AWTIK POU ÉTIDYÉ 24
Jéova, pli bèl ègzanp a moun ki ka padonné
« Vou, O Jéova, ou enmé sa ki byen é ou paré a padonné ; ou ka montré tout lanmou fidèl la ou ni la pou tout moun ki ka kriyé-w » (SÒM 86:5).
KANTIK 42 Prière des serviteurs de Dieu
ON TI LIDÉ ASI SA NOU KAY VWÈa
1. Ka Wa Salomon ka aprann-nou adan Éklézyas 7:20 ?
MI SA Wa Salomon maké : « Pa ni pon nonm jis asi latè ki toujou ka fè lèbyen é ki pa’a jen péché » (Ékl. 7:20). A pa jé, sa vré menm ! Noutout nou ka fè péché (1 Jan 1:8). Alò sa ka rivé noutout dè fè Bondyé lapenn oben dè fè ondòt moun lapenn, kifè, nou bizwen kè yo padonné-nou.
2. Lèwvwè on zanmi an nou ka padonné-nou, ka nou ka rèsanti ?
2 Ès ou ka sonjé on jou ou fè on zanmi a-w lapenn ? Konm ou té anvi rété bon bon zanmi èvè-y, sèten ou mandé-y padon èvè tout tchè a-w. É ka ou rèsanti lè ou vwè kè zanmi a-w té dakò pou padonné-w ? Sèten ou santi-w soulajé é ou té kontan toubònman.
3. A ki kèsyon nou ké réponn adan awtik-lasa ?
3 Noutout nou anvi kè Jéova vin méyè zanmi an nou. Men dépawfwa nou ka di oben nou ka fè dé biten ki ka fè-y lapenn. Alò, kijan nou pé sèten kè Jéova anvi padonné-nou ? Lè Jéova ka padonné on moun é lèwvwè nou nou ka padonné on moun, a pa menm biten-la. Poukwa nou ka di sa ? É kimoun Jéova ka padonné ? Adan awtik-lasa, nou ké réponn a sé kèsyon-lasa.
JÉOVA TOUJOU PARÉ A PADONNÉ
4. Jéova toujou paré a padonné. Poukwa nou pé sèten dè sa ?
4 Labib ka ban-nou on garanti : Jéova toujou paré a padonné. Lèwvwè i fè Moyiz konnèt-li asi Mòn Sinayi-la, mi sa i mandé on zanj di Moyiz : « Jéova, Jéova, on Bondyé ki ka aji èvè pityé é ki ka pran penn a moun, ki pa ka fè kòlè vit, ki plen lanmou, on lanmou ki fidèl é ki toujou ka di lavérité ; i ka aji èvè plizyè milyé moun èvè on lanmou ki fidèl, i ka padonné lè on moun fè érè, lè on moun pa rèspèkté lwa a-y é lè on moun péché » (Ègz. 34:6, 7). Jéova sé on Bondyé ki ni onlo bonté é ki ni onlo mizérikòd. I toujou paré a padonné moun ki ka rèpanti-yo (Néém. 9:17 ; Sòm 86:15).
Jéova konnèt tousa ki ja pasé adan vi an nou ki ka fè kè nou ni pèwsonalité-la nou ni la (gadé paragraf 5 la).
5. Dapré Sòm 103:13, 14, ka Jéova sav byen é ka sa ka ba-y anvi fè ?
5 Konm sé Jéova ki kréyé-nou, pa ni ayen i pa konnèt asi nou. Ou ka imajiné sa ! Jéova konnèt tout ti détay asi chakmoun asi latè ! (Sòm 139:15-17). I konnèt ki défo nou pran owa fanmi an nou. Anplisdisa, i sav tousa ki pasé adan vi an nou é ki ka fè kè nou ni pèwsonalité-la nou ni la. Konm Jéova konnèt lézimen byen menm, ka sa ka ba-y anvi fè ? Sa ka pousé-y aji èvè mizérikòd épi nou (Sòm 78:39 ; li Sòm 103:13, 14).
