Kijan Jéova vlé lasanblé-la aji èvè on moun ki fè on péché ki grav ?

1. Ka Jéova vlé pou toutmoun ?

LÈ JÉOVA kréyé lézimen, i fè-yo on mannyè pou lésé-yo fè pwòp chwa a yo. Nou ka pran désizyon chak jou Bondyé fè jou. Désizyon-la nou ni a pran la ki pli enpòwtan la, sé lè nou ka désidé ba Jéova vi an nou é lè nou ka rantré an fanmi a-y. Sé sa Jéova vlé pou toutmoun. Poukisa ? Sé pas i enmé-nou é i vlé nou ni tchè-kontan. I vlé nou vin zanmi a-y é kè nou viv pou touttan (Dét. 30:19, 20 ; Gal. 6:7, 8).

2. Lèwvwè on moun po’o rèpanti-y, ka Jéova anvi ? (1 Jan 2:1)

² Men nou ka tou konprann kè Jéova pa’a fòsé ponmoun sèvi-y. I ka lésé-noutout désidé dè sa nou ké fè. Men vinvwè on moun ki batizé ka fè on péché ki grav, ka ki ké pasé ? Ében siwvwè i pa’a rèpanti-y, yo ké woté-y adan lasanblé-la (1 Kor. 5:13). Men a pa paskè yo woté-y adan lasanblé-la kè Jéova pa anvi vwè moun-lasa viré koté a-y. An réyalité, si i bay vi a Gason a-y konm ranson, sé pas i té anvi padonné péché a moun ki ka rèpanti-yo (li 1 Jan 2:1). Pap’an-nou ki plen lanmou ka sipliyé moun ki péché rèpanti-yo (Zak. 1:3 ; Wom. 2:4 ; Jak 4:8).

3. Ka nou ké vwè adan awtik-lasa ?

³ Jéova vlé kè nou vwè péché-la é moun ki ka péché menmjan li i ka vwè-yo. Awtik-lasa ké montré-nou kijan nou pé rivé fè sa. Pannan ou ka ègzaminé awtik-lasa, 1) gadé kijan, lèwvwè on moun fè on péché ki grav adan lasanblé Korent o 1^é syèk, lasanblé-la réglé pwoblèm-lasa, 2) gadé ki konsèy lapòt Pòl ba lasanblé-lasa lèwvwè nonm-la ki té fè péché-la rèpanti-y é 3) gadé ka istwa-lasa ka montré-nou asi jan Jéova ka vwè sèwvitè a-y ki fè on péché ki grav.

O 1^é SYÈK, KA LASANBLÉ-LA FÈ LÈWVWÈ ON FRÈ FÈ ON PÉCHÉ KI GRAV ?

4. Ka ki té ka pasé adan lasanblé Korent ? (1 Korentyen 5:1, 2).

⁴ (Li 1 Korentyen 5:1, 2.) Lèwvwè Pòl fè 3^èm vwayaj a-y antankè misyonè, i tann palé dè on malpwòpté ki té ka fèt adan lasanblé Korent, on lasanblé yo té toufré fòwmé. On frè a lasanblé-lasa té ka kouché èvè madanm a pap’a-y. Mi on manjé kochon mi ! Non sèlman lasanblé-la té ka wousoulé-y, men ou té’é di frè é sè a lasanblé-la té fyèw dè sa. Pétèt pou yo, yo té ka aji èvè mizérikòd kon Bondyé té ka fè-y èvè moun ki enpawfè. Men a pa konsa Jéova té ka vwè sa ditou-ditou pas i pa ka pran kè moun fè péché adan pèp a-y. Vyé vi-la frè-la té ni la té ka choké moun ki pa té ka adoré Jéova é sa té ka fè sé moun-lasa malpalé pèp a Bondyé. Anplisdisa, frè-la ki té ka fè péché-lasa té’é pé détenn asi dòt moun ki té ka frékanté-y. Alò ka Pòl mandé frè é sè Korent fè ?

