Anba dominasyon a Bondyé, té ni lapé é linité adan linivè.

Poukwa nou bizwen wayòm a Bondyé ?

Lè i kréyé lézimen sé enki Jéova, kréyatè an nou, ki té ka gouvèné. I té ka fè sa èvè lanmou, é i ba lézimen on bèl koté toubònman pou yo rété, Jadendédèn-la. I té ka ba-yo manjé pou tann-é-konprann. I té ba-yo on travay vréman entérésan osi (Jénèz 1:28, 29 ; 2:8, 15). Jousalè, limanité té’é ka viv anpé si lézimen té kité Bondyé gouvèné-yo èvè lanmou.

Èv ba Adan fwi-la Bondyé défann-yo manjé la, é Adan ka tchenbé-y an men a-y. — Prèmyé nonm-la é prèmyé madanm-la pa lésé Bondyé dominé-yo.

Labib ka di kè on zanj yo té’é kriyé Satan Lèdyab plita, ba Bondyé do é i di kè Bondyé pa andwa gouvèné limanité. Dapré-y, tchè a lézòm té’é pli kontan san dominasyon a Bondyé é san konsèy a-y. Malérèzman, Adan é Èv, prèmyé paran an nou, suiv ègzanp a Satan : yo viré Bondyé do osi (Jénèz 3:1-6 ; Révélasyon 12:9).

Konm yo pa lésé Bondyé dominé-yo, Adan é Èv pèd bèl paradi-la yo té ka viv adan-y la, é lèspwa dè viv pou touttan èvè on santé ki pawfè (Jénèz 3:17-19). Jous timoun a yo, ki fèt aprésa, pran plon akòz dè désizyon a yo. Labib ka di kè konm Adan péché, « péché-la rantré an mond-la [...], é lanmò rantré pa péché-la » (Women 5:12). Péché-la pòté ondòt gran malè : « Lòm ka dominé lòm pou fè-y soufè » (Éklézyas 8:9). Kivédi, lè sé nonm ka dominé nonm, antoutjan ké ni pwoblèm.

LÒM KA KOUMANSÉ DOMINÉ LÒM

Nèmwòd, adan tout òwgèy a-y. Dèyè do a-y, ni moun ka pòté bon mannèv pou konstwi on batiman. — Nèmwòd viré Jéova do.

Prèmyé nonm labib ka palé dè-y antankè dirijan, sé on dénonmé Nèmwòd. Nonm-lasa rèbélé-y é i montré i pa té vlé Jéova dominé lézimen. Dépi an tan a Nèmwòd, nonm ki ni pouvwa ka sèvi èvè-y pou sizé asi lézòt. Mi sa wa Salomon maké ni 3 000 an dè sa : « An vwè dlo ka koulé an zyé a moun yo ka pwofité asi yo, é pa té ni ponmoun pou konsolé-yo. Séla ki té ka pwofité asi yo la, sé yo ki té ni pouvwa » (Éklézyas 4:1).

Jòdla, sitiyasyon-la pa chanjé. Dapré on piblikasyon a Lénasyonzini ki sòti an 2009, pli sa k’ay é pli moun ka di kè « mové dominasyon a sé dirijan-la » ka fè pawti a « prèmyé rézon ki fè si ni tousa moun ka soufè ».

I JA LÈ POU AJI !

Mond-la bizwen méyè moun pou dirijé-y, é on pi bon gouvènman. É jistèman, sé sa Kréyatè an nou ka pwomèt-nou !

On séri imaj : Sa dominasyon a lézimen ka pòté. 1) An Azi, on madanm sizé atè-la adan on lari ki pa pwòp. I ka tchenn timoun a-y ka pléré an dé bra a-y. 2) On nonm, ki ja ni on bèl laj, kouché byen malad adan on lopital. 3) Sòlda ki ka bat lagè ka tiré koud fizi. 4) Moun ki byen kòlè ka manifèsté. Yo ka kriyé, èvè afich an men a yo. 5) Pannan yo ka rivé akaz a yo, on madanm é fi a-y ka konstaté kè yo pété kaz a yo. 6) On vil èvè tuiyo a lizin é poto élèktrik, adan onpakèt lafimé ki ka poliyé lèw-la. — Pa menm méyè gouvènman a lézimen pa rivé rézoud gwo difikilté limanité ka jwenn.

Bondyé mèt on wayòm anplas, kivédi on gouvènman. Gouvènman-lasa ké pran plas a tout gouvènman a lézimen, é « sé li tousèl ki ké rété pou touttan » (Danyèl 2:44). Sé pou wayòm-lasa ni milyon moun ka priyé (Matyé 6:9, 10). Men a pa Bondyé limenm ki ké antèt a gouvènman-lasa. Bondyé chwazi on moun ki ni lokazyon viv antankè nonm pou mété-y konm Chèf adan wayòm a-y. Kimoun ésa ?