AWTIK POU ÉTIDIÉ 15
KANTIK 30 Zanmi-mwen, Bondié-mwen, Papa-mwen
« Vini tou pré Bondié, sé sa ki bon ba nou ! »
« Kantapou mwen, vini tou pré Bondié, sé sa ki bon ba mwen » (SÒM 73:28).
MI SA NOU KÉ WÈ
Nou ké wè ki manniè nou pé vini pli pré Jéova épi ki bienfè nou ka trapé lè nou ka fè sa.
1-2. a) Kisa fòk nou fè pou ni an bèl lanmitié épi an moun ? b) Kisa nou kèy wè adan awtik-tala ?
ÈS OU ni an bon zanmi ? Koumanniè ou vini zanmi épi’y ? Lè’w vini pasé tan épi’y, sa pèwmèt ou aprann ki difikilté i jwenn, sa i enmen épi sa i pa enmen. Kifè, ou wè i ni bèl kalité ou sé lé ni tou. Épi, ou vini enmen moun-tala.
2 Pou ni an bèl lanmitié épi an moun, sa ka mandé tan épi éfò. Menm manniè-a, fòk nou aprann konnèt Jéova pli bien épi rann lanmou nou ni ba’y pli fò. Adan awtik-tala, nou ké wè ki manniè nou pé vini pli pré Bondié épi ki bienfè nou ka trapé lè nou ka fè sa. Men pou koumansé, annou wè poutji sé an bon bagay pwoché kònou toujou plis di méyè Zanmi-nou, Jéova.
3. Poutji fòk nou médité asou bénéfis nou ka trapé lè nou ka vini pli pré Jéova ?
3 Asiré, ou dakò pou di ki vini pli pré Bondié, sé an bagay ki bon ba’w. Men sonjé poutji sa bon di fè sa, pé ba’w balan pou kontinié vini obò’y (Sòm 63:6-8). Annou pran an ègzanp : Nou sav ki manjé bienkonmifo, fè ispò, dòmi asé épi bwè asé dlo, bon ba kò-nou. É poutan, an patjé moun pa djè anlè sé bagay-tala épi ka néglijé santé-yo. Alòs ki, pli nou ka katjilé anlè bénéfis ni bon labitid parapòt a santé-nou, sé plis nou ké rivé gadé sé bon labitid-tala. Menm manniè-a, menm si nou sav ki vini pli pré Bondié bon ba nou, médité asou bénéfis sa ka pòté ba nou kéy endé nou kontinié fè sa ankò plis (Sòm 119:27-30).
4. Kisa Sòm 73:28 ka èsprimen ?
4 (Li Sòm 73:28.) Matjè Sòm 73-la sé té an Lévit ki té ka jwé mizik an tanp Jéova-a. Lè i matjé sòm-tala, sa dwèt té ka fè an moman i té ka adoré Jéova épi fidélité. Poutan, i santi sa té nésésè pou li menm sonjé — é fè lézòt sonjé tou — ki vini pli pré Bondié ka pòté bénédision. Annou wè yonn-dé bienfè nou pé trapé lè nou ka vini pli pré Bondié.
« VINI TOU PRÉ BONDIÉ » KA BA NOU TJÈ-KONTAN
5. a) Poutji nou ni tjè-kontan lè nou ka vini pli pré Jéova ? b) Adan ki domenn sajès Jéova ja endé’w épi pwotéjé’w ? (Pwovèb 2:6-16).
5 Pli nou ké pwòch Jéova, pli nou ké ni tjè-kontan (Sòm 65:4). I ni anlo rézon ka fè nou di sa. An rézon, sé ki sa bon ba nou aplitjé sé konsèy Labib-la, pas yo saj épi itil. Avrédi, sajès Bib-la ka pwotéjé nou kont mové lenfliyans é i ka anpéché nou fè péché ki grav (li Pwovèb 2:6-16). Sé poutji Bib-la ka di : « Bienéré nonm-lan ki ka touvé lasajès épi nonm-lan ki ka trapé bon jijman » (Pwo. 3:13).
