Ou pé santi-w anpé lèwvwè ni boulvès

1. Lapé ki ka vin dè Bondyé, ka sa yé ojis é ki byenfé sa ka pwokiré-nou ? (Filipyen 4:6, 7).

NI ON biten sé moun-la ki an mond-la pa konnèt menm. Sé « lapé-la ki ka vin dè Bondyé ». Lèwvwè nou ka rèsanti sa, nou ka santi-nou kalm é sé grasa bèl lanmityé-la nou ni la èvè Pap’an nou ki an syèl-la. Lèwvwè nou ni lapé ki ka vin dè Bondyé, nou ka santi-nou ansékirité (li Filipyen 4:6, 7). Nou pé vin bon zanmi èvè moun ki ka adoré Bondyé. Anplisdisa, nou pé vin bon bon zanmi èvè Bondyé limenm, li ki sé Bondyé a lapé (1 Tés. 5:23). Lèwvwè nou konnèt Pap’an nou, kè nou ka fè-y konfyans é kè nou ka kouté-y, lapé-la i ka ban-nou la pé trankilizé tchè an nou lèwvwè ni boulvès.

2. Poukwa nou pé sèten kè nou pé rivé a ni lapé ki ka vin dè Bondyé ?

² Lèwvwè ni boulvès kon lè ni épidémi, lè ni katastwòf, lè ni dézòd an péyi-la oben lè ni pèwsékisyon, ès nou pé ni lapé ki ka vin dè Bondyé poubon ? Sé gwo difikilté-lasa pé angwasé-nou toubònman. Men mi konsèy-lasa Jézi ba disip a-y : « Fò pa tchè a zòt enkyèt, é pa lésé lapè sézi-y » (Jan 14:27). Ni onlo frè é sè ki jwenn éprèv ki té rèd toubònman, yo suiv konsèy-lasa é grasa Jéova yo rivé ni lapé.

OU PÉ SANTI-W ANPÉ MENM LÈWVWÈ NI ÉPIDÉMI

3. Kijan on épidémi oben on pandémi pé anpéché-nou santi-nou anpé ?

³ Lèwvwè ni on épidémi oben on pandémi, sa pé chalviré prèstout vi an nou. Sonjé sa ki rivé onlo moun pannan pandémi a COVID-19 la. Yo fè on ankèt owa plizyè moun é plis ki lanmwatyé adan yo di kè yo vin trapé pwoblèm pou yo dòmi akòz dè pandémi-lasa. Akòz dè pandémi-la osi, onsèl kou, ni plis moun ki vin istrésé bon istrésé la, ki mèt-yo ka fè déprésyon, ki mèt-yo ka bwasonné é ka pran dwòg, ki touvé-yo ka pran kou adan pwòp kaz a yo é ki éséyé fin bat èvè lavi. Siwvwè ni on épidémi koté-la ou ka rété la, kijan ou pé fè pou ou pa enkyété-w twòp é pou ou pé sa kontinyé ni lapé ki ka vin dè Bondyé ?

4. Lèfètkè nou konnèt pwofési-la Jézi ban-nou la anrapò èvè sé dènyé jou-la, sa ka trankilizé-nou. Poukisa ?

⁴ Jézi té ja di kè pannan sé dènyé jou-la té’é ni épidémi « on koté apré lòt » (Lik 21:11). Lèfètkè nou sav sa, poukwa sa ka trankilizé-nou ? Paskè lèwvwè dé biten konsa ka fèt, sa pa ka siwprann-nou. Nou ka rann-nou kont kè tout biten-la ka fèt ègzaktèman kon Jézi té anonsé. Sé pousa, nou ka suiv konsèy-la i té ba sé krétyen-la ki té’é viv an tan a lafen. Mi sa i té di : « Siwtou, pa pran lafrous » (Mat. 24:6).

5. a) Dapré Filipyen 4:8, 9, lèwvwè ni épidémi, ka pou nou mandé Jéova adan priyè an nou ? b) Kijan anrèjistrèman a Bib-la édé on sè é kijan ègzanp a-y pé édé-nou ?