5. Ka Pòl mandé lasanblé Korent fè é ka sa té vlé di ojis ? (1 Korentyen 5:13 ; gadé imaj-la osi).

⁵ (Li 1 Korentyen 5:13.) Jéova fè Pòl maké on lèt ba lasanblé Korent. Adan lèt-lasa, i mandé pou yo ‘woté’ moun-la ki fè péché-la é ki pa rèpanti-y la adan lasanblé-la. Kijan lasanblé-la té dwèt aji èvè nonm-lasa ? Pòl di-yo ‘arété frékanté-y’. Ka i té vlé di ojis ? I èspliké kè ‘fò pa yo té menm manjé èvè moun-lasa’ (1 Kor. 5:11). Lèwvwè ou ka manjé on ti biten èvè on moun, pli souvan ki rarman sa ka ba-zòt lokazyon fè on bèl ti kozé. É piti-a-piti, ou pé touvé-w ka pasé tibwen plis tan èvè moun-lasa. Alò, sa Pòl té vlé di sé kè si sa pa té nésésè, fò pa sé frè é sè Korent la té pasé tan èvè on moun konsa. Sa té’é pwotéjé-yo, pas konsa i pa té’é détenn asi yo (1 Kor. 5:5-7). Anplisdisa, sa té’é édé moun-la konprann jan i fè Jéova lapenn. I té’é wont é sa té’é ba-y anvi rèpanti-y.

6. Kijan lèt-la Pòl té voyé la aji asi lasanblé Korent é asi moun-la ki té ni mové konduit la ?

⁶ Pòl té ka mandé-y kijan sé Korentyen-la té’é réyaji lèwvwè yo té’é li lèt a-y. Men Tit menné bon nouvèl ba-y. Sé frè é sè Korent la té byen réyaji. Yo fè tousa Pòl té mandé-yo fè. Anplisdisa, pannan sé mwa-la ki vin apré la, frè-la ki té ni mové konduit la rèpanti-y. I té chanjé konpòwtasyon a-y é i té chanjé létadèspri a-y. I mété-y ka aji annakò èvè prensip a Jéova ki jis osi. Alò konnyéla, ka lapòt Pòl té kay ankourajé lasanblé-la fè ?

KIJAN POU LASANBLÉ-LA TÉ AJI ÈVÈ MOUN-LA KI TÉ PÉCHÉ LA É KI RÈPANTI-Y LA ?

7. Apré yo té woté moun-la adan lasanblé-la, kijan moun-la ki té péché la réyaji ? (2 Korentyen 2:5-8).

⁷ (Li 2 Korentyen 2:5-8.) Adan 2^èm lèt-la Pòl té maké la ba sé Korentyen-la, Pòl di-yo : « Jan-la lamajorité adan zòt rèpran moun-lasa, ja ni asé pou-y ». Sa vé di kè apré yo té woté moun-la adan lasanblé-la, moun-lasa rann-li kont kè fò i té rèpanti-y. É konm i rèpanti-y, i pa té bizwen yo korijé-y pou sa i té fè la ankò (Ébr. 12:11).

8. Ka Pòl mandé lasanblé Korent fè ankò ?

⁸ Aprésa, Pòl mandé lasanblé-la ‘padonné moun-la ki péché la volontyé, konsolé-y’ é i di lasanblé-la kè fò-yo té ‘fè-y santi kè yo enmé-y’. Nou ka tou konprann kè Pòl pa té vlé kè yo enki pèwmèt moun-la wouvin adan lasanblé-la. Sa i té vlé, sé kè yo montré-y kè yo té padonné-y vréman é kè yo té enmé-y, ki sé adan jan-la yo té ka aji èvè-y la, ki sé adan sa yo té ka di-y. A moman-lasa, yo té’é montré-y kè yo té ka akéyi-y bra gran wouvè.

9. Pétèt ni sèwten moun adan lasanblé-la ki té ni dimal a padonné moun-la ki té péché la é ki rèpanti-y la. Ka ki ka fè-nou di sa ?