6. Poutji matjè Sòm 73-la té pèd lajwa i té ni ?
6 Sa vré, menm zanmi Jéova pé adan latristès pandan an tan. Sé sa ki rivé matjè Sòm 73-la, lè vié lidé pasé an tèt-li. I té ka touvé sé méchan-an té ni an bèl lavi, alòs ki yo pa té ka rèspèkté ni Bondié, ni lwa Bondié. I koumansé égri, épi i té lé viv kon yo. I té ka pansé ki sé moun méchan épi awogan tala, té toujou ni plis lajan, té ni an bon santé, é pa té konnèt sa ki té lasoufwans. Men i té ni tò (Sòm 73:3-7, 12). Tèlman i té ka santi kòy mal, an lè, i mandé kòy si tout éfò i té ka fè pou sèvi Jéova té vo lapenn. Tjè’y té an bobo, lè i di : « Sé pou ayen mwen té ka goumen pou ni an tjè pwòp épi fè éfò pou rété inosan » (Sòm 73:13).
7. Lè nou tris, kisa nou pé fè ? (gadé osi zimaj-la).
7 Men matjè sòm-lan pa kité tristès-li paralizé’y. I mété kòy an mannèv. I rantré « adan gran tanp Bondié-a », la éti Jéova korijé manniè wè’y, épi i asèpté disiplin-lan (Sòm 73:17-19). Jéova, ki sé méyè Zanmi-nou, ka wè lè tjè-nou fann. Sé pou sa lè nou tris, nou pé prédié Jéova épi mandé’y sa nou pou fè. Tout bèl konsèy nou ka touvé an Pawòl-li osi, épi ankourajman frè èk sè-nou, kèy ba nou lafòs kontinié sèvi’y menm lè nou tris. Asiré, menm lè nou ka néyé anba lentjétid, Jéova pé konsolé nou é apézé tjè-noua (Sòm 94:19).
Lévit-la ki matjé Sòm 73-la, doubout « adan gran tanp Bondié-a » (gadé paragraf 7-la).
« VINI TOU PRÉ BONDIÉ » KA BA LAVI-NOU AN SANS ÉPI KA BA NOU AN LÈSPÉRANS
8. Ba dòt rézon enpòwtan ka montré ki « vini tou pré Bondié » bon ba nou.
8 « Vini tou pré Bondié » bon ba nou pou 2 rézon ankò : lavi-nou ni an sans é nou ni an lèspérans ki solid (Jér. 29:11). Annou pran tan dékatiyé sé bienfè-tala.
9. Poutji nou pé di, vini pli pré Bondié ka ba lavi-nou an sans ?
9 Lè nou ka pwoché di Jéova, sa ka ba lavi-nou an sans. Jòdi, ba anlo moun, Bondié pa ka ègzisté. Sé moun-tala pa sav poutji yo asou latè, é ba yo, an jou, lézòm ké anni disparèt. Men gras a létid Labib-nou, nou ni lasirans « [ki Bondié] ka ègzisté é i ka divini Bondié-a ki sa rékonpansé moun ki ka chèché’y épi tout tjè-yo » (Ébré 11:6). Kidonk, lè nou ka fè chwa dépi jòdi-a, sèvi Papa-nou Jéova, asiré nou ka trapé lakontantman. Pas avrédi, Bondié kréyé lòm pou i sèvi’y (Dét. 10:12, 13).
10. Ki pwonmès Jéova ka fè moun ki ka fè’y konfians ? (Sòm 37:29).
10 An patjé moun pa ni an vré lèspwa adan lavi-yo. Yo ka kontanté kòyo di travay, mayé, fè timanmay épi sanblé an ti lajan pou ritrèt-yo. Zafè Bondié-a pa anlè kont-yo. Men nou, nou ka mété lèspwa-nou an Jéova, pas nou sav i ka jété an zié anlè moun ki ka sèvi’y (Sòm 25:3-5 ; 1 Tim. 6:17). Nou ka fè’y konfians pas sé Bondié-nou épi Zanmi-nou, é nou ka kwè tout pwonmès i fè nou. Ni an patjé pwonmès nou présé wè réyalizé, kontèl adoré’y pou toujou adan paradi-a (li Sòm 37:29).
