Édé frè é sè a-w andiré lèwvwè yo anba éprèv

1. Souvantfwa, kijan Jéova ka réponn a priyè a sèwvitè a-y ?

ÈS OU té sav Jéova pé sèvi èvè-w pou réponn a priyè a dòt moun ki ka priyé-y èvè tout tchè a yo ? Sa valab pou noutout adan lasanblé-la, ki nou ansyen, ki nou asistan, ki nou pyonyé oben ki nou pwoklamatè. Sa valab osi ki nou jenn, ki nou ja ni on bèl laj, ki nou sé on frè oben ki nou sé on sè. Lèwvwè on zanmi a Bondyé ka kriyé-y o sèkou, souvantfwa, Jéova ka sèvi èvè sé ansyen-la oben èvè dòt sèwvitè a-y ki fidèl pou vin « on gran sous a konsolasyon » pou moun-lasa (Kol. 4:11). A pa ti kontan nou kontan sèvi Jéova é frè é sè an nou konsa ! Nou pé ni lokazyon fè sa lèwvwè tin on épidémi, lèwvwè tin on katastwòf ki fèt oben lèwvwè tin pèwsékisyon.

ÉDÉ FRÈ É SÈ A-W LÈWVWÈ NI ON ÉPIDÉMI

2. Nou pé ni dimal a édé lézòt lèwvwè ni on épidémi. Poukisa ?

² Lèwvwè ni on épidémi,yonn byen vlé édé lòt men nou pé ni dimal a fè sa. Pa ègzanp, nou anvi ay vwè frè é sè an nou men pétèt kè sa pé mèt vi an nou oben vi a yo andanjé. Pétèt kè nou sav kè sèwten adan nou ni pwoblèm a lajan é nou té’é byen vlé envité-yo manjé akaz an nou, men a pa on biten nou pé fè lèwvwè ni on épidémi. Dépawfwa nou té’é byen vlé édé lézòt men lèwvwè fanmi an nou ka soufè osi akòz dè pandémi-la nou pé ni dimal a fè sa. Men nou anvi édé lézòt, sa enpòwtan pou nou, é lè nou ka fè tousa nou pé pou fè sa, sa ka fè Jéova plézi (Pwov. 3:27 ; 19:17). Alò, kijan nou pé fè sa ?

3. Ka ègzanp a sé ansyen-la ki adan lasanblé a Desi ka aprann-nou ? (Jérémi 23:4).

³ Sa sé ansyen-la pé fè. Si ou sé on ansyen, aprann konnèt frè é sè a-w byen kon on bèwjé konnèt chak mouton ki adan troupo-la (li Jérémi 23:4). Adan awtik a simenn pasé nou palé dè on sè non a-y sé Desi, mi sa i ka di : « Sé ansyen-la ki adan gwoup a prédikasyon an mwen té ni labitid préché èvè mwen é èvè sélézòt frè é sè la ki adan gwoup-la é yo té ni labitid pasé dé bon ti moman èvè nou osib. » Alò, lèwvwè pandémi a Covid-19 la rivé é kè akòz dè sa Desi pèd déotwa moun an fanmi a-y, sé ansyen-la rivé soutyenn-li pli fasilman.

4. Poukwa sé ansyen-la rivé édé Desi, é ka sa ka aprann-nou ?

⁴ Mi sa Desi ka èspliké : « Konm sé ansyen-la té ja bon zanmi èvè mwen, an té pé di-yo sa an té ka rèsanti é sa ki té ka enkyété-mwen pi fasilman. » Ka sa ka aprann nou ? Sé ansyen-la, fò-zò pran swen a sé ti mouton-la ki anba rèsponsabilité a zòt la é fò-zò fè sa avan sitiyasyon-la vin mové menm. Fò-zò vin zanmi a yo. Si on épidémi ka anpéché-zòt ay vwè-yo akaz a yo, chèché a pran nouvèl a yo é a édé-yo ondòt jan. Mi sa Desi ka di : « Sa rivé kè plizyè ansyen kriyé-mwen oben voyé mésaj ban mwen menm jou-la. Yo té ka pawtajé sèwten vèwsé èvè mwen é sa té ka touché-mwen onlo menmsi an té konnèt sé vèwsé-lasa byen menm. »

