Ki sajès ki ka gidé vi an nou ?

1. Poukwa noutout bizwen sajès-la ki ka vin dè Bondyé ? (Pwovèb 4:7).

SI SA ja rivé-w dè ni on gwo désizyon a pran, sèten ou mandé Jéova ba-w sajès. É ou byen fèt fè sa ! (Jak 1:5). Mi sa wa Salomon ékri : « Sajès, sé biten-la ki pli enpòwtan la » (li Pwovèb 4:7). Nou ka tou konprann kè Salomon pa té ka palé dè nenpòt ki sajès. I té ka palé dè sajès-la Jéova ka bay la (Pwov. 2:6). Men ès sajès-lasa pé édé-nou rivé about a difikilté nou ka jwenn jòdila ? Wi, é sé sa nou kay vwè adan awtik-lasa.

2. Ki biten on moun pé fè pou ni sajès ?

² On bon mwayen pou on moun pé sa vin saj, sé lè i ka pran tan étidyé é mèt ansègnman a 2 nonm ki té ni onlo sajès an pratik. Prèmyé-la sé Salomon. Labib ka di kè « Bondyé ba Salomon on sajès ki té èstraòwdinè, é i ba-y onlo kapasité toubònman pou i té ni bon jijman » (1 Wa 4:29). Dézyèm moun-la nou ké palé la sé Jézikris. Pa té ni moun asi latè ki té ni plis sajès ki-y (Mat. 12:42). Mi sa on pwofési té ka anonsé anlè-y : « Lèspri a Jéova ké pozé asi-y, lèspri pou ni sajès é entélijans » (Iz. 11:2).

3. Ka nou ké ègzaminé adan awtik-lasa ?

³ Grasa sajès-la Jéova té ba Salomon é Jézi, yo toulédé bay dé bon ti konsèy, é jous a jòdijou, sé konsèy-lasa vréman itil pou nou. Adan awtik-lasa, nou ké ègzaminé sèwten adan sé konsèy-la yo bay la. Sé konsèy-lasa ké édé-nou ba lajan-la é travay-la plas-la ki fo la é vwè-nou on mannyè ki rézonab.

BA LAJAN-LA PLAS-LA KI FO LA

4. Ki diférans ki té ni ant sitiyasyon a Salomon é sitiyasyon a Jézi ?

⁴ Salomon sé té on boug ki té rich toubònman é i té ka viv alèz a-y adan on gran kaz (1 Wa. 10:7, 14, 15). Jézikris li pa té ni granzafè. Dayè pou yonn, i pa menm té ni kaz a-y ki ta-y (Mat. 8:20). Men poutan, yo toulédé té ka lésé byen matéryèl an plas a yo pas yo té ni onlo sajès. Sajès-la yo té ni la té ka sòti menm koté-la : owa Jéova.

5. Kijan Salomon té ka ba lajan-la plas-la ki té fo la ?

⁵ Salomon té ka rèkonnèt kè « lajan sé on pwotèksyon » (Ékl. 7:12). Èvè lajan-la nou ni la nou pé ni sa nou bizwen é délè nou pé fè-nou plézi. Menmsi Salomon té ni onlo lajan toubònman, i té sav kè té ni dòt biten ki té lontan pi enpòwtan ki sa. Mi sa i ékri pa ègzanp : « Préféré ou ni on bon répitasyon ki ou ni onpakèt richès » (Pwov. 22:1). I té rèmawké osi kè pli souvan ki rarman, moun ki enmé lajan toujou vé ni plis, men kèlkèswa sa yo ni, yo pa jen kontan (Ékl. 5:10, 12). I di osi kè fò pa nou pansé kè lajan sé sa ki pi enpòwtan pas kèlkèswa kantité lajan-la nou ni la, nou pé pèd tousa nou ni adan on batzyé (Pwov. 23:4, 5).