⁵ Lèwvwè ni on épidémi, sa pé fè-nou pè é nou pé jous pèd lakat. Sé sa ki rivé Desib. Akòz dè COVID-19 la, tonton a-y, pap’a-y é mèdsen a-y mò. Kifè, i té pè trapé viris-lasa é i té pè ba manman-y li osi pas manman-y té ja ni on bèl laj. Anplisdisa, konm i té ka riské dè pèd travay a-y akòz dè pandémi-lasa, i té ka mandé-y si i té’é rivé ni on dèkwa é si i té’é rivé péyé lwayé a-y. Tèlman i té enkyèt, i pa té ka rivé dòmi. Men magrésa, Desi rivé santi-y anpé kon avan. Kijan i rivé fè sa ? I priyé Jéova é i di-y dé biten byen prési adan priyè a-y. I mandé Jéova édé-y rété kalm é édé-y konsantré-y asi dé biten ki pozitif (li Filipyen 4:8, 9). Anplisdisa, i té ka kouté Jéova palé ba-y. Pou sa, i té ka kouté anrèjistrèman a Bib-la. Mi sa i ka di : « Lè an té ka tann vwa a sé lèktè-la, sa té ka trankilizé-mwen é sa té ka fè-mwen sonjé jan Jéova té ka pran swen an mwen » (Sòm 94:19).

6. Lè ou ka étidyé tousèl a-w é lè ou k’ay réinyon, kijan sa pé édé-w ?

⁶ Lèwvwè ni on épidémi é kè maladi-la ka kouri, sa pé anpéché-w fè sèwten biten ou té ni labitid fè men pa jen lésé sa anpéché-w étidyé Labib tousèl a-w ni anpéché-w ay réinyon. Sa sé frè é sè-la ka rakonté ki rivé-yo adan piblikasyon an nou é adan vidéo an nou ké fè-w sonjé kè frè é sè a-w ki ka jwenn menm difikilté ki-w ka rété fidèl a san pou san (1 Pyè 5:9). Sé réinyon-la ké édé-w mèt dé lidé ki sòti an Bib-la é ki pozitif an lèspri a-w. Anplisdisa, ou ké ni lokazyon ankourajé lézòt é yo ké pé ankourajé-w osi (Wom. 1:11, 12). Lè ou ka réfléchi asi jan Jéova pran swen a sèwvitè a-y lèwvwè yo té malad, lèwvwè yo té pè oben lèwvwè yo té ka santi-yo tousèl, sa ka rann fwa a-w pi fò é an menm balan-la ou ka pi sèten ankò kè vou osi, Jéova ké soutyenn-vou.

7. Ka ègzanp a lapòt Jan ka aprann-nou ?

⁷ Fè éfò pou ou kontinyé palé èvè frè é sè a-w. Délè, lèwvwè ni on épidémi, yonn pé pa rété kolé-kolé èvè lòt, menm lèwvwè nou èvè frè é sè an nou adan lasanblé-la. Lèwvwè sa ka rivé, nou ka santi-nou tibwen kon lapòt Jan ki té anvi vwè zanmi a-y Gayis toubònman menm pou yo té pasé on ti moman ansanm (3 Jan 13, 14). Men i té ja byen konprann kè sa pa té’é posib akòz dè sitiyasyon-la. Alò, i konsantré-y asi sa i té pé fè. I voyé on ti lèt ba Gayis. Menmjan-la osi, si ou pé pa ay vwè frè é sè a-w akaz a yo, fè éfò pou ou pé sa kriyé-yo pa téléfòn oben pa vidéokonférans. Ou pé voyé on ti mésaj ba yo osi. Pi ou ké kontinyé fè sa, pi ou ké santi-w ansékirité é ou ké santi-w anpé. É si ou ka santi kè ou angwasé bon angwasé la, mandé sé ansyen-la édé-w. Yo ké ba-w dé bon ti konsèy ki ké fè-w dibyen. Aksèpté konsèy a yo (Iz. 32:1, 2).

OU PÉ SANTI-W ANPÉ MENMSI OU SIBI ON KATASTWÒF

8. Kijan on katastwòf té’é pé anpéché-w santi-w anpé ?

⁸ Siwvwè dlo ja monté akaz a-w, tè-la ja soukwé koté-la ou ka rété la oben difé ja fè bon déga koté-la ou yé la, sa pé rivé kè ou ka santi-w enkyèt bon enkyèt la é kè sa pa’a disparèt konsa menmsi sa ka fè lontan sa fèt. Siwvwè ou pèd moun ou té enmé oben ou pèd tout zéfé a-w, pétèt kè sa rann-vou tris toubònman, pétèt kè ou santi kè sa kasé 2 bra a-w oben kè ou té kòlè bon kòlè la. Sa pa vé di kè ou sé on moun ki enmé byen matéryèl oben kè ou pa ni asé fwa. Lèwvwè on gwo éprèv konsa ka tonbé asi-w, ou pé réyaji on mannyè ki négatif, é sé on biten nou pé konprann (Jòb 1:11). Men, menm adan on sitiyasyon difisil konsa, ou pé santi-w anpé. Kijansa ?

