Liv a Larévélasyon : kijan liv-lasa ké konsèwné-w dèmen ?

1. Ki désizyon enpòwtan fò toutmoun pran ?

JÒDIJOU, sé moun-la ni on désizyon enpòwtan a pran : ès yo ké soutyenn Jéova, é ès yo ké rèkonnèt kè i andwa gouvèné antankè Gran Mèt a linivè, oben ès yo ké préféré soutyenn Satan Lèdyab, lènmi a Bondyé ki mové toubònman ? Pa ni ponmoun ki pé di kè i pa’a mélanjé-y adan sa pas toutmoun oblijé fè on chwa. É sèlon désizyon-la yo ké pran la, swa yo ké viv pou touttan, swa yo ké disparèt (Mat. 25:31-33, 46). Pannan « gwo tribilasyon-la », swa yo ké ni mak-la pou yo rété vivan, swa yo ké ni mak-la pou yo détwi (Rév. 7:14 ; 14:9-11 ; Ézék. 9:4, 6).

2. a) Ka Ébré 10:35-39 ka ankourajé-nou fè ? b) Poukwa liv a Larévélasyon ni onlo valè pou nou ?

² (Li Ébré 10:35-39.) Si ou ka soutyenn Jéova, ou fè on bon chwa. Men pétèt ou té’é byen vlé kè lézòt osi pran désizyon-lasa. Ou pé sèvi èvè liv a Larévélasyon pou édé-yo. Liv-lasa bèl toubònman ! I ka montré sa ki kay rivé moun ki kont Jéova é i ka èspliké osi ki bénédisyon moun ki fidèl é ki ka soutyenn dominasyon a Jéova ké risivwè. Sa enpòwtan toubònman kè nou ègzaminé sa liv-lasa ka anségné pas sa ké ban-nou plis balan pou nou kontinyé sèvi Jéova. Anplisdisa, nou ké pé sèvi èvè sa liv-lasa ka anségné pou édé dòt moun a pran bon désizyon-la, é pou yo kontinyé sèvi Jéova.

3. Ka nou ké vwè adan awtik-lasa ?

³ Adan awtik-lasa, nou ké ègzaminé sé kèsyon-lasa : Ki bénédisyon moun ki ka soutyenn wayòm a Bondyé ké jwenn ? Ka ki ké rivé moun ki chwazi soutyenn bèt sovaj wouj la yo ka palé adan liv a Larévélasyon ?

ON BÈL LANDÈMEN KA ATANN MOUN KI FIDÈL A JÉOVA

4. Ki gwoup-moun ki ka adoré Jéova Jan ka vwè an syèl-la èvè Jézi ?

⁴ Jan ka vwè on vizyon, é adan vizyon-lasa i ka vwè 2 gwoup-moun ki ka adoré Jéova, ki ka soutyenn dominasyon a-y é yo ka ba sé moun-lasa lavi étèwnèl. Adan prèmyé gwoup-la ni 144 000 moun é Bondyé voyé lèspri sen a-y asi yo pou yo vin wen (Rév. 7:4). Yo pran-yo asi latè pou yo pé sa fòwmé on gouvènman oben on wayòm an syèl-la èvè Jézi. Sé 144 000 la é Jézi ka dirijé latè ansanm (Rév. 5:9, 10 ; 14:3, 4). Adan vizyon-la, Jan ka vwè-yo doubout anlè Mòn Syon la an syèl-la owa Jézi (Rév. 14:1).

5. Talè, ka ki ké rivé sé krétyen wen la ki asi latè la ?

⁵ Dépi an tan a sé apòt-la jiska jòdijou, Bondyé chwazi milyé é milyé moun pou fè pawti a sé 144 000 la (Lik 12:32 ; Wom. 8:17). Men Jan aprann kè pannan sé dènyé jou-la, pé’é ni onlo krétyen wen asi latè. Avan gwo tribilasyon-la koumansé, yo ké mèt dènyé so-la asi yo é sa ké montré kè Jéova aksèpté-yo (Rév. 7:2, 3 ; 12:17). É aprésa, lèwvwè moman-la ké rivé, yo ké ay an syèl-la pannan gwo tribilasyon-la pou jwenn tou sélézòt krétyen wen la ki ja mò la é ki té fidèl. A moman-lasa, yo ké gouvèné èvè Jézi adan wayòm a Bondyé (Mat. 24:31 ; Rév. 5:9, 10).

6-7. a) Ki gwoup-moun Jan ka vwè aprésa, é ka yo ka di asi sé moun-lasa ? b) Poukwa sé krétyen wen la é « gran-foulmoun-la » présé vwè sa ki maké an Révélasyon chapit 7 réyalizé ?

