Jéova sé Sous lajwa-nou

1-2. a) Kisa an patjé moun ka risanti jòdi-jou ? b) Di kisa nou kèy palé adan awtik-tala ?

JÒDI-JOU, ni tjè-kontan, sé dèyè sa tout moun ka kouri. Poutan, ou sé di chèché ni tjè-kontan sé chayé dlo an pannié. Lavérité, sé ki anlo moun maléré, pas yo ka pansé yo pé kèy janmen ni an bèl lavi. Délè, menm moun ka sèvi Jéova ka risanti sa osi. Difèt nou ka viv « sé dènié jou-a », nou sav nou ké jwenn sitiyasion, épi osi ni santiman ki « rèd pou sipòté » (2 Tim. 3:1).

² Adan awtik-tala, nou ké wè kisa ki pé rann nou maléré, é lè sa ka rivé, sa nou pé fè pou viré ni tjè-kontan. Pou koumansé, annou wè ki moun ki pé endé nou ni vré bonè-a.

KI MOUN KI PÉ BA NOU VRÉ BONÈ-A

3. Kisa nou ka aprann asou Jéova lè nou gadé tousa i fè ? (gadé sé zimaj-la osi).

³ Jéova sé Bondié-a ki toujou ni tjè-kontan. É i lé nou toujou ni tjè-kontan osi. Sé pou sa i kréyé tousa bèl bagay pou ba nou lajwa. Ès planèt-nou an pa bèl ! Nou enmen wè tout bèl koulè ki ni, nou ka pran plézi gadé zannimo jwé, é nou kontan lè nou ka manjé an bon ti manjé tété-dwèt. Poubon, Jéova enmen nou, é i lé nou pwofité di lavi-a !

Ti éléfan : Image © Romi Gamit/Shutterstock ; ti mancho : Vladimir Seliverstov/500px via Getty Images ; ti kabrit : Rita Kochmarjova/stock.adobe.com ; dofen : georgeclerk/E+ via Getty Images

4. a) Poutji Jéova ni tjè-kontan magré tout malè i ka wè anlè latè ? b) Kisa Jéova ka ba nou ? (Sòm 16:11).

⁴ Jéova sav tout moun ka soufè. É i vréman tris lè i ka wè manniè soufwans ka malmennen nou. Poutan Labib-la ka kriyé’y « Bondié-a ki éré » (1 Tim. 1:11). Magré sa i ka wè, poutji Jéova ni tjè-kontan ? I ja chwazi an jou pou fè disparèt an fwa pou tout, tousa ka rann nou tris, épi tousa ka fè nou soufè. Anplis, i ka konprann lè nou ka soufè, é i lé endé nou. Koumanniè i ka endé nou ? I ka ofè nou an bèl kado : sé lajwa (li Sòm 16:11). Annou wè koumanniè i ba Yich-li a Jézi, menm kado-tala.

5-6. Poutji Jézi ni tjè-kontan ?

⁵ Apré Jéova, moun-lan ki ni plis tjè-kontan adan tout linivè, sé Jézi. Poutji nou pé di sa ? Pou yonn, « i sé pòtré Bondié envizib la » ; sa lé di, i ka suiv menm larèl-la ki Papa’y adan tousa i ka fè (Kol. 1:15 ; 1 Tim. 6:15). Pou dé, Jézi sé moun-lan ki pasé plis tan épi Jéova, Bondié-a ki toujou ni tjè-kontan.

⁶ Pou fini, Jézi ni tjè-kontan pas i toujou fè sa Papa’y ka mandé’y (Pwo. 8:30, 31 ; Jan 8:29). É gras a fidélité’y, i ni favè Jéova (Mat. 3:17).