6. Kijan Jézi té ka ba byen matéryèl plas-la ki fo la ? (Matyé 6:31-33).

⁶ Jézi té ka ba byen matéryèl plas-la ki fo la. Pa ègzanp, i té ka aprésyé lèwvwè yo té ka ba-y on bon ti manjé (Lik 19:2, 6, 7). On jou, i fè dlo touné an diven é pa té ni pibon diven ki diven-la i té fè la. Sé té lèwvwè i té fè 1^é mirak a-y (Jan 2:10, 11). É jou-la i mò la, lenj-la i té ni asi-y la té ka kouté chè (Jan 19:23, 24). Men a pa byen matéryèl i té ka mèt prèmyé douvan adan vi a-y. Mi sa i ni lokazyon di disip a-y : « Ponmoun pé pa travay kon èsklav pou dé mèt […]. Zò pé pa travay kon èsklav pou Bondyé é pou Lajan » (Mat. 6:24). I anségné osi kè siwvwè nou ka mèt wayòm a Bondyé prèmyé douvan adan vi an nou, Jéova ké ban-nou tousa nou bizwen (li Matyé 6:31-33).

7. Ki bénédisyon Daniel jwenn davwa i té ka ba lajan plas-la ki fo la ?

⁷ Adan pawòl a Bondyé nou ka touvé konsèy ki plen sajès anrapò èvè lajan. Tin onlo frè é sè ki jwenn onpakèt bénédisyon pas yo suiv sé konsèy-lasa. Sé ka a on frè ki sélibatè non a-y sé Daniel. Mi sa i ka èspliké : « Lèwvwè an té jenn, an désidé kè sa ki té’é pi enpòwtan adan vi an mwen sé sèvi Jéova. » Konm Daniel fè ansòt pou vi a-y té rété senp, i té pé itilizé kapasité a-y pou sèvi Jéova, pa ègzanp lè yo té bizwen on pal pou pòté sèkou é pou travay adan Bétèl-la. Mi sa i ka di ankò : « Franchman, an pa jen règrété désizyon-la an té pran la. Sé vré kè an té’é pé gangné onlo lajan si sé sa ki té pi enpòwtan pou mwen, men an pa té’é ni sé zanmi-la an ni la jòdla é an pa té’é kontan kon an kontan la jòdla davwa an mèt Wayòm-la prèmyé douvan adan vi an mwen. Pa ni pon lajan ki pé ban-mwen tchè-kontan kon Jéova ka ban-mwen tchè-kontan. » Ègzanp a Daniel ka montré kè si nou ka mèt lanmityé an nou èvè Jéova avan byen matéryèl, nou ké jwenn onpakèt bénédisyon.

BA TRAVAY-LA PLAS-LA KI FO LA

8. Kijan nou fè sav kè Salomon té ka ba travay-la plas-la ki fo la ? (Éklézyas 5:18, 19).

⁸ Salomon ni lokazyon di kè lèwvwè on moun ka travay rèd sa pé ba-y onlo jwa. É i di kè jwa-lasa ka ‘vin dè Bondyé’ (li Éklézyas 5:18, 19). Mi sa i ni lokazyon ékri osi : « Lè on moun ka travay rèd, sa ka pòté bon biten » (Pwov. 14:23). Salomon té sav sa i té ka di pas sé té on boug ki pa té pè travay ! I konstwi kaz, i planté chan-rézen, i fè jaden, i fè basen pou wouzé sé jaden-lasa é i jou konstwi vil (1 Wa 9:19 ; Ékl. 2:4-6). Sèten i té kontan, pas sa té ka fè onlo travay toubònman. Men Salomon pa té ka konté yenki asi sé biten-lasa pou ni lakontantman poubon. I té ka fè onlo biten osi pou Jéova. Pa ègzanp, i fè-yo konstwi on tanp pou Jéova ki té bèl toubònman é sé-y ki té antèt a pwojé-lasa. Travay-lasa diré 7 an (1 Wa 6:38 ; 9:1). Apré i fè tout kalté travay, ki sé pou Jéova, ki sé pou-y menm, i rivé konprann kè sa ki pi enpòwtan, sé sa nou ka fè pou Jéova. Sé pousa, mi sa i maké : « Apré tousa an fin di la, mi sa ki pi enpòwtan : Krenn vré Dyé-la é suiv komandman a-y » (Ékl. 12:13).

