AWTIK POU ÉTIDIÉ 30
KANTIK 97 Pawòl Bondié sé lavi
Ou pé aprann plis asou sé prèmié vérité Labib-la
« Man toujou paré pou fè zòt sonjé sé bagay-tala, magré zòt ja konnèt yo é magré zòt ja doubout solid adan lavérité » (2 PIÈ 1:12).
MI SA NOU KÉ WÈ
Nou ké wè ki manniè sa nou aprann lè nou koumansé étidié Labib pé kontinié endé nou jòdi-a ankò.
1. Kisa ou risanti lè’w aprann sé prèmié vérité Labib-la ?
SÉ PRÈMIÉ vérité-a nou aprann adan Bib-la chanjé lavi-nou. Lè nou aprann non Bondié sé té Jéova, nou koumansé vini zanmi’y (Iza. 42:8). Lè nou aprann lavérité anlè lanmò, nou arété mandé kònou si fanmi-nou épi zanmi-nou ki mò ka soufè (Ékl. 9:10). É lè nou aprann Bondié ké fè latè-a tounen an paradi, nou sispann entjèt pou lavni. A moman-tala, nou trapé lasirans nou pé ké viv sèlman 70 ouben 80 lanné, men nou ké ni posibilité viv pou létèrnité (Sòm 37:29 ; 90:10).
2. Ki manniè 2 Piè 1:12, 13 ka montré ki menm krétjen ki mi, bizwen kontinié réfléchi asou prèmié vérité yo aprann ?
2 Fòk nou toujou sonjé ki sé prèmié vérité-a nou aprann adan Labib-la enpòtan. Lapòt Piè ékri dézièm lèt-li a ba krétjen ki té « ja doubout solid adan lavérité » (li 2 Piè 1:12, 13). Men sé krétjen-tala té vréman an danjé, pas adan sanblé-a té ni fo ansénian, épi moun ki pa té ni piès rèspé ba Bondié (2 Piè 2:1-3). Piè fè sé krétjen-tala sonjé yonn-dé vérité yo té ja konnèt, pou misklé lafwa-yo, épi pou ba yo an pal pou tjenbé douvan sé danjé-tala. Sé vérité-tala té ké endé yo rété fidèl jik alafen.
3. Poutji tout sé krétjen-an pou kontinié médité asou vérité biblik yo bien konnèt ? Ba an ègzanp.
3 Sé krétjen-an ki adan lavérité dépi pliziè lanné, kapab aprann nouvo lison asou vérité yo ja konnèt. Annou pran an ègzanp : An manman épi yich-li, pé ni sé menm engrédian-an pou fè an soup. Men asiré, manman-an, ki ni plis lèspérians, ké sa fè pliziè modèl soup ki tété-dwèt épi sé engrédian-tala. Menm manniè-a, si nou ka sèvi Jéova dépi lontan, nou pé aprann diféran lison asou an menm vérité, alòs ki an moun ki fini koumansé étidié Labib pé ké rivé fè sa lamenm. Poutji nou ka rivé fè sa ? Sé pétèt, pas dépi nou pran batenm, sitiyasion-nou chanjé, é nou fè anpil bagay adan lòwganizasion Jéova. Lè nou ka médité asou vérité biblik nou aprann dépi lontan, nou ka rivé konprann koumanniè nou pé aplitjé yo adan lavi-nou jòdi-a. Anplis, nou ka touvé dòt manniè pou aplitjé yo. Atjèlman, nou ké wè sa sé krétjen-an ki ni lèspérians pé aprann asou 3 vérité biblik ki fondal-natal ba tout krétjen.
JÉOVA SÉ KRÉYATÈ-A
4. Koumanniè sav Jéova sé Kréyatè-nou, chanjé lavi-nou ?
4 « Moun-lan ki fè tout bagay, sé Bondié » (Ébré 3:4). Nou sav latè-a, épi tousa ki ka viv anlè’y, ka ègzisté pas i ni an Kréyatè saj épi tou-puisan ki fè yo. Men gras a vérité-tala, nou pé aprann plis bagay ankò anlè Bondié. Difèt i kréyé nou, i sav tout bagay anlè nou. Anplis, i ka sousié kòy di nou, é sé li ki sav sa ki méyè ba nou. Sav Jéova sé Kréyatè-nou, anni chanjé lavi-nou toubonnman épi ba’y an sans.