9. Ka Jézi di pou préparé-nou sianka ni on katastwòf ?

⁹ Sonjé sa Jézi té anonsé. Ni sèwten moun ki ka pansé kè pon gwo malè pé’é jen rivé-yo men nou ki sé disip a Kris, nou pa’a vwè sa konsa. Nou sav kè pi sa ké ay, pi ké ni katastwòf é nou pé pri adan sa a nenpòt ki moman. Jézi té di disip a-y kè avan lafen rivé té’é ni « gwo tranmanntè » ki té’é fèt é kè té’é ni dòt katastwòf osi (Lik 21:11). Anplisdisa, Jézi té anonsé kè moun ké ka « méprizé lalwa dè plizanpli » (Mat. 24:12). Pa ègzanp, nou ka konstaté sa jòdijou lè nou ka vwè kè ni plis moun ki ka tchouyé moun, kè ni plis vyolans é plis téworis. Jézi pa jen di kè si nou ka jwenn sé pwoblèm-lasa sé pas Jéova lagé-nou. An réyalité, onlo sèwvitè a Jéova ki fidèl ja sibi sé kalté katastwòf-lasa (Iz. 57:1 ; 2 Kor. 11:25). Pétèt Jéova pé’é fè on mirak pou pwotéjé-nou lèwvwè ni on katastwòf men i ké ban-nou sa nou bizwen pou nou pé sa rété kalm.

10. Si nou ka préparé-nou dépi aprézan sianka on katastwòf fèt, sa ka montré kè nou ni fwa an Jéova. Kijansa ? (Pwovèb 22:3).

¹⁰ Tin dé moman fò nou aji san pèd tan. Si nou ja pran tan réfléchi asi sa nou ké fè adan on sitiyasyon konsa, sa ké pi fasil pou nou dè rété kalm si janmé sa rivé. Men ès si nou ka préparé-nou sianka ni on katastwòf, sa vé di kè nou pa ni fwa an Jéova ? Awa ! A pa sa. Okontrè sa ka montré kè nou ni fwa an Jéova é kè nou sèten kè i ké pran swen an nou. Kijansa ? Ében Pawòl a Bondyé ka ankourajé-nou a préparé-nou sianka ni on katastwòf (li Pwovèb 22:3). Òwganizasyon a Jéova ka ankourajé-nou a fè sa osic. I ka sèvi èvè sé piblikasyon-la, sé réinyon-la, é èvè sé lasanblé-la lè i ka voyé lèt ban nou pou fè-nou sonjé sa. Ès nou ni konfyans adan Jéova ? Si nou ka réponn wi, fò-nou suiv konsèy-la i ban-nou la dépi aprézan, avan on katastwòf rivé.

11. Ka ègzanp a Margaret ka aprann-nou ?

¹¹ An-nou réfléchi asi sa ki rivé Margaret. Yo ba-y lòd sòti an kaz a-y akòz dè on gwo difé ki té pri adan on foré ki té toupré koté-la i té ka rété la. Konm té ni onpakèt moun ki té ka éséyé chapé kò a yo anmenmtan, té ni bon anboutéyaj an lari-la. Lèwgadé on gwo lafimé ki té nwè nwè nwè vin kouvè lari-la é Margaret vin touvé-y pri adan vwati a-y pannan on moman. Men i rivé woté kò a-y adan sitiyasyon-lasa pas i té byen préparé. Jistèman, i té ni on kat pou édé-y sav ki dòt chimen pou i pran siwvwè pa té ni mwayen pasé pa chimen-la toutmoun té ni labitid pran la é kat-lasa toujou té ka rété an sak a-y. Avan sitiyasyon-lasa té rivé, i té ja pran on tan pou ay gadé ola chimen-lasa té yé pou i té pé sa pran-y fasilman siwvwè fò i té chapé kò a-y san tadé. Konm i té byen préparé, sa sové vi a-y.

