Poutji fòk nou mandé lézòt konsèy ?

1. Kisa kèy pèwmèt nou pran bon désizion, épi rivé an bout sé désizion-tala ? (Pwovèb 13:10 ; 15:22).

NOU tout, nou lé pran bon désizion, é nou lé sé désizion-tala mennen bon rézilta. Pawòl Bondié ka èsplitjé koumanniè nou pé atenn sé 2 lòbjèktif-tala (li Pwovèb 13:10 ; 15:22).

2. Kisa Jéova ka pwonmèt nou ?

² Asiré, méyè moun-lan ki pé endé nou ni lasajès épi trapé bon konsèy, sé Papa-nou Jéova. I ka pwonmèt i ké endé nou. Adan Pawòl-li, i ka di : « Zié-mwen pa ka ladjé’w toupandan man ka ba’w konsèy » (Sòm 32:8). Isiya, Jéova ka pwonmèt i ké ba nou sé konsèy-la nou bizwen, é i kèy endé nou aplitjé yo.

3. Ki kèsion nou ké réponn adan awtik-tala ?

³ Adan awtik-tala, nou ké apiyé asou Labib pou réponn sé 4 kèsion-tala : 1) Si man lé ni bon rézilta lè yo ka ba mwen konsèy, ki kalité fòk man ni ? 2) Ki moun ki pé ba mwen bon konsèy ? 3) Ki manniè man pé montré man ka asèpté yo ba mwen konsèy ? 4) Poutji fòk pa man mandé dòt moun pran désizion a laplas-mwen ?

KI KALITÉ FÒK MAN NI ?

4. Ki kalité fòk ni pou trapé bon rézilta lè yo ka ba nou konsèy ?

⁴ Pou trapé bon rézilta lè yo ka ba nou konsèy, fòk nou ni limilité. Délè, fòk rikonnèt, nou bizwen an moun endé nou pou pran an bon désizion pas nou mantjé lèspérians. Anplis, fòk nou pran konsians nou pa sav tout bagay. Si nou pa ni limilité, Jéova pé ké pé endé nou. É lè nou ka li Labib, nou sé pé twazé sé konsèy-la i ka ba nou (Mic. 6:8 ; 1 Piè 5:5). Men, si nou ni limilité, nou kèy bwè sé konsèy Labib-la, é nou kèy aplitjé yo lamenm.

5. Kisa ki té pé fè David bat lèstonmak-li ?

⁵ Annou wè kisa nou ka aprann épi lègzanp wa David. Sé kapasité-a i té ni, épi tout bagay èstwòdinè i fè, té pé fè’y bat lèstonmak-li. Lontan avan i vini wa, sé té an mapipi adan lanmizik. Yo jis mandé’y jwé mizik ba wa-a (1 Sam. 16:18, 19). Lè Jéova chwazi David pou vini wa, i ba’y lèspri sen, kifè, David vini puisan (1 Sam. 16:11-13). Pèp-la té ka gloriyé’y, pas i té fè yo genyen anlo ladjè ; pa ègzanp, i té rivé genyen Goliat, an Filisten ki té wotè an pié-koko (1 Sam. 17:37, 50 ; 18:7). Ès i bat lèstonmak-li pou tousa i té fè ? Épi, ès i di kòy i pa té bizwen pèsonn ba’y konsèy ? Piès pa. I rété toupiti.

6. Koumanniè nou sav ki David sé té an nonm ki té ka mandé konsèy ? (gadé osi zimaj-la).

⁶ Aprézavwè i vini wa, David kontinié chèché moun ki té pé ba’y konsèy (1 Kwo. 27:32-34). Sa pa ka fè nou soté, pas David sé té an moun ki té ka chèché konsèy tout lè. Sé pa konsèy nonm sèlman i té ka asèpté. I asèpté osi konsèy an madanm yo té ka kriyé Abigayil. Sé té madanm Nabal, an nonm ki pa té ni piès rèspé ba pèsonn, ki té engra épi égoyis. Men kantapou David, épi limilité, i suiv bon konsèy Abigayil. Sé konsa i évité fè an gwo lérè (1 Sam. 25:2, 3, 21-25, 32-34).

7. Kisa lègzanp David ka aprann nou ? (Éklézias 4:13 ; gadé sé zimaj-la osi).

⁷ Lègzanp David ka aprann nou yonn-dé lison. Si nou fò adan an bagay, ouben nou ni an rèsponsabilité, fòk pa nou pansé nou sav tout bagay, épi nou pa bizwen konsèy pèsonn. É kon David, fòk nou kouté konsèy yo ka ba nou, kisiswa moun-lan ki ka ba nou konsèy-la (li Éklézias 4:13). Konsa, sa ké évité nou fè gwo lérè ; lérè ki pé fè, ki nou ki lézòt ditò.

KI MOUN KI PÉ BA MWEN BON KONSÈY ?

