AWTIK POU ÉTIDYÉ 20
Liv a Larévélasyon : kijan liv-lasa ka konsèwné lènmi a Bondyé ?
« É sé pawòl enspiré la sanblé sé wa-la on koté yo ka kriyé an ébré Awmagédon » (RÉV. 16:16).
KANTIK 150 Chèché Bondyé pou ou pé sa sové
ON TI LIDÉ ASI SA NOU KAY VWÈa
1. Ka liv a Larévélasyon ka di anrapò èvè pèp a Bondyé ?
LIV a Larévélasyon ka di-nou kè Wayòm a Bondyé ka gouvèné an syèl-la é kè yo fè Satan sòti an syèl-la (Rév. 12:1-9). Kifè, sa mèt lapé anhola men sa menné onlo pwoblèm asi latè. Poukwa nou ka di sa ? Pas Satan anrajé toubònman é i pa’a las pèwsékité sèwvitè a Bondyé ki fidèl asi latè (Rév. 12:12, 15, 17).
2. Ka ki ké édé-nou rété fidèl a Jéova ?
2 Ka ki ké édé-nou rété fidèl a Jéova magré Satan ka ataké-nou ? (Rév. 13:10). Si nou konnèt sa ki ké fèt dèmen sa ké édé-nou. Adan Révélasyon, lapòt Jan ka palé osi dè sé bénédisyon-la ki ka atann-nou la é yonn adan sé bénédisyon-lasa sé kè yo ké détwi tout lènmi a Bondyé. An-nou vwè aprézan kijan liv a Larévélasyon ka palé dè sé lènmi-lasa é kijan i ka èspliké sa ki kay rivé-yo.
YO KA SÈVI ÈVÈ « SENBÒL » POU PALÉ DÈ LÈNMI A BONDYÉ
3. Liv a Larévélasyon ka sèvi èvè senbòl pou palé dè lènmi a Bondyé. Bay déotwa adan yo.
3 Lè nou ka gadé prèmyé vèwsé a liv a Larévélasyon, nou ka vwè kè yo ka « sèvi èvè dé senbòl » pou palé dè sé vizyon-la (Rév. 1:1). Nou ka touvé plizyè bèt sovaj ki ka rèprézanté lènmi a Bondyé. Pa ègzanp, nou ka touvé bèt sovaj la ki ka sòti an lanmè-la é ki ni « dis kòn é sèt tèt » (Rév. 13:1). É dèyè do a bèt-lasa té ni « ondòt bèt sovaj ki té ka sòti dè latè ». Dézyèm bèt-lasa ka palé kon dragon é i ka fè difé sòti an syèl-la (Rév. 13:11-13). Aprésa, Jan ka vwè on twazyèm bèt, « on bèt sovaj ki wouj » é ni on pwòstitiyé ki sizé anlè a-y. Sé 3 bèt sovaj lasa ka rèprézanté lènmi a Jéova. Yo kont-li é yo kont wayòm a-y dépi nanni-nannan. Sé pousa sa enpòwtan kè nou sav kimoun yo yé vréman (Rév. 17:1, 3).
4 GWO MANMAN BÈT
Yo ka « sòti adan lanmè-la » (Dan. 7:1-8, 15-17). Yo ka rèprézanté sé gouvènman-la ki mèt sèwvitè a Bondyé anba dominasyon a yo é ki pèwsékité-yo dépi an tan a Danyèl (gadé sé paragraf 4, 7 la).
4-5. Kijan sa yo ka di an Danyèl 7:15-17 ka édé-nou konprann ka sé senbòl-la ka rèprézanté ?
4 Pou nou konprann plibyen kimoun ki lènmi a Jéova, fò-nou konnèt ka sé bèt sovaj la é pwòstitiyé-la ka rèprézanté. É méyè mannyè nou pé rivé konprann sa sé si nou ka lésé Labib èspliké-nou sa. Ni plizyè senbòl ki adan liv a Larévélasyon kè dòt liv a Labib ka èspliké. Pa ègzanp, pwofèt Danyèl vwè adan on rèv « kat gwo manman bèt » ki té ka ‘sòti an lanmè-la’ (Dan. 7:1-3). I di kè sé 4 bèt-lasa ka rèprézanté 4 « wa » kivédi 4 gouvènman (li Danyèl 7:15-17). Sa ka édé-nou konprann kè lè liv a Larévélasyon ka palé dè bèt, sé dè gouvènman i ka palé osi.