6. Ka ki ka montré kè Jéova anvi padonné-nou ?
6 Jéova anvi padonné-nou toubònman é nou ni on prèv ki ka montré sa. I sav kè sé akòz dè Adan, prèmyé nonm-la kè nou anba jouk a péché-la é anba jouk a lanmò (Wom. 5:12). Nou pé pa libéré-nou noumenm an nou dè sa é nou pé pa fè sa pou ponmoun nonplis (Sòm 49:7-9). Men konm Bondyé enmé-nou é kè i ni onlo konpasyon pou nou, i pran sèwten dispozisyon pou libéré-nou. Men ka i fè konsa ? Ében an Jan 3:16, yo ka di-nou kè i voyé sèl gason-la i té ni la mò an plas an nou (Mat. 20:28 ; Wom. 5:19). Dispozisyon-la i pran la ka libéré lézimen dè péché-la é dè lanmò siwvwè yo ka montré kè yo ni fwa an Jézikri (Ébr. 2:9). Jan-la Jézi mò la té rèd toubònman é sé té on honté ! Alò, nou ka imajiné jan Jéova dwèt soufè lè i vwè tousa yo fè gason a-y. É nou ka tou konprann kè i pa té’é jen lésé gason a-y mò siwvwè i pa té ni lentansyon padonné-nou.
7. Adan Labib, nou ka touvé ègzanp a moun ki fè péché ki grav é Jéova padonné-yo. Bay déotwa ègzanp.
7 Jéova padonné onlo moun ki fè péché ki grav. Nou ka touvé ègzanp a yo adan Labib (Éféz. 4:32). Lè ou ka réfléchi asi sa, kimoun ki ka vin an lèspri a-w ? Pétèt kè ou ka sonjé Wa Manasé. Misyé-lasa té mové é a pa ti biten i fè kont Jéova ! I mété-y ka adoré fo-dyé é i ankourajé dòt moun fè sa osi. I jous sakrifyé timoun a-y pou sé fo-dyé-la. Anplisdisa, i mèt on idòl adan tanp a Jéova. Mi sa Labib ka di asi Manasé : « I fè onlo onlo mové biten kè Jéova pa té enmé, èspré pou fè-y fè kòlè » (2 Kron. 33:2-7). Men, tibwen tan apré, lèwvwè Manasé rèpanti-y poudèbon, Jéova padonné-y volontyé. I jous fè-y wouvin wa (2 Kron. 33:12, 13). Pétèt osi ou ka sonjé David. I fè onlo péché ki té grav toubònman. Pa ègzanp, i fè adiltè é i tchouyé on moun. Men lèwvwè David rèpanti-y poudèbon é kè i rèkonnèt kè i té péché kont Jéova, Jéova padonné-y (2 Sam. 12:9, 10, 13, 14). Tout sé ègzanp-lasa ka montré-nou on mannyè ki klè kè Jéova toujou paré a padonné. É kon nou ké ni lokazyon vwè, lè Jéova ka padonné on moun, sa pa ni ayen a vwè èvè lè nou nou ka padonné on moun.
PA NI PONMOUN KI PÉ PADONNÉ-NOU KON JÉOVA KA FÈ-Y
8. Poukwa pa ni ponmoun ki plibyen plasé ki Jéova pou jijé lézòt ?
8 Jéova sé « Jij a tout latè » (Jén. 18:25). Fò on bon jij konnèt sé lwa-la byen menm. Jéova sé Jij an nou é i konnèt tout sé lwa-la byen menm piskè sé-y ki mété-yo anplas (Iz. 33:22). Pa ni ponmoun ki konnèt sa ki byen é sa ki dwèt plibyen ki Jéova. Dè ki biten on bon jij bizwen ankò ? Pou i jijé byen konm i fo, fò i konnèt tousa ki pasé avan i jijé on afè. É konm Jéova konnèt tousa ki ka fèt, nou pé di kè sé méyè jij ki tini.
9. Jéova pa kon sé jij-la ki asi latè-la. Asi ki biten i ka bazé-y pou di si i ka padonné on moun oben si i pa’a padonné-y ?
