Endé lamenm moun ki lé aprann konnèt Bondié

1. Ki manniè sé moun-lan pé réyaji, lè yo ka tann bon nouvèl-la ? (Akt 13:47, 48 ; 16:14, 15).

AN 1^ié sièk-la, anlo moun té kontan menm, lè sé prèmié krétjen-an palé yo di Jézi, é yo asèpté bon nouvèl-la lamenm (li Akt 13:47, 48 ; 16:14, 15). Jòdi-a osi, yonn-dé moun ka kontan lamenm, lè yo ka tann bon nouvèl-la. Men dòt moun bizwen plis tan pou asèpté’y. Kisa fòk nou fè lè nou ka jwenn sé dé gwoup moun-tala, ki ni « léta lèspri-a ki fo pou ni lavi étèrnèl » ?

2. Poutji nou pé konparé travay an pwoklamatè épi travay an agrikiltè ?

² Pou èsplitjé sa, annou pran an ègzanp. Fè disip, sé kon lè’w ka fè jaden. Lè i ni fwi ki matrité, agrikiltè-a ka tjuiyi yo. Men adan jaden-an, toujou ka rété dòt koté pou fouchté épi planté. Menm manniè-a, lè an moun ja paré pou kouté mésaj-la, lamenm, nou pou endé’y vini an disip Jézi. Men pou sa ki poko paré, nou kèy kontinié endé yo konprann poutji sa bon ba yo étidié Labib, épi aprann konnèt Bondié (Jan 4:35, 36). Fòk nou chèché konprann si moun-lan paré pou kouté ouben si i poko paré. Sa kèy endé nou sav koumanniè pou endé’y. Pou koumansé, annou wè koumanniè nou pé endé an moun ka asèpté mésaj-la, dépi prèmié kozé-a. Nou ké wè osi, koumanniè nou pé kontinié endé’y vini pli pré Jéova.

LÈ AN MOUN PARÉ POU KOUTÉ

3. Kisa fòk nou fè lè an moun ka asèpté kouté bon nouvèl-la lamenm ? (1 Korentjen 9:26).

³ Lè an moun paré pou kouté bon nouvèl-la, fòk lamenm, nou endé’y pran chimen-an ka mennen a lavi. Sé pou sa, dépi prèmié bokantaj-la, fòk pa nou tjèlèkèté pou pwopozé’y an létid Labib, ouben envité’y adan réyinion-nou (li 1 Korentjen 9:26).

4. Ba lègzanp an moun ki asèpté étidié Labib lamenm.

⁴ Pwopozé yo an létid Labib. I ni yonn-dé moun ki paré étidié Labib lamenm. Gadé sa ki pasé Kanada : An jédi, an madanm frennen douvan an prézantwa, épi i pran bwochi-a Viv an bèl lavi pou toujou ! Sè-a ki té la di’y konsa, i té pé ni an létid Labib gratis anlè bwochi-tala. Davwè madanm-lan té entérésé, i ba’y niméwo téléfòn-li. Tibren plita, menm jou-a, madanm-lan vréyé an mésaj ba sè-a, pou sav ki jou i té pé koumansé létid-la. Lè sè-a pwopozé’y an randévou pou wikenn-lan, madanm-lan mandé’y : « Poutji pa dèmen ? Man disponib. » Yo koumansé étidié Labib vandrèdi-a. Wikenn-lan menm, madanm-lan vini réyinion pou prèmié fwa, é lamenm, an bèl lanmitié épi Jéova koumansé.

5. Kisa nou pé fè pou endé an moun ki poko paré pou étidié ? (gadé sé zimaj-la osi).

⁵ Asiré-pa-pétèt, tout moun pé ké asèpté étidié Labib lamenm kon madanm-tala. I ni dé-twa kèy bizwen plis tan. Épi yo, pétèt nou kèy koumansé bokanté anlè an sijé ki pé entérésé yo. Si nou rété pozitif, é si nou ka kontinié entérésé kònou a moun-lan, pétèt nou ké pé koumansé an létid Labib asé vit. Alò, kisa nou pé fè pou pwopozé yo an létid ? Nou pozé frè é sè ki filé pou koumansé létid Labib kèsion-an.

