Jéova vé kè toutmoun rèpanti-yo

1. Lè on moun ka rèpanti-y, ka sa vlé di ègzaktèman ?

LÈWVWÈ nou ka fè on biten ki pa bon, sa enpòwtan toubònman kè nou rèpanti-nou. Adan Labib, on moun ki ka rèpanti-y sé on moun ki ka règrété sa i fè ki pa bon, ki ka arété fè sa, é ki byen désidé a pa woufè sa i té ka fè la (adan lexique-la, gadé mo-la « repentir »).

2. Poukwa fò-nouchak konprann byen ka sa vé di lèwvwè on moun ka rèpanti-y ? (Néémi 8:9-11).

² Fò-nouchak konprann ka sa vé di lèwvwè on moun ka rèpanti-y. Poukwa fò nou fè sa ? Paskè noutout ka fè péché touléjou. Konm noutout sé pitit a pitit a Adan é Èv, noutout anba jouk a péché la é anba jouk a lanmò (Wom. 3:23 ; 5:12). Kifè, nou ka fè péché é nou bizwen rèpanti-nou. Menm dé nonm ki té ni onlo fwa kon lapòt Pòl touvé-yo ka goumé èvè péché-la (Wom. 7:21-24). Men ès sa vé di kè fò-nou santi-nou tris toulongalé pas nou ka fè péché ? Non, piskè Jéova sé on Bondyé ki ni onlo mizérikòd é i vé nou ni tchè-kontan. An-nou pran ègzanp a sé Juif-la ki té ka viv an tan a Néémi (li Néémi 8:9-11). Jéova pa té vé yo santi-yo tris toulongalé parapòt a péché yo ni lokazyon fè. Okontrè, i té vé yo adoré-y èvè tchè-kontan. Jéova sav byen kè lèwvwè nou ka rèpanti-nou, sa ka édé-nou ni tchè-kontan. Sé pousa i ka èspliké-nou ka sa vé di lèwvwè on moun ka rèpanti-y. Nou pé sèten kè siwvwè nou ka rèpanti-nou, Pap’an-nou ki ni onlo mizérikòd ké padonné-nou.

3. Ka nou ké vwè adan awtik-lasa ?

³ Adan awtik-lasa, nou ké vwè 3 biten anrapò èvè lè on moun ka rèpanti-y. Nou ké vwè : 1) ka Jéova anségné pèp a Israèl asi sa, 2) kijan i édé pèp a-y pou i rèpanti-y, 3) ka Jézi anségné disip a-y.

SA JÉOVA MONTRÉ PÈP A-Y ANRAPÒ ÈVÈ LÈWVWÈ ON MOUN KA RÈPANTI-Y

4. Jéova anségné nasyon a Israèl ka pou fè si yo té ba-y do. Ka i di-yo ?

⁴ Lèwvwè Jéova ba Israèl lwa a-y, tout pèp-la pwomèt kè yo té’é obéyi. Jéova pwomèt-yo kè siwvwè yo té ka obéyi sé lwa-la, i té’é pwotéjé-yo é i té’é béni-yo. Mi sa i di-yo anrapò èvè sé lwa-lasa : « Komandman-la an ka ba-w la jòdila, i pa two rèd ba-w ; sé on biten ou pé fè » (Dét. 30:11, 16). Men pawkont i di-yo kè siwvwè yo té ka ba-y do, é kè yo té k’ay adoré dòt dyé pa ègzanp, yo té’é soufè paskè i pa té’é béni-yo ankò. Men ès sa vé di Bondyé té’é ba-yo do é kè i pa té’é jen lévé-yo digad ankò ? Non, yo té’é pé viré an 2 bra a Jéova é kouté sa i ka di-yo (Dét. 30:1-3, 17-20). Sa vé di kè yo té pé rèpanti-yo. É siwvwè yo té ka fè sa, Jéova té’é viré owa a yo é i té’é béni-yo kon avan.

5. Kijan Jéova montré i pa té lagé pèp a-y ? (2 Wa 17:13, 14).

⁵ Pèp-la Jéova té chwazi la viré kont li a plizyè rèpriz. Non sèlman yo té ka adoré idòl, men yo té ka fè dòt mové biten osi. Kifè, yo soufè adan sa. Men apapousa Jéova lagé pèp a-y ki té pran on mové chimen. I voyé pwofèt si pwofèt pou édé sé Israélit-la rèpanti-yo é pou yo wouvin owa-y (li 2 Wa 17:13, 14).

6. Jéova té vé kè pèp a-y rèpanti-y toubònman. Kijan i sèvi èvè pwofèt a-y pou i fè pèp a-y konprann sa ? (gadé imaj-la osi).