8. Poutji Jonatan té pé ba David bon konsèy ?

⁸ Kisa lègzanp David ka aprann nou ankò ? David kouté konsèy moun ki té an tjè-koko épi Jéova, men anplis, sé moun-tala té ka bien konprann sitiyasion-an i té ka viv. Pa ègzanp, lè i té ka chèché sav si sa té posib fè lapé épi wa Sayil, i kouté konsèy Jonatan, yich Sayil. Poutji Jonatan té bien plasé pou ba’y bon konsèy ? Pas Jonatan té an tjè-koko épi Jéova, men anplis, i té bien konnèt papa’y, Sayil (1 Sam. 20:9-13). Koumanniè nou pé aplitjé sa nou fini wè a ?

9. Lè nou bizwen konsèy, ki moun nou sé pé ay wè ? Ba an ègzanp (Pwovèb 13:20).

⁹ Lè’w bizwen an konsèy, alé wè an moun ki an tjè-koko épi Jéova. Men anplis, fòk moun-tala ni lèspérians adan sitiyasion-an ou ka viv laa (li Pwovèb 13:20). A sipozé an jenn frè ka chèché an bon ti sè pou i mayé. Ki moun ki pé ba’y bon konsèy adan ka-tala ? An zanmi ki pa mayé pé ba’y bon konsèy, si i ka apiyé sé konsèy-tala asou Pawòl Bondié. Men an koup ki mi èspiritièlman, ki konnèt li bien, épi ki éré adan mariyaj-yo dépi yonn-dé tan, kèy pé ba’y méyè konsèy. Non sèlman yo ké pé ba’y konsèy ki ka apiyé asou Labib, men osi asou sa yo menm aprann adan pwòp mariyaj-yo.

10. Kisa nou kèy wè atjèlman ?

¹⁰ Nou wè ki kalité fòk nou ni, é nou wè ki moun ki pé ba nou bon konsèy. Atjèlman, nou kèy wè poutji fòk nou asèpté konsèy, é ès sé an bon bagay mandé lézòt pran désizion a laplas-nou.

KI MANNIÈ MAN PÉ MONTRÉ MAN KA ASÈPTÉ KONSÈY ?

11-12. a) Délè, kisa nou anvi fè ? b) Kisa Woboam fè, lè i té ni an gwo désizion pou pran ?

¹¹ Délè, an moun pé mandé dòt moun konsèy, men avrédi, i ja désidé sa i kèy fè. I jiskont ka chèché moun ka alé an sans-li. Nou pé pa di ki moun-tala ka chèché konsèy ! Annou wè ki manniè mové ègzanp wa Woboam pé sèvi nou lison.

¹² Woboam vini wa Izrayèl apré papa’y Salomon. Tout bagay té bèl ba nasion Izrayèl-la, men yo touvé Salomon té ka fè yo travay two rèd. Yo alé wè Woboam, épi yo sipliyé’y pou i ba yo an wouspèl adan travay-la. Woboam mandé yo tan pou réfléchi. Pou koumansé, i bien réyaji ; i alé wè moun ki té travay épi papa’y épi ki té ni bon lèspérians (1 Wa 12:2-7). Men i pa asèpté kouté konsèy-yo. Poutji ? Ès i té ja pran désizion’y épi i té ka chèché jiskont moun ki té dakò épi’y ? Si sé sa i té ka chèché, i touvé’y, lè i alé wè kanmarad-li ki té pli jenn (1 Wa 12:8-14). Woboam di pèp-la ègzaktiman sa kanmarad-li té di’y. Akòz di sa, nasion-an vini séparé an 2, é Woboam trapé pwoblèm asou pwoblèm (1 Wa 12:16-19).

13. Ki manniè nou sav nou paré risivwè konsèy ?

¹³ Kisa mové ègzanp Woboam ka aprann nou ? Lè nou ka mandé konsèy, fòk nou paré asèpté sé konsèy-la yo ka ba nou. Koumanniè nou ké sav nou paré fè sa ? Annou mandé kònou : « Lè man ka mandé an konsèy, ès lamenm, man ka vréyé sa dèyè do-mwen, pas sé pa sa man té anvi tann ? » Annou pran an ègzanp.

14. Lè yo ka ba nou an konsèy, kisa fòk nou sonjé ? Ba an ègzanp (gadé zimaj-la osi).

¹⁴ Imajinen yo ka pwopozé an frè an travay ki pé fè’y genyen bon lajan. Avan i asèpté travay-tala, i ka mandé an ansien an konsèy. Frè-a ka di ansien-an, chak fwa i kèy pati travay, i kèy viv lwen fanmiy-li pou an bon moman. Ansien-an ka fè’y sonjé prensip Labib-la ki ka di, pli gran rèsponsabilité’y sé endé fanmiy-li suiv dirèksion Pawòl Bondié (Éfé. 6:4 ; 1 Tim. 5:8). Frè-a pa dakò épi sa ansien-an ka di’y. Alò i ka kontinié mandé dòt moun konsèy adan lasanblé-a, jiktan i touvé an moun ki ka di’y asèpté travay-la. Ès nou pé di frè-a té ka chèché konsèy ? Ouben ès i ja pran désizion’y, épi i ka chèché jiskont an moun ki dakò épi’y ? Annou sonjé ki tjè-nou trèt (Jér. 17:9). Délè, konsèy-la nou bizwen tann, sé tala nou pa lé tann.