9 Jéova pa kon sé jij-la ki asi latè la. Lèwvwè i ka jijé on afè, i konnèt tousa ki pasé byen menm (Jén. 18:20, 21 ; Sòm 90:8). Lézimen ka jijé parapòt a sa yo ka vwè oben parapòt a sa yo ka tann men li Jéova, i pa konsa. I sav byen kè sa on moun ka fè ka dépann dè plizyè biten. Pa ègzanp, moun-lasa pé ka aji kon i ka aji la parapòt a sa i pran koté fanmi a-y pas chyen pa’a fè chat. Anplisdisa, koté-la i ka rété la, jan-la yo lévé-y la é sa i ka rèsanti pé jouwé on wòl asi jan i ka aji osi. É si moun-la ni pwoblèm an tèt, sa pé jouwé on wòl adan sa i ka fè osi. Jéova pé li an tchè an nou. Alò lè on moun ka fè on biten, Jéova sav byen poukwa i ka fè-y. Nou pé pa kaché Jéova ayen (Ébr. 4:13). Donk, lèwvwè Jéova ka padonné on moun nou pé sèten kè i ka fè sa pas i konnèt sitiyasyon-la byen menm.
Jéova toujou ka jijé on mannyè ki jis. I pa jen ka pran pawti ; ponmoun pé pa ba-y on biten anba tab pou fè-y fè on biten (gadé paragraf 10 la).
10. Poukwa nou pé di kè lèwvwè Jéova ka jijé, i toujou ka jijé on mannyè ki jis? (Détéwonòm 32:4).
10 Jéova toujou ka jijé on mannyè ki jis. I pa jen ka pran pawti. Sé pousa, i pa jen ka gadé figi a on moun, sa moun-lasa ni, si moun-lasa ni kapasité oben si toutmoun konnèt moun-lasa pou vwè si i ka padonné-y oben si i pa’a padonné-y (1 Sam. 16:7 ; Jak 2:1-4). Ponmoun pé pa mèt présyon asi Jéova é ponmoun pé pa ba-y on biten anba tab pou fè-y fè on biten (2 Kron. 19:7). I pa jen ka lésé sa i ka rèsanti aji asi désizyon i ka pran (Ègz. 34:7). On biten nou pé sèten sé kè Jéova sé méyè jij ki tini pas i ka konprann toutbiten. I ka konprann-nou byen é i ka konprann sitiyasyon an nou byen osi (li Détéwonòm 32:4).
11. Poukwa nou pé di kè pa ni 2 moun ki ka padonné kon Jéova ka fè-y ?
11 Moun ki maké Lézékriti ébrayik té ka rèkonnèt kè pa ni ponmoun ki pé padonné kon Jéova. Poukwa yo di sa ? On èspésyalis a Labib té ka di kè « lèwvwè yo té bizwen palé dè Bondyé ki ka padonné on moun, yo té ka sèvi èvè on mo ébré. Men yo pa jen té ka sèvi èvè mo-lasa pou palé dè on moun ki ka padonné ondòt moun pas moun-lasa pé pa padonné kon Jéovab. » Sé Jéova tousèl ki pé padonné on moun a san pou san lèwvwè i fè on péché é kè i ka rèpanti-y. Men lèwvwè Jéova ka padonné-nou, ka sa ka pòté dè bon pou nou ?
12-13. a) Lèwvwè Jéova ka padonné on moun, ka moun-lasa ka rèsanti ? b) Lèwvwè Jéova ka padonné on moun, sé pou konmen tan ?
12 Lèwvwè nou sèten kè Jéova padonné-nou, a moman-lasa on ‘épòk a soulajman’ ka koumansé pou nou. Sa vé di kè lèspri an nou trankil é kè nou ka vin ni on konsyans ki nèt. Sé enki lèwvwè « Jéova limenm » ka padonné-nou kè nou ka rèsanti sé biten-lasa (Akt 3:19). Lèwvwè Jéova ka padonné-nou, nou pé wouvin bon bon zanmi èvè-y kon avan é sé konsi ayen pa té pasé.
13 Lèwvwè Jéova ka padonné-nou, i pa ka wouvin asi sa, kivédi i pa jen ka fè-nou rèpwòch apré é i pé’é pini-nou pou sa ankò nonplis (Iz. 43:25 ; Jér. 31:34). Labib ka di kè Jéova ka mété péché an nou lwen an nou « menmjan koté-la solèy-la ka lévé la lwen koté-la i ka kouché lac » (Sòm 103:12). Lèwvwè nou ka sonjé jan Jéova ka padonné-nou, nou ka rété èstèbèkwè é nou ni onlo rèkonésans pousa (Sòm 130:4). Men kimoun Jéova ka padonné ?
KIMOUN JÉOVA KA PADONNÉ ?