7. Kisa ki pé ba nou tjè-kontan ?

⁷ Nou pé ni vré lajwa-a, lè nou ka kontinié aprann konnèt Jéova. Chèché sav manniè i ka wè tout bagay ké endé nou imité’y, é sé konsa nou ké ni tjè-kontan. Nou ka ni tjè-kontan osi, lè nou ka fè volonté’y, épi nou sav nou ni favè’ya (Sòm 33:12). Men délè, nou pé santi nou tris, ouben déprimé yonn-dé jou, ouben sa pé diré pli lontan. Ès sa lé di nou pa ni favè Jéova ? Non ! Jéova sav ki adan monn-tala, sa pé rivé nou tibren pianm-pianm (Sòm 103:14). Annou wè aprézan, kisa nou pé fè si nou ka santi nou maléré, é koumanniè nou pé viré ni tjè-kontan.

PA KITÉ AYEN ANPÉCHÉ’W NI TJÈ-KONTAN

8. Ki manniè sé pwoblèm lavi-a pé aji anlè nou ?

⁸ 1) Pwoblèm lavi. Pétèt yo ka maltrété’w pas ou ka sèvi Jéova. Pétèt osi ou ka soufè palakòz an katastwòf natirèl, ouben pas ou malad, pas laj-la ka monté, ouben pas ou ni pwoblèm lajan. Nou pé maléré lè sé pwoblèm-tala ka tonbé anlè nou, èspésialman si nou pé pa fè ayen pou chanjé sitiyasion-an. Labib pa ka séré pou di nou, ‘twòp chagren pé krazé tjè-nou’ (Pwo. 15:13). Annou palé di Babis, an ansien ki, asou 4 lanné sèlman, pèd frè’y la épi lé paran’y. I ka di : « Man té ka santi kòmwen sèl, san pèsonn pou endé mwen. Délè, man té ka santi tjè-mwen té an bobo, pas man pa té pé pasé plis tan épi lé paran-mwen épi frè-mwen avan yo mò. » Sé menm bagay-la ba nou. Délè, pwoblèm nou ka jwenn sitèlman rèd, ki yo pé dékourajé nou, épi sisé tout lafòs-nou.

9. Kisa ki pé endé nou viré ni tjè-kontan ? (Jérémi 29:4-7, 10).

⁹ Kisa ki pé endé nou viré ni tjè-kontan ? Nou pé viré ni tjè-kontan si nou réyalis, épi si nou ni rikonésans. Monn-lan lé fè nou kwè, nou ké ni tjè-kontan si lavi-nou pawfé. Men sa pa vré. Pa èkzanp, Jéova té mandé sé Juif-la ki té lèkzil Babilòn asèpté réyalité-a, épi adapté kòyo épi nouvo lavi-a yo té ni. I di yo, fè kon yo pé épi sa yo ni (li Jérémi 29:4-7, 10). Lison-an ? Fè éfò pou asèpté sitiyasion’w, épi ni rikonésans pou tout bèl bagay ou ka viv. Anplis, sonjé Jéova pé ké jen ladjé’w (Sòm 63:7 ; 146:5). Effie ki paralizé akòz an aksidan, di konsa : « Jéova, fanmi-mwen, épi lasanblé-a, endé mwen anpil. Kifè, man toujou di kòmwen, si man ladjé, sa lé di man pa ni rikonésans. Pas Jéova épi frè é sè-mwen, fè an patjé bagay ba mwen ! Man lé montré yo tout rikonésans-mwen. »

10. Poutji nou pé ni tjè-kontan, menm lè nou ka jwenn difikilté ?

¹⁰ Nou pé ni tjè-kontan, menmsi lavi-nou pa kon nou lé a, ouben an bagay térib vini rivé fanmi-nou ouben nou menmb (Sòm 126:5). Poutji ? Pas lajwa an tjè-nou, pa ka dépann di sitiyasion-nou. Maria ki sé an pionié, di konsa : « Lè’w douvan pwoblèm, lajwa an tjè, sa pa lé di ou pa ka janmen pléré, ouben ou pa ka janmen di lézòt sa’w ka risanti. Sa lé di plito, ou pa ka oubliyé tout bèl pwonmès Jéova fè’w. Jéova ké endé nou pwotéjé lajwa ki an tjè-nou. » Sonjé, kisiswa wotè difikilté nou ka jwenn, yo tout la pou an tan. Sé kon lè dlo lanmè ka chayé mak pié an moun anlè sab-la. Talè, menm manniè-a, tout difikilté nou ka jwenn ké disparèt, pé ké rété piès tras.