9. Kijan Jézi fè ansòt pou ba travay-la plas-la ki té fo la ?

⁹ Jézi té ka travay rèd. Lèwvwè i té jenn, i té ka travay bwa (Mawk 6:3). I lévé adan on gran fanmi é sèten manman-y é pap’a-y té ka aprésyé pal-la i té ka ba-yo la. Konm travay-la i té ka fè la té pawfè, onlo moun dwèt té ka kouri dèyè-y pou i té travay pou yo ! Nou ka imajiné jan Jézi dwèt té enmé travay-la i té ka fè la. Men menmsi i té ka pran tan a-y pou fè travay a-y byen konm i fo, i toujou té ka fè ansòt pou i ni tan pou sèvi Jéova (Jan 7:15). Plita, lèwvwè i té ka préché aplentan, mi konsèy-lasa i ba sé moun-la ki té ka kouté-y la : « Travay, men pa travay pou manjé ki ka gaté, travay pou manjé-la ki ka rété pou lavi étèwnèl » (Jan 6:27). É adan sèwmon-la i fè anlè montangn-la, i di : « Sanblé trézò adan syèl-la plito » (Mat. 6:20).

10. Ki pwoblèm nou pé rivé a jwenn lèwvwè nou sé on moun ki ka travay rèd ?

¹⁰ Lè nou ka mèt konsèy a Jéova ki plen sajès an pratik, nou ka rivé ba travay-la plas-la ki fo la. Antankè krétyen, Labib ka ankourajé-nou « travay rèd » é i ka ankourajé-nou « fè on bèl travay » (Éféz. 4:28). Si nou sé on moun ki onèt é si nou ka travay rèd, sèten patron an nou ké vwè sa é pétèt kè i ké di-nou kè i ka aprésyé jan-la nou ka travay la. Nou té’é pé aksèpté fè plis lè adan travay an nou pou patron-la palé anbyen dè Témwen a Jéova. Men siwvwè akòz dè sa nou pa ni asé tan pou fanmi an nou é pou Jéova fò-nou ké fè chanjman pou nou pé sa ni plis tan pou sé biten-la ki pi enpòwtan la.

11. William pwofité dè bèl ègzanp a on frè ki té sav mèt travay-la an plas-la ki fo la. Ka ègzanp a frè-la aprann-li ?

¹¹ On jenn frè non a-y sé William té ka travay ba on frè ki ansyen é ki té sav ba travay-la plas-la ki fo la. Lè William ka palé dè frè-lasa mi sa i ka di : « [Frè-lasa] té sav lésé travay-la an plas a-y é sé on bèl ègzanp adan domenn-lasa. I ka travay rèd é konm i ka travay byen menm, i ka antann-li èvè sé moun-la i ka travay ba yo la. Men lèwvwè i fin jouné a-y, i sav mèt travay-la akoté pou i pé sa pran tan pou fanmi a-y é pou Jéova. É zò sav on biten ? A pa ti kontan frè-lasa kontan ! An pa gè konnèt onlo moun ki ni tchè-kontan konsab ! »

AN-NOU VWÈ-NOU ON MANNYÈ KI RÉZONAB

12. a) Ka ki ka montré kè Salomon té ka vwè-y on mannyè ki rézonab ? b) Kijan Salomon vin pèd bèl létadèspri-la i té ni la ?

¹² Lèwvwè Salomon té ka adoré Jéova é kè i té fidèl a-y, i té ka vwè-y limenm on mannyè ki rézonab. Lèwvwè i té jenn, i té ka rèkonnèt kè i pa té ni asé èkspéryans é i mandé Jéova gidé-y (1 Wa 3:7-9). Lèwvwè i té toufré vin wa, i té sav kijan sa té danjéré lèwvwè on moun té ni òwgèy adan tchè a-y. Mi sa i maké : « Avan malè, ni òwgèy, é avan on moun pran mové chimen, i ka ni mépri pou lézòt » (Pwov. 16:18). Men malérèzman, kèlkètan apré, limenm pa tchenn kont dè konsèy-lasa. I vin ni òwgèy an tchè a-y é i pa té ka rèspèkté komandman a Jéova ankò. Pa ègzanp, ni on lwa ki té ka di kè an Izrayèl, fò pa on wa té « mayé èvè onlo madanm […] pou sa pa détouné tchè a-y » (Dét. 17:17). Men Salomon pa rèspèkté lwa-lasa. I vin ni 700 madanm é 300 konkibin, é anplisdisa, onlo adan sé madanm-lasa té ka adoré fo-dyé ! (1 Wa 11:1-3). Pétèt kè i pansé kè i ké pé « jéré tousa ». Antouka, konm i pa obéyi Jéova, i fin pa péyé sa (1 Wa 11:9-13).

