Ki manniè an létid Labib ka pasé épi Témwen Jéova ?
Sé Témwen Jéova-a ka pwopozé an manniè éfikas pou aprann sa Labib ka ansénié. Létid Labib-la pé endé’w :
ni lajwa adan lavi’w
divini zanmi Bondié
sav sa Labib ka pwonmèt pou dèmen
Adan awtik-ta’a, ou ké wè :
Ès man pé fè an lison jiskont pou sav ki manniè sa ka pasé ?
Si man koumansé étidié, ès moun ké fè présion anlè mwen pou man vini Témwen Jéova ?
Menm si man ja étidié épi Témwen Jéova, ès man pé rikoumansé an létid Labib ?
Ki manniè an létid Labib ka pasé ?
Ansénian’w ké endé’w konnèt pli bien Labib-la, gras a tèm pou bokanté. Sé diskision-an ou ké ni pandan létid Labib-ou asou liv-la Viv an bèl lavi pou toujou ! kay pèwmèt ou aprann piti-a-piti sa Labib ka ansénié é ki manniè i pé endé’w. Pou sav plis anlè sa, gadé vidéwo-ta’a.
Ès fòk péyé pou ni an létid ?
Piès pa. Nou ka suiv lòd-la Jézi ba sé disip-li a : « Zòt risivrè san péyé ayen, zòt pou ba san mandé ayen » (Matié 10:8). Moun ki ka ansénié lakay-nou pa ka risivrè lajan, é zòt pé trapé an labib é an liv Viv an bèl lavi pou toujou ! san péyé ayen.
Konben tan sa ka diré ?
Adan pwogram létid-la, i ni 60 lison. Sé wou ki ka désidé ki tan ou lé étidié. Laplipa sé étidian-an ka fè o mwen an lison pa simenn.
Ki manniè man pé enskri kòmwen ?
1. Plen dimann-lan asou Entèwnèt. Nou kèy sévi sé enfòmasion-an ou ka ba nou anlè’w sèlman pou réponn ou.
2. An moun kèy kontakté’w. I kèy montré’w ki manniè létid-la ka pasé é i kèy réponn kèsion’w.
3. Ou ké pran randévou épi ansénian’w lan. Ou pé étidié kay-ou, ouben an lòt koté, pa téléfòn, pa apèl-vidéwo, pa lèt ouben imèl. Dabitid, an létid ka diré annèdtan, men silon pwogram-ou i pé swa pli kout, swa pli long.
Ès man pé fè an lison jiskont pou sav ki manniè sa ka pasé ?
Wi. Plen dimann-lan asou Entèwnèt. Lè ansénian-an kèy kontakté’w, di’y ou sé lé fè an lison pou’w wè si ou enmen sa. Si ou lé jété an zié anlè sa zòt ké étidié, ou pé gadé bwochi-a Viv an bèl lavi pou toujou ! I ni sé 3 prèmié lison-an andidan’y.
Si man koumansé étidié, ès moun ké fè présion anlè mwen pou man vini Témwen Jéova ?
Men non. Sé Témwen Jéova-a enmen étidié Labib épi moun, men yo pa ka fòsé pèsonn vini Témwen Jéova. Yo ka kontanté kòyo montré sa Labib ka ansénié épi rèspé. Ba yo, chak moun ni dwa chwézi kwayans-yo (1 Piè 3:15).
Ès man pé sèvi pwòp labib-mwen ?
Wi, ou pé sèvi tradiksion-an ou simié. Menm si Témwen Jéova enmen sèvi La Bible. Traduction du monde nouveau pas i senp épi ègzak, yo ka konprann ki an patjé moun simié itilizé an tradiksion yo ni labitid sèvi.
Ès man pé envité moun vini épi mwen ?
Wi. Si ou lé ou pé envité moun lafanmi’w ouben zanmi’w.
Menm si man ja étidié épi Témwen Jéova, ès man pé rikoumansé an létid Labib ?
Wi. Dayè, nou sav ou ké enmen nouvo pwogram létid-tala nou ka pwopozé, pas i ka adapté kòy a sa sé moun-lan bizwen jòdi. Parapòt a avan sa pli agréyab épi pli fasil pou diskité.
Si man lé étidié Labib tou sèl, kisa man pé fè ?
Menm si laplipa sé moun-lan ki ka étidié ka touvé sa pli fasil konprann épi an moun pou endé yo, i ni moun ki préféré étidié tou sèl. Ribrik-nou « Outils d’étude de la Bible » ka pwopozé zouti gratui pou endé’w ègzaminen Labib-la. Mi yonn-dé ou sé pé aprésié :
Vidéos bibliques. Sé ti vidéwo-tala tou kout. Yo ka réponn kèsion biblik ki fondal-natal.
Questions bibliques. Sé awtik-tala ka réponn anlo kèsion moun ka pozé kòyo asou Labib.
Que veulent dire ces versets ? Aprann sans yonn-dé vèsé ouben lèsprésion nou ka touvé adan Labib ki sélèb.