AWTIK POU ÉTIDIÉ 21
KANTIK 21 Avan tout, kontinié chèché Wayòm-lan
Chèché vil-la ki la pou toujou
« Nou ka chèché épi tout tjè-nou vil-la ki pou vini an » (ÉBRÉ 13:14).
MI SA NOU KÉ WÈ
Nou ké wè ki konsèy adan Ébré chapit 13 ki pé itil ba nou jòdi-a épi dèmen.
1. Kisa Jézi té pwofétizé parapòt a Jérizalèm ?
AVAN lanmò’y, Jézi ba disip-li an pwofési. Pwofési-tala réyalizé pou prèmié fwa jiskont avan Jérizalèm détwi. I avèti sé disip-li a ki ‘lawmé té ké viwonnen Jérizalèm’ (Lik 21:20). É i di yo fòk yo té kèy chapé-kouri dépi yo té ké wè sé lawmé-a. Anfinaldikont, sé lawmé-tala sé té sé Women-an (Lik 21:21, 22).
2. Ki konsèy Pòl ba sé krétjen-an ki té ka viv Lajidé épi Jérizalèm, é kisa i fè yo sonjé ?
2 Yonn-dé lanné avan sé Women-an antouré Jérizalèm, lapòt Pòl ékri an lèt ki té ni an mésaj enpòwtan ba sé krétjen-an ki té ka viv Lajidé épi Jérizalèm. Jòdi-jou, lèt-tala sé liv Ébré-a. Andidan’y, i ni konsèy itil asou manniè yo té pou paré kòyo pou sé lévènman-an ki té ka vini. Men kisa ki té ka vini ojis ? Yo pa té ké tadé détwi Jérizalèm. Si sé krétjen-an pa té lé ayen rivé yo, fòk yo té paré ladjé kay-yo épi travay-yo. Sé poutji Pòl fè yo sonjé : « Isiya nou pa ni an vil ki ké la pou toujou. » Apré sa, i di yo osi : « Nou ka chèché épi tout tjè-nou vil-la ki pou vini an » (Ébré 13:14).
3. « Vil-la ki ni vré fondasion » sé kisa, é poutji nou ka chèché vil-tala ?
3 Sé krétjen-an ki chwézi kité Jérizalèm épi Lajidé, yo mété yo alafèt, men yo rivé sové lavi-yo. Jòdi-a, yo ka mété nou alafèt, pas nou ka rifizé mété konfians-nou adan lézòm. Men osi, pas nou pa ka chèché blèz kònou épi chèché lasékirité adan monn-tala. Poutji nou ka fè sé chwa-tala ? Pas nou sav ki adan an ti moman, monn méchan tala kèy disparèt. Kidonk, nou ka chèché « vil-la ki ni vré fondasion », sa lé di « vil-la ki pou vini an » : wayòm Bondiéa (Ébré 11:10 ; Mat. 6:33). Adan lé 3 prèmié mòso awtik-tala nou ké wè 1) ki manniè sé konsèy-la Pòl ba sé krétjen 1ié sièk-la endé yo chèché « vil-la ki pou vini an », 2) ki manniè sé konsèy-tala préparé yo ba sa ki té ka vini an é 3) ki manniè sé konsèy-tala pé endé nou jòdi-a.
FÈ JÉOVA KONFIANS PAS I PÉ KÉ JANMEN LADJÉ’W
4. Poutji Jérizalèm sé té an vil enpòwtan ba sé krétjen-an ?
4 Jérizalèm sé té an vil enpòwtan ba sé disip Jézi-a. Yo fòwmé prèmié sanblé krétjen-an adan vil-tala lanné 33 apré Jézikri, é sé la komité santral la té yé. Anplis di sa, adan vil-tala anpil krétjen té ni kay-yo épi anpil dòt bagay ankò. Poutan, Jézi di sé disip-li a, fodré yo té paré kité Jérizalèm épi menm Lajidé (Mat. 24:16).
5. Koumanniè Pòl préparé sé krétjen-an ba sa ki té kèy rivé ?
5 Konm Pòl té lé endé sé krétjen-an pou yo kité Jérizalèm, i fè yo konprann plimié manniè Jéova té ka wè vil-tala. Pòl fè yo sonjé ki Jéova pa té lé tann palé ni di Tanp-lan, ni di sé prèt-la, ni di sakrifis yo té ka fè davwè sé bagay-tala pa té sakré ankò (Ébré 8:13). Anplis, enpé adan sé Juif-la té rijété Mési-a. Kidonk, pèsonn pa té ké ni pou alé Jérizalèm pou adoré Jéova ankò, pas Jérizalèm épi Tanp-lan té ké disparèt (Lik 13:34, 35).