11. Lè nou ka vini pli pré Jéova, ki bienfè nou ka trapé, é kisa Jéova ka risanti ?
11 Vini pli pré Jéova, sé an bon bagay ba nou pou an patjé dòt rézon ankò. Pa ègzanp, i ka pwonmèt padonnen péché moun ki pwòch li é ka ripanti kòyo (Iza. 1:18). Kifè, si sa rivé nou péché an jou adan lavi-nou, nou pa ka santi kònou krazé palakòz an konsians ki chajé (Sòm 32:1-5). Anplis, ba Jéova tjè-kontan, sé an plézi pou nou (Pwo. 23:15). Asiré, ou ka sonjé dòt bienfè ankò an bèl lanmitié épi Bondié ka pòté. Men koumanniè ou pé kontinié vini pli pré’y ?
KOUMANNIÈ NOU PÉ KONTINIÉ « VINI TOU PRÉ BONDIÉ »
12. Kisa ou ja fè pou vini pli pré Bondié ?
12 Si ou ja pran batenm, sa lé di ou ja fè anlo éfò pou vini pli pré Jéova. Ou aprann an patjé vérité anlè’y épi asou Jézi. Ou ripanti kòw parapòt a péché ou fè. Ou montré ou ni an lafwa ki solid an li, é ou fè tousa ou pé pou fè sa i té ka mandé’w. Men si ou lé pwoché ankò plis obò’y, fòk ou kontinié fè sé bagay-tala (Kol. 2:6).
13. Palé di 3 bagay ki kèy endé nou kontinié pwoché ankò plis di Jéova.
13 Kisa ki ké endé nou pwoché ankò plis di Jéova ? 1) Fòk nou kontinié li épi étidié Bib-la. Lè nou ka étidié Labib, fòk nou fè plis ki aprann bagay asou Bondié. Fòk nou chèché konprann kisa Bondié lé nou fè épi kité sé prensip-la ki adan Pawòl-li djidé nou (Éfé. 5:15-17). 2) Fòk nou médité asou manniè i montré lanmou ba nou adan lavi-nou pou misklé lafwa-nou. 3) Fòk nou kontinié rayi bagay Bondié pa ka sipòté, épi pa frékanté moun ka fè sé bagay-tala (Sòm 1:1 ; 101:3).
14. Kisa nou pé fè chak jou pou fè Jéova plézi ? (1 Korentjen 10:31 ; gadé sé zimaj-la osi).
14 (Li 1 Korentjen 10:31.) Fòk nou bien désidé fè Jéova plézi, sé an bagay ki fondal-natal. Pou fè sa, sé pa jiskont lè nou ka préché, épi alé réyinion adan lasanblé-nou. Touléjou, fòk nou fè bagay ki ka fè Jéova plézi. Pa ègzanp, lè nou toujou onnèt, é lè nou ka partajé sa nou ni épi lézòt, nou ka réjwi tjè Jéova (2 Kor. 8:21 ; 9:7). I lé osi nou ba lavi-nou anlo valè, pas sé an kado i fè nou. Kidonk, nou ka prangad bien manjé, pa bwè twòp lalkòl, épi nou ka fè dòt bagay ki ka endé nou gadé an bon santé. Tout éfò pou fè Jéova plézi, menmsi ba nou sé dé bagay ki pa ni anpil enpòwtans, ké fè i ké enmen nou ankò plis (Lik 16:10).
Pran prékosion lè nou ka kondui, lè nou ka pran swen di santé-nou, lè nou ka fè ispò, lè nou ka manjé bienkonmifo, men osi lè nou ka partajé sa nou ni épi lézòt. Tousa sé dé bagay nou pé fè pou fè Jéova plézi (gadé paragraf 14-la).