⁹ Lè yo tann kè moun-la ki té péché la té viré adan lasanblé-la, pétèt odépa ni sa ki pa té kontan. Poukwa nou ka di sa ? Pétèt ni sa ki té kòlè pas i té mèt dézagréman adan lasanblé-la. Pétèt osi ni sa ki té tris davwa i té fè-yo ditò. Ni sa ki dwèt té ka pansé kè sa pa té jis kè yo akéyi moun-lasa bra gran wouvè alòskè yo, yo ka goumé rèd pou kontinyé maché dwèt (konparé èvè sa ki maké adan Lik 15:28-30). Men poukwa fò moun an lasanblé-la té montré frè-la kè yo té enmé-y vréman ?

10-11. Ka ki té’é pé rivé siwvwè sé ansyen-la pa té ka padonné moun-la ki té fè péché-la é ki té rèpanti-y la ?

¹⁰ Ou ka imajiné sa ki té’é pasé siwvwè sé ansyen-la pa té dakò pou frè-la ki té péché la viré adan lasanblé-la. Oben imajiné kè menm apré i viré adan lasanblé-la, sé frè é sè la pa té montré-y kè yo enmé-y. Sa té’é fè-y lapenn toubònman, é ‘lapenn-lasa té’é pé jous chayé-y’. Pétèt i té’é pansé kè i pé’é jen pé sèvi Bondyé ankò, kifè tout éfò i té’é pé fè pou wouvin bon zanmi èvè Bondyé pa té’é sèvi ayen.

¹¹ Pi mové ankò, siwvwè sé frè é sè a lasanblé-la pa té ka padonné moun-la ki té fè péché-la é ki té rèpanti-y la, yo té’é pé rivé a pèd lanmityé a yo èvè Jéova. Poukisa ? Pas olyé yo imité Jéova é yo padonné moun-la ki té fè péché-la, sé Satan, ki rèd é ki pa ni tchè, yo té’é ka imité. Yo té’é lésé Dyab-la sèvi èvè yo pou fè moun-la lagé Jéova (2 Kor. 2:10, 11 ; Éféz. 4:27).

12. Kijan lasanblé Korent té pé imité Jéova ?

¹² Frè é sè Korent té pé imité Jéova olyé yo té imité Satan. Kijan yo té’é fè sa ? Ében sé siwvwè yo té ka aji èvè moun-la ki rèpanti-y la kon Jéova té ka aji èvè moun ki té ka rèpanti-yo. An-nou vwè ka sèwten moun ki maké Labib ni lokazyon di anrapò èvè Jéova. Pa ègzanp, David ni lokazyon di kè Jéova ‘enmé sa ki byen é kè i paré a padonné’ (Sòm 86:5). Mi sa Miché maké : « Kimoun ki kon vou o Bondyé, on Bondyé ki ka padonné fòt rèstan a pèp a-y ka fè é ki pa’a tchenn kont dè péché a-y ? » (Mich. 7:18). É mi sa Izayi di asi Bondyé ankò : « Moun-la ki méchan la, fò i chanjé konpòwtasyon a-y, é nonm-la ki mové la, fò i woté lidé ki an tèt a-y ; fò i wouvin owa Jéova, é i ké pran penn a-y, fò i wouvin owa Bondyé an nou, pas i ké padonné anplen » (Iz. 55:7).

13. Poukwa fò pa sé ansyen-la té tadé pou fè moun-la ki té rèpanti-y la viré adan lasanblé-la ? (gadé ti karé-la « A ki moman yo pèwmèt moun-la ki té fè péché la é ki rèpanti-y la viré adan lasanblé-la ? »).

¹³ Pou yo té imité Jéova, fò frè é sè a lasanblé Korent té akéyi moun-la ki té fè péché-la é ki té rèpanti-y la bra gran wouvè é fò yo té fè-y santi kè yo enmé-y. É sé sa menm yo fè. Yo fè tousa Pòl té mandé-yo fè é sé konsa yo montré kè yo ‘obéyi adan tout biten’ (2 Kor. 2:9). Sa té ka fè enki kèlkè mwa yo té woté péchè-la adan lasanblé-la, men davwa yo té korijé-y, i té rèpanti-y. Kifè, sé ansyen-la pa té bizwen atann pou yo fè moun-lasa viré adan lasanblé-la.