ÈS FÒK MAN MANDÉ LÉZÒT PRAN DÉSIZION A LAPLAS-MWEN ?

15. Kisa fòk pa nou fè, é poutji ?

¹⁵ Sé nou chak la ki pou pran pwòp désizion-nou (Gal. 6:4, 5). Kon nou ja wè, avan nou pran an désizion, nou ké montré nou ni sajès, si nou ka chèché konsèy adan Pawòl Bondié, épi obò krétjen ki mi. Men, fòk nou prangad pa mandé lézòt pran désizion a laplas-nou. Sé sa yonn-dé ka fè, lè yo ka anni mandé an moun yo ka fè konfians : « Kisa ou té ké fè a laplas-mwen ? » I ni dòt krétjen ki ka fè kon lézòt san réfléchi.

16. Ki désizion sé krétjen Korent-lan té pou pran parapòt a viann-lan ki té sakrifié ba zidòl ? (1 Korentjen 8:7 ; 10:25, 26).

¹⁶ Atjèlman, annou palé di an sitiyasion ki fèt adan sanblé Korent-lan, o 1^ié sièk : ès sé krétjen-an té pé manjé viann yo té pétèt sakrifié ba zidòl ? Pòl ékri ba sé krétjen Korent-lan : « Nou sav an zidòl pa ayen, é sé an sèl Bondié ki ni » (1 Kor. 8:4). Alò sa fè yonn-dé pansé, sa pa té an pwoblèm achté anlè marché-a, viann yo té pétèt sakrifié ba zidòl pou manjé. Dòt désidé pa manjé viann-tala, pas konsians-yo pa té ka pèwmèt yo fè sa (li 1 Korentjen 8:7 ; 10:25, 26). Sé chak moun ki té pou désidé sa yo té pou fè. Pòl pa janmen di sé Korentjen-an pran désizion ba lézòt ouben fè kon lézòt. Yo chak té ‘pou rann Bondié kont pou sa yo té fè’ (Wom. 14:10-12).

17. Kisa ki sé pé rivé si nou ka jiskont fè kon lézòt ka fè ? Ba an lègzanp (gadé sé zimaj-la osi).

¹⁷ Jòdi-a, ki sitiyasion nou pé jwenn, ka sanm sa nou fini wè a ? Annou palé di sé konpozan san-an. Sé chak krétjen ki pou désidé ba pwòp kòy, si i ké asèpté ouben pa asèpté sé konpozan san-anb. Pétèt ba nou, rivé konprann sé bagay-tala sé an mòn. Men fòk nou pran pwòp désizion-nou. Pou vré, sé rèsponsabilité-nou. Sé nou ki pou pòté’y (Wom. 14:4). Si nou ka jiskont fè sa lézòt ka fè, nou pé rann konsians-nou pli fèb. Pou vré, sèl manniè nou pé aji épi sajès, sé lè nou ka pran désizion ki apiyé asou Labib (Ébré 5:14). Kidonk, ki tan fòk alé wè an krétjen ki mi pou mandé konsèy ? Nou pé fè sa sèlman si nou fè richèch, épi magré sa, nou pa ka konprann ki manniè pou aplitjé sé prensip Labib-la adan sitiyasion-nou.

KONTINIÉ MANDÉ KONSÈY

18. Kisa Jéova ka fè ba nou ?

¹⁸ Jéova ka fè nou konfians anpil, pas i ka kité nou pran pwòp désizion-nou. I ba nou Pawòl-li, Labib. É i ka ba nou zanmi ki ni anpil sajès, ki pé endé nou rézonnen asou sé prensip Labib-la. Épi tout sé bagay-tala, Jéova ka montré i sé an Papa ki enmen nou anlo (Pwo. 3:21-23). Koumanniè nou pé di’y mèsi pou tousa ?

19. Koumanniè nou pé kontinié ba Jéova tjè-kontan ?

¹⁹ Sé paran-an ni tjè-kontan, lè yo ka wè yich-yo grandi, vini dé moun ki ka sèvi Jéova épi sajès, épi dé moun ki ka endé lézòt. Menm manniè-a, Papa-nou ki an sièl-la ni tjè-kontan, lè i ka wè nou pwogrésé épi vini pli mi, lè i ka wè nou mandé konsèy, épi pran désizion ki ka montré nou enmen’y.