Ou pé sèten Jéova padonné-w

1-2. Lè nou ka mandé Jéova padon pou on péché nou fè, kijan Jéova ka aji ? (gadé imaj-la osi).

WA DAVID té vréman tris parapòt a mové biten i té fè (Sòm 40:12 ; 51:3 é sa ki maké antèt a sòm-la). Men i rèpanti-y é Jéova padonné-y (2 Sam. 12:13). Kifè, David té kontan lèwvwè i réyalizé kè Jéova té padonné-y (Sòm 32:1).

² Nou osi nou kontan lè nou ka vwè kè Jéova ka aji èvè mizérikòd èvè nou é kè i ka padonné péché an nou. Menmsi nou fè on péché ki grav, lèfètkè nou sav kè Jéova vé padonné-nou, sa ka konsolé-nou. Men i ké padonné-nou enki si nou sensè, si nou ka priyé-y pou mandé-y padon, si nou k’ay palé ba sé ansyen-la pou di sa nou fè é si nou ka fè tousa nou pé pou nou pa viré fè menm péché-la (Pwov. 28:13 ; Akt 26:20 ; 1 Jan 1:9). É nou kontan toubònman dè sav kè lè Jéova ka padonné péché an nou, i pa jen ka viré pini-nou pou sa ! (Ézék. 33:16).

3-4. Menmsi Jennifer té ja pran lèbatèm, ka i té ka rèsanti é ka nou ké vwè adan awtik-lasa ?

³ Men délè, sèwten moun pé ni dimal a kwè kè Jéova padonné péché a yo. Sé sa ki rivé Jennifer, on sè ki lévé adan lavérité. Lè i té jenn, i koumansé fè dé mové biten é i té ka kaché sa i té ka fè pou paran a-y pa té suiv sa. Men plizyè lanné apré, i viré owa Jéova, i pwogrésé é i pran lèbatèm. I ka di : « Avan, vi an mwen sé té fè péché sèksyèl, pran dwòg, fè vyé kòlè. É sa ki té pi enpòwtan adan vi an mwen sé té fè lajan. An té sav kè grasa sakrifis a Jézi, Jéova pé padonné péché an nou. Men menmsi an té rèpanti-mwen é an té mandé Jéova padonné-mwen, an pa té ka rivé mèt an tèt an mwen kè i té padonné-mwen. »

⁴ Pétèt kè délè ou ka di-w kè Jéova dwèt kòlè èvè-w toujou parapòt a péché ou ni lokazyon fè. Men Jéova vé kè ou sèten kè i padonné-w kon i fè-y pou David. Adan awtik-lasa, nou ké vwè poukwa fò nou sèten kè Jéova padonné-nou vréman é ka ki pé édé-nou fè sa.

POUKWA FÒ OU SÈTEN KÈ JÉOVA PADONNÉ PÉCHÉ A-W

5. Ka Satan vlé fè-nou kwè ? Bay on ègzanp.

⁵ Lèfètkè nou sèten kè Jéova padonné-nou, sa ka édé-nou pou nou pa pri adan « zatrap » a Satan. An-nou sonjé kè Satan ké fè tousa i pé pou nou arété sèvi Jéova. Pa ègzanp, Satan pé éséyé fè-nou kwè kè Jéova pé ké jen padonné-nou. An-nou palé dè sa ki rivé on krétyen ki té Korent. Davwa i té fè on péché sèksyèl, yo té woté-y adan lasanblé-la (1 Kor. 5:1, 5, 13). Tibwen tan apré, i rèpanti-y. Men Satan pa té vlé kè frè é sè a lasanblé a-y padonné-y, é i pa té vlé yo akéyi-y adan lasanblé-la nonplis. É si lasanblé-la pa té ka padonné-y, frè-la té pé pansé kè Jéova pa té’é jen padonné-y. Sa té’é fè-y lapenn, é tèlman sa té’é fè-y lapenn, i té’é fin pa lagé Jéova. É sé ègzaktèman sa Satan té vlé. Menmjan-la jòdijou, Satan vlé fè-nou kwè kè Jéova pé ké jen padonné-nou é i ka fè sa pou nou arété sèvi Jéova. Men « nou konnèt lentansyon a-y byen » (2 Kor. 2:5-11).