6. Poutji sé Ébré-a té bizwen tann sé konsèy-la Pòl ba an Ébré 13:5, 6 ?
6 Lè Pòl ékri ba sé Ébré-a, an patjé moun té enmen viv ouben vizité Jérizalèm. An ékriven women lépòk-tala di, ki vil-la ki té pli popilè adan réjion-tala, sé té Jérizalèmb. Anlo Juif té ka vini pliziè fwa adan lanné-a parapòt a sé fèt rilijié a, kifè, yo té ka dépansé anlo lajan Jérizalèm. Parapòt a sa, i ka sanm yonn-dé krétjen rivé genyen an patjé lajan. Sé pétèt pou sa lapòt Pòl ba sé krétjen ébré a bèl konsèy-tala : « Sé pa lanmou pou lajan ki pou mennen lavi-zòt ; touvé lakontantman adan sa zòt ja ni. » Dèyè sa, i fè yo sonjé an pwonmès Jéova li menm fè adan Lézékriti : « Man pé ké jen kité’w, é man pé ké jen ladjé’w » (li Ébré 13:5, 6 ; Dét. 31:6 ; Sòm 118:6). Sé krétjen-an ki té ka viv Lajidé épi Jérizalèm té ké bizwen lasirans-tala. Poutji ? Pas titak tan apré Pòl ékri yo, yo té ké oblijé kité ki kay, ki travay, é près tout bien yo té ni. Apré, fòk yo té kèy ay viv an lòt koté yo pa té konnèt. É sa, sa pa té kèy fasil !
7. Poutji fòk nou aprann ni an konfians total an Jéova dépi atjèlman ?
7 Lison-an ba nou : É nou, kisa ki ka atann nou ? ‘Gran tribilasion-an’ kèy koumansé. Monn méchan tala ké détwi (Mat. 24:21). Kon sé prèmié krétjen-an, fòk nou rété « véyatif » é fòk nou paré (Lik 21:34-36). Pandan gran tribilasion-an, pétèt fòk nou kèy asèpté pèd kay-nou épi près tousa nou ni. A moman-tala, fòk nou kèy ni an konfians total ki Jéova pé ké janmen ladjé nou. Avan gran tribilasion-an koumansé, fòk nou kèy montré wotè konfians-nou an Jéova. Mandé kòw : « Ès tjè-mwen épi òbjèktif-mwen ka montré ki lajan sé pa poto-mitan lavi-mwen, men ki sé Jéova ka pran swen di mwen ? » (1 Tim. 6:17). Sa vré, lègzanp sé prèmié krétjen-an pé endé nou rété fidèl pandan gran tribilasion-an. Men gran tribilasion-tala ka vini an, kèy lontan pli rèd pasé tousa sé krétjen-an ja viv. Ki manniè nou ké rivé sav sa nou pou fè èkzaktiman lè gran tribilasion-an kèy koumansé ?
OBÉYI SÉ FRÈ-A KI KA DIRIJÉ NOU
8. Ki enfòwmasion Jézi ba disip-li ?
8 Yonn-dé lanné apré Pòl ékri yo, sé krétjen-an wè sé sòlda women an viwonnen Jérizalèm. Sa té lé di ki Jérizalèm té ké détwi, é moman-an té rivé pou yo chapé-kouri (Mat. 24:3 ; Lik 21:20, 24). Men chapé ki koté ? Sèl bagay Jézi té di : « Moun ki Lajidé ké ni pou chapé-kouri pa koté sé montann-lan » (Lik 21:21). É sé pa montann i té mantjé adan réjion-tala. Alò, ki dirèksion yo té pou pran ?
9. Lè sé krétjen-an té pou chapé-kouri adan sé montann-lan, kisa yo pétèt mandé kòyo, é poutji ? (gadé kat-la osi).
9 Annou palé di yonn dé montann oti sé krétjen-an té pé chapé-kouri, pa ègzanp : montann Lasamari, montann Lagalilé, mòn Èrmon, montann Liban é sé montann-lan ki té pa lòt koté Jouden-an (gadé kat-la). Adan sé montann-tala, té ni vil éti sé krétjen-an té pé kwè yo té kèy an sékirité. Pa ègzanp, vil Gamala té pann anlè tèt an montann. Kifè, ba yonn-dé Juif, sé té an bon koté pou alé séré. Men sé Women-an rivé détwi Gamala, épi yo tjwé an patjé moun ki té ka viv lac.
