Kijan sé ansyen-la ka édé moun yo woté adan lasanblé-la

1-2. a) Lè on moun ka kontinyé péché, ka Jéova ka pansé dè sa ? b) Lè on moun ka fè on péché ki grav, ka Jéova ka èspéré i ké fè ?

JÉOVA pa ka pran kè moun aji nenpòt kijan adan lasanblé-la. I hay lèwvwè moun ka fè péché (Sòm 5:4-6). Sa i vé sé kè nou obéyi sé komandman-la ki an Bib-la. Men i sav osi kè nou sé dé moun ki enpawfè, kifè nou pé’é pé obéyi a tout sé komandman-la kon on moun ki pawfè (Sòm 130:3, 4). Anmenmtan, Jéova pa dakò ditou-ditou èvè moun ki « pa ni pon rèspé pou[-y], ki ka pran favè-la nou pa mérité la [...] kon on èskiz pou yo ni on konduit ki san rèspé é ki ni fon-é-toupé » (Jid 4). Sé pousa Labib ka di kè lèwvwè lagè a Awmagédon ké rivé, ‘Bondyé ké détwi moun ki pa ni pon rèspé pou-y’ (2 Pyè 3:7 ; Rév. 16:16).

² Men Jéova vé pa ponmoun détwi. Kon nou vwè-y adan sé awtik-la ki avan la, Labib ka di : « I vé kè toutmoun rivé rèpanti » (2 Pyè 3:9). Sé ansyen-la ka pran ègzanp asi Jéova, é èvè onlo pasyans, yo ka éséyé édé on moun ki péché pou i chanjé konpòwtasyon a-y é pou i wouvin bon zanmi èvè Jéova. Men a pa toutmoun ki péché ki ka réyaji byen (Iz. 6:9). Ni sa ki ka kontinyé fè sa ki mové magré sé ansyen-la fè éfò pou édé-yo rèpanti-yo. A moman-lasa, ka fò sé ansyen-la fè ?

« WOTÉ MÉCHAN-LA ANMITAN A ZÒT »

3. a) Dapré sa Labib ka di, ka pou sé ansyen-la fè lèwvwè on moun pa ka rèpanti-y ? b) Poukwa nou pé di kè lèwvwè on moun pa ka rèpanti-y sé limenm ki fè si yo ka woté-y adan lasanblé-la ?

³ Lèwvwè on moun ki péché vé pa rèpanti-y, sé ansyen-la oblijé suiv komandman-la nou ka touvé adan 1 Korentyen 5:13. Mi sa i ka di : « Woté méchan-la anmitan a zòt ». Moun-la ki péché la sav byen kè siwvwè i pa’a rèpanti-y yo ké woté-y adan lasanblé-la. Alò sa i simé sé sa i ka rékòlté (Gal. 6:7). Poukwa nou ka di sa ? Pas magré tousa sé ansyen-la fè pou édé-y, sé-y ki désidé i vé pa rèpanti-y (2 Wa 17:12-15). Jan-la i ka aji la ka montré kè i vé pa kouté sa Jéova ka mandé (Dét. 30:19, 20).

4. Lè yo ka woté on moun adan lasanblé-la, poukwa yo ka di lasanblé-la sa ?

⁴ Lè yo ka woté on moun ki péché é ki pa ka rèpanti-y adan lasanblé-la, yo ka di lasanblé-la kè moun-lasa pa Témwen a Jéova ankòa. Si yo ka fè sa, a pa pou fè moun-la hont, men sé plito pou pèwmèt lasanblé-la obéyi komandman-la ki ka di kè ‘fò-nou arété frékanté’ on moun ki pa ka rèpanti-y é kè ‘fò pa nou manjé èvè-y nonplis’ (1 Kor. 5:9-11). Si Labib ka di sa, sé kè ni on bon rézon. Lapòt Pòl maké : « Tibwen lèven ka fè tout pat-la monté » (1 Kor. 5:6). Si on moun ki péché é ki pa ka rèpanti-y té ka rété adan lasanblé-la, sélézòt frè é sè la té’é pé pansé kè yo pa oblijé fè sa Jéova ka mandé (Pwov. 13:20 ; 1 Kor. 15:33).