⁶ Apré i vwè gwoup a sé krétyen-la yo chwazi la pou ay viv an syèl-la, Jan ka vwè on « gran-foulmoun ». Gwoup-lasa pa kon gwoup a sé 144 000 la pas tèlman ni moun adan gwoup-lasa, pa ni mwayen konté-yo (Rév. 7:9, 10). Mi sa yo ka di Jan asi yo : « Sé moun-lasa, sé yo ki sòti anba gwo tribilasyon-la, yo lavé gran wòb a yo é yo blanchi sé wòb-lasa adan san a Timouton-la » (Rév. 7:14). Gran-foulmoun-lasa, sé moun ki ké rété vivan apré « gwo tribilasyon-la », yo ké kontinyé viv asi latè é yo ké trapé onpakèt bénédisyon (Sòm 37:9-11, 27-29 ; Pwov. 2:21, 22 ; Rév. 7:16, 17).

⁷ Révélasyon chapit 7 ka palé dè sèwten évènman. Ki Bondyé chwazi-nou pou ay viv an syèl-la ki i chwazi-nou pou viv asi latè, ès nou ja ka vwè-nou ka viv sé évènman-lasa ? Men sé sa menm pou nou fè. Mésyé, lè sa ké fèt, sé ké on bèl biten pou moun ki ké ay viv an syèl-la é pou moun ki ké viv asi latè ! A pa ti kontan nou ké kontan kè nou té chwazi soutyenn wayòm a Bondyé ! Aprézan, an-nou vwè ki dòt biten liv a Larévélasyon ka aprann-nou asi gwo tribilasyon-la (Mat. 24:21).

MOUN KI KONT BONDYÉ KÉ DISPARÈT É SÉ KÉ ON HONTÉ POU YO

8. Kijan gwo tribilasyon-la ké koumansé é kijan lamajorité a sé moun-la ké réyaji ?

⁸ Kon nou vwè-y adan awtik a simenn pasé, talè, sé nasyon-la kay ataké Gran Babilòn-la ki ka rèprézanté tout sé fo rèlijyon-la ki asi latè (Rév. 17:16, 17). Lèwvwè évènman-lasa ké rivé, sé ké koumansman a gwo tribilasyon-la. Lè sé moun-la ké vwè sa, ès onlo adan yo ké mèt-yo ka sèvi Jéova ? Awa ! Okontrè ! Révélasyon chapit 6 ka di kè pannan péryòd-lasa ki ké enpòwtan toubònman, moun ki pa’a sèvi Jéova ké kouri kaché anba zèl a sistèm politik la é anba zèl a sistèm a lajan-la pou édé-yo. Adan liv a Larévélasyon, yo ka konparé sé 2 sistèm-lasa èvè montangn. Konm sé moun-la pé’é soutyenn wayòm a Bondyé, Jéova ké vwè-yo kon lènmi a-y (Lik 11:23 ; Rév. 6:15-17).

9. Poukwa pannan gwo tribilasyon-la, sé moun-la ké vwè kè sèwvitè a Jéova pa kon tout sélézòt moun-la é ka ki ké rivé sèwvitè a Bondyé ?

⁹ Pannan gwo tribilasyon-la, a pa ti rèd biten-la ké rèd, é sèwvitè a Bondyé pé’é kon sélézòt moun-la. Poukwa nou ka di sa ? Pas sé enki yo ki ké kontinyé adoré Jéova é yo ké rèfizé soutyenn bèt sovaj la (Rév. 13:14-17). Sé moun-la ki kont Jéova la pé’é pran sa é yo ké anrajé toubònman. Sé nasyon-la ké mèt-yo ansanm pou fòwmé on gwoup é yo ké ataké sèwvitè a Bondyé toupatou si latè. Labib ka kriyé évènman-lasa atak a Gòg dè Magòg (Ézék. 38:14-16).

10. Dapré Révélasyon 19:19-21, kijan Jéova ké okipé-y dè moun ki ka ataké pèp a-y ?

¹⁰ Kijan Jéova ké réyaji lè i ké vwè-yo ka ataké pèp a-y san pityé ? Mi sa limenm ka di : « An ké fè gwo kòlè toubònman » (Ézék. 38:18, 21-23). Chapit 19 a liv a Larévélasyon ka di-nou sa ki ké pasé apré : Jéova ké voyé Gason a-y défann sèwvitè a-y é krazé lènmi a yo. Lè Jézi ké vin pou ataké-yo, « sé lawmé-la ki an syèl-la » ké vin èvè-y, kivédi sé zanj-la ki fidèl la é sé 144 000 la (Rév. 17:14 ; 19:11-15). Kijan lagè-lasa ké fin ? Kèlkèswa moun é kèlkèswa òwganizasyon ki kont Jéova, i ké détwi-yo a san pou san (li Révélasyon 19:19-21).