5. Ki vérité pé endé nou travay limilité-nou ? (Izayi 45:9-12).
5 Sav Jéova sé Kréyatè-nou ka aprann nou lenpòwtans ni limilité. Pa ègzanp, Jòb rivé di bagay ki pa té vré asou Jéova. Pas i té ka sonjé yenki kòy, i mété sa ki té enpòtan asou koté pou pwouvé sé li ki té ni rézon. Men Jéova fè’y sonjé sé li ki kréyé tout bagay, é i tou-puisan (Jòb 38:1-4). Sa endé Jòb konprann Jéova toujou ka fè sa ki jis. Sé sa pwofèt Izayi té lé di, lè i matjé : « Ès larjil-la ké di Artizan-an : “Sa’w ka fè la ?” » (li Izayi 45:9-12).
6. A ki moman fòk nou réfléchi asou grandè sajès épi puisans Kréyatè-nou ? (gadé sé zimaj-la osi).
6 Lè an moun ka sèvi Jéova dépi lontan, i pé koumansé apiyé asou pwòp kòy, plito ki asou Jéova (Jòb 37:23, 24). Men si i ka pran tan réfléchi asou grandè sajès épi puisans Kréyatè’y, kisa i ké anvi fè ? (Iza. 40:22 ; 55:8, 9). Sa ké endé’y gadé limilité’y, é i ké konsidéré ki manniè wè Jéova pli wo ki ta’y.
Fòk sonjé ki lidé-nou pa pli wo ki ta Jéovae (gadé paragraf 6-la).
7. Kisa Irena fè pou asèpté an chanjman adan lòwganizasion Jéova ?
7 Irenaa, ka viv Slovéni, asèpté an chanjman lòwganizasion Jéova fè, lè i sonjé Jéova sé Kréyatè-a. I ka di : « Sa pa toujou fasil ba mwen asèpté désizion sé frè-a ka pran. Pa ègzanp, menmsi man té gadé Aktialité no 8 Komité santral la an 2023, prèmié fwa man wè an frè fè an diskou épi an bab an fidji’y, sa chouboulé mwen. Kidonk, man priyé Jéova pou i endé mwen asèpté chanjman-tala. » Irena konprann sé Jéova ki sav méyè manniè pou dirijé lòwganizasion’y adan bon larèl-la, pas sé li ki Kréyatè sièl-la épi latè-a. Si’w pa ka rivé asèpté an nouvo dirèksion lòwganizasion ka pran, ou pé médité épi limilité asou grandè sajès épi puisans Kréyatè-nou. (Wom. 11:33-36).
POUTJI BONDIÉ KA PÈWMÈT LASOUFWANS ?
8. Lè’w aprann poutji Bondié ka pèwmèt lasoufwans, ki bienfè sa pòté ba’w ?
8 Poutji Bondié ka pèwmèt lasoufwans ? Yonn-dé moun ki pa touvé répons kèsion-tala, faché kont Bondié, ouben yo ka di Bondié pa ka ègzisté ! (Pwo. 19:3). Men wou, ou aprann si lézòm ka soufè épi ka mò, sé palakòz péché-a, é pa pas Jéova fè an bagay ki mové. Ou aprann osi, pasians Jéova pèwmèt milion moun aprann konnèt li, é konprann ki manniè i ké fè lasoufwans disparèt pou toujou (2 Piè 3:9, 15). Sav poutji Jéova ka pèwmèt lasoufwans, rasiré tjè’w é fè’w vini pli pré’y.
9. Adan ki sitiyasion fòk nou sonjé poutji Jéova ka pèwmèt lasoufwans ?
9 Fòk nou pran pasians jiktan Jéova mété an milié adan lasoufwans. Men, lè nou menm, ouben an pwòch-nou, ka pèd an moun, ka soufè ouben ka sibi lenjistis, nou pé mandé kònou poutji Jéova pa ka mété lanmen pli vit adan zafè lézòm (Abk. 1:2, 3). Si sa vini rivé nou, sa té ké bon nou viré-wè poutji Jéova ka pèwmèt lasoufwansb (Sòm 34:19). Nou sé pé sonjé osi ki Jéova lé fè disparèt lasoufwans pou toujou. Annou pran tan osi médité asou pwojé’y.