5 An-nou ègzaminé sèwten senbòl nou ka touvé adan liv a Larévélasyon. Lè nou ké fè sa, nou ké vwè kijan Labib ka édé-nou konprann plibyen ankò ka sé senbòl-lasa ka rèprézanté. Nou ké koumansé èvè sé bèt sovaj la. Nou ké ègzaminé an prèmyé ka yo ka rèprézanté ègzaktèman. Aprésa, nou ké vwè ka ki ké rivé sé bèt-lasa. É pou fin, nou ké vwè ka tout sé biten-lasa ni a vwè èvè nou.
YO KA DÉVWALÉ KIMOUN KI LÈNMI A BONDYÉ
BÈT SOVAJ LA KI NI 7 TÈT LA
I « ka sòti an lanmè-la » é i ni 7 tèt, 10 kòn é 10 kouwòn (Rév. 13:1-4). I ka rèprézanté tout sé gouvènman-la ki dirijé limanité jis a jòdijou. Sé 7 tèt-la ka rèprézanté sé 7 puisans mondyal la ki mèt sèwvitè a Bondyé anba dominasyon a yo é ki pèwsékité-yo (gadé sé paragraf 6-8 la).
6. An Révélasyon 13:1-4, yo ka palé dè on bèt sovaj ki ni 7 tèt. Ka i ka rèprézanté ?
6 Ka bèt sovaj la ki ni 7 tèt la yé ? (li Révélasyon 13:1-4). Nou ka vwè kè bèt sovaj lasa ka sanm on léopa, kè i ni pat a lous, on gèl a liyon é i ni 10 kòn. Sé 4 bèt-la nou ka touvé adan Danyèl chapit 7 la ni sé biten-lasa osi. Men pawkont, lè nou ka gadé Révélasyon chapit 13 nou ka vwè kè sé onsèl bèt ki ni tout sé biten-lasa. Sa ka édé-nou konprann kè bèt sovaj lasa pa ka rèprézanté onsèl gouvènman oben onsèl puisans mondyal. Jan ka di osi kè bèt sovaj lasa ka dominé « tout tribi, tout pèp, tout lang é tout nasyon ». Donk, nou ka tou konprann kè i ni plis pouvwa ki onsèl gouvènman (Rév. 13:7). Tousa ka montré kè bèt sovaj lasa ka rèprézanté tout sé gouvènman-la ki dirijé limanité jous aprézanb (Ékl. 8:9).
7. Ka sé 7 tèt a bèt sovaj la ka rèprézanté ?
7 Ka sé 7 tèt a bèt sovaj la ka rèprézanté ? Révélasyon chapit 17 ka édé-nou réponn a kèsyon-lasa piskè i ka palé dè imaj a bèt sovaj la nou ka touvé an Révélasyon chapit 13 la. An Révélasyon 17:10, nou ka li : « Yo sé sèt wa : senk ja tonbé, yonn anplas, é lòt-la po’o rivé ; men lè i ké vin, i pé ké rété lontan. » Pawmi tout sé gouvènman-la Dyab-la itilizé la, ni 7 yo ka konparé èvè dé tèt pas yo té ni oben yo ni onlo pouvwa. Sé 7 tèt-lasa sé dé puisans mondyal é akòz dè yo pèp a Bondyé pran plon pas yo té ka pèwsékité-yo. An tan a lapòt Jan, ni 5 gouvènman ki pa té ka gouvèné ankò : sé Léjipt, Lasiri, Babilòn, Wayòm a sé Mèd-la é sé Pèws-la é Lagrès. Sizyèm puisans mondyal la té ka gouvèné toujou, sé té Wòm, men dènyé-la poto’o rivé. Ki puisans mondyal sétyèm tèt-lasa té’é rèprézanté ?