5. Kijan sé ansyen-la pé sav ka frè é sè a yo bizwen, é kijan yo pé édé-yo ?

⁵ On biten ou pé fè pou sav sa frè é sè a-w bizwen sé pozé-yo déotwa ti kèsyon ki pé ké jenné-yo (Pwov. 20:5). Ès yo ni asé manjé, ès yo ni sé médikaman-la yo bizwen la é ès yo ni dòt biten ki nésésè ? Ès yo ka riské pèd travay a yo, oben ès yo ni dimal a péyé lwayé a yo ? Ès yo bizwen on pal pou bénéfisyé dè on èd léta ka bay ? Sé frè é sè la édé Desi ni sé biten-la i té bizwen la. Men sa ki édé-y plis adan sé éprèv-la i té ka travèsé la, sé jan sé ansyen-la aji épi lanmou èvè-y é jan yo sèvi èvè Labib pou ankourajé-y. Mi sa i di : « Sé ansyen-la priyé èvè mwen. Menmsi an pa’a sonjé tousa yo di ègzaktèman, an ka sonjé sa an té ka rèsanti. Sé konsi Jéova té ka di-mwen : “Ou pa tousèl” » (Iz. 41:10, 13).

6. Adan lasanblé-la kijan onlo adan nou pé soutyenn frè é sè a yo ? (gadé imaj-la).

⁶ Sa lézòt pé fè. Fò sé ansyen-la ankourajé frè a yo é édé-yo. Sé yo an prèmyé ki dwètèt fè sa. Men Jéova vé kè noutout fè sa (Gal. 6:10). Menmsi sé on toupiti biten nou ka fè pou édé on moun ki malad, sa pé ankourajé-y onlo. Pa ègzanp, on timoun pé voyé on ti kat oben on désen pou on frè é sa pé fè-y dibyen. On jennmoun pé ay fè kous ba on sè oben fè ondòt biten ki ké itil pou-y. Dòt frè é sè a lasanblé-la pé fè on ti manjé pou on moun ki malad é pòté-y akaz a-y ba-y. Nou ka tou konprann kè lèwvwè on épidémi ka kouri, sé tout lasanblé-la ki bizwen ankourajman. Pétèt nou té’é pé rété tibwen pli lontan apré sé réinyon-la pou palé èvè frè é sè an nou, ki nou an sal di Wayòm la oben ki nou pa vidéokonférans. Fò pa nou oubliyé osi kè sé ansyen-la bizwen kè nou ankourajé-yo. Pannan on épidémi, souvantfwa, sé ansyen-la ni onlo biten a fè. Dayè, ni sèwten pwoklamatè ki voyé on ti mo ba yo pou di-yo mèsi pou tout travay-la yo ka fè la. A pa ti bèl sa bèl lè ‘yonn ka kontinyé ankourajé lòt é lè yonn ka kontinyé fòwtifyé lòt’ ! (1 Tés. 5:11).

ÉDÉ LÉZÒT LÈWVWÈ NI ON KATASTWÒF

7. Lèwvwè on katastwòf fèt, frè é sè an nou pé jwenn onlo difikilté. Kilès ?

⁷ On katastwòf pé chalviré vi a on moun adan on batzyé. Moun-lasa pé pèd tout zéfé a-y, kaz a-y, é i pé jous pèd moun i té enmé. On gwo malè konsa pé rivé frè é sè an nou a nenpòt ki moman. Ka nou pé fè pou édé-yo ?

8. Ka sé ansyen-la é sé chèf a fanmi la pé fè avan on katastwòf fèt ?

⁸ Sa sé ansyen-la pé fè. Sé ansyen-la, sé avan on katastwòf fèt pou zò édé frè é sè a zòt préparé-yo pou sianka. Fè ansòt pou toutmoun adan lasanblé-la sav ka pou yo fè pou yo rété ansékirité é pou yo rivé jwenn-zòt. Adan awtik a simenn pasé nou palé dè Margaret. Mi sa i ka rakonté : « On jou, adan pawti-la “Sa lasanblé-la bizwen”, sé ansyen-la fè-nou sonjé kè sézon a difé poto’o fin. Yo di-nou konsa kè siwvwè lapolis té ka di-nou chapé kò an nou oben siwvwè sitiyasyon-la té ka vin danjéré, fò-nou té’é pati tousuit. Sé frè-la di sa a bon moman-la piskè 5 simenn apré on gwo difé pri. » Pannan étid familyal la, on chèf a fanmi pé fè tout fanmi-la sonjé ka pou yo fè lèwvwè ni on katastwòf. Konsa lè moman-la ké rivé, konm zò ké byen préparé, sa ké édé ki vou, ki timoun a-w rété kalm.

