Koumanniè nou pé aprann ba lézòt bon konsèy

1. Ki moun ki pou ba konsèy, é poutji ?

ÈS OU enmen ba lézòt konsèy ? Ba yonn-dé moun sa fasil. I ni dòt ki pa enmen konséyé lézòt, pas yo pa djè alèz épi sa. Men sa’w lé fè ! Nou tout oblijé fè sa tanzantan. Poutji ? Pas Jézi li menm di, yo té kèy rikonnèt vré disip-li gras a lanmou-a yo té ké ni yonn pou lòt (Jan 13:35). É an manniè pou montré frè èk sè-nou nou enmen yo, sé lè nou ka ba yo konsèy lè sa nésésè. Labib-la ka di ki lè nou ka ba an « konsèy sensè », lanmitié-nou épi lézòt ka vini pli fò (Pwo. 27:9).

2. Kisa sé ansien pou rivé fè, é poutji ? (gadé osi kad-la « Konsèy yo ka ba nou adan réyinion-an ki ka fèt pandan simenn-lan »).

² Sé ansien-an èspésialman pou kapab ba lézòt bon konsèy. Sé Jéova épi Jézi ki ba yo rèsponsabilité pran swen di lasanblé-a (1 Piè 5:2, 3). Pou rivé fè sa, yo ka fè diskou ki apiyé asou Pawòl Bondié, yo ka ba nou konsèy lè sa nésésè, é yo ka endé sé moun-lan ki ladjé Jéova viré adan lasanblé-a. Koumanniè sé ansien-an pé ba lézòt bon konsèy ? É koumanniè nou pé fè sa osi ?

3. a) Ki manniè nou pé aprann ba lézòt bon konsèy ? (Izayi 9:6 ; gadé osi kad-la « Suiv lègzanp Jézi lè’w ka ba an konsèy »). b) Kisa nou kèy wè adan awtik-tala ?

³ Nou pé aprann ki manniè nou pé ba bon konsèy, lè nou ka étidié manniè yonn-dé moun adan Labib ba konsèy. Jézi, sé moun-lan ki té ka ba sé méyè konsèy-la. Dayè, yo ka kriyé’y « bon Konséyé » (li Izayi 9:6). Adan awtik-tala, nou ké wè sa nou pé fè lè an moun ka mandé nou an konsèy, é sa nou pé fè lè fòk nou konséyé an moun ki pa mandé nou ayen. Nou ké wè osi manniè sa potalan touvé bon manniè-a épi bon moman-an pou konséyé an moun.

LÈ YO KA MANDÉ NOU AN KONSÈY

4-5. Lè yo ka mandé nou an konsèy, prèmié bagay fòk nou mandé kònou sé kisa ? Ba an ègzanp.

⁴ Lè an zanmi ka vini mandé’w konsèy, sa ka fè’w plézi, pas ou ka wè i ka fè’w konfians. É ou té kèy enmen endé’y lamenm. Men avan sa, fòk ou asiré kòw ou ni tout enfòwmasion ki nésésè pou pé sa ba’y an bon konsèy. Ou pou mandé kòw : « Ès man ni konésans-lan ki fo pou man pé sa ba’y an bon konsèy ? » Délè, méyè manniè pou ba zanmi-nou an pal, sé pa di ayen, épi touvé an moun ki ni konésans-lan ki fo adan sitiyasion’y lan.

⁵ Annou pran an ègzanp. Imajinen an vié maladi ka tonbé anlè an bon zanmi. I ka èsplitjé’w i fè an patjé richèch asou yonn-dé trètman i sé pé pran, épi i ka mandé’w, kilès fòk i pran. Pétèt ou ni lidé’w anlè sa, men ou pa dòktè, é ou pa sav sa pou fè adan sitiyasion-tala. Adan ka-tala, sa’w pé fè ba zanmi’w, sé endé’y touvé an moun ki ni fòwmasion-an pou otjipé di’y.

6. Poutji sa méyè atann tibren avan nou réponn an moun ki mandé nou an konsèy ?

⁶ Pétèt nou ka pansé nou bien plasé pou ba zanmi-nou an konsèy. Men pétèt sa méyè pa ba konsèy-la lamenm. Poutji ? Pwovèb 15:28 ka di « an moun ki jis ka pran tan katjilé avan i réponn ». Kidonk, menmsi nou ka pansé nou sav sa pou di, souvan, sa méyè fè richèch, prédié épi bien réfléchi avan nou ba an konsèy. Konsa nou kèy ba an konsèy ki annakò épi sa Jéova ka di. Annou sonjé sa ki rivé pwofèt Natan.