I té ni anlo montann éti sé krétjen-an té pé chapé-kouri, men sé pa adan tout yo té kèy an sékirité (gadé paragraf 9-la).
10-11. a) Ki manniè Jéova dwèt djidé sé krétjen-an ? (Ébré 13:7, 17). b) Ki bénéfis sé krétjen-an trapé lè yo obéyi sé frè-a ki té ka dirijé lasanblé-a ? (gadé zimaj-la osi).
10 Pou Jéova endé sé krétjen-an fè bon chwa-a, i itilizé sé frè-a ki té ka dirijé lasanblé-a. Plita, mi sa an istowyen yo ka kriyé Ézèb ékri asou périòd-tala : « Bondié té ba sé frè Jérizalèm-lan an révélasion. Sé krétjen-an té pou kité Jérizalèm épi ay Péla, an vil pa koté Péréd. » Vil Péla sé té méyè koté pou alé. Davwè i pa té lwen Jérizalèm, sa té fasil pou rivé la. Laplipa sé moun-lan ki té ka rété Péla pa té Juif, kifè yo pa té an djè épi sé Women-an (gadé kat-la).
11 Sé krétjen-an ki ‘obéyi sé frè-a ki té ka dirijé’ lasanblé-a, chapé-kouri adan sé montann Péla-a (li Ébré 13:7, 17). Tansifèt, yo rivé sové lavi-yo. Yo kontinié atann épi konfians wayòm Bondié-a, « vil-la ki ni vré fondasion ». Kifè Jéova pa jen ladjé yo (Ébré 11:10).
Yo té ké an sékirité Péla, an koté ki pa té lwen Jérizalèm (gadé paragraf 10 épi 11).
12-13. Ki manniè Jéova djidé pèp-li lè yo jwenn moman difisil ?
12 Lison-an ba nou : Jéova ka ba nou dirèksion ki klè, é pou sa, i ka sèvi sé frè-a ka dirijé nou. Adan Labib, i ni anpil ègzanp ka montré ki Jéova ka sèvi nonm ki fidèl pou djidé pèp-li lè bagay-la ka vini rèd (Dét. 31:23 ; Sòm 77:20). É jòdi-a ankò, i ni anpil prèv ka montré i ka kontinié sèvi nonm ki fidèl pou djidé pèp-li.
13 Pa ègzanp, lè Covid-19 la koumansé, ‘sé frè-a ki ka dirijé nou’ ba sé lasanblé-a larèl-la yo té bizwen. Sé ansien-an risivwè dirèksion, pou sé frè é sè-a kontinié réyini kòyo é adoré Jéova. Titak tan apré pandémi-a koumansé, nou trapé an lasanblé nou pa jen oubliyé. Lasanblé-tala fèt adan près 500 lang. Nou té pé suiv li anlè Entèrnèt, latélé épi laradio. Pandan pandémi-a, nouriti èspiritièl la kontinié tonbé kon kann. Gras a sa, nou rété ini. Fòk nou asiré, kisiswa léprèv-la nou ké jwenn, Jéova kèy endé sé frè-a ki ka dirijé nou pran bon désizion. Anplis, pou nou paré pou gran tribilasion-an, é pou nou aji épi sajès pandan périòd-tala ki ké soukwé latè-a, nou pou fè Jéova konfians é obéyi sé frè-a i mété pou dirijé nou. Ki kalité fòk nou ni ankò ?
OUVÈ LAPÒT KAY-OU ÉPI LAPÒT TJÈ’W BA FRÈ É SÈ’W
14. Silon Ébré 13:1-3, ki kalité sé krétjen-an té pou ni avan Jérizalèm détwi ?
14 Lè gran tribilasion-an ké pété, nou kèy pou montré lanmou yonn ba lòt kon nou pa jen fè avan. Fòk nou kèy suiv lègzanp sé krétjen-an ki té ka viv Jérizalèm épi Lajidé. Yo toujou té ka montré lanmou yonn ba lòt (Ébré 10:32-34). Men pandan sé dènié lanné-a avan Jérizalèm détwi, fòk sé krétjen-an té montré an « lanmou ant frè èk sè » ankò pli fò épi ‘ouvè lapòt kay-yo’ (li Ébré 13:1-3). Anmizi-anmizi lafen monn-lan ka pwoché, nou osi, fòk nou ké ni ankò plis sé kalité-tala.