10. Ki manniè Anne trapé konsolasion apré lanmò manman’y ?
10 Sav poutji Jéova ka pèwmèt lasoufwans pé endé nou tjenbé. Anne, ki ka viv Mayòt, ka rakonté : « I ni pliziè lanné manman-mwen mò, é poutan, tjè-mwen toujou an bobo. Men man ka sonjé toulong, Jéova pa rèsponsab malè nou ka jwenn. Sé pa ti présé i présé fè tout soufwans-nou disparèt, épi résisité moun nou enmen. Lè man ka katjilé asou sé vérité-tala, man ka risanti an gran lapé an tjè-mwen. Souvantman, sa ka siwpwann mwen ! »
11. Lè nou sav poutji Jéova ka pèwmèt lasoufwans, sa ka ankourajé nou kontinié préché. Poutji nou ka di sa ?
11 Pas nou sav poutji Bondié ka pèwmèt lasoufwans, sa ka ankourajé nou kontinié préché. Lapòt Piè èsplitjé ki Jéova ka pran pasians pas i lé tout moun ripanti kòyo pou yo sové. Piè èsplitjé osi sa nou pé fè pou endé yo. I di : « Katjilé asou ki modèl moun zòt pou yé, moun ki ni an konduit ki sen épi ka fè aksion ka montré yo enmen Bondié » (2 Piè 3:11). Préché bon nouvèl-la, sé an « aksion ka montré [nou] enmen Bondié ». Kon Papa-nou Jéova, nou enmen tout moun, é nou lé yo viv adan monn nouvo a, éti lajistis ké mèt. Épi pasians, Jéova ka ba moun ki adan téritwè’w posibilité adoré’y. É wou, ou ni lonnè travay kantékant épi’y, pou endé an maksimòm moun aprann konnèt li avan lafen monn-tala rivé ! (1 Kor. 3:9).
NOU KA VIV « SÉ DÈNIÉ JOU-A »
12. Ki lasirans nou ni dépi nou aprann sa Labib ka di asou « sé dènié jou-a » ?
12 Labib ka di an manniè klè, ki manniè sé moun-lan té ké yé pandan « sé dènié jou-a » (2 Tim. 3:1-5). Lè nou ka wè manniè sé moun-lan ka viv alantou nou, nou ka wè an manniè klè, sa Labib ka di vré poubon. É lè nou ka wè konpòwtasion sé moun-lan vini plizanpli mové, sa ka ba nou lasirans nou pé fè Pawòl Bondié konfians (2 Tim. 3:13-15).
13. Parapòt a lègzanp-lan Jézi ba an Lik 12:15-21, kisa fòk nou mandé kònou ?
13 Sav nou ka viv sé dènié jou-a, ké endé nou osi sèvi tan-nou méyè manniè ki ni. Annou wè ki manniè nou pé fè sa gras a an ègzanp Jézi pran (li Lik 12:15-21). Poutji Labib ka di ki misié-tala té « sòt » ? Sé pa pas i té rich. Men sé pas i pa té ka mété sa ki enpòtan douvan. I té ka ‘anmasé trézò ba kòy, men i pa té rich an zié Bondié’. Poutji sa té potalan i fè chanjman lamenm an lavi’y ? Bondié èsplitjé’y : « Oswè-a menm ou ké pèd lavi’w. » Ki manniè listwa-tala pé itil ba nou jòdi-a ? Pa rété anpil tan avan lafen monn-tala rivé, alò nou sé pé mandé kònou : « Ès man ni òbjèktif ki ka montré man ka sèvi tan-mwen méyè manniè ki ni ? Ki modèl òbjèktif man ka ankourajé yich-mwen ni ? Ès man ka sèvi fòs-mwen, tan-mwen, épi tousa man ni pou anmasé trézò ba kòmwen an prèmié ? Ouben, ès sa ki pli enpòtan ban mwen, sé sanblé trézò an sièl-la ? »
14. Ki manniè sa ki rivé Miki ka endé nou konprann, manniè sa enpòtan katjilé anlè prèv nou ka viv sé dènié jou-a ?
14 Lè nou ka katjilé anlè sé prèv-la ka montré nou ka viv sé dènié jou-a, manniè nou ka wè lavi-a pé chanjé toutafètman. Sé sa ki rivé an sè, yo ka kriyé Miki. I ka rakonté : « Apré man pran bak-mwen, man té lé touvé an travay ki té ké pèwmèt mwen étidié zannimo. Men man té lé osi vini pionié pèwmanan, épi préché la éti yo té bizwen plis pwoklamatè. Yonn-dé frè é sè adan lasanblé-mwen di mwen bien réfléchi pou sav, ès sé té an bon bagay ba mwen fè lé dé. Men yo fè mwen sonjé osi, lafen monn-tala près rivé, é adan monn nouvo-a, man ké ni létèrnité pou étidié tout zannimo man lé. Kidonk, man désidé fè létid pli kout pou aprann an métié. Sa endé mwen touvé an travay ki té ka pèwmèt mwen ni asé lajan pou bwè épi manjé, épi asé tan pou vini pionié. É plita, man alé viv Lékwatè, éti yo té bizwen plis pwoklamatè. » Jòdi-a, Miki épi mari’y adan sèvis siwkonskripsion-an adan péyi-tala.
