Kijan pou koumansé on ti kozé èvè on trak

Dépi mwa a janvyé 2018, ou pé touvé asi prèmyé paj a Kayé Vi é ministè-la dé lidé asi sa ou pé di an prédikasyon. Yo ankourajé-nou konsantré-nou asi ti kozé-la nou ni èvè sé moun-la, plito ki yenki prézanté-yo piblikasyon. Pou édé sé pwoklamatè-la fè kò èvè métòd-lasa, tini dé vidéo ki ka ba-w on lidé asi sa ou pé di pou koumansé on ti kozé enki èvè Labib. Ès sa vlé di kè nou pa dwètèt itilizé piblikasyon lè nou ka préché dè kaz an kaz ? A pa sa ditou ! Pa ègzanp, sé trak-la sé on mwayen ki vréman éfikas pou koumansé on ti kozé. Mi on métòd nou pé itilizé èvè nenpòt ki trak :

1. Pozé kèsyon-la a plizyè répons la ki asi prèmyé paj-la.

2. Montré répons a Labib grasa vèwsé-la oben sé vèwsé-la ki anho a dézyèm paj-la. Si ou ni tan, li é palé dè déotwa lidé ki andidan trak-la.

3. Ba moun-la trak-la é ankourajé-y a li rèstan-la lè i ké pé.

4. Avan ou pati, montré-y kèsyon-la ki anba soutit-la « Réfléchi asi sa » é pran mo èvè-y pou réponn èvè Labib on pwochen fwa.

Lè ou ka viré, ègzaminé répons-la é lésé on kèsyon pou pwochen fwa-la. Ou pé chwazi on kèsyon ou ka touvé anlè sit entèwnèt an nou oben adan piblikasyon-la ki ka parèt an do a trak-la. Lè lè-la ké rivé, propozé bwochi-la Bon nouvèl ki ka vin dè Bondyé oben ondòt piblikasyon ki fèt pou étidyé ki adan bwèt a zouti pou anségné la.