12. Lè yo ka di-nou ka pou nou fè pou nou pé sa rété ansékirité, poukwa nou ka obéyi ?

¹² Pou pwotéjé popilasyon-la é pou woumèt lòd an péyi-la, sé otorité-la pé ban-nou on lè pou nou rantré akaz an nou é yo pé di konsa kè apré lè-lasa nou pa ni dwa sòti ankò. Yo pé oblijé-nou osi sòti koté-la nou ka rété la é yo pé pran dòt dispozisyon kon séla. Ni sèwten moun ki pa’a kouté lèwvwè yo ka mandé-nou fè sa oben yo ka tadé pas yo vé pa lésé zéfé a yo. Men kijan sé krétyen-la ka réyaji ? Mi sa Labib ka di : « Akòz dè Ségnè-la, soumèt-zòt douvan tout otorité lézòm mèt anplas : ki sé douvan on wa antankè moun ki pli ho ki zòt, ki sé douvan gouvènè antankè moun i voyé » (1 Pyè 2:13, 14). Òwganizasyon a Jéova ka di-nou osi ka pou nou fè pou tout biten pasé byen pou nou. Pa ègzanp, souvantfwa, yo ka mandé-nou ba sé ansyen-la niméwo a téléfòn an nou é adrès an nou pou yo pé sa rivé jwenn-nou sianka ni pwoblèm. Ès ou ja fè sa ? Yo pé di-nou kijan pou nou aji lè gouvènman-la ka mandé-nou pa sòti akaz an nou oben lè yo ka di-nou kité kaz an nou pou ay ondòt koté. Yo pé di-nou osi ka pou nou fè pou nou pé sa ni sa ki fo pou manjé oben pou swangné-nou. Anplisdisa, yo pé di-nou a ki moman é kijan nou pé édé lézòt. Si nou pa ka obéyi, sa pé mèt vi an nou andanjé é sa pé mèt vi a sé ansyen-la andanjé osi. Fò pa ou oubliyé kè sé frè-lasa ki fidèl ka voyé on zyé asi nou akontinyé (Ébr. 13:17). Mi sa Margaret di : « An suiv dirèksyon-la sé ansyen-la é òwganizasyon a Jéova té ban-nou la é an sèten kè sé sa ki sové vi an mwen. »

13. Menmsi sèwten krétyen oblijé kité kaz a yo, ka ki ka édé-yo kontinyé ni tchè-kontan é kontinyé santi-yo anpé ?

¹³ Ni onlo frè é sè ki té oblijé kité kaz a yo pas swa on katastwòf fèt la yo té ka rété la, oswa ni lagè oben ni gaoulé an péyi a yo. Men yo ka fè tousa yo pé pou fè kò èvè nouvo sitiyasyon a yo é pou fè plis pou Jéova. Yo ka fè kon sé 1^é krétyen-la. Lèwvwè té ni bon pèwsékisyon, yochak té oblijé pran bò a yo men yo kontinyé « anonsé bon nouvèl a pawòl a Bondyé » (Akt 8:4). Prédikasyon-la ka édé frè é sè an nou konsantré-yo asi wayòm a Bondyé olyé yo konsantré-yo asi difikilté yo ka jwenn. Konsa, yo ka kontinyé ni tchè-kontan é yo ka kontinyé santi-yo anpé.

OU PÉ SANTI-W ANPÉ MENM LÈWVWÈ NI PÈWSÉKISYON

14. Lèwvwè yo ka pèwsékité-nou, sa pé anpéché-nou rété anpé. Kijansa ?

¹⁴ Ni onlo biten ki ka édé-nou santi-nou anpé men lèwvwè yo ka pèwsékité-nou, nou pé pa pwofité dè sé biten-lasa. Pa ègzanp, nou kontan toubònman lè nou k’ay réinyon, lè nou pé préché agou a tchè an nou é lè nou pé kontinyé fè ti zafè an nou kon nou té ni labitid fè san nou pè yo mèt-nou lajòl. Lèwvwè yo ka anpéché-nou fè sé biten-lasa, sa pé pran tèt an nou é lè nou ka sonjé sa ki té’é pé rivé-nou, sa pé fè-nou pè. Si sé sa nou ka rèsanti, sa toutafè nòwmal. Men fò-nou fè atansyon pas Jézi di kè akòz dè pèwsékisyon-la, disip a-y té’é pé arété suiv-li (Jan 16:1, 2). Alò, ka nou pé fè pou nou rété anpé menm lèwvwè yo ka pèwsékité-nou ?