15. Lè yo chapé-kouri pou alé Péla, ki manniè sé krétjen-an montré yo té ni lanmou yonn pou lòt ?
15 Sé sòlda women an antouré Jérizalèm, épi yo pati san pèsonn konprann poutji. Kifè, sé krétjen-an rivé chapé-kouri, men sé sèlman yonn-dé bagay yo rivé chayé dèyè yo (Mat. 24:17, 18). Lè yo pran chimen sé montann-lan, yonn dwèt endé lòt. É lè yo rivé Péla, fòk yonn té kontinié endé lòt pou koumansé an nouvo lavi. Avrédi, anlo adan sé frè èk sè-a té bizwen manjé, rad, épi an koté pou viv. Kifè, sé krétjen-an montré an lanmou ki fò yonn pou lòt, yo ouvè lapòt kay-yo ba lézòt épi yo partajé sa yo té ni (Tit 3:14).
16. Ki manniè nou pé montré lanmou ba frè èk sè-nou ki bizwen nou endé yo ? (gadé zimaj-la osi).
16 Lison-an ba nou : Lanmou ka pousé nou soutienn frè é sè ki bizwen nou endé yo. Pa ègzanp, anpil montré kòyo volontè pou endé frè èk sè ki réfijié palakòz ladjè ouben katastwòf natirèl. Sé frè é sè-a ba yo sa yo té bizwen pou viv, épi yo ankourajé yo kontinié sèvi Jéova. An sè ki kité Likrèn akòz di ladjè di : « Nou wè koumanniè Jéova sèvi sé frè-a pou djidé nou é pran swen di nou. Yo té vréman janti épi nou, é yo bien akéyi nou épi endé nou Likrèn, Lawongri, é atjèlman isiya Lalmay ! » Sa ki ka ouvè lapòt ba frè èk sè-yo, é ki ka pran swen di yo, sé dé bon zouti an lanmen Jéova (Pwo. 19:17 ; 2 Kor. 1:3, 4).
Frè é sè-nou ki réfijié bizwen nou endé yo (gadé paragraf 16-la).
17. Poutji sa fondal-natal dépi jòdi-a pran labitid ouvè lapòt kay-nou épi lapòt tjè-nou ba frè é sè-nou ?
17 Pandan gran tribilasion-an, nou ké ni ankò plis lokazion endé frè èk sè-nou (Abk. 3:16-18). Jéova ka ansénié nou dépi jòdi-a, ouvè lapòt kay-nou ba frè èk sè-nou, épi ba yo lanmou pas sé kalité-tala ké fondal-natal.
KISA KI KA ATANN NOU ?
18. Koumanniè nou pé imité sé krétjen ébré a ki kité Jérizalèm ?
18 Lè yo détwi Jérizalèm, ayen pa rivé sé krétjen-an ki obéyi lè yo pran kouri adan sé montann-lan. Yo kité vil-la, men Jéova li menm pa janmen kité yo tonbé. Kisa lègzanp-yo ka aprann nou ? Nou pa sav ègzaktiman kisa ki ké fèt dèmen. Men nou sav Jézi di nou fòk nou paré obéyi (Lik 12:40). Nou pé médité osi asou sé bèl konsèy-la Pòl ba sé Ébré-a épi aplitjé yo. Anfen, nou pé kwè pwonmès-la ka sòti an bouch Jéova li menm, lè i ka di nou, i pé ké janmen kité nou, é i pé ké janmen ladjé nou (Ébré 13:5, 6). Kidonk, annou chèché épi balan, vil-la ki la pou toujou, wayòm Bondié-a. Alè-tala, nou ké pé pwofité bénédision wayòm Bondié-a pou létèrnité ! (Mat. 25:34).
KANTIK 157 Anfen lapé !
a An tan Labib, souvan sé an wa ki té ka gouvèné sé vil-la. Kidonk, nou pé di ki sé vil-tala sé té dé wayòm (Jén. 14:2).
b Pline l’Ancien, Histoire naturelle (V, 70), S. Schmitt, La Pléiade, 2013.
c Sé lévènman-tala rivé lanné 67 apré Jézikri, titak tan apré sé krétjen-an kité Lajidé épi Jérizalèm.
d Histoire ecclésiastique, É. Grapin, A. Picard, 1913.