6. Lè nou ka santi-nou koupab, ka ki pé édé-nou ?

⁶ Lèfètkè nou sèten kè Jéova padonné-nou, sa ka édé-nou pou nou pa santi-nou koupab. Lè nou ka fè on péché, nou ka santi-nou koupab é sa toutafè nòwmal (Sòm 51:17). Sé on bon biten pas sa ka édé-nou chanjé konpòwtasyon an nou é sa ka édé-nou pou nou pa woufè menm érè-la (2 Kor. 7:10, 11). Men si nou ka kontinyé pansé kè Jéova pa padonné-nou, sa pé ké ban-nou gou pou nou sèvi Jéova ankò. Pawkont si nou ka mèt fon an tèt an nou kè Jéova padonné-nou poudèbon, menmsi nou ka santi-nou koupab, nou ké mèt sa dèyè do an nou. Nou ké kontinyé sèvi Jéova, nou ké sèten kè nou ka fè-y plézi é nou ké kontan kon avan. Sé sa Jéova vé pou nou (Kol. 1:10,11 ; 2 Tim. 1:3). Men ka nou pé fè pou nou vréman sèten kè Jéova padonné-nou ?

KA KI PÉ ÉDÉ-MWEN POU AN SÈTEN JÉOVA PADONNÉ-MWEN ?

7-8. Lè Jéova palé Moyiz dè-y menm, ka Jéova di-y é dè ki biten nou pé sèten ? (Ègzòd 34:6, 7).

⁷ Sonjé kijan Jéova ka palé dè-y menm. Pa ègzanp, lè Moyiz té vlé sav plis biten asi Jéova, gadé ka Jéova di-ya (li Ègzòd 34:6, 7). Menmsi Jéova ni onpakèt bèl kalité, i di Moyiz kè i sé « on Bondyé ki ka aji èvè pityé é ki ka pran penn a moun ». Si on moun ki enmé-y fè on péché é kè i ka rèpanti-y èvè tout tchè a-y, ès ou ka di on Bondyé konsa ké vlé padonné moun-lasa ? Nou pé sèten dè sa ! Si Jéova pa ka padonné moun-lasa, sé konsi i pa ni pon pityé ba-y é kè i pa ni pon konpasyon ba-y nonplis. Jéova pa jen ka aji konsa.

⁸ Nou pé sèten kè lèwvwè Jéova ka di kè i ni mizérikòd, sé pawòl senk é kat pas Jéova pa jen ka manti (Sòm 31:5). Alò nou pé kwè-y zyé fèmé. Si ou ni dimal a kwè kè Jéova padonné-w poudèbon, mi sa pou mandé-w : « Ès an sèten Jéova ni mizérikòd, kè i ni konpasyon é kè dépi on moun ka rèpanti-y i ka padonné moun-lasa ? Alò si an sèten sa, an pé sèten kè i padonné-mwen osi. »

9. Ka Sòm 32:5 ka aprann-nou asi jan Jéova ka padonné péché an nou ?

⁹ Sonjé sa Jéova ka aprann-nou adan Labib asi jan i ka padonné-nou. Pa ègzanp, David ni lokazyon maké : « Ou padonné fòt an mwen, ou padonné péché an mwen » (li Sòm 32:5). An ébré, mo-la yo tradui la é ki ba-y « padonné » pé vlé di « lévé », « woté » oben « chayé ». Ki vé di lè Jéova padonné David, sé konsi i té lévé sé péché-la é kè i té chayé-yo on koté ki lwen lwen lwen. Kifè David té pé ni tchè-kontan davwa Jéova té padonné-y poudèbon (Sòm 32:2-4). Nou osi nou pé ni tchè-kontan menmsi nou péché. Si nou rèpanti-nou èvè tout tchè a-y, nou pa bizwen santi-nou koupab ankò. Okontrè, nou pé ni tchè-kontan pas Jéova padonné-nou poudèbon.

10-11. Labib ka di kè Jéova ‘paré a padonné-nou’. Ka sa ka aprann-nou asi Jéova ? (Sòm 86:5).