5. Lèwvwè yo woté on moun adan lasanblé-la, kijan pou nou vwè moun-lasa é poukwa nou ka di sa ?

⁵ Lèwvwè yo woté on moun adan lasanblé-la, kijan pou nou vwè moun-lasa ? Fò pa nou mèt an tèt an nou kè pa ni pon èspwa pou moun-lasa. Anfèt, sé konsidiré moun-lasa sé on mouton ki pèd. Men lè on mouton lésé twoupo-la, ni mwayen i wouviré adan twoupo-la ankò. On biten pou nou sonjé osi sé kè moun-lasa té ba Jéova vi a-y. Men alèla konm i pa ka rèspèkté pwomès-la i té fè Jéova la, i pa bon bon zanmi èvè-y ankò (Ézék. 18:31). Konm Jéova ka lésé pòt-la wouvè toujou é kè i dakò pou aji èvè mizérikòd èvè moun, nou pé kontinyé èspéré kè moun-lasa ké chanjé. Men kijan sé ansyen-la pé édé on moun yo woté adan lasanblé-la ?

KIJAN SÉ ANSYEN-LA KA ÉDÉ MOUN YO WOTÉ ADAN LASANBLÉ-LA

6. Ka sé ansyen-la ka fè pou édé sé moun-la yo woté adan lasanblé-la ?

⁶ Lè yo ka woté on moun adan lasanblé-la, ès sa vlé di sé ansyen-la ka lésé-y asi kont a-y é yo pa’a fè ayen pou édé-y wouvin owa Jéova ? Anponjan ! Lè on komité a ansyen ka di on moun ki péché é ki pa rèpanti-y kè yo ké woté-y adan lasanblé-la, an menm balan-la yo ka èspliké-y ka pou i fè pou i pé sa viré adan lasanblé-la. Men a pa yenki sa. Sé ansyen-la ké di moun-la ki péché la kè yo vé fè on ti kozé èvè-y adan déotwa mwa. Konsa, yo ké pé vwè si i chanjé létadèspri. Si moun-la dakò pou wouvwè sé ansyen-la, lè yo ké fè ti kozé-lasa, yo ké kontinyé édé-y pou i rèpanti-y. Menmsi i po’o chanjé létadèspri a-y, dè tanzantan yo ké éséyé vwè-y.

7. Lèwvwè yo woté on moun adan lasanblé-la, kijan sé ansyen-la pé aji èvè konpasyon épi-y kon Jéova ka fè-y ? (Jérémi 3:12).

⁷ Sé ansyen-la ka fè éfò pou yo aji èvè konpasyon épi moun yo woté adan lasanblé-la kon Jéova ka fè-y. An tan lontan, Jéova pa atann kè pèp a Israèl viré an 2 bra a-y pou i pé sa édé-yo. Okontrè, sé-y ki pran douvan. I voyé pwofèt owa a yo avan menm yo té rèpanti-yo. Kon nou vwè-y adan 2^èm awtik a Tou dè Gad lasa, Jéova di Ozé padonné madanm a-y é mandé-y si i vé viré èvè-y alòskè madanm-la té adan péché a-y toujou. Jéova montré pèp a-y jan i té ni konpasyon (Ozé 3:1 ; Mal. 3:7). Kon Jéova, sé ansyen-la anvi kè moun-la ki péché la viré an 2 bra a Bondyé é yo pa’a mèt baton an wou a-y pou anpéché-y fè sa (li Jérémi 3:12).

8. Kijan ègzanp a gason-la ki té pran mové chimen ka montré-nou mizérikòd a Jéova ? (Lik 15:7).

⁸ Adan 2^èm awtik a Tou dè Gad lasa, nou vwè kè Jézi pran ègzanp a on gason ki té pèd chimen. Ou ka sonjé-y ? Pannan i té ka wouviré aka pap’a-y, lè papa-la vwè-y « i kouri jwenn-li, i pran-y an dé bra a-y é i bo-y èvè tandrès » (Lik 15:20). Papa-la pa atann kè gason a-y mandé-y padon, i pran douvan pou i ay jwenn-li, kon nenpòt papa ki enmé timoun a-y té’é fè. Sé ansyen-la ka rèsanti menm biten-la lè yo ka sonjé on moun ki pèd chimen. Yo ka kontinyé ni èspwa kè sé timouton-la ki pèd chimen ké wouviré adan lasanblé-la (Lik 15:22-24, 32). Lè on moun ki péché ka rèpanti-y, ni onlo jwa an syèl-la men ni onlo jwa asi latè osi ! (li Lik 15:7).