9. Kijan sé ansyen-la pé òwganizé-yo pou yo pé sa kolaboré yonn èvè lòt avan é apré on katastwòf fèt ?

⁹ Si ou rèsponsab a on gwoup a prédikasyon, pa atann on katastwòf rivé pou-w ni niméwo a téléfòn é adrès a touséla adan gwoup-la ki dakò pou ba-w sé enfòwmasyon-lasa. Fè on lis, é fè ansòt pou i toujou ègzak. Konsa, siwvwè on katastwòf fèt, ou ké pé kriyé chak pwoklamatè pou pran nouvèl a-y é pou sav ka i bizwen. Aprésa, voyé tout sé enfòwmasyon-lasa pou koòwdinatè-la san pèd tan. Konsa, li a tou a-y ké pé kriyé rèsponsab a siwkonskripsyon-la. Lè sé frè-la ka kolaboré men-dan-lamen konsa, sé frè é sè la ka risivwè méyè èd-la yo pé ni la. Apré gwo difé-la ki fèt la koté-la Margaret té ka rété la, rèsponsab a siwkonskripsyon-la rété san dòmi pannan 36 èdtan. I rété ka òwganizé travay a sé ansyen-la ki té ka chèché a jwenn apépré 450 frè é sè. Yo té vlé pran swen a yo pas yo té oblijé kité kaz a yo (2 Kor. 11:27). Grasa sa, yo touvé on koté pou touséla ki té bizwen on kaz té pé sa rété.

10. Pou sé ansyen-la, sa enpòwtan kè yo ankourajé frè é sè a yo. Poukwa nou ka di sa ? (Jan 21:15).

¹⁰ Fò sé ansyen-la sèvi èvè Labib pou ankourajé frè é sè a yo é fò-yo édé séla ki angwasé la. Sé rèsponsabilité a yo (1 Pyè 5:2). Lèwvwè ni on katastwòf, fò sé ansyen-la sèten kè tout sé frè é sè la ansékirité, kè yo ni manjé pou yo manjé, kè yo ni lenj pou mèt asi yo é kè yo ni on koté pou yo rété. Men fò pa nou oubliyé kè sé frè é sè lasa ké bizwen kè yo ankourajé-yo èvè Labib pannan plizyè mwa é kè yo soutyenn-yo pas délè moral a yo pé a zéro (li Jan 21:15). Mi sa Harold, on frè ki adan on komité a filyal é ki jwenn onlo frè é sè ki sibi on katastwòf ka di : « Pou woupran doubout a-w sa ka mandé tan. Pétèt yo koumansé oubliyé déotwa ti biten yo pèd. Men tin dé biten yo ka sonjé toutlè. Yo pé ka sonjé kè yo pèd on biten ki té ni onlo valè pou yo, oben kè yo pèd on moun yo té enmé oben kè yo manké mò. Lèwvwè sa ka vin an lèspri a yo, sa pé fann tchè a yo. Men sa pa vé di kè fwa a yo pa asé solid. An réyalité, sa yo ka rèsanti la toutafè nòwmal. »

11. Sé fanmi-la pé bizwen yo édé-yo pannan on bon moman. Ka yo pé fè pou yo ?

¹¹ Labib ka ankourajé-nou « pléré èvè moun ki ka pléré » é sé ansyen-la ka suiv konsèy-lasa (Wom. 12:15). Lè on moun sòti anba on biten konsa, i pé bizwen yo fè-y sonjé kè i pa pèd lanmou a Jéova ni lanmou a frè é sè a-y. Sé ansyen-la ké fè tousa yo pé pou édé sé fanmi-la pa lagé sé bon labitid-la yo té ni la pou rété bon zanmi èvè Jéova, kon pa ègzanp, priyé, étidyé, ay réinyon é préché. Anplisdisa, yo pé ankourajé sé paran-la pou yo pé sa édé timoun a yo a pa jen oubliyé kè tin dé biten kè pon katastwòf pé’é jen pé détwi. Léparan, fè timoun a zòt sonjé ké Jéova ké rété Zanmi a yo pou touttan é kè i ké toujou la pou yo. É siwtou, pa oubliyé di-yo kè toupatou asi latè yo ni on bèl fanmi ki ni plen frè é sè adan é ki toujou paré a édé-yo (1 Pyè 2:17).