¹⁰ (Li Sòm 86:5.) David ka di kè Jéova toujou « paré a padonné ». Sa vlé di kè lè nou ka fè érè Jéova pa ka monté an koko é dépi nou ka rèpanti-nou i toujou paré a padonné-nou. Poukwa i konsa ? Mi sa rèstan a vèwsé-la ka di : « Ou ka montré tout lanmou fidèl la ou ni la pou tout moun ki ka kriyé-w. » Adan awtik-la ki avan la, nou vwè kè Jéova enmé moun ki enmé-y èvè on lanmou ki fidèl é kè i pé’é jen lagé-yo. Alò si on sèwvitè a-y ka fè on péché é kè i ka rèpanti-y, Jéova ké kontinyé enmé-y é i ké padonné tout péché a-y (Iz. 55:7). Si ou ni dimal a kwè kè Jéova padonné-w pou sa ou ni lokazyon fè, mi sa pou mandé-w : « Ès an dakò pou di kè dépi on moun ka rèpanti-y é kè i ka priyé Jéova pou i padonné-y, Jéova ka padonné moun-lasa ? Alò si Jéova ka fè sa pou lézòt, an pé sèten kè si an ka rèpanti-mwen é kè an ka mandé-y padonné-mwen, i ké fè-y. »

¹¹ Labib ka di osi kè Jéova ka konprann byen kè noutout enpawfè (Sòm 139:1, 2). An-nou vwè ka David di adan ondòt sòm é kijan sa pé édé-nou pou nou sèten kè Jéova vé padonné-nou.

PA OUBLIYÉ SA JÉOVA KA SONJÉ

12-13. Ka Jéova ka sonjé, é kijan i ka aji èvè nou ? (Sòm 103:14).

¹² (Li Sòm 103:14.) David ka èspliké pou ki rézon Jéova paré a padonné moun ki ka rèpanti-yo. I di kè Jéova « ka sonjé nou sé pousyè ». Sa vé di kè i sav kè noutout ka fè érè. Pou nou konprann sa pibyen, an-nou arété-nou asi sa David di.

¹³ David di kè Jéova « sav byen èvè ki biten nou fèt ». Jéova fè Adan « èvè pousyè ki sòti adan tè-la » é konm sé-y ki fè-y, i té sav kè magré Adan té pawfè fò Adan té fè sèwten biten pou i kontinyé viv. Pa ègzanp, fò i té manjé, fò i té dòmi é fò i té rèspiré. É sé konsa pou noutout (Jén. 2:7). Men konm Adan é Èv péché é kè nou sé désandan a yo, lè yo ka di kè nou fèt « èvè pousyè », sa vé di osi kè nou fèt èvè péché-la andidan an nou é kè fò nou goumé pou nou pa fè mové biten. Lè David di kè Jéova « ka sonjé kè nou sé pousyè », i té vlé di osi kè pas Jéova sav kè nou enpawfè i toujou ka aji èvè konpasyon épi nou. I sav kè délè nou ké fè érè é lè i ka vwè kè nou sensè lè nou ka rèpanti-nou, i ka aji èvè mizérikòd épi nou é i ka padonné-nou (Sòm 78:38, 39).

14. a) Ka David ka di-nou anrapò èvè jan Jéova ka padonné-nou ? (Sòm 103:12). b) Kijan ègzanp-la David pran la ka montré kè lèwvwè Jéova ka padonné on moun i pa ka wouvin asi sa ? (gadé ti karé-la « Jéova ka padonné moun é i ka oubliyé mové biten yo fè »).

¹⁴ Ka ki pé édé-nou pou nou sèten Jéova padonné-nou ? An Sòm 103:12, David ka di kè « menmjan koté-la solèy-la ka lévé la lwen koté-la i ka kouché la », sé menmjan-la Jéova ka mèt péché an nou lwen an nou lèwvwè i ka padonné-nou (li-y). Lè ou byen gadé, la solèy-la ka lévé la é la i ka kouché sé 2 koté ki lwen yonn dè lòt toubònman. Ka sa ka aprann-nou asi Jéova ? Adan on liv, yo ka pran on bèl ègzanp anrapò èvè sa. I ka èspliké kè Bondyé ka mèt péché an nou tèlman lwen kè pa menm lòdè a yo i pa’a pran. Pa ni pon tras a yo ankò é pa menm sonjé Bondyé pa’a sonjé sa nonplis. Délè, santi nou santi on lòdè, sa ka fè-nou sonjé on biten. Men pou Jéova, lèwvwè i ka padonné-nou, pa ni pon lòdè ni ayen ki pé fè-y viré sonjé sa nou fè la. I pé ké fè-nou sonjé sa nonplis, é i pé ké fè-nou péyé pou sa nou fè la (Ézék. 18:21, 22 ; Akt 3:19).