15. Épi an ègzanp, montré sé moun-lan pé chanjé épi asèpté bon nouvèl-la (gadé sé zimaj-la osi).
15 Fòk pa nou dékourajé lè nou ka préché ba moun ki pa lé kouté bon nouvèl-la. Sé moun-lan pé chanjé. Sonjé Jak, dimi-frè Jézi. I wè Jézi grandi, vini Mési-a épi ansénié kon pèsonn pa té janmen fè. Poutan, pandan pliziè lanné, Jak pa suiv Jézi. Sé sèlman apré Jézi résisité i vini disip-li. É i vini an disip ki té ni anpil balanc ! (Jan 7:5 ; Gal. 2:9). Lègzanp Jak ka montré sa enpòtan pa ladjé pwòch-ou ki pòkò montré lavérité ka entérésé yo, épi osi kontinié préché ba moun ki pa té lé kouté’w avan. Pa bliyé, davwè nou ka viv sé dènié jou-a, préché sé an aktivité potalan. Lè’w ka préché jòdi-a ba an moun, sa pé ba rézilta plita ; pétèt menm, apré koumansman gran tribilasion-and.
Kisa ki pé endé nou kontinié préché ba pwòch-nou ki pa Témwen ?f (gadé paragraf 15-lan).
KONTINIÉ ÉTIDIÉ SÉ PRÈMIÉ VÉRITÉ-A JÉOVA APRANN OU
16. Lè nou ka viré étidié prèmié vérité nou aprann, kisa sa ka pòté ba nou ? (gadé osi kad-la « Sèvi sé vérité-a pou endé lézòt »).
16 An pati nouriti èspiritièl la lòwganizasion ka ba, fèt ba moun ki pa konnèt anlo bagay asou Labib. Pami yo, ni diskou piblik la nou ni chak simenn, yonn-dé awtik é vidéwo yo ka mété asou jw.org, épi yonn-dé jounal ki fèt ba moun ki pa Témwen. Men nou ki ka sèvi Jéova, nou bizwen nouriti èspiritièl tala osi. Pou vré, i ka fè lanmou-nou ba Jéova grandi, i ka misklé lafwa-nou adan Pawòl-li, épi i ka endé nou ansénié sé vérité-a an manniè pli filé (Sòm 19:7).
17. Adan ki sitiyasion fòk ou médité asou sé prèmié vérité-a ?
17 Nou ki ka sèvi Jéova dépi lontan, nou kontan lè nou ka risivwè an nouvo èsplikasion asou an vérité biblik. Men nou ni anpil rikonésans osi ba sé prèmié vérité-a nou aprann adan Labib, pas sé vérité-tala endé nou vini pli pré Jéova. Lè lòwganizasion ka ba nou an dirèksion, men nou ni lenprésion sé sa nou ka pansé ki pli bon, fòk nou sonjé, épi limilité, ki sé Jéova Kréyatè-nou, ki saj épi puisan, ki ka dirijé lòwganizasion-nou. Si an moun ki pwòch-nou ouben nou menm, ka pasé an léprèv, annou pran pasians ! Épi annou médité asou rézon ka fè Jéova ka pèwmèt lasoufwans. É avan nou désidé koumanniè nou ké sèvi tan-nou épi sa nou ni, annou pa bliyé ki, pas nou ka viv sé dènié jou-a, préché sa vréman enpòtan. Fòk sé prèmié vérité-a Jéova aprann nou, kontinié rann nou pli saj, épi endé nou sèvi’y épi fidélité !
KANTIK 95 Limiè-a plizanpli fò
a Nou chanjé non-an.
b Gadé awtik-la « Pourquoi la souffrance disparaîtra bientôt » adan Tou di Gad-la 15 mé 2007, p. 21-25, an fwansé.
d Gadé awtik-la « Kisa nou sav parapòt a jijman Jéova pou lavni ? » adan Tou di Gad-la mé 2024, p. 8-13.
e DÉ-TWA MO ASOU SÉ ZIMAJ-LA : An ansien ka ba an lidé, men sé lézòt ansien-an pa dakò épi’y. Plita, pandan i ka gadé an sièl plen zétwèl, i ka pran tan katjilé asou sajès épi puisans Kréyatè-a. I ka réyalizé ki sa Jéova lé, pli enpòtan ki sa i lé.
f DÉ-TWA MO ASOU SÉ ZIMAJ-LA : Toupandan an jenn sè ka fè létid pèrsonèl li, i ka ègzaminé prèv ka montré nou ka viv sé dènié jou-a. Sa ka ankourajé’y kriyé sè’y la pou préché ba’y.