6. Ki manniè nou pé ba an moun anvi viré-ni dòt bokantaj épi nou ?

⁶ Adan yonn-dé péyi, pwoklamatè épi pionié ka èsplitjé sa pou fè pou pwopozé an létid Labib. Pa ègzanp, plivomié ou pa sèvi mo kontèl « étidié », « étid Labib » ouben « man kèy ansénié’w ». Yo ka trapé méyè rézilta lè yo ka itilizé « bokantaj », « diskision » épi « gadé sa Bib-la ka di ». Pou endé moun-lan palé épi nou an pwochen fwa, nou pé di an bagay kontèl : « Sa vréman èstwòdinè sav ki Labib ka réponn a sé gran kèsion lavi-a » ouben « Labib sé pa sèlman an liv ka palé di Bondié ; i ka ba osi konsèy ki itil adan lavi ». Ou sé pé ajouté : « Sa pa ka pran anpil tan ; 10 minit a 1 kardè sifizan pou dékouvè anlo bèl bagay. » Anfen, plivomié nou pa di moun-lan nou kèy vini « chak simenn », pou yo pa santi kòyo oblijé viré-palé épi nou toulong.

7. A ki moman yonn-dé moun konprann yo té touvé lavérité ? (1 Korentjen 14:23-25).

⁷ Envité yo adan an réyinion. I ka sanm, sé pas yo té vini réyinion, ki yonn-dé moun an tan lapòt Pòl té asiré yo touvé lavérité (li 1 Korentjen 14:23-25). Jòdi-a osi, sé konsa sa ka pasé. Près tout sé moun-lan ki koumansé étidié Labib pwogrésé vit, pas yo vini an réyinion. Kidonk, a ki moman fòk envité yo ? Adan liv-la Viv an bèl lavi pou toujou !, sé adan lison 10-la nou ka envité yo pou prèmié fwa an réyinion. Men nou pa oblijé atann nou rivé jis la. Dépi prèmié bokantaj-la, ou sé pé envité an moun adan sé réyinion wikenn-lan. Pou sa, ou pé ba’y tit diskou piblik la, ouben ou pé partajé épi’y an ti lidé nou kèy palé adan Tou di Gad-la pou simenn-lan.

8. Kisa nou pé di an moun lè nou ka envité’y adan réyinion-nou ? (Izayi 54:13).

⁸ Lè’w ka envité an moun adan réyinion-nou, èsplitjé’y kisa ki diféran épi sa i ni labitid wè adan rèlijion’y. An étidian Labib, ki té ka asisté pou prèmié fwa létid Tou di Gad-la, mandé sè-a ki té ka étidié épi’y : « Misié-a ka mennen diskision-an konnèt non tout moun ? » Sè-a di’y konsa ki menm manniè nou konnèt non tout moun ki adan fanmi-nou, menm manniè-a, nou chak la ka fè an éfò pou konnèt non chak moun adan lasanblé-a. Étidian-an di’y sé pa konsa sa ka pasé adan rèlijion’y. Lòbjèktif réyinion-nou, sé osi an bagay ki nouvo ba sé étidian-an. Nou ka réyini pou adoré Jéova, pou i ansénié nou é pou nou ankourajé kònou (li Izayi 54:13 ; Ébré 2:12 ; 10:24, 25). Kidonk adan réyinion-nou, pa ni piès bagay mistik moun oblijé fè. Yo òwganizé an manniè pou nou chak la risivwè ansèyman-an adan bon kondision (1 Kor. 14:40). Anplis, pou nou pé sa alèz pou aprann, sé sal réyinion-an fèt an manniè senp. Davwè nou pa ka fè politik, nou pa ka palé di sa. Nou pa ka non pli fè polémik, é nou pa ka fè gran déba ka mennen kankan. Pou moun-lan sav koté i ka mété pié’y, sa té ké entérésan montré’y vidéwo-a Kisa ki ka pasé andidan an Sal di Wayòm ?