9. Ki bèl envitasyon Jéova ka fè sé moun-la ki péché la ?

⁹ Ka nou vwè jous aprézan ? Nou vwè kè Jéova pa ka aksèpté kè moun ki ka péché é ki pa ka rèpanti-yo rété adan lasanblé-la. Men sa pa vé di kè i ka ba sé moun-lasa do. I anvi yo viré an 2 bra a-y. Lèwvwè on moun ka rèpanti-y, Jéova ka di-nou sa i ka rèsanti. Gadé ka i ka di anrapò èvè sa adan Ozé 14:4 : « An ké géri-yo é yo ké arété aji on mannyè ki ka montré kè yo pa fidèl. Sé dè mwenmenm an ké enmé-yo pas an pa kòlè èvè yo ankò. » Sé pawòl-lasa ka ba sé ansyen-la balan pou yo gadé pou vwè tout ti biten ki ka montré kè on moun koumansé rèpanti-y. É pasaj-lasa ka montré moun yo woté adan lasanblé-la kè Jéova enmé-yo, é kè i anvi yo viré an 2 bra a-y.

10-11. Lèwvwè sa ja ka fè onpakèt lanné yo woté on moun adan lasanblé-la, kijan sé ansyen-la ka éséyé édé-y ?

¹⁰ É sé moun-la yo woté adan lasanblé-la sa ja ka fè bon enpé lanné ? Pétèt yo ja lagé péché-la ki té fè si yo té woté-yo adan lasanblé-la. Délè, yo pa menm ka sonjé pou ki rézon yo té woté-yo adan lasanblé-la. Men kèlkanswa, sé ansyen-la ka éséyé rètouvé sé moun-lasa pou rann-yo on ti vizit. Lè yo ké fè on ti kozé èvè moun-la, yo ké mandé-y si i dakò pou yo priyé èvè-y, é èvè onlo lanmou, yo ké ankourajé-y viré owa Jéova. On biten ki sèten sé kè si sa ka fè lontan moun-lasa lagé lasanblé-la, i ké bizwen viré aprann sèwten biten asi Jéova é asi Labib. Sé pousa, si i ka di sé ansyen-la i vé wouvin owa Jéova, yo ké pran dispozisyon pou on moun étidyé èvè-y menmsi i po’o viré adan lasanblé-la. Men sé ké toujou sé ansyen-la ki ké pran sé dispozisyon-lasa.

¹¹ Pou sé ansyen-la imité konpasyon a Jéova, yo ka chèché touséla ki lagé Jéova la pou fè-yo sonjé kè pòt-la wouvè toujou. Dépi ou vwè on moun ka montré kè i rèpanti-y vréman é kè i pa’a fè sé mové biten-la i té ka fè la avan, sé ansyen-la pé fè-y viré adan lasanblé-la (2 Kor. 2:6-8).

12. a) Adan ki sitiyasyon sé ansyen-la ké montré-yo véyatif ? b) Poukwa fò pa nou konpranndèdi kè Jéova pé’é jen padonné sèwten moun ? (gadé nòt-la osi).

¹² Délè, fò sé ansyen-la ké montré-yo vréman véyatif èvè on moun. Pa ègzanp, sé pé pas moun-lasa té fè on timoun vwè mizè, oben kè i té mélé-y adan zafè a apòsta oben i té monté konplo pou divòsé èvè moun-la i té mayé èvè-y la. Adan sé sitiyasyon-lasa, fò sé ansyen-la ké sèten kè moun-la ka rèpanti-y vréman (Mal. 2:14 ; 2 Tim. 3:6). Fò yo pwotéjé twoupo-la. Men anmenmditan, fò-yo sonjé kè si on moun lagé péché-la i té ka fè la é kè i ka rèpanti-y vréman, Jéova ka aksèpté i viré adan lasanblé-la. Kifè, menmsi fò yo véyatif avan yo pèwmèt on moun ki té éséyé kouyonné lézòt viré adan lasanblé-la, fò pa yo ay two lwen nonplis é mèt an tèt a yo kè Jéova pé’é jen padonné on moun konsab (1 Pyè 2:10).

KA LASANBLÉ-LA PÉ FÈ

13. Ès nou ké aji menmjan-la èvè on moun yo korijé é èvè on moun yo woté adan lasanblé-la ? Bay on ti èsplikasyon.