11. Koumanniè sa lapòt Pòl viv pé ankourajé’w ?

¹¹ Atjèlman, kisa fòk nou fè si nou ka koumansé kwè pas nou ni pwoblèm, nou pa ni favè Bondié ? Si sé sa, annou sonjé yonn-dé sèvitè Jéova ki jwenn pwoblèm alòs ki yo té fidèl. Sé Jézi li menm ki chwazi lapòt Pòl pou mennen lavérité « ba sé nasion-an, ba sé wa-a, é ba yich Izrayèl » (Akt 9:15). Mi bèl lonnè i té ba’y ! Poutan, pwoblèm tonbé kon kann asou lapòt Pòl ! (2 Kor. 11:23-27). Ès pas i té ni pwoblèm dèyè pwoblèm i té pèd favè Jéova ? Piès pa ! Okontrè, i rivé tjenbé pas Jéova té ka béni’y (Wom. 5:3-5). Aprézan, réfléchi asou sitiyasion’w. Ou ka tjenbé épi fidélité magré tout léprèv ou ka jwenn. Donk wou osi, ou pé asiré sèten ou ni favè Jéova.

12. Poutji, lè’w ni lèspwa mal-papay, sa pé tiré lajwa an tjè’w ?

¹² 2) Lè’w ni lèspwa mal-papay (Pwo. 13:12). Sé pas nou ni rikonésans épi nou enmen Jéova, nou ka fiksé kònou òbjèktif èspiritièl. Men si sé òbjèktif-tala pann two wo, sa pé koupé dé jaré-nou (Pwo. 17:22). An pionié yo ka kriyé Holly ka di : « Man té lé fè Lékòl pou évanjélizatè Wayòm-lan, préché adan an lòt péyi, ouben travay anlè chantié Ramapo-a. Men sitiyasion-mwen chanjé, é man pa té pé atenn sé òbjèktif-tala ankò. Sa fè mwen lapenn. Lè’w anvi fè yonn-dé bagay épi ou pé pa fè yo, sa ka égri’w. » Anlo moun ni menm santiman ki Holly.

13. Si sitiyasion’w pa ka pèwmèt ou fè tousa ou lé, ki òbjèktif réyalis ou pé ni ?

¹³ Kisa ki pé endé nou viré ni tjè-kontan ? Sonjé Jéova sé pa an moun ki rèd. I pa ka mandé’w plis ki sa’w pé fè. É valè’w an zié’y, pa ka dépann di sa’w kapab fè adan sèvis-li. Sa i lé, sé ki nou rikonnèt limit-nou épi nou rété fidèl (Mic. 6:8 ; 1 Kor. 4:2). Jéova ka plis gadé sa ki an tjè-nou, pito ki sa nou ka fè. Alò, ès sa rézonnab chèché fè bagay Jéova sav nou pé pa fèc ? Men non ! Alò, si sitiyasion’w pa ka pèwmèt ou fè tousa ou lé ba Jéova, fiksé kòw òbjèktif ou ké pé atenn. Poutji pa endé an jenn pwogrésé adan lasanblé’w, ouben soutienn frè é sè ki ajé ? Ès ou pé ni òbjèktif-la di alé ankourajé an moun kay-li, ouben kriyé’y, ouben menm vréyé an mésaj ba’y ? Lè’w kèy éséyé atenn òbjèktif konsa ki enpòwtan épi réyalis, Jéova kèy ba’w lajwa, é sa sé bénédision’y ! Pa oubliyé ki talè, adan monn nouvo a, nou ké ni an patjé lokazion pou sèvi Jéova manniè nou lé ! Holly, nou palé pli wo a, fini pa di kòy : « Anfinaldikont, man ni létèrnité douvan mwen. Man ka pansé ki, gras a Jéova, man ké pé atenn yonn-dé òbjèktif adan monn nouvo a. »

