jéova ? Gino, an jenn frè ka di : « Man té ka touvé ki lè’w Témwen Jéova sa té ka anpéché’w pran plézi an lavi-a. Près tout sé jenn-lan ki grandi épi mwen, té ka fè lafèt, té ni ti kopin-yo épi yo té ka jwé jé vidéwo violan. Men mwen, man té ka pasé tout tan-mwen an réyinion épi ka préché. » Kouman, manniè wè tala aji anlè Gino ? I ka di : « Man koumansé mennen 2 lavi. Yonn tout moun ka wè épi an lòt anba-fèy. É pandan an tan, sa vré, man pran pié-mwen. Men man pa té ka risanti vré lajwa-a. Man viré-fè katjil asou vérité Labib man té mété asou koté, é man pran désizion sèvi Jéova épi tout tjè-mwen. Dépi man fè chwa-tala, man ka santi Jéova ka réponn tout lapriyè-mwen. »

20. Kisa nou bien désidé fè ?

²⁰ Chantè an sòm chanté ba Jéova : « Bienéré moun-lan ou ka chwazi épi ou ka fè vini bò’w pou i rété adan lakou kay-ou ! » (Sòm 65:4). Kidonk, fòk nou bien désidé sèvi Jéova. Kon Jozié, nou ka di épi fòs : « Mwen menm, épi lafanmi-mwen, nou kay sèvi Jéova » (Joz. 24:15).