APRÉ LAGÈ-LA KÉ NI ON MAYÉ

11. Adan liv a Larévélasyon, ki évènman ki pi enpòwtan ?

¹¹ Imajiné jan sèwvitè a Jéova ki rété fidèl a-y ké ni tchè-kontan lèwvwè tout lènmi a Bondyé pé ké ka ègzisté ankò ! Aaa mésyé sa ké bèl menm ! An syèl-la, yo ké kriyé tèlman yo ké kontan lè yo ké détwi Gran Babilòn-la. Men ni ondòt évènman ankò ki ké fè-yo ni tchè-kontan plis ankò (Rév. 19:1-3). Sé évènman-la ki pli enpòwtan la adan liv a Larévélasyon : « mayé a Timouton-la » (Rév. 19:6-9).

12. Dapré Révélasyon 21:1, 2, kitan mayé a Timouton-la ké fèt ?

¹² Kitan mayé a Timouton-la ké fèt ? Jis avan lagè a Awmagédon koumansé, tout sé 144 000 wen-la ké an syèl-la. Men a pa a moman-lasa mayé-la ké fèt (li Révélasyon 21:1, 2). Mayé-lasa ké fèt apré Awmagédon, lèwvwè yo ké détwi tout lènmi a Bondyé (Sòm 45:3, 4, 13-17).

13. Lè mayé-lasa ké fèt, ki biten ki ké koumansé an menm balan-la ?

¹³ Lè mayé-lasa ké fèt, ki biten ki ké koumansé an menm balan-la ? Mayé-lasa sé ké on senbòl ki ka montré kè menmjan on mayé ka ini on misyé èvè on madanm, menmjan-la osi Jézi Kris, Wa-la, ké ini èvè sé 144 000 la pas sé yo ki ka rèprézanté madanm-mayé-la. Apawtiw dè moman-lasa, Kris é sé 144 000 la ké koumansé gouvèné ansanm é yo ké fè sa pannan 1 000 an (Rév. 20:6).

ON VIL KI BÈL TOUBÒNMAN KI KÉ PÒTÉ ONLO BON BITEN BA-W

14-15. Adan Révélasyon chapit 21, èvè ki biten yo ka konparé sé 144 000 la ? (gadé imaj-la ki anlè po a jounal-la).

¹⁴ Adan chapit 21 la, yo ka konparé sé 144 000 la èvè on vil ki bèl toubònman yo ka kriyé « Nouvo Jérizalèm-la » (Rév. 21:2, 9). Yo konstwi vil-lasa asi 12 wòch ki ka sèvi-y fondasyon, é asi sé 12 wòch-lasa « té ni 12 non, non a sé 12 apòt a Timouton-la ». Lè Jan vwè sa, sèten sa mawké-y. Poukwa nou ka di sa ? Pas i vwè non a-y maké asi yonn adan sé wòch-lasa. Mi on bèl lonnè mi ! (Rév. 21:10-14 ; Éféz. 2:20).

¹⁵ Vil-lasa sé on senbòl é i pa’a sanm pondòt vil. Pi gran lari a-y fèt enki èvè lò, i ni 12 pòt é chak pòt-la sé on pèwl é yo dékoré miray a-y é fondasyon a-y èvè pyè ki ni onlo valè. « Longè a-y, lajè a-y, é hotè a-y té menm biten » (Rév. 21:15-21). Men ou té’é di ka manké on biten ! Sé pousa, mi sa Jan èspliké : « An pa vwè tanp adan vil-la pas sé Jéova Dyé, Toupuisan-la, é Timouton-la ki sé tanp a vil-la. É vil-la pa té bizwen ni solèy-la ni lalin-la pou kléré-y, pas sé glwa a Bondyé ki té ka kléré-y, é sé Timouton-la ki té lanp a-y » (Rév. 21:22, 23). Sé moun-la ki ka fè pawti a Nouvo Jérizalèm-la ké owa Jéova (Ébr. 7:27 ; Rév. 22:3, 4). Sé pousa yo ka di adan vèwsé-la kè Jéova é Jézi sé tanp a vil-la.