12. Lèwvwè ni on katastwòf, kijan lézòt pé soutyenn sé dispozisyon-la yo ka pran la pou édé frè é sè an nou ? (gadé imaj-la).

¹² Sa lézòt pé fè. Si on katastwòf fèt koté-la ou ka rété la, mandé sé ansyen-la ka ou pé fè pou édé frè é sè a-w. Pétèt kè ou ké pé pran déotwa moun ki té oblijé kité kaz a yo akaz a-w oben déotwa volontè ki ka vin pou édé lèwvwè ni on katastwòf. Pétèt ou ké pé pòté manjé oben sèwten biten ki nésésè pou sé frè é sè la ki sibi katastwòf-la. Men si katastwòf-la fèt on koté ki lwen lwen lwen, ès ou pé fè on biten ? Wi, ou pé priyé pou frè é sè a-w ki pèd biten a yo akòz dè katastwòf-la (2 Kor. 1:8-11). Pétèt osi ou ké pé bay on ti lajan pou soutyenn tousa ki ka fèt pou pòté frè é sè an nou sèkou. Pou sa, ou pé fè on ti ofrann pou travay-la ki ka fèt toupatou asi latè (2 Kor. 8:2-5). Si ou pé òwganizé-w pou ay édé la ni on katastwòf ki fèt, ou pé mandé sé ansyen-la kijan ou pé fè sa. Si yo kriyé-w pou sèvi antankè volontè, pétèt yo ké fòwmé-w, é lè moman-la ké rivé pou yo voyé-w on koté, sa ou ké fè ké pi itil pou frè é sè a-w.

ÉDÉ FRÈ É SÈ A-W LÈWVWÈ YO KA PÈWSÉKITÉ-YO

13. Ki difikilté frè an nou ka jwenn adan sé péyi-la yo ka entèwdi aktivité an nou ?

¹³ Adan sé péyi-la yo ka entèwdi aktivité an nou, biten-la ja rèd men i ka vin pli rèd ankò akòz dè pèwsékisyon-la. Sé frè é sè la ki ka rété sé koté-lasa ka jwenn menm pwoblèm ki adan dòt péyi. Yo ni pwoblèm a lajan, yo ka tonbé malad, oben yo ka pèd moun yo enmé. Men konm yo ka entèwdi aktivité an nou, a pa toutlè sé ansyen-la pé ay vwè frè é sè a yo kon yo té’é vlé oben kriyé-yo pou ankourajé-yo. Sé pwoblèm-lasa on ansyen non a-y sé Andrei jwenn. Nou té palé dè-y adan awtik a simenn pasé. On sè ki adan gwoup a prédikasyon a-y vin trapé pwoblèm a lajan. Aprésa, sè-lasa fè on aksidan a vwati. I té oblijé fè plizyè opérasyon é akòz dè sa i pa té pé travay ankò. Magré yo entèwdi aktivité an nou adan péyi-lasa, é magré sa fèt pannan pandémi-la, sé frè é sè la fè tousa yo té pé pou édé-y é toutlè, Jéova té ka voyé zyé asi-y.

14. Lèwvwè sé ansyen-la ka fè fon asi Jéova, yo ka bay on bèl ègzanp. Kilès ?

¹⁴ Sa sé ansyen-la pé fè. Andrei priyé Jéova é i fè sa i té pé. Ka Jéova fè dè koté a-y ? Ni plizyè moun adan lasanblé-la ki té pé fè plis biten pou édé sè-la. Kifè, Jéova pousé-yo fè sa. Pa ègzanp lèwvwè sè-la té ni randévou èvè on dòktè, ni sèwten frè é sè ki té ka menné-y. Ni dòt ankò ki ba-y lajan. Jéova pousé sé frè é sè-la fè tousa yo té pé pou édé sè a yo. Yo aji èvè kouraj é yo travay men-dan-lamen, kifè Jéova béni éfò a yo (Ébr. 13:16). Sé ansyen-la, lèwvwè gouvènman ka mèt baton an wou an nou pou anpéché-nou fè sèwten biten, pa pè mandé dòt moun ba-zòt on pal (Jér. 36:5, 6). Men pi enpòwtan la, fè fon asi Jéova. I pé édé-zòt pran swen a frè é sè a zòt.