7. Kisa lègzanp pwofèt Natan ka aprann nou ?

⁷ Lè wa David di Natan i té lé konstwi an tanp ba Jéova, lamenm Natan té dakò épi’y. Men sé pa sa Jéova té lé. Pou vré, avan Natan té konséyé David, i té pou mandé Jéova sa i té ka pansé (1 Kwo. 17:1-4). Ègzanp-tala ka montré nou fòk pa nou « cho palé » lè yo ka mandé nou an konsèy (Jak 1:19). Sé konsa nou ké montré nou ni sajès.

8. Ba an lòt rézon ka montré fòk nou bien réfléchi avan nou ba an konsèy.

⁸ Annou wè an lòt rézon ka montré fòk nou bien réfléchi avan nou ba an konsèy. Si nou ka ba moun-lan an konsèy, épi i vini trapé pwoblèm, pétèt nou ni an rèsponsabilité adan sa ki rivé’y. Asiré-pa-pétèt, sa enpòwtan bien katjilé avan nou palé.

LÈ YO PA MANDÉ NOU KONSÈY

9. Avan yo konséyé an frè ouben an sè, kisa sé ansien-an pou chèché sav ? (Galat 6:1).

⁹ Délè, sé ansien-an kèy pou pran douvan pou konséyé an frè ouben an sè ki « fè chimen-kochi » (li Galat 6:1). Moun-tala poko fè an péché ki grav, men i koumansé pran an mové chimen. A moman-tala, sa sé ansien-an lé, sé endé moun-lan rété anlè chimen-an ka mennen a lavi étèrnèl (Jak 5:19, 20). Men pou yo konséyé bon manniè-a, fòk yo koumansé pa chèché sav si moun-lan fè an péché pou toulbon. Yo ka konprann, sé pa pas an moun pran an désizion diféran di ta yo, ki moun-lan fè an bagay Jéova pa enmen (Wom. 14:1-4). Men lè sé ansien-an ka désidé alé wè an krétjen ki fè an péché ki grav poubon, ki manniè yo pé ba’y konsèy ?

10-12. Èsplitjé épi an ègzanp, ki manniè sé ansien-an pou fè, lè yo pou konséyé an moun ki pa mandé yo konsèy (gadé sé zimaj-la osi).

¹⁰ Sa pa fasil ba sé ansien-an konséyé an moun ki pa mandé yo ayen. Poutji ? Lapòt Pòl èsplitjé ki an moun pé fè chimen-kochi san menm i wè sa. Kidonk, avan yo alé ba moun-lan an konsèy, sé ansien-an kèy fè sa ki fo pou i paré asèpté konsèy-la.

¹¹ Annou pran ègzanp an agrikiltè ki ka éséyé fè lévé an piébwa adan an tè ki rèd. Avan i koumansé simen, i ka travay latè-a, kifè, sa ka rann li pli mòl pou sé grenn-lan antré andidan’y. Apré sa, i ka simen sé grenn-lan. É pou fini, i ka wouzé yo pou yo lévé. Menm manniè-a, pou an frè paré risivwè an konsèy, an ansien ni yonn-dé bagay pou fè. Pa ègzanp, dépi i ni an lokazion, i ka di frè-a i bizwen palé épi’y, pas i ka sousié kòy di’y. Si ansien-an ki ka ba konsèy-la, sé an moun ki enmen lézòt épi ki ni konpasion, sa kèy pli fasil ba sé moun-lan kouté épi asèpté konsèy-li.

¹² Ansien-an kèy kontinié « travay tè-a pou i vini mòl », sa lé di préparé moun-lan pou i asèpté konsèy-la. I kèy fè’y sonjé ki tout moun ka fè lérè, é ki délè, nou bizwen konsèy (Wom. 3:23). Ansien-an pé palé ba’y épi dousè, anpil rèspé, épi sèvi Bib-la pou montré moun-lan ki bizwen an konsèy i pran an mové chimen. Lè moun-lan kèy konprann i konmèt an lérè, ansien-an kèy « planté grenn-lan ». Sa lé di, i ké èsplitjé’y an manniè klè épi fwanch sa i pou fè pou korijé sitiyasion-an. Anfinaldikont, i kèy « wouzé grenn-lan ». Sa lé di, i ké félisité’y épi sensérité, é i ké prédié épi’y (Jak 5:15).