JÉOVA SÉ ON BONDYÉ KI JIS É KI NI SAJÈS. KIJAN NOU PÉ IMITÉ-Y ?

14-15. Ka sa ki pasé adan lasanblé Korent ka aprann-nou ? (2 Pyè 3:9 ; gadé imaj-la osi).

¹⁴ Nou ka touvé sa ki fèt adan lasanblé Korent é mannyè yo réglé pwoblèm-la adan Labib, é sa maké la « pou enstwi-nou » (Wom. 15:4). Istwa-lasa ka montré-nou kè Jéova pa ka aksèpté kè on moun ki fè on péché ki grav é ki pa ka rèpanti-y rété adan pèp a-y. Pétèt kè sèwten ka pansé kè konm Jéova sé on Bondyé ki ni mizérikòd, i ké lésé moun-la ki fè on péché ki grav é ki pa rèpanti-y adan lasanblé-la. Men a pa konsa Jéova ka aji èvè mizérikòd èvè on moun. Menmsi i ni mizérikòd, i pa’a pran kè moun fè nenpòt ki biten. Prensip a-y ka montré-nou ka ki byen é ka ki mal é i pé’é jen chanjé prensip a-y pou ponmoun (Jid 4). Si Jéova té ka lésé on moun ki péché é ki vé pa rèpanti-y adan lasanblé-la, i pa té’é aji èvè mizérikòd, pas sé mèt i té’é mèt tout lasanblé-la andanjé (Pwov. 13:20 ; 1 Kor. 15:33).

¹⁵ Istwa-lasa ka montré-nou ondòt biten. Jéova vé pa ponmoun détwi. Chaklè sa posib, i ka chèché a sové moun ki fè péché. Dèstan yo ka chanjé létadèspri a yo é jan-la yo té ka konpòwté-yo la, i ka aji èvè mizérikòd épi yo (Ézék. 33:11 ; li 2 Pyè 3:9). Lè moun-la ki té ka péché la rèpanti-y é kè i lagé mové konduit-la i té ni la, Jéova sèvi èvè Pòl pou èspliké sé frè é sè Korent la kè fò yo té padonné moun-lasa é kè fò yo té akéyi-y bra gran wouvè.

16. Apré ou vwè jan Jéova té vé yo aji èvè misyé-la ki té adan lasanblé Korent, ka ou ka rèsanti ?

¹⁶ Jan-la Jéova té vé yo aji èvè moun-la ki té fè péché la adan lasanblé Korent ka montré jan Jéova ni lanmou é jan i sé on Bondyé ki jis (Sòm 33:5). Ès sa pa’a ba-w gou pou-w ba Bondyé louwanj plis ankò ? Konm noutout ka fè péché, noutout bizwen Bondyé padonné-nou. Nou pé ni onlo rèkonésans pou Jéova davwa i bay vi a Gason a-y kon on ranson pou i pé sa padonné-nou. Sa i anvi, sé kè nou ni tchè-kontan pou touttan.

17. A ki kèsyon nou ké réponn adan sé awtik-la ki ka vin la ?

¹⁷ É jòdijou ? Lèwvwè ni on péché ki grav adan on lasanblé, kijan yo ka réglé sa ? Kijan ansyen a lasanblé-la pé imité Jéova adan mannyè i ka aji èvè lanmou é kijan yo pé édé moun-lasa rèpanti-y ? É lèwvwè sé ansyen-la ka désidé kè yo ké woté on moun adan lasanblé-la oben kè yo ké fè-y viré adan lasanblé-la, kijan pou sé frè é sè-la réyaji ? Sé sa nou ké vwè adan sé awtik-la ki ka vin la.