Kijan sé sèwvitè a siwkonskripsyon la ka édé-nou ?

Souvan, adan Lézékriti grèk (Nouvo Tèstaman), yo ka palé dè lapòt Pòl é dè Bawnabas. Sé té dé sèwvitè ki té ka déplasé pou vizité kongrégasyon ki té ni o prèmyé syèk. Poukwa yo té ka fè sa ? Pas yo té enkyèt pou frè é sè a yo é yo té vlé sav si tout biten té kay byen pou yo. Pòl ni lokazyon di : « An nou rètouné vwè sé frè-la [...] pou nou vwè kijan yo yé » (Akt 15:36). I té paré a fè on pakèt kilomèt pou-y té pé sa konsolidé fwa a yo. Jòdijou, sé èvè menm objèktif-la sé sèwvitè a siwkonskripsyon la ka vizité sé kongrégasyon-la.

Yo ka vin ban-nou plis fòs. Chak sèwvitè a siwkonskripsyon ka okipé dè 20 kongrégasyon apépré ; yo ka pasé on simenn èvè chak kongrégasyon, dé fwa an lanné-la. Èkspéryans a yo é ta madanm a yo (si yo mayé) vréman itil pou nou. Yo enmé fè konésans èvè toutmoun, yo enmé préché èvè nou é fè étid biblik èvè nou. Yo ka édé chak moun an kongrégasyon-la pèwsonèlman é pousa, yo ka rann-yo vizit èvè sé ansyen-la. Ki sé lasanblé, ki sé réinyon, diskou a yo ka ankourajé-nou (Akt 15:35).

Yo ka entérésé-yo a toutmoun. Sé sèwvitè a siwkonskripsyon la ka édé moun ki an kongrégasyon-la raproché-yo dè Jéova. Yo ka réini èvè sé ansyen-la é sé asistan ministéryèl la pou analizé ki pwogré ki fèt é pou ba-yo konsèy pou édé-yo asimé rèsponsabilité a yo pli byen. Yo ka édé sé pyonyé-la vin pli éfikas an prédikasyon. Yo enmé fè konésans èvè moun ki ka koumansé vin réinyon é yo ka ranségné-yo pou yo sav ki pwogré sé moun-lasa ka fè. Chak sèwvitè a siwkonskripsyon ka fè onlo sakrifis pas i ka konsidéré i sé « on bon kolèg ki ka travay èvè [nou] pou entéré [an nou] » (2 Korentyen 8:23). Nou pé imité fwa a yo é menmjan ki yo, nou pé manifèsté on gran rèspé pou Bondyé (Ébré 13:7).

• Poukwa sé sèwvitè a siwkonskripsyon la ka vizité sé kongrégasyon-la ?

• Ka pou-w fè pou pwofité dè vizit a yo ?