14. Kisa ki pé tiré lajwa an tjè-nou ?

¹⁴ 3) Kouri dèyè plézi. Ni yonn-dé ka itilizé sé rézo sosio a pou fè moun konprann, ki kouri dèyè plézi, sé sa ké endé yo ni tjè-kontan épi vini an moun. Nou sé pé koumansé kwè ki, lè nou ka yenki fè sa nou enmen, kontèl, achté sa nou lé, vwayajé toupatou asou latè, sé sa kèy ba nou tjè-kontan. Pa ni ayen ki mové adan sé bagay-tala. Jéova kréyé nou an manniè pou nou pran plézi adan bèl bagay lavi-a. Men anlo moun konstaté, ki sé plézi-tala pa ka ba yo tjè-kontan. Okontrè, i ka tiré lajwa ki an tjè-yo. Eva, an pionié, di konsa : « Lè’w ka chèché fè kòw plézi san rété, avrédi, pli ou ni, pli ou sé ni. » Kifè, kouri dèyè plézi pé rann nou maléré, épi lavi-nou pé kon an sak vid.

15. Kisa lavi wa Salomon ka aprann nou ?

¹⁵ Wa Salomon éséyé an patjé bagay diféran pou wè kisa ki té ké ba’y tjè-kontan. I fè kòy plézi an tout sòs pou éséyé touvé vré bonè-a. I fè sa, pa èkzanp, adan manjé, i té ka kouté bèl mizik, i pwofité di tousa lajan té pé achté an tan’y. Épi ki rézilta ? I pa jenmen santi i té satisfèt. I di konsa : « Zié pa ka fini gadé é zorèy pa ka fini kouté » (Ékl. 1:8 ; 2:1-11). I ni moun ka pansé, sé lè pòch-yo plen lajan, épi yo pé fè sa yo lé, yo ké ni tjè-kontan. Men sa pa vré. Sé bagay-tala pé pa mété lajwa an tjè-nou pou vré.

16. Poutji lè nou ka ba lézòt, sa ka endé nou ni tjè-kontan ? (gadé sé zimaj-la osi).

¹⁶ Kisa ki pé endé nou viré ni tjè-kontan ? Jézi ansénié vérité-tala : « An moun ka jwenn plis bonè lè i ka ba, pasé lè i ka risivwè. » (Akt 20:35). An ansien yo ka kriyé Alekos konstaté : « Man ka éséyé fè anlo ti bagay ba lézòt. É pli man ka ba, pli man ni tjè-kontan pas sé pa kòmwen man ka sonjé. » Kisa ou pé fè ba lézòt ? Si’w ka wè an moun ka soufè, ankourajé’y. Ou pa kèy pé réglé tout pwoblèm i ni, men ou ké pé konsolé’y lè’w ka pran tan kouté’y, épi si’w ni konpasion ba’y. Épi osi, fè’y sonjé i pé jété tout chaj-li asou Jéova (Sòm 55:22 ; 68:19). Ou pé osi endé’y sonjé ki Jéova pa ladjé’y (Sòm 37:28 ; Iza. 59:1). Anfen, ou pé ba’y an bèl ti pal, pa èkzanp si’w ka fè an ti manjé ba’y, ouben pati épi’y an koté i anvi alé. Ou pé osi envité’y préché, asiré sa ké riba’y fòs. Poutoudi, kité Jéova itilizé’w ! Pas vré bonè-a sé lè nou ka sonjé lézòt pito ki nou menm (Pwo. 11:25).

17. Kisa fòk nou fè pou ni tjè-kontan pou vré ? (Sòm 43:4).

¹⁷ Si nou ka kontinié aprann konnèt Papa-nou ki an sièl-la, nou ké ni tjè-kontan pou vré. Bib-la ka ba nou lasirans Jéova sé ‘Sous lajwa-nou’ (li Sòm 43:4). Menm lè nou ni pwoblèm, nou pa bizwen pè ouben èstrésé. Si nou ka yenki gadé Sous lajwa-nou, Jéova, nou pé ké janmen maléré ! (Sòm 144:15).