8. Ka sétyèm tèt a bèt sovaj la ka rèprézanté ?
8 Aprézan nou ké vwè kè sé pwofési-la ki adan liv a Danyèl la ka édé-nou sav ka sétyèm é dènyé tèt a bèt sovaj la ka rèprézanté. Ki puisans mondyal ki ka dominé an tan a lafen, kivédi dépi « jou a Ségnè-la » koumansé ? (Rév. 1:10). Sé puisans-la Langlètè é Lamérik ka fòwmé la. Sé 2 gouvènman-lasa puisan é yo ka travay men-dan-lamen. Sé pousa nou pé di kè puisans-lasa sé sétyèm tèt a bèt sovaj la yo ka palé an Révélasyon 13:1-4.
ON BÈT SOVAJ KI NI 2 KÒN, KON KÒN A ON TIMOUTON
I « ka sòti dè latè » é i « ka palé kon on dragon ». Yo ka kriyé-y « fo-pwofèt-la » pas i ka fè difé sòti an syèl-la é i ka fè biten èstraòwdinè (Rév. 13:11-15 ; 16:13 ; 19:20). Pou palé dè puisans-la Langlètè é Lamérik ka fòwmé la, yo ka sèvi èvè on bèt sovaj ki ni 2 kòn kon kòn a on timouton é yo ka kriyé-y « fo-pwofèt-la » osi pas i ka kouyonné toutmoun ki asi latè é i ka di-yo fè on imaj a bèt sovaj la ki ni 7 tèt la (gadé paragraf 9 la).
9. Ka bèt sovaj la ki ni « 2 kòn, kon kòn a on timouton » ka rèprézanté ?
9 Adan Révélasyon chapit 13, nou ka aprann kè sétyèm tèt-la sé puisans mondyal la Langlètè é Lamérik ka fòwmé la é kè i ka aji kon on bèt sovaj ki ni « 2 kòn, kon kòn a on timouton » men kè i « ka palé kon on dragon ». I ka fè biten èstraòwdinè é i jous ka fè difé sòti an syèl-la douvan toutmoun (Rév. 13:11-15). Sé pousa, adan Révélasyon chapit 16 é chapit 19, yo ka kriyé bèt sovaj lasa « fo-pwofèt-la » (Rév. 16:13 ; 19:20). Anplisdisa, Danyèl ka di apépré menm biten-la asi-y lè i ka di kè puisans mondyal la kè Lamérik é Langlètè ka fòwmé la ké fè onlo déga toubònman (Dan. 8:19, 23, 24, nòt). É sé ègzaktèman sa ki fèt pannan dézyèm gè mondyal la. Sé 2 bonb atomik la yo pété la o Pasifik jouwé on gran wòl adan fen a lagè-la. Sé syantifik a Langlètè é a Lamérik ki kolaboré ansanm pou fè sé bonb-lasa. Nou pé di kè puisans mondyal la Lamérik é Langlètè ka fòwmé la fè difé sòti an syèl-la pou rivé asi latè.
ON BÈT SOVAJ KI WOUJ
Asi bèt-lasa, ni on pwòstitiyé ki sizé. Sé Gran Babilòn-la. É liv a Larévélasyon ka di kè sé-y ki sé 8èm wa-la (Rév. 17:3-6, 8, 11). Odépa, pwòstitiyé-la ka éséyé kontwolé bèt sovaj la men aprésa bèt sovaj la ka viré kont li é i ka détwi-y. Madanm-lasa ka rèprézanté tout sé fo rèlijyon-la ki ka ègzisté la. Bèt-la i sizé asi-y la ka rèprézanté Lénasyonzini. Òwganizasyon-lasa ka défann entéré a tout sistèm politik la ki asi latè la (gadé sé paragraf 10, 14-17 la).