¹³ Kon nou vwè-y adan awtik-la ki avan la, délè sé ansyen-la ka di lasanblé-la kè yo korijé on moun. Ès sa vé di kè fò pa nou frékanté-y ankò ? Awa, pas moun-la rèpanti-y é i arété fè mové biten-la i té ka fè la (1 Tim. 5:20). I ka fè pawti a lasanblé-la toujou é i bizwen frè é sè a-y ankourajé-y pou i kontinyé maché dwèt (Ébr. 10:24, 25). Pawkont, lèwvwè yo ka woté on moun adan lasanblé-la, a pa menm biten-la. Moun-lasa, nou ké ‘arété frékanté-y’ é ‘pa menm manjé nou pé ké manjé èvè-y ankò’ (1 Kor. 5:11).

14. Lèwvwè on moun yo woté adan lasanblé-la ka vin réinyon, ki désizyon chakmoun dwètèt pran ? (gadé imaj-la osi).

¹⁴ Ès sa vlé di kè pas yo woté on moun adan lasanblé-la, nou pa’a lévé-y digad ankò ? Pa oblijé. Sé vré, nou pé ké frékanté moun-lasa, men ès nou pé envité-y adan réinyon an nou, siwtou si sé té bon moun an nou oben on moun an fanmi an nou ? Sé chakmoun ki ké pran désizyon a-y annakò èvè konsyans a-y. É si moun-lasa ka vin réinyon ? Si sé té avan, nou pa té ké di-y bonjou. Men konnyéla, sé chakmoun ki ka vwè si konsyans a-y ka pèwmèt-li di-y bonjou. Ni sa ki ké di-y bonjou é ki ké di-y kè yo kontan vwè-y é yo pé’é vwè pon pwoblèm adan sa. Men kèlkanswa, nou pé’é pran pon chapit èvè moun-lasa é nou pé ké frékanté-y.

15. Dè kimoun yo ka palé adan 2 Jan 9-11 ? (gadé ti karé-la « Èskè Jan é Pòl té ka palé dè menm péché-la ? »)

¹⁵ Ni sèwten moun ki pé di : « Men an pa’a konprann ! Ès Labib pa’a di kè moun-la ki ka di-y bonjou ka pawtisipé adan mové biten i ka fè ? » (li 2 Jan 9-11). Lè nou ka gadé sé pasaj-la ki avan é apré vèwsé-lasa, nou ka vwè kè sé dè moun ki apòsta yo ka palé é dè moun ki ka pousé dòt moun bétizé (Rév. 2:20). Si on moun ka kontinyé défann sa sé apòsta-la ka anségné, oben si i ka ankourajé moun fè biten ki mové, sé ansyen-la pé ké ay vwè-y. Apapoudi tout krab-la mò an bari-la pou moun-lasa. Men toutotan moun-lasa pa chanjé, nou pé’é di-y bonjou é nou pé’é envité-y vin réinyon nonplis.

AN-NOU IMITÉ MIZÉRIKÒD A JÉOVA

16-17. a) Ka Jéova anvi vwè moun ki péché fè ? (Ézékyèl 18:32). b) Kijan sé ansyen-la pé travay ansanm èvè Jéova pou édé moun ki péché ?

¹⁶ Ka nou aprann adan sé 5 awtik-la nou étidyé la ? Jéova vé pa ponmoun détwi ! (li Ézékyèl 18:32). Sa i vlé sé kè sé moun-la ki péché la wouviré an 2 bra a-y (2 Kor. 5:20). Sé pousa, dépi an tan lontan i pa té ka las mandé sèwvitè a-y ki té lagé-y pou yo rèpanti-yo é viré owa a-y. Lèwvwè sé ansyen-la ka pòté mannèv pou édé moun ki péché rèpanti-yo, yo ka travay ansanm ansanm èvè Jéova ! (Wom. 2:4 ; 1 Kor. 3:9).

¹⁷ Ou ka imajiné jan toutmoun kontan an syèl-la lèwvwè on moun ka rèpanti-y ! Kanta Papa Jéova, pa menm palé ! I ka kontan vwè ti mouton a-y ka viré adan lasanblé-la. Pi nou ka réfléchi asi jan Jéova ni konpasyon, jan i ni mizérikòd é jan i ka ban-nou favè-la nou pa mérité la, pi nou ka vin enmé Jéova fò (Lik 1:78).