⁶ An-nou vwè kijan Jéova sèvi èvè sé pwofèt-la pou avèti é pou korijé pèp a-y. Pa ègzanp i sèvi èvè Jérémi pou di-yo : « O Israèl, vou ki ban-mwen do, viré owa an mwen. […] An pé ké méprizé-w é an pé ké rété kòlè èvè-w, pas an sé on moun ki fidèl. […] An pé ké ni-w asi tchè pou touttan. Sèlman, onsèl biten an ka mandé-w : rèkonnèt kè ou koupab pas ou ba Jéova […] do » (Jér. 3:12, 13). I sèvi èvè Joèl pou di pèp a-y : « Viré owa an mwen èvè tout tchè a zòt » (Joèl 2:12). Mi sa i voyé Izayi di-yo : « Pwòpté-zòt ; woté sé mové biten-la zò ka fè la douvan zyé an mwen ; arété fè sa ki mal » (Iz. 1:16-19). É mi sa i voyé Ézékyèl di-yo : « Lèwvwè on moun ki méchan ka mò, èskè sa ka fan’an plézi ? Ès an pa pisimé moun-lasa arété fè sa ki mal é i rété vivan ? […] Lè on moun ka mò sa pa jen ka fan’an plézi. Arété fè sa ki mal pou zò sové vi a zòt ! » (Ézék. 18:23, 32). Lèwvwè on moun ki ka péché ka viré rèpanti-y, Jéova ni tchè-kontan toubònman pas i vé kè moun-lasa rété vivan, é sa i vé menm sé kè i viv pou touttan. Sa vé di kè Jéova pa ka enn rété 2 bra a-y kwazé ka atann kè on moun chanjé pou i pé sa édé-y. An-nou vwè déotwa ègzanp pou nou konprann sa.

7. Lèwvwè Jéova sèvi èvè ègzanp a pwofèt Ozé é madanm a-y, ka i té vlé anségné pèp a-y ?

⁷ Gadé kijan Jéova sèvi èvè ègzanp a pwofèt Ozé é madanm a-y Gomè pou anségné pèp a-y. Madanm a-y tronpé-y é aprésa, i lésé-y pou dòt boug. Ka Jéova fè ? Konm Jéova pé li an tchè a moun, mi sa i di Ozé fè : « Wouviré enmé madanm-la ondòt misyé enmé la é ki ka fè adiltè, menmjan Jéova enmé pèp a Israèl alòskè pèp-la ka sèvi dòt dyé » (Ozé 3:1 ; Pwov. 16:2). Lè Jéova mandé Ozé viré owa madanm a-y, madanm-la té adan malpwòpté a-y toujou. Magrésa, Jéova voyé pwofèt Ozé palé ba madanm-la, pou i di-y kè i ka padonné-y é pou yo rékonsilyéa. Menmjan-la, Jéova pa lagé pèp a-y magré i té wòs wòs a-y. Menmsi yo té ka kontinyé fè mové biten, i té enmé-yo toujou é i toujou té ka voyé pwofèt pou édé-yo rèpanti-yo é pou fè chanjman adan vi a yo. Ègzanp-lasa ka montré-nou kè Jéova konnèt tout biten asi on moun é kè i ké toujou éséyé édé on moun ki fè péché ki grav pou i rèpanti-y (Pwov. 17:3). An-nou vwè kijan i ka fè sa.

SA JÉOVA KA ÉSÉYÉ FÈ POU ÉDÉ PÈP A-Y RÈPANTI-Y

8. Ka Jéova fè pou édé Kayen rèpanti-y ? (Jénèz 4:3-7 ; gadé imaj-la osi).

⁸ Kayen, sé té pitit a Adan é Èv é kon tout timoun a Adan é Èv, i té ni tandans a fè sa ki mové. Anplisdisa, i pa pòté pon mannèv pou tandans-lasa pa té pran lanmen asi-y. Labib ka di kè « i té ka fè sa ki mové » (1 Jan 3:12). Sé pétèt pou sa Jéova pa aksèpté Kayen é ofrann a-y ditou. Lèwgadé Kayen fè gwo kòlè é sa kasé 2 bra a-y. Men, apapousa i mété-y ka aji byen. Alò ka Jéova fè ? I palé ba-y èvè onlo jantiyès, i èspliké-y kè i té’é béni-y si i té ka aji byen (li Jénèz 4:3-7). I avèti-y osi é i di-y ka ki té’é rivé-y si i té ka kontinyé fè mové biten. Men i pa tchenn-kont dè konsèy a Jéova. I pa lésé Jéova édé-y pou i rèpanti-y. Konm Kayen pa kouté Jéova, ès Jéova di an tchè a-y kè i pé’é édé ponmoun rèpanti-y ankò ? Awa, okontrè !