9-10. Lè nou ka envité an moun an réyinion, kisa nou pé fè pou i pa pè vini ? (gadé zimaj-la osi).

⁹ I ni moun ki pa cho vini réyinion pas yo pè nou fè yo vini Témwen Jéova. Bien èsplitjé moun-lan ou ka envité a ki, menmsi sa ka fè nou plézi wè moun vini an réyinion, nou pa ka fòsé pèsonn partisipé. Nou enmen risivwè fanmi menm épi jenn tjanmay, adan réyinion-nou. Nou pa ka séparé sé tjanmay-la di paran-yo. Tout fanmiy-lan asiz ansanm épi ka aprann ansanm. Konsa, lé paran-an sav kisa yo ka ansénié tjanmay-yo (Dét. 31:12). Nou pa ka mandé moun lajan, é nou pa ka ba pèsonn anvlòp pou mété lajan adan. Nou pito ka suiv lòd-la Jézi ba : « Yo ba zòt pou ayen, zòt pou ba pou ayen » (Mat. 10:8). Ou pé èsplitjé moun-lan osi ki sa pa nésésè i achté lenj èspésial pou vini réyinion, pas Bondié pa ka gadé lenj-lan, men tjè-a (1 Sam. 16:7).

¹⁰ Lè an moun ka vini réyinion, fè tousa ou pé pou i santi kòy alèz. Fè’y fè konésans épi sé ansien-an é dòt pwoklamatè. Si i santi kòy alèz, asiré i kéy lé viré-vini. Pandan réyinion-an, si moun-lan pa ni bib, nou pé endé’y suiv adan bib-nou sé vèsé-a oratè-a ka pran. Nou pé fè’y suiv osi asou piblikasion-nou. Nou pé menm ba’y yonn pou i suiv tou sèl.

LÈ’W KOUMANSÉ AN LÉTID LABIB

11. Koumanniè ou ka montré ou ka rèspèkté tan-an moun-lan ni ?

¹¹ Lè an moun ka étidié, kisa fòk ou sonjé ? Sonjé moun-lan ni dòt bagay ka fè. Rèspèkté tan-an i disponib. Pa ègzanp, si’w ka pran randévou épi’y, vini a lè, é sa, kisiswa labitid péyi-a. Anplis, pétèt sa té kèy pli mié ou pa fè prèmié létid-la two long. Pwoklamatè ki ni anpil lèspérians ka konséyé fè’y kout, menmsi moun-lan lé sav plis. Pou bout, pa palé twòp, lésé moun-lan palé (Pwo. 10:19).

12. Lè’w koumansé an létid, ki lòbjèktif fòk ou ni ?

¹² Dépi ou koumansé an létid, lòbjèktif-ou sé endé moun-lan konnèt épi enmen Jéova épi Jézi. Koumanniè ou pé fè sa ? Ou ké mété douvan Pawòl Bondié pito ki wou menm ouben sa’w konnèt (Akt 10:25, 26). Lapòt Pòl ba nou an bèl lègzanp. Lè i té ka ansénié, i té ka mété Jézi douvan, moun-lan Jéova vréyé pou endé tout moun konnèt li épi enmen’y (1 Kor. 2:1, 2). Lapòt Pòl di osi, sa enpòtan nou endé sé nouvo disip-la dévlopé bèl kalité nou pé konparé épi lò, lajan, é piè ki ni valè (1 Kor. 3:11-15). Adan sé kalité-tala, nou ka touvé lafwa, lasajès, bon jijman é lapè fè Jéova lapenn (Sòm 19:9, 10 ; Pwo. 3:13-15 ; 1 Piè 1:7). Fòk ou ni menm òbjèktif-la ki Pòl. Fòk ou endé sé étidian’w lan ni an lafwa ki solid, épi ni an bèl rilasion épi Papa-yo ki an sièl-la é ki enmen yo (2 Kor. 1:24).

13. Koumanniè ou pé montré ou ni pasians épi ou ka chèché konprann étidian’w lan ? (2 Korentjen 10:4, 5 ; gadé zimaj-la osi).