14. Dépi nou koumansé awtik-lasa, ka nou aprann asi jan Jéova ka padonné on moun ?
14 Kon nou ja vwè-y adan awtik-la, Jéova pa’a gadé si on péché grav oben si i pa grav pou padonné on moun. Nou vwè osi kè sé Jéova ki kréyé-nou, sé-y ki mèt anplas sé lwa-la é sé-y ki jij an nou, kifè i konnèt onlo biten é i ka bazé-y asi konésans-lasa pou i pé sa désidé si i ka padonné on moun oben si i pa’a padonné-y. Men ni dòt biten ankò kè Jéova ka gadé pou sav si i ka padonné-nou oben si i pa ka padonné-nou. Ki biten ésa ?
15. Dapré Lik 12:47, 48, avan Jéova padonné on moun, ki prèmyé biten i ka gadé ?
15 On prèmyé biten Jéova ka gadé pou sav si i ka padonné on moun oben si i pa ka padonné-y sé si moun-lasa té sav oben si i pa té sav kè sa i té ka fè la té mové. Nou ka touvé lidé-lasa adan sa Jézi di an Lik 12:47, 48 (li-y). Lèwvwè on moun ka fè on mové biten alòskè i sav byen kè sa i ka fè la pa’a fè Jéova plézi, i ka fè on péché ki grav. A moman-lasa, Jéova pé désidé kè i pé’é padonné-y (Mawk 3:29 ; Jan 9:41). Men fò noutout rèkonnèt kè dépawfwa nou ka fè on biten é aprésa nou ka rann-nou kont kè sé on mové biten nou fè la. Ès ni mwayen Jéova padonné-nou ? Wi. An-nou vwè ondòt biten Jéova ka gadé pou vwè si i ka padonné-nou.
Nou pé sèten kè Jéova ké padonné-nou si nou ka rèpanti-nou èvè tout tchè an nou (gadé sé paragraf 16 é 17 la).
16. Lè on moun ka rèpanti-y, ka sa vlé di ojis é poukwa fò-nou rèpanti-nou si nou vlé kè Jéova padonné-nou ?
16 Ondòt biten Jéova ka gadé osi, sé si moun-la ki péché la ka rèpanti-y vréman. Men lè on moun ka rèpanti-y ka sa vlé di ojis ? Lè on moun ka rèpanti-y sa vlé di kè i ka chanjé létadèspri a-y, i ka chanjé mannyè i ka aji é i ka chanjé sa i té ni lentansyon fè. Sa vlé di kè moun-lasa ka règrété mové biten-la i fè la. Men sa pé vlé di osi kè moun-la ka sonjé dé biten ki byen kè i té dwèt fè men kè i pa fè é i ka règrété sa. É adan sé 2 ka-lasa, moun-la ka tris. Moun-lasa tris akòz dè sé mové biten-la i fè la é i tris osi pas i sav kè si sa rivé-y sé paskè i pa fè sa ki té fo pou i té rété bon bon zanmi èvè Jéova. An-nou sonjé ègzanp a Manasé é David. Yo toulédé té fè péché ki té grav men konm yo rèpanti-yo poudèbon, Jéova padonné-yo (1 Wa 14:8). Sa ka montré-nou kè Jéova ka padonné on moun si i ka vwè kè moun-lasa ka rèpanti-y poudèbon. Men lèwvwè nou ka rèpanti-nou, a pa règrété pou nou règrété péché-la nou fè la sèlman. Fò-nou paré a fè dé biten pou nou montré sad. É jistèman sé on biten kè Jéova ka gadé osi é sé sa nou kay vwè.
17. Lè on moun ka viré owa Bondyé, ka sa vlé di é poukwa fò-nou fè sa si nou vlé pa woufè sé menm péché-la ankò ? (Izayi 55:7).
17 On twazyèm biten Bondyé ka gadé, sé si moun-lasa viré owa a-y. Lè on moun ka viré owa bondyé sa vlé di kè i ka lagé tout sé mové biten-la Jéova pa enmé la é i ka mété-y ka fè volonté a Jéova (li Izayi 55:7). Fò moun-lasa chanjé mantalité a-y é fò i tchenn kont dè sa Jéova ka pansé adan tout domenn a vi a-y (Wom. 12:2 ; Éféz. 4:23). Anfinaldikont, fò moun-lasa byen désidé a pa lésé sé vyé lidé-la i té ni la é sé mové labitid-la i té ni avan la woupran lanmen asi-y (Kol. 3:7-10). Nou ka tou konprann kè sé enki si nou ni lafwa adan sakrifis a Jézi, kè Jéova pé padonné-nou é kè i pé lavé-nou dè tout kalté péché. Si i ka vwè kè nou ka fè éfò èvè tout tchè an nou pou chanjé konduit an nou, i ké fè-nou bénéfisyé dè tout byenfé sakrifis-lasa ka pòté (1 Jan 1:7).