9. Kijan Jéova édé David pou i té rèpanti-y ?

⁹ Jéova té enmé wa David onlo toubònman. I jous di kè i sé ‘on nonm ki ka fè ègzaktèman sa ki ka fè-y plézi’ (Akt 13:22). Men David té fè dé gwo péché. I té kouché èvè on madanm ki pa té madanm a-y é i té tchouyé on moun. Sèlon Lwa a Moyiz, David té mérité yo tchouyé-y (Lév. 20:10 ; Nonb 35:31). Magrésa Jéova aji èvè onlo bonté épi-yb. I voyé pwofèt a-y Natan pou i ay vwè wa-la, menmsi David po’o té fè pon pli pou montré i té ka rèpanti-y. Natan sèvi èvè on ègzanp pou touché tchè a David. Tèlman ègzanp-lasa touché-y, David rèpanti-y (2 Sam. 12:1-14). I maké on sòm ki sòti anfon a tchè a-y é ki ka montré jan i té ka rèpanti-y (Sòm 51, sa ki maké antèt a sòm-la). Sòm-lasa konsolé onlo onlo frè é sè ki té péché é i ba-yo fòs pou yo rèpanti-yo. A pa ti kontan nou kontan Jéova édé David, sèwvitè a-y kè i enmé, pou i té rèpanti-y.

10. Jéova ka pran pasyans èvè nou é i ka padonné-nou. Lèwvwè ou ka sonjé sa, ka ou ka rèsanti ?

¹⁰ Jéova hay tout kalté péché (Sòm 5:4, 5). Men i enmé-nou é lèwvwè nou ka fè on péché, i vé édé-nou. I toujou ka chèché a édé moun ki ka fè péché pou yo rèpanti-yo é pou yo wouvin bon zanmi èvè-y. I ka fè sa menmsi moun-lasa té’é fè pi gwo péché ki ni asi latè. Lè nou ka sonjé sa, ès sa pa ka rasiré-nou ? Lè nou ka pran on tan pou médité asi jan Jéova ni pasyans é asi jan i ni mizérikòd, sa ka ban-nou plis balan pou nou rété fidèl a-y é pou nou rèpanti-nou tousuit apré nou fè on péché. Alèla, an-nou vwè ka Jézi anségné disip a-y anrapò èvè lèwvwè on moun ka rèpanti-y.

SA JÉZI APRANN DISIP A-Y ANRAPÒ ÈVÈ LÈWVWÈ ON MOUN KA RÈPANTI-Y

11-12. Kijan Jézi montré toutmoun kè Pap’a-y sé on Bondyé ki toujou paré a padonné lézòt ? (gadé imaj-la osi).

¹¹ O prèmyé syèk, tan-la té rivé pou Mési-la parèt. Kon awtik-la ki té avan la té ka di, Jéova sèvi ki èvè Jan Lèbatis ki èvè Jézikri pou montré pèp a-y kijan sa enpòwtan kè yo rèpanti-yo (Mat. 3:1, 2 ; 4:17).

¹² Toupannan Jézi té asi latè, i toujou fè moun konnèt jan Pap’a-y ni mizérikòd. I montré-nou sa byen lèwvwè i sèvi èvè on bèl ègzanp : ta on papa é gason a-y. Gason-la désidé menné on vyé vi. Men aprésa, « i woupran sans a-y » é i viré aka pap’a-y. Kijan papa-la réyaji ? Mi sa Labib ka di : « Alòskè i té ka rété [gason-la] bon tibwen chimen a fè toujou, pap’a-y vwè-y olwen é sa fè-y lapenn pou-y. I kouri jwenn-li, i pran-y an dé bra a-y é i bo-y èvè tandrès. » Pou tiboug-la, pap’a-y pa té’é padonné-y. Alò i mandé-y si i té pé vin on ouvriyé pou travay akaz a-y. Men li papa-la, a pa ti présé i té présé padonné gason a-y. I kriyé-y « gason an mwen » é i wouba-y plas a-y adan fanmi-la. Aprésa, mi sa i ni lokazyon di anrapò èvè gason a-y : « I té pèd, men nou viré touvé-y » (Lik 15:11-32). Avan Jézi té vin asi latè, sèten i ni lokazyon vwè jan Pap’a-y té ni konpasyon é jan i té présé padonné moun ki té ka rèpanti-yo. É a pa onsèl fwa i dwèt vwè sa. Istwa-la Jézi rakonté la ka touché-nou onlo é ka montré jan Pap’an-nou Jéova ni mizérikòd !