10. Ka « imaj a bèt sovaj la » ka rèprézanté ? (Révélasyon 13:14, 15 ; 17:3, 8, 11).
10 Aprésa, Jan ka vwè ondòt bèt sovaj. I ka sanm bèt sovaj a 7 tèt la toubònman men yo pa menm koulè. Li i wouj. Adan liv a Larévélasyon, yo ka kriyé-y « imaj a bèt sovaj la » é yo ka di kè sé-y ki ‘uityèm wa-lac’ (li Révélasyon 13:14, 15 ; 17:3, 8, 11). I ka di osi kè ‘wa-lasa’ ka parèt, aprésa i ka disparèt é anfinaldikont i ka wouparèt ankò. É sé ègzaktèman sa ki rivé òwganizasyon a Lénasyonzini. Òwganizasyon-lasa ka défann entéré a tout sé sistèm politik la ki asi latè. Prèmyé fwa òwganizasyon-lasa parèt, yo té ka kriyé-y Sosyété a sé nasyon-la é aprésa i disparèt pannan dézyèm gè mondyal la é i wouparèt jan nou konnèt-li jòdijou é yo ka kriyé-y òwganizasyon a Lénasyonzini.
11. Adan liv a Larévélasyon, yo ka palé dè bèt sovaj. Ka yo ka fè é poukwa fò pa nou pè yo ?
11 Sé bèt sovaj la ki adan liv a Larévélasyon, ka rèprézanté sé gouvènman-la ki ka ankourajé sé moun-la viré kont Bondyé é kont sèwvitè a-y. Yo ka sanblé « sé wa-la ki asi tout latè » pou lagè a Awmagédon, kivédi pou lagè a « gran jou a Bondyé Toupuisan-la » (Rév. 16:13, 14, 16). Men nou, fò pa sa fè-nou pè. Pas Jéova, Bondyé an nou ki gran toubònman, ké pòté mannèv pou sové touséla ki ka soutyenn wayòm a-y (Ézék. 38:21-23).
12. Ka ki ké rivé tout sé bèt sovaj la ?
12 Ka ki ké rivé tout sé bèt sovaj lasa ? Nou ka touvé répons-la adan Révélasyon 19:20. Mi sa i ka di : « É yo kenbé bèt sovaj la, èvè fo-pwofèt-la ki té akonpli sign douvan bèt sovaj la pou kouyonné sé moun-la ki rèsèvwa mak a bèt sovaj la é séla ki ka adoré imaj a-y. Yo toulédé, yo jété-yo tou vivan adan létan a difé la ki ni souf adan-y la ». Sa vlé di kè sé gouvènman-lasa ké ka dirijé asi latè toujou lèwvwè Bondyé ké détwi-yo pou touttan.
13. Ki présyon sé gouvènman-la ka mèt asi sé krétyen-la ?
13 Ka sa vlé di pou nou ? Konm nou nou sé dé krétyen, fò-nou rété fidèl a Bondyé é a wayòm a-y (Jan 18:36). Nou pa’a mélanjé-nou adan zafè a politik a mond-lasa. Dépawfwa nou pé touvé-nou adan on sitiyasyon ki difisil é pou montré kè nou pa ka pran pawti sé on bab pas sé gouvènman-la ka mèt présyon asi nou pou nou montré kè nou ka soutyenn-yo adan sa nou ka di é adan sa nou ka fè. É moun ki ké aksèpté sa sé gouvènman-la ka mandé-yo fè la ké ni mak a bèt sovaj la asi yo (Rév. 13:16, 17). Men si on krétyen ni mak-lasa asi-y i pa ni favè a Jéova ankò é i ka pèd tout èspwa dè viv asi latè pou touttan (Rév. 14:9, 10 ; 20:4). Sé pousa, sa enpòwtan kè nou pa pran pawti adan pon zafè a politik kèlkèswa présyon-la yo ka mèt asi nou la !
LÈ YO KÉ DÉTWI GRAN PWÒSTITIYÉ-LA SÉ KÉ ON HONTÉ BA-Y
14. Dapré Révélasyon 17:3-5, Jan vwè on biten ki fè-y rété èstèbèkwè. Ki biten ésa ?
14 Jan vwè ondòt vizyon é i di konsa kè i « rété èstèbèkwè ». Ka i vwè konsa ? On madanm ki sizé asi do a on bèt sovaj wouj (Rév. 17:1, 2, 6). Yo ka kriyé madanm-lasa « Gran Babilòn-la », é yo ka di i sé on « gran pwòstitiyé » é kè i ka fè « péché sèksyèl » èvè sé « wa-la ki asi latè la » (li Révélasyon 17:3-5).