OU PÉ SÈTEN KÈ JÉOVA PARÉ A PADONNÉ-W
18. Ka awtik-lasa aprann-nou asi mannyè Jéova ka padonné ?
18 An-nou wouvin tibwen asi déotwa lidé enpòwtan kè nou vwè adan awtik-lasa. Pa ni ponmoun ki ka padonné kon Jéova ka fè-y. Poukwa nou ka di sa ? Prèmyèwman, sé pas Jéova toujou paré a padonné. Dézyèmman, pa ni ponmoun ki konnèt-nou myé ki Jéova. I sav byen poukwa nou ni pèwsonalité-la nou ni la é sé-y ki plibyen plasé pou di si nou ka rèpanti-nou poudèbon. É twazyèmman, lèwvwè Jéova ka padonné-nou i pa’a wouvin asi sa. Pou li, sé konsi nou pa té jen péché. Sa ka pèwmèt-nou ni on konsyans ki nèt é sa ka pèwmèt-nou fè-y plézi.
19. Menmsi nou enpawfè é kè nou ka fè érè, poukwa nou pé ni tchè-kontan kanmenm ?
19 Nou ka tou konprann kè toutotan nou ké enpawfè nou ké kontinyé fè péché. Men ni on lidé ki adan liv-la Études perspicaces des Écritures (volume 2) ki ka ankourajé-nou. Mi sa i ka di an paj 765 la : « Jéova ni onlo mizérikòd é i sav kè sèwvitè a-y ni défo. Men menmsi yo ka fè érè davwa yo enpawfè, yo pa oblijé pran penn a sa tout vi a yo (Sòm 103:8-14 ; 130:3). Si yo ka fè tousa yo pé pou suiv prensip a Bondyé adan vi a yo, yo pé ni tchè-kontan (Filip. 4:4-6 ; 1 Jan 3:19-22). » Mésyé, a pa ti ankourajé sa ka ankourajé-nou dè tann sa !
20. Ka nou ké vwè adan awtik-la ki ka vin la ?
20 Jéova toujou paré a padonné-nou lèwvwè nou ka règrété vréman on péché kè nou fè é nou ni onlo rèkonésans pou sa. Men kijan nou pé imité-y adan domenn-lasa ? Poukwa nou pé di kè lèwvwè Jéova ka padonné on moun é lèwvwè nou nou ka padonné on moun ni dé biten ki ka sanm é ni dé biten ki vréman diféran ? Poukwa sa enpòwtan kè nou konprann sa ? Sé sa nou ké vwè adan awtik-la ki ka vin la.
KANTIK 45 « La méditation de mon cœur »
a Adan pawòl a-y, Jéova ka di-nou kè i ka aksèpté padonné moun ki ka fè péché é ki ka rèpanti-yo é i ka fè sa volontyé. Men dépawfwa, pétèt nou pé ka pansé kè nou pa’a mérité kè Jéova padonné-nou. Adan awtik-lasa, nou ké vwè poukwa nou pé sèten kè Bondyé an nou toujou paré a padonné-nou si nou ka règrété sé péché-la nou fè la poudèbon.
b R. Baker Girdlestone, Synonyms of the Old Testament, James Nisbet and Co., 1897
c Gadé liv-la Approchez-vous de Jéhovah chap 26, paragraf 9.
d POU NOU BYEN KONPRANN : « Lè on moun ka rèpanti-y » sa vlé di kè i ka chanjé létadèspri a-y. I ka rèkonnèt kè vi-la i té ni la avan pa té bon é i ka règrété sé mové biten-la i fè la oben i ka règrété kè i pa fè sé biten-la i té dwèt fè la. On moun ki ka rèpanti-y vréman ka montré sa adan jan-la i ka aji la é i ka chanjé konduit a-y.