13-14. Ka Pyè aprann anrapò èvè lèwvwè on moun ka rèpanti-y é ka i montré lézòt anrapò èvè sa ? (gadé imaj-la osi).

¹³ Ègzanp a Jézi aprann lapòt Pyè onlo biten asi jan Jéova ka padonné moun ki ka rèpanti-yo. Pyè ni lokazyon fè onlo érè, é Jézi toujou té paré pou padonné-y. Pa ègzanp, lèwvwè Pyè rènyé Mèt a-y 3 fwa, tèlman konsyans a-y té ka bat-li sa chouboulé-y onlo (Mat. 26:34, 35, 69-75). Men apré Jézi résisité, i ay touvé Pyè lèwvwè Pyè té tousèl a-y pou i té pé sa palé ba-y (Lik 24:33, 34 ; 1 Kor. 15:3-5). Jézi té sav kè Pyè té rèpanti-y é i té vlé rasiré-y. Pousa i di-y kè i té padonné-y (gadé Mawk 16:7).

¹⁴ Pyè té konnèt byen ka sa yé lèwvwè on moun ka rèpanti-y é kè yo ka padonné-y. Sé pousa i té pé èspliké lézòt sé biten-lasa. Kèlkètan apré Lapannkòt 33, Pyè èspliké on foulmoun ki té ni onpakèt Juif adan kè sé Mési-la yo té tchouyé. Men aprésa i ba-yo on konsèy ki té plen lanmou. Mi sa i di-yo : « Rèpanti-zòt é viré owa Bondyé, pou péché a zòt éfasé, pou Jéova limenm fè épòk a soulajman-la vini » (Akt 3:14, 15, 17, 19). Sa Pyè di la ka montré kè lèwvwè on moun ki fè on péché ka rèpanti-y, sa ka ba-y gou pou i viré owa Bondyé kivédi, pou i chanjé mannyè i té ka pansé é mannyè i té ka aji. A moman-lasa, i ka anvi konpòwté-y kon Bondyé ka mandé. Pyè èspliké sé Juif-la osi kè Bondyé té’é éfasé péché a yo kivédi i té’é fè sé péché-lasa disparèt. Plizyè dizenn lanné apré, mi sa i di sé krétyen-la pou rasiré-yo : « [Jéova] ka pran pasyans èvè zòt, pas i vé pa ponmoun détwi, men i vé kè toutmoun rivé rèpanti » (2 Pyè 3:9). Kèlkèswa péché-la nou té’é pé fè la, menmsi sé on péché ki grav, dèstan nou ka rèpanti-nou, Jéova ka padonné-nou é i pa’a fè-y adèmi ! Lèfètkè nou sav sa, nou ka santi-nou anpé.

15-16. a) Ka Pòl ni lokazyon viv, é ka sa montré-y anrapò èvè jan Jéova ka padonné lézòt ? (1 Timoté 1:12-15). b) Ka nou ké vwè adan awtik-la ki ka vin la ?

¹⁵ Avan i vin krétyen, Pòl ni lokazyon fè onlo mové biten. I pèwsékité bon pèwsékité la sé disip-la kè Jézi té enmé la. É pétèt kè lamajorité adan yo té ka kwè kè i pa té’é jen chanjé. Men, Jézi li, a pa konsa i té ka vwè sa. I té sav kè Pòl té pé chanjé é kè i té pé rèpanti-y. Jézi é Pap’a-y vwè bèl kalité a Pòl. Mi sa Jézi di : « Nonm-lasa, sé ja-la an chwazi la » (Akt 9:15). I jous fè on mirak pou pousé Pòl a rèpanti-y (Akt 7:58–8:3 ; 9:1-9, 17-20). Kifè Pòl rèpanti-y é i vin krétyen. Jézi chwazi-y pou i vin apòt a-y. Souvantfwa, Pòl té ka di kijan i té ni rèkonésans pou sa Jéova é Jézi té fè ba-y (li 1 Timoté 1:12-15). Mi sa lapòt Pòl anségné : « Bondyé, adan bonté a-y, vlé édé-w pou-w rèpanti-w » (Wom. 2:4).

¹⁶ On jou, Pòl aprann kè lasanblé Korent té ka wousoulé on frè ki té ka fè péché sèksyèl é sé té onsèl manjé kochon. Ka Pòl di-yo fè ? Lè nou ka gadé sa i di-yo, sa ka montré-nou jan Jéova ka aji èvè sèwvitè a-y épi lanmou lèwvwè i ka korijé-yo é jan i ka padonné-yo lèwvwè yo ka rèpanti-yo. Nou ka pé vwè osi kijan nou pé imité-y. Adan awtik-la ki ka vin la, nou ké vwè ka sa ki pasé adan lasanblé Korent ka aprann-nou.