15-16. Ka « Gran Babilòn-la » ka rèprézanté é kijan nou fè sav sa ?
15 Ka « Gran Babilòn-la » yé ? Madanm-lasa pé pa rèprézanté on òwganizasyon ki politik piskè liv a Larévélasyon ka di konsa kè i ka fè péché sèksyèl èvè sé wa-la ki asi latè la (Rév. 18:9). Anplisdisa, lèfètkè i sizé anlè bèt sovaj la, sa ka montré kè i ka éséyé vwè kijan i ka fè sé gouvènman-lasa fè sa li i vlé. Nou ka vwè osi kè i pé pa rèprézanté sistèm a lajan-la ki swèf lajan toubònman é ki ka fè pawti a mond a Satan. É adan liv a Larévélasyon, yo ka palé dè sé machann-la ki asi latè la pou palé dè-y (Rév. 18:11, 15, 16).
16 Dépawfwa, lè Labib ka di kè sèwten moun ka vann kò a yo oben kè yo ka « fè adiltè », sé pou palé dè moun ki ka di swadizan kè yo ka adoré Bondyé men ki ka adoré dòt biten oben pou palé dè moun ki ka fè on biten ki ka montré kè yo zanmi èvè mond-lasa (1 Kron. 5:25 ; Jak 4:4). Lè Labib ka palé dè moun ki pa sali-yo oben dè moun ki « vyèj », sé pou palé dè moun ki ka adoré Bondyé é ki fidèl a-y (2 Kor. 11:2 ; Rév. 14:4). An tan lontan, sé a Babilòn fo adorasyon-la té sizé. Sé pousa, Gran Babilòn-la ka rèprézanté tout sé kalité fo adorasyon-la. Yo ka sèvi èvè imaj-lasa konm senbòl pou palé dè tout sé fo rèlijyon-la (Rév. 17:5, 18 ; gadé awtik-la « Qu’est-ce que Babylone la Grande ? » asi jw.org).
17. Ka ki kay rivé Gran Babilòn-la ?
17 Ka ki kay rivé Gran Babilòn-la ? Nou ka touvé répons-la an Révélasyon 17:16, 17. Mi sa i ka di : « Kanta sé dis kòn-la ou vwè la é kanta bèt sovaj la, yo ké hay pwòstitiyé-la, yo ké mété-y anchèpi é yo ké lésé-y toutouni ; yo ké manjé chè a-y é yo ké brilé-y a san pou san. Pas Bondyé mèt lidé a-y an tchè a yo, pou yo fè volonté a-y ». Jéova ké pousé sé nasyon-la sèvi èvè bèt sovaj la ki wouj la, kivédi èvè Lénasyonzini, pou fin bat èvè sé fo rèlijyon-la é pou détwi-yo a san pou san (Rév. 18:21-24).
18. Si nou vlé pa soutyenn Gran Babilòn-la anponjan, kijan pou nou aji ?
18 Ka sa vlé di pou nou ? Fò-nou fè tousa nou pé pou nou ba Bondyé ‘on adorasyon ki pwòp é ki san tach an zyé a-y’ (Jak 1:27). Pousa, fò pa nou lésé ansègnman a Gran Babilòn-la détenn asi-nou. Fò pa nou fè sa moun ki pa ka suiv prensip a Labib ka fè. Fò pa nou mélanjé-nou adan sé fèt-la ki pa’a fè Bondyé plézi la. É fò-nou ba tousa ki anrapò èvè sé démon-la gran lè a yo. Anplisdisa, fò-nou ankourajé sé moun-la sòti adan Gran Babilòn-la pou Bondyé pa kondanné-yo (Rév. 18:4).