16. Ki byenfé limanité ké jwenn pannan sé 1 000 an la ?

¹⁶ A pa ti enmé sé krétyen wen la enmé pran tan pou réfléchi asi vil-lasa ! Men sa dwètèt entérésé séla ki ni lèspwa dè viv asi latè osi. Lèwvwè sé 1 000 an la ké koumansé, Nouvo Jérizalèm-la ké pwokiré-yo onlo byenfé. Pou palé dè tout sé byenfé-lasa, yo ka pran imaj a on flèv, « flèv dlo a lavi ». Asi chak bò a flèv-lasa ni « pyébwa a lavi » é fèy a sé pyébwa-la té la « pou géri sé nasyon-la » (Rév. 22:1, 2). Toutmoun ki ké ka viv asi latè a moman-lasa ké pé pwofité dè tousa. É piti-a-piti, séla ki ké kontinyé obéyi ké vin pawfè. Pé’é tini ni maladi, ni doulè ankò é ponmoun pé’é ka pléré pas i anpenn (Rév. 21:3-5).

17. Kimoun ki ké pwofité dè tout sé byenfé-la wayòm a Bondyé ké pòté pannan sé 1 000 an la ? (Révélasyon 20:11-13).

¹⁷ Kimoun ki ké pwofité dè sé bèl biten-lasa ? Dabò pou yonn sé gran foulmoun-la, kivédi tout sé moun-la ki ké pasé Awmagédon vivan. É si ni timoun ki fèt adan paradi-la, yo ké pwofité dè sa osi. Men Révélasyon chapit 20 ka di osi kè moun ki mò ké résisité (li Révélasyon 20:11-13). Kimoun ki ké résisité ? Sé « moun [ki] jis », kivédi moun ki rété fidèl a Jéova é « moun ki pas jis » kivédi, moun ki pa ni lokazyon aprann konnèt Jéova (Akt 24:15 ; Jan 5:28, 29). Men ès sa vé di kè tout sé mò-la ké résisité pannan sé 1 000 an la ? Awa, a pa konsa sa ké pasé. Moun ki rèfizé sèvi Jéova avan yo té mò é ki pa jen démòd pé ké résisité pas yo té pé aprann konnèt Jéova men yo pa té vlé. É mannyè yo chwazi viv vi a yo montré kè yo pa té mérité viv adan paradi-la (Mat. 25:46 ; 2 Tés. 1:9 ; Rév. 17:8 ; 20:15).

DÈNYÉ ÉPRÈV-LA

18. Lè yo ka di lézimen ké wouvin vivan an bout a sé 1 000 an la, ka sa vé di ?

¹⁸ An bout a sé 1 000 an la, toutmoun asi latè ké vin pawfè. Ponmoun pé’é ka soufè ankò akòz dè péché-la Adan té fè la (Wom. 5:12). Malédisyon-la ki té ka fè-nou soufè akòz dè péché-lasa ké disparèt é pé’é rété pon tras. Sé konsa lèwvwè sé 1 000 an la ké fin, toutmoun asi latè ké wouvin vivan. Sa vé di kè yo ké vin pawfè (Rév. 20:5).

19. Fò toutmoun pasé pa on dènyé éprèv. Poukwa sa nésésè ?

¹⁹ Nou sav kè Jézi rété fidèl magré tout éprèv Dyab-la mèt douvan a-y pou anpéché-y rété fidèl. Men lè toutmoun ké pawfè, ès yo ké kontinyé suiv Bondyé si Dyab-la ka mèt fidélité a yo a léprèv ? Sé sa chakmoun ké ni a montré lèwvwè yo ké lagé Satan é kè i ké sòti adan tou san fon la an bout a sé 1 000 an la (Rév. 20:7). Moun ki ké rété fidèl a Jéova pannan dènyé éprèv-lasa ké ni lavi étèwnèl é yo ké pwofité dè sa Labib ka kriyé vré libèté-la (Wom. 8:21). É moun aprézan ki ké ba Bondyé do, i ké détwi-yo pou touttan, menmjan i ké détwi Dyab-la é tout démon a-y (Rév. 20:8-10).

20. Ka ou ka rèsanti apré tout sé bèl biten-la nou vwè la adan liv a Larévélasyon ?

²⁰ Apré tousa nou vwè adan liv a Larévélasyon, kijan ou ka santi-w ? Ès ou ja présé vwè kijan sa ki maké adan sé pwofési-lasa ké réyalizé pou-w pwofité dè sa vou osi ? Ès sa pa ba-w anvi envité dòt moun vin adoré Jéova èvè nou ? (Rév. 22:17). Aprézan nou vwè bèl landèmen-la ki ka atann-nou la, nou ja présé é nou anvi di menm biten ki lapòt Jan : « Amèn ! Vini, Ségnè Jézi » (Rév. 22:20).