13. Kisa an ansien pé fè pou sav si an moun bien konprann konsèy-la i ba’y ?

¹³ Délè, an moun pa ka rivé bien konprann an konsèy yo ba’y. Kisa an ansien pé fè pou asiré kòy an moun bien konprann konsèy-la i ba’y ? Épi anpil rèspé, i pé pozé’y yonn-dé kèsion (Ékl. 12:11). Ansien-an kèy chèché sav si moun-lan konprann sé konsèy-la, é si i sav koumanniè pou aplitjé yo.

BON MOMAN-AN É BON MANNIÈ-A

14. Ès sé an bon bagay konséyé an moun lè nou faché ?

¹⁴ Pas nou pa parfé, sa ka rivé nou tout di ouben fè bagay ki pé énèrvé frè é sè-nou (Kol. 3:13). É Labib-la jis ka di, délè an moun pé fè nou lévé-faché (Éfé. 4:26). Men fòk pa nou kouri ba an konsèy lè nou faché. Poutji ? « Pas lè an nonm an kòlè, sé pa sa ki jis an zié Bondié i ka fè » (Jak 1:20). Si nou ka konséyé an moun alòs ki nou kontrayé, sitiyasion-an pé vini ankò pli mové. Sa pa lé di fòk pa nou janmen di an moun ki blésé nou, sa nou ka pansé épi risanti. Men fòk nou kalmé kònou avan nou palé ba moun-lan. Nou pé aprann anpil asou manniè Éliyou konséyé Jòb.

15. Kisa lègzanp Éliyou ka aprann nou ? (gadé zimaj-la osi).

¹⁵ Pandan pliziè jou, Jòb éséyé défann kòy douvan sé kanmarad-li a ki té ka di mové bagay anlè’y. Éliyou kouté tousa Jòb di. I risanti lapenn ba’y. Men i lévé-faché, lè Jòb di bagay ki pa té vré asou Jéova pou pwouvé i té inosan. Magré sa, Éliyou atann avan i palé, é i konséyé Jòb épi dousè èk anpil rèspé (Jòb 32:2 ; 33:1-7). Lègzanp Éliyou ka aprann nou an vérité ki enpòwtan : simié nou ba an konsèy lè nou défaché, épi fòk nou ba konsèy-la épi rèspé èk lanmou (Ékl. 3:1, 7).

KONTINIÉ KONSÉYÉ LÉZÒT ÉPI ASÈPTÉ KONSÈY YO KA BA’W

16. Ki lison nou ka touvé adan Sòm 32:8 ?

¹⁶ Awtik-tala apiyé asou vèsé-a ki ka di ‘zié Jéova pa ka ladjé nou toupandan i ka ba nou konsèy’ (li Sòm 32:8). Sa lé di i kèy kontinié endé nou. I ka ba nou konsèy é i ka endé nou aplitjé yo. Mi bèl ègzanp i ka ba nou ! Lè nou pou konséyé an moun, annou fè kon Jéova. Annou kontinié endé moun-tala épi annou ba’y tout pal-la i bizwen an pou i pran bon désizion.

17. Kisa nou ka risanti lè sé ansien-an ka ba nou bon konsèy ki apiyé asou Labib ? (Izayi 32:1, 2).

¹⁷ Jòdi-a, sa ka vini plizanpli enpòwtan, ba épi risivwè bon konsèy (2 Tim. 3:1). Lè sé ansien-an ka ba nou bon konsèy ki apiyé asou Labib pou ankourajé nou épi endé nou kontinié sèvi Jéova, yo ‘kon an ti dlo lasous anlè an tè ki sèk’ (li Izayi 32:1, 2). É lè nou ni zanmi ka di nou sa nou bizwen tann, é pa sa nou anvi tann, yo ka fè nou an kado ki ni anpil valè. Pawòl yo « kon ponm an lò adan dékorasion fèt épi lajan » (Pwo. 25:11). Nou tout la, annou kontinié ba bon konsèy épi annou aprann asèpté konsèy yo ka ba nou !