15. Si nou ka santi-nou koupab toujou akòz dè biten ki ja pasé, ka pou nou fè ?

¹⁵ Si ou dimal a kwè kè Jéova padonné-w poudèbon, kijan sa ki maké an Sòm 103 pé édé-w ? Sonjé ka Jéova ka rèsanti. I ka sonjé kè ou enpawfè. É dépi on moun sensè lèwvwè i ka rèpanti-y, Jéova ka padonné-y. É sé sa ou fè. Sonjé osi kè Jéova désidé kè i pé’é jen sonjé péché ou fè oben i pé’é jen vin palé-w dè sa ou fè é i pé’é jen viré pini-w, pas i ja padonné-w. Alò si Jéova pa’a rété ka sonjé péché ou fè, ou pa dwètèt fè sa nonplis (Sòm 130:3). Lè nou sèten Jéova padonné-nou, nou pa’a santi-nou koupab ankò é nou ka fè douvan.

16. Lèwvwè nou ka sonjé péché nou fè toutlè alòskè Jéova ja padonné-nou, sa danjéré. Bay on ègzanp ki ka montré sa (gadé imaj-la osi).

¹⁶ An-nou pran on ègzanp. Lè ou ka kondui on vwati, ou pé gadé adan rétrovizè-la dètanzantan pou vwè sa ki ka pasé dèyè. Konsa sa pé édé-w pou-w pa fè aksidan. Men si ou ka fè sa toutlè, sa pé danjéré. Pou-w pé ansékirité lèwvwè ou ka kondui, fò ou gadé dwèt douvan a-w. Menmjan-la délè, lè nou ka sonjé péché nou fè, sé on bon biten. Sa pé anpéché-nou woufè sé menm érè-la. Men si nou ka sonjé péché nou fè toutlè alòskè Jéova ja padonné-nou, nou ka riské pèd jwa an nou é nou pé’é pé ba Jéova sa nou ni dè méyè. Alò an-nou gadé douvan pito. Nou asi wout-la ki ka menné adan paradi-la Bondyé pwomèt-nou la é koté-lasa, « ponmoun pé ké sonjé biten ki ja pasé » ! (Iz. 65:17 ; Pwov. 4:25).

KONTINYÉ FÈ ON TRAVAY ASI-W

17. Poukwa fò nou fè ansòt pou nou toujou sèten kè Jéova enmé-nou é kè i padonné-nou ?

¹⁷ Fò nou fè ansòt pou nou toujou sèten kè Jéova enmé-nou é kè i padonné-nou (1 Jan 3:19). Poukwa fò nou fè sa ? Fò nou fè sa pas Satan ka éséyé fè-nou kwè kè nou ja fè tèlman biten kè pa ni mwayen Jéova enmé-nou é kè i padonné-nou. Satan ka sèvi èvè sé 2 biten-lasa pou fè-nou lagé Jéova. Pli lafen ka vin é pli i ké mèt sa rèd asi nou, pas i sav pa’a rété-y onlo tan (Rév. 12:12). Alò pa pri adan zatrap a Satan !

18. Ka nou pé fè pou nou sèten an fon a tchè an nou kè Jéova enmé-nou é kè i padonné-nou ?

¹⁸ Pou-w toujou sèten kè Jéova enmé-w, suiv sé ti konsèy-la nou vwè adan awtik-la ki té avan la. Pou-w sèten kè Jéova padonné-w vréman, fè on ti réfléchi asi sa limenm a-y ka di lè i ka palé dè kalité a-y. Pran tan réfléchi osi asi jan Labib ka di kè Jéova ka padonné-nou. Pa jen oubliyé kè Jéova ka sonjé kè nou enpawfè é kè i ké aji èvè mizérikòd èvè nou. On dènyé biten pou-w pa oubliyé, sé kè lè i ka padonné-nou, i pa’a fè-y adèmi. Apré ou fè tousa, ou ké kontan pas ou ké sèten Jéova aji èvè mizérikòd èvè-w é ou ké pé di menmbiten ki David : « Mèsi Jéova davwa ou ‘padonné fòt an mwen é ou padonné péché an mwen’ » (Sòm 32:5).