Ki manniè ladjè ké disparèt

BONDIÉ KÉ DÉTWI TOUT GOUVÈNMAN LÉZÒM

Bondié ké sèvi an ladjè Labib-la ka kriyé Armagédona pou détwi tout gouvènman lézòm (Révélasion 16:16). A moman-tala, « wa tout latè-a » ké ‘sanblé pou ladjè gran jou Bondié ki Tou-Puisan’ (Révélasion 16:14). Apré Armagédon, ladjè Bondié, pé ké ni ladjè ankò asou latè.

Bondié ké mété wayòm-li, kivédi gouvènman’y, alaplas gouvènman lézòm. Wayòm-tala ké dirijé latè-a dépi sièl-la, é i pé ké janmen disparèt (Danièl 2:44). Sé Yich-li, Jézikri, Bondié chwézi pou vini Wa wayòm-tala (Izayi 9:6, 7 ; Matié 28:18). Sé ba wayòm-talab Jézi aprann disip-li prédié (Matié 6:9, 10). Alò, tout limanité ké ini anba lotorité an sèl gouvènman, é sé Jézi ki ké dirijé’y.

Jézi pé ké sèvi lotorité’y an manniè égoyis, kon sé nonm-lan ki ka dirijé ka fè. I jis épi i pa ka fè préférans. Kidonk pèsonn pé ké pè Jézi aji épi’y an manniè enjis pou an zafè koulè lapo, péyi oben kilti (Izayi 11:3, 4). Anplis, pèsonn pé ké ni bizwen goumen pou défann dwa’y. Poutji ? Pas Jézi ké sousié kòy di chak moun. « I kéy délivré maléré-a ki ka mandé soukou, men osi toupiti-a é moun-lan ki pa ni pèsonn pou endé’y. […] I kéy sové yo anba loprésion èk laviolans » (Sòm 72:12-14).

Asou tout latè, wayòm Bondié ké détwi sé zam-lan ki ka tjwé moun (Miché 4:3). Anplis, i ké débarasé latè-a di sé moun-lan ki mové é ki pa lé arété goumen, oben ki ka fè lézòt méchansté (Sòm 37:9, 10). Chak nonm, chak fanm épi chak timanmay ké an sékirité, kisiswa koté-a yo ké viv asou latè (Ézékièl 34:28).

Lè wayòm Bondié ké dirijé latè, tout sé nonm-lan ké ni pli bèl lavi ki ni. Gouvènman-tala ké tiré sé pwoblèm-lan ki ka mennen sé nonm-lan goumen, kontèl lanmizè, lafanmin épi pwoblèm lòjman. Tout moun ké pé ni an bondans bon kalité manjé é yo tout ké ni an kay konfòtab (Sòm 72:16 ; Izayi 65:21-23).

Wayòm Bondié ké fè disparèt tout mové bagay ladjè pòté, kontèl soufrans fizik, é osi soufrans ki adan tjè épi lèspri moun. Sé moun-lan ki mò ké menm résisité, é yo ké viré viv asou latè-a (Izayi 25:8 ; 26:19 ; 35:5, 6). Kifè sé fanmi-an ké pé ritouvé kòyo. Sé moun-lan pé ké menm sonjé sa ki fèt pandan ladjè pas ‘vié bagay antan lontan ké ja disparèt’ (Révélasion 21:4).

BONDIÉ KÉ TIRÉ PÉCHÉ-A

Lè wayòm Bondié ké dirijé latè-a, tout sé moun-lan ké adoré Jéovac, Bondié-a « ki plen lanmou épi lapé » (2 Korentjen 13:11). Yo ké aprann viv ansanm adan lapé (Izayi 2:3, 4 ; 11:9). Tout sé moun-lan ki ké obéyi Bondié pé ké péchè ankò, yo ké divini parfé (Women 8:20, 21).

BONDIÉ KÉ DÉTWI SATAN ÉPI SÉ DÉMON-AN

Wayòm Bondié ké détwi Satan épi sé démon-an ki ka pousé sé moun-lan fè ladjè (Révélasion 20:1-3, 10). Lè sé mové lèspri-tala ké disparèt, ké ni « an bondans lapé » (Sòm 72:7).

Zòt pé ni lasirans Bondié ké tjenn pwonmès-li di fè disparèt ladjè. I pé, é i lé fè sa.

• Bondié ni sajès-la épi puisans-lan ki nésésè pou bout ladjè épi laviolans (Jòb 9:4). Pa ni ayen ki two fò ba’y (Jòb 42:2).

• Bondié rayi wè lézòm soufè (Izayi 63:9). É anplis, « i rayi tout moun ki enmen laviolans » (Sòm 11:5).

• Bondié toujou ka fè sa i ka di ; i pé pa manti (Izayi 55:10, 11 ; Tit 1:2).