15. Yo pé rivé a pèwsékité-nou, poukwa fò pa sa fè-nou pè ? (Jan 15:20 ; 16:33).

¹⁵ Mi sa Pawòl a Bondyé ka di-nou : « Tout moun ki vlé montré an vi a yo kè yo enmé Bondyé é kè yo vlé vin disip a Jézi ké jwenn pèwsékisyon osi » (2 Tim. 3:12). Apré yo entèwdi prédikasyon-la adan péyi a-y, on frè non a-y sé Andréi té ni dimal a kwè kè yo té’é pèwsékité tout sèwvitè a Jéova ki ka rété an péyi-la. Mi sa i té ka di : « Tèlman ni Témwen a Jéova adan péyi-la, an pa’a vwè kijan lapolis ké fè pou arété noutout. » Men olyé lidé-lasa té trankilizé-y, sa té ka angwasé-y bon angwasé la. Ni dòt frè é sè aprézan, olyé yo té mèt an tèt a yo kè yo pa té’é jen arété-yo, yo té préféré fè fon asi Jéova. Yo té sav kè sa té’é pé rivé-yo a nenpòt ki moman men yo pa té ka pran tèt a yo pou sa. Yo pa té enkyèt kon Andréi. Alò, Andréi désidé ni menm mantalité ki yo é i désidé fè Jéova konfyans a san pou san. Tibwen tan apré, i woukoumansé santi-y anpé é konnyéla la, menmsi i ka jwenn difikilté, i ni tchè-kontan kanmenm. Noutout nou pé rèsanti menm biten-la. Yo ké pèwsékité-nou. Fò-nou atann-nou a sa. Men Jézi ka ban-nou on garanti. I ka di-nou ké nou pé rété fidèl (li Jan 15:20 ; 16:33).

16. Lèwvwè yo ka pèwsékité-nou, ki dirèksyon pou nou suiv ?

¹⁶ Lèwvwè gouvènman-la ka entèwdi aktivité an nou oben kè yo ka mèt bon présyon asi nou pou anpéché-nou préché é réini-nou kon nou té’é vé, filyal-la é sé ansyen-la pé ban-nou on dirèksyon. Sa yo ké mandé-nou fè, sé pou pwotéjé-nou, sé pou nou pé sa ni sé piblikasyon-la é tousa nou bizwen pou nou pé sa rété bon bon zanmi èvè Jéova, é pou nou pé sa kontinyé préché dépi sa posib. Alò, fè tousa ou pé pou suiv dirèksyon-la yo ka ba-w la menmsi ou pa’a konprann ègzaktèman poukwa yo ka mandé-w fè sa (Jak 3:17). Anplisdisa, lè on moun pa andwa sav sèwten biten, pa ba-y pon enfòwmasyon pas sa pé mèt vi a frè é sè a-w andanjé é sa pé aji asi aktivité a lasanblé-la (Ékl. 3:7).

17. Menmjan ki sé apòt-la, ka nou byen désidé a fè ?

¹⁷ Yonn adan sé prèmyé biten-la ki ka fè kè Satan an lagè èvè sèwvitè a Bondyé sé pas yo ka « bay témwanyaj asi Jézi » (Rév. 12:17). Pa lésé Satan ni mond a-y fè-w pè. Lèwvwè nou ka kontinyé édé moun vin disip a Jézi magré yo ka pèwsékité-nou, sa ka mèt onlo jwa an tchè an nou é nou ka santi-nou anpé. O 1^é syèk, lèwvwè sé Juif-la ki té ka rèprézanté lalwa mandé sé apòt-la arété préché, yo chwazi kouté Bondyé olyé yo té kouté-yo. Yo kontinyé préché é grasa sa, yo té ni tchè-kontan (Akt 5:27-29, 41, 42). Nou ka tou konprann kè lèwvwè yo ka anpéché-nou préché fò-nou fè atansyon (Mat. 10:16). Men si nou ka fè tousa nou pé pou préché dépi sa posib, nou ké santi-nou anpé pas nou ka fè Jéova plézi é pas nou ka préché on mésaj ki ka sové vi a moun.

« BONDYÉ A LAPÉ-LA KÉ ÈVÈ-W »

18. Owa kimoun nou pé touvé pé-la nou bizwen la ?

¹⁸ Ni on biten pou ou mèt fon an tèt a-w, sé kè menmsi nou ka jwenn bout-rèd, nou pé santi-nou anpé. Lèwvwè nou ka jwenn éprèv, fò-nou sonjé kè sa nou bizwen sé lapé ki ka vin dè Bondyé, kivédi on biten kè Jéova tousèl pé ban-nou. Siwvwè ni on épidémi oben on katastwòf ki fèt oben kè ni pèwsékisyon, fè Pap’a-w ki an syèl-la konfyans a san pou san. Rété toupré a òwganizasyon a Jéova. Konsantré-w asi tout sé bèl biten-la ki ké fèt talè. Si ou fè sa, ‘Bondyé a lapé-la ké èvè-w’ (Filip. 4:9). Adan awtik-la ki ka vin la, nou ké vwè kijan nou pé édé frè é sè an nou ki ka jwenn éprèv ni lapé-la ki ka vin dè Bondyé.