¹³ Anplis di sa, kon Jézi, fòk ou pran pasians épi chèché konprann étidian-an. Pa pozé’y kèsion ki pé mété’y mal alèz. Lè sa nésésè, mété asou koté lansèyman i poko ka rivé konprann épi viré asou yo plita. Pa éséyé fòsé’y asèpté an lansèyman si i pa paré. Ba lavérité tan-an ki nésésè pou pran rasin an tjè’y (Jan 16:12 ; Kol. 2:6, 7). Labib-la ka konparé fo ansèyman moun-lan aprann, épi « bagay ki bien solid » fòk fè « chalviré ». Adan lang-lan yo ékri Bib-la, yo ka sèvi zimaj an batiman ki solid. É batiman-tala, fòk nou krazé’y (li 2 Korentjen 10:4, 5). Men pa chèché krazé batiman-tala, alòs ki étidian-an ni an pié andidan’y toujou. Simié fè’y konprann piti-a-piti, sé Jéova i pou fè konfians (Sòm 91:9).

LÈ AN MOUN KA VINI RÉYINION

14. Ki manniè fòk nou fè épi moun ka koumansé vini réyinion ?

¹⁴ Kisiswa kilti an moun, pozision’y adan lasosiété, nasionalité’y ouben ras-li, Jéova pa lé nou fè préférans (Jak 2:1-4, 9). Alò, ki manniè nou pé montré lanmou ba sé moun-lan ka vini réyinion ?

15-16. Koumanniè nou pé endé moun ka koumansé vini réyinion, pou yo santi nou kontan wè yo ?

¹⁵ I ni moun ka vini adan réyinion-nou, jiskont pou wè manniè sa ka pasé. Ouben sé pas an moun yo konnèt, ka abité an lòt réjion, ankourajé yo alé. Kidonk, pa ézité alé palé épi an moun ka vini an réyinion pou prèmié fwa. Montré’y ou kontan i vini, men pa fè twòp. Envité’y asiz bò’w. Fè’y suiv adan bib-ou, ouben adan sé piblikasion-an nou ka étidié. Ou pé osi ba’y piblikasion ki nésésè pou i suiv. Anplis di sa, ou kèy véyatif a sa i ka risanti é a manniè i ka réyaji. An misié di frè-a ki té akéyi’y, i té jennen pas i pa té abiyé kon tout moun. Frè-a réponn li ki sé Témwen Jéova-a sé moun kon tout moun, é sa rasiré misié-a. Misié-tala vini Témwen Jéova, é i pa janmen bliyé répons frè-a. Kidonk, lè an moun ka vini an réyinion pou prèmié fwa, sa bien entérésé kònou a moun-tala avan épi apré réyinion-an. Men nou ka rété véyatif pou pa rantré an zafè-yo (1 Piè 4:15).

¹⁶ Koumanniè nou pé mété sé moun-lan ki ka vizité nou alèz ? Sé lè nou ka palé épi rèspé di moun ki pa Témwen Jéova, ouben di kwayans-yo, adan koumantè-nou ouben sijé-nou. Nou pé ké di pawòl ki pé fwasé yo, ouben ka ba lenprésion nou ka ensilté yo (Tit 2:8 ; 3:2). Pa ègzanp, nou pé ké fè lafèt épi sa an moun ka kwè ki pa annakò épi sa Labib ka di (2 Kor. 6:3). Sé frè-a ka fè diskou piblik, pou véyatif anlè tout sé bagay-tala. Anplis, yo kèy èsplitjé mo épi lidé sé moun-lan pa konnèt.

17. Lè nou ka touvé moun ki « ni léta lèspri-a ki fo pou ni lavi étèrnèl », kisa fòk nou fè ?

¹⁷ Chak jou ka pasé, sa ka vini présé-présé fè disip. É nou ka kontinié touvé moun ki « ni léta lèspri-a ki fo pou ni lavi étèrnèl » (Akt 13:48). Alò annou pa ézité pwopozé yo an létid Labib, épi envité yo adan réyinion-nou. Sé konsa nou ké endé yo koumansé maché anlè ‘chimen-an ki ka mennen a lavi’ (Mat. 7:14).