13. Jézi té ni imilité toubònman. Ka ègzanp a-y ka aprann-nou ?

¹³ Jézi toujou té ka vwè-y on mannyè ki rézonab. Lè i té ka sèvi Jéova an syèl-la, avan i té vin asi latè, i fè dé biten ki té vréman èstraòwdinè. « Bondyé pasé pa-y pou kréyé tout sélézòt biten-la an syèl-la é asi latè » (Kol. 1:16). Lèwvwè i pran lèbatèm, i ka sanm sa tout sé biten-la i té fè la èvè Pap’a-y an syèl-la wouvin an lèspri a-y (Mat. 3:16 ; Jan 17:5). Men Jézi pa vin ni òwgèy lèwvwè i mété-y ka sonjé tout sé biten-lasa. Okontrè, i pa janmé té ka ba lézòt lenprésyon kè i té méyè ki yo. I èspliké disip a-y kè lé i vin si latè, i « pa vin pou yo sèvi-y, men pou sèvi é pou bay vi a-y kon on ranson pou libéré onlo moun » (Mat. 20:28). É konm i té ni imilité, i té ka rèkonnèt osi kè i pa té pé pran asi-y pou fè ayen (Jan 5:19). Jézi té ni imilité toubònman ! Mi on bèl ègzanp mi ! Asiré sèten, noutout vlé suiv ègzanp a-y.

14. Ni on biten Jézi di ki ka édé-nou vwè-nou on mannyè ki rézonab. Ki biten ésa ?

¹⁴ Jézi aprann disip a-y kijan sa enpòwtan kè yo osi yo vwè-yo on mannyè ki rézonab. On jou, i ni lokazyon di-yo : « [Bondyé] jous ka konté chak branch chivé a zòt » (Mat. 10:30). Sé pawòl-lasa ka rasiré-nou, siwtou si nou ni tandans a pansé kè nou pa vo ayen. Sa Jézi té di ka montré kè Pap’an nou ki an syèl-la ka enkyété-y pou nou é kè nou ka konté onlo pou-y. Si Jéova ka pèwmèt-nou adoré-y é kè i ka pansé kè nou ka mérité viv adan mond nouvo-la, fò pa nou jen pansé kè Jéova ni tò.

15. a) Tou dè Gad la ankourajé-nou a vwè-nou on mannyè ki rézonab. Èspliké kijan i fè sa. b) Kon nou ka vwè-y asi sé imaj-la ki asi paj 24 la, si nou ka akwè-nou nou ké raté onlo bon biten. Ki biten ésa ?

¹⁵ Ni 15 lanné dè sa, Tou dè Gad la té ka ankourajé-nou a vwè-nou on mannyè ki rézonab. Mi sa i té ka di : « Nou pa dwètèt pansé kè nou méyè ki lézòt sinon nou ka riské dè vin on moun ki ka akwè-y ; é anmenmditan, nou pa dwètèt ka vwè-nou kon on moun ki pa vo ayen, sinon sa ké kasé 2 bra an nou. Fò-nou vwè-nou on mannyè ki rézonab, sa vé di kè fò-nou konnèt byen kikoté kò an nou bon é ki kikoté kò an nou pa gè bon. Mi kijan on sè ka vwè sa : “An pa pibon moun ki ni asi latè ; men an pa on mové moun nonplis. An sav an ni kalité an mwen é défo an mwen kon toutmounc.” » Ès ou ka vwè kijan sa pé fè-w dibyen lè ou ka vwè-w on mannyè ki rézonab ?

16. Poukwa Jéova ka ban-nou dé ti konsèy ki plen sajès ?

¹⁶ Adan Pawòl a-y, Jéova ka ban-nou dé bon ti konsèy ki plen sajès. Poukwa i ka fè sa ? Pas i enmé-nou é pas i vé nou ni tchè-kontan (Iz. 48:17, 18). Méyè biten nou pé fè pou nou pé sa ni tchè-kontan poubon sé si nou ka kontinyé mèt Jéova prèmyé douvan adan vi an nou. Si nou ka fè sa, nou pé’é jwenn difikilté moun ki pa’a lésé lajan an plas a-y ka jwenn. Nou pé’é jwenn difikilté moun ki pa’a lésé travay an plas a-y ka jwenn nonplis. É nou pé’é jwenn difikilté moun ki ka akwè-yo oben moun ki ni lenprésyon kè yo pa vo ayen ka jwenn. Alò fò-nou byen désidé a aji èvè sajès é a fè Pap’an nou Jéova plézi ! (Pwov. 23:15).