PLI GRAN LÈNMI A BONDYÉ KA DISPARÈT
DRAGON-LA KI KOULÈ A DIFÉ LA
Satan ba bèt sovaj la ki ni 7 tèt la pouvwa (Rév. 12:3, 9, 13 ; 13:4 ; 20:2, 10). Yo ké jété Satan, pli gran lènmi a Jéova, adan on tou san fon pou 1000 an. Aprésa, yo ké jété-y « adan létan a difé la ki ni souf adan-y » (gadé sé paragraf 19-20 la).
19. Kimoun ki dragon-la ki koulè a difé la ?
19 Liv a Larévélasyon ka palé osi dè on « gran dragon ki koulè a difé » (Rév. 12:3). Dragon-lasa ka goumé èvè Jézi é zanj a-y (Rév. 12:7-9). I ka ataké pèp a Bondyé é sé-y ki ka ba sé bèt sovaj la, kivédi sé gouvènman-la, pouvwa-la yo ni la (Rév. 12:17 ; 13:4). Ka i ka rèprézanté ? Sé-y ki sé « prèmyé sèpan-la, sila yo ka kriyé Dyab é Satan » (Rév. 12:9 ; 20:2). Sé-y ki ka dirijé tout lènmi a Jéova.
20. Ka ki kay rivé dragon-la ?
20 Ka ki kay rivé dragon-la ? Dapré Révélasyon 20:1-3, on zanj kay jété Satan adan on tou san fon. Tou san fon lasa ké kon on lajòl pou-y. I ké rété la pannan 1 000 an é pannan tan-lasa i pé’é pé kouyonné sé nasyon-la ankò. Anfinaldikont, yo ké jété ki li ki démon a-y adan « létan a difé la ki ni souf adan-y » la é yo ké détwi-yo a san pou san (Rév. 20:10). Imajiné jan lavi ké yé lè Satan é démon a-y pé’é la ankò. Mésyé, sa ké bèl !
21. Poukwa nou pé ni tchè-kontan ?
21 Awtik-lasa édé-nou konprann plizyè senbòl ki adan liv a Larévélasyon. Konnyéla nou sav kimoun ki lènmi a Bondyé é nou vwè ka ki ké rivé-yo. A pa ti kontan nou kontan ! Wi, kon Révélasyon 1:3 ka di : « Tchè-kontan pou moun-la ki ka li byen ho sa ki maké adan pwofési-lasa, é pou touséla ki ka tann [...] sa ki maké adan-y » ! Men lèwvwè lènmi a Jéova ké disparèt, ki bénédisyon moun ki fidèl ké jwenn ? Sé sa nou kay vwè adan awtik-la ki ka vin la. Sé ké dènyé a séri-la.
KANTIK 23 Jéhovah commence à régner
a Liv a Larévélasyon ka sèvi èvè senbòl pou palé dè lènmi a Bondyé. Liv a Danyèl kanta li ka édé-nou konprann ka sé senbòl-lasa vlé di. Adan awtik-lasa, nou ké konparé sèwten pwofési ki adan liv a Danyèl èvè sèwten pwofési ki adan liv a Larévélasyon. Konsa sa ké édé-nou vwè kimoun ki lènmi a Bondyé é aprésa nou ké vwè ka ki ké rivé-yo.
b Ondòt biten ki ka montré kè bèt sovaj la ki ni 7 tèt la ka rèprézanté tout sé gouvènman-la, sé kè yo ka di kè i ni « dis kòn ». É byensouvan, adan Labib, lèwvwè yo ka sèvi èvè nonb 10 la sé pou palé dè on biten ki antyè kivédi kè pa ka manké ayen adan.
c Imaj a bèt sovaj la pa ni « kouwòn » asi kòn a-y kon bèt sovaj la ki ni 7 tèt la (Rév. 13:1). I pa ni kouwòn pas i ka vin dè sé 7 prèmyé wa-la é pas sé yo ki ka ba-y pouvwa-la i ni la. (Gadé awtik-la « Qu’est-ce que la bête de couleur écarlate de l’Apocalypse chapitre 17 ? » asi jw.org.)