15. Ka nou pé fè pou nou pé sa rété ini lèwvwè yo ka pèwsékité-nou ?

¹⁵ Sa lézòt pé fè. Lèwvwè yo ka entèwdi aktivité an nou, dépawfwa nou oblijé réini-nou an toupiti gwoup. Alò, sa enpòwtan toubònman kè toutmoun fè ansòt pou yonn antann-li byen èvè lòt. Fò pa nou goumé yonn èvè lòt men sé kont Satan pou nou goumé. An-nou pasé asi fòt a frè é sè an nou. É si nou trapé on ti bab èvè ondòt moun, an-nou réglé sa tousuit (Pwov. 19:11 ; Éféz. 4:26). An-nou édé lézòt san nou atann kè yo mandé-nou fè sa (Tit 3:14). Jan-la sé frè é sè la édé sè-la nou palé dè-y talè la fè tout gwoup a prédikasyon-la dibyen. Yo vin plis ki on gwoup, yo vin on fanmi (Sòm 133:1).

16. Dapré Kolosyen 4:3, 18, lèwvwè yo ka pèwsékité frè é sè an nou, kijan nou pé édé-yo ?

¹⁶ Ni onlo frè é sè ki ka kontinyé sèvi Jéova menmsi gouvènman-la ka anpéché-yo adoré-y kon yo té’é vlé. Ni sèwten adan yo ki lajòl pas yo ni fwa an Jéova. Nou pé priyé pou yo é pou fanmi a yo. Nou pé priyé osi pou touséla ki ka édé sé frè é sè lasa rété bon bon zanmi èvè Jéova, ki ka édé-yo ni on dèkwa é ki ka édé-yo lèwvwè afè a yo ka pasé douvan tribinal magré yo pé mèt-yo lajòl pou sac (li Kolosyen 4:3, 18). Fò pa ou jen oubliyé kè lèwvwè ou ka priyé pou frè é sè a-w, sa pé édé-yo ! (2 Tés. 3:1, 2 ; 1 Tim. 2:1, 2).

17. Kijan ou pé préparé-w pou pèwsékisyon-la dépi aprézan ?

¹⁷ Vou é fanmi a-w, zò pé préparé-zòt pou pèwsékisyon-la dépi aprézan (Akt 14:22). Pa éséyé imajiné tout sé mové biten-la ki té’é pé fèt la. Olyé ou fè sa, konsolidé lanmityé a-w èvè Jéova é édé timoun a-w fè menm biten-la. Si délè ou enkyèt, di Bondyé tousa ki an tchè a-w (Sòm 62:7, 8). Zò pé fè Jéova konfyans pou plizyè rézon. Lè zò an fanmi, palé dè sad. Lè ou ka préparé-w sianka ni on katastwòf, sa ka édé timoun a-w. Menmjan-la, si ou ka préparé-w voumenm a-w pou pèwsékisyon-la, sa ké édé sé timoun-la osi. Yo ké ni kouraj é yo ké rété kalm pas ou aprann-yo fè Jéova konfyans.

18. Ka ki ké fèt dèmen ?

¹⁸ Lapé-la Bondyé ka ban-nou la ka pwotéjé-nou (Filip. 4:6, 7). Grasa sa, Jéova ka trankilizé-nou dépi aprézan lèwvwè nou malad, lèwvwè ni on katastwòf, oben lèwvwè nou ka jwenn pèwsékisyon. Jéova ka sèvi èvè sé ansyen-la pou pran swen an nou é yo ka pòté bon mannèv pou fè sa. Anplisdisa, Jéova ka pèwmèt nouchak édé frè é sè an nou. Sé on bèl lonnè toubònman ! An-nou pwofité dè pé-la nou ni la jòdijou pou nou pé sa préparé-nou pou sé éprèv-la ki ka vin la é ki ké pi rèd kon ‘gwo tribilasyon-la’ (Mat. 24:21). Adan sé sitiyasyon-lasa, fò-nou ké fè tousa nou pé pou nou rété anpé é pou édé lézòt rété anpé osi. Men, apré gwo tribilasyon-la, nou pé’é jwenn sé sitiyasyon difisil lasa ankò, kifè, nou pé’é enkyèt ankò. Nou ké ni sa Jéova té toujou vé pou nou : nou ké ni vré pé-la é i ké diré pou touttan (Iz. 26:3, 4).