15. Koumanniè Jéova lé nou aji épi lézòt ?
15 Jéova bon épi tout moun, ki yo ka sèvi’y, ki yo pa ka sèvi’y (Mat. 5:45). Tout moun ka pwofité di bonté Jéova, é sa i lé, sé ki nou montré menm jantiyès-la ba tout moun. Pa ègzanp, i ka mandé nou « pa malpalé pèsonn, pa chèché kankan, […] épi toujou dous épi tout moun » (Tit 3:2). Kidonk, menmsi sé moun-lan pa ka kwè an Jéova, fòk pa nou jen méprizé yo (2 Tim. 2:23-25). Si nou toujou janti épi tout moun, asiré nou ké pwoché ankò plis di Jéova.
MENMSI OU FÈ AN LÉRÈ, « VINI TOU PRÉ BONDIÉ »
16. Kisa matjè Sòm 73-la risanti apré i mantjé glisé ?
16 Si’w fè an lérè épi ou ka santi ou pa mérité lanmou Jéova ankò, kisa ou pé fè ? Sonjé menm bagay-la rivé matjè Sòm 73-la. I di konsa : « Pié-mwen mantjé fè chimen-kochi ; ankò tibren man glisé » (Sòm 73:2). I admèt i té égri, i « pa té rézonnab », é i fini pa vini kon an moun ‘douvan [Jéova] ki pa té kapab réfléchi, konsidiré i té an bèt’ (Sòm 73:21, 22). Ès i pansé palakòz lérè i fè, ki Jéova pa té enmen’y ankò, é i pa té kèy padonnen’y ?
17. a) Lè matjè sòm-lan santi i té atè menm, kisa i fè ? b) Koumanniè nou pé imité matjè sòm-lan ? (gadé sé zimaj-la osi).
17 Si matjè sòm-lan risanti Jéova té ladjé’y, i dwèt risanti sa pandan an ti moman sèlman. Menm lè i té ka santi i té atè menm, i té sav i té bizwen vini pli pré Jéova. Kifè i di’y : « Men atjèlman, sé épi’w man yé tout lè ; ou tjenbé lanmen dwèt mwen. Sé konsèy-ou ki ka djidé mwen, apré ou ké mennen mwen pou man trapé laglwa » (Sòm 73:23, 24). Nou osi, lè nou ka santi kònou fèb ouben dékourajé, annou mandé Jéova, Woché-nou, fòs-la nou bizwen an (Sòm 73:26 ; 94:18). Menmsi nou konmèt an péché ki grav, annou viré tou pré Jéova, pas nou asiré sèten i « paré pou padonnen » (Sòm 86:5). Lè nou ka santi nou atè menm, sa vréman enpòtan ki nou vini an dé bra Bondié-nou (Sòm 103:13, 14).
Si nou ka santi nou ka fébli èspiritièlman, prédié pli souvan épi alé adan sé réyinion-an toulong ké endé nou vini pli pré Jéova (gadé paragraf 17-la).
NOU KÈY PÉ « VINI TOU PRÉ BONDIÉ » POU TOUJOU
18. Poutji nou ké pé kontinié vini pli pré Jéova san rété ?
18 Nou ké pé kontinié vini pli pré Jéova san rété, épi aprann konnèt li pli bien pou toujou. Poutji ? Pas Labib ka di « sajès-li épi konésans-li gran toubannman » (Wom. 11:33).
19. Ki lasirans sé Sòm-lan ka ba nou ?
19 Sòm 79:13 ka di : « Nou, ki sé pèp-ou épi twoupo patiraj-ou, nou ké di’w mèsi pou toujou ; épi nou kéy anonsé louwanj-ou jénérasion apré jénérasion. » Wou osi, si ou ka pwoché kòw di Jéova ankò plis, ou pé asiré sèten ou ké risivwè bénédision pou létèrnité. Kifè, ou pé di épi konfians : « Sé Bondié ki ka pwotéjé tjè-mwen é sé li ki rékonpans-mwen pou toujou » (Sòm 73:26).
KANTIK 32 Pran ba Bondié !
a An moun ka santi i tris, èstrésé ouben i ni langwas épi ka rété adan léta-tala lontan, pétèt sa nésésè i alé wè an èspésialis. Pou ni plis enfòwmasion asou sa, gadé Tou di Gad-la no 1 2023, an fwansé.