Frè é sè ki ja ni on bèl laj, zò pé fè onlo biten pou lasanblé-la
« Lè an ka viré sonjé tousa an té ka rivé fè lè an té jenn, mwenmenm ka touvé sa fò. Alè an pa annéta fè sa an té ka fè avan » (Connie, 83 an).
Pétèt kè vou osi ou pé pa fè tousa ou té ka fè avan. Menmsi sa ja ka fè bon enpé tan ou ka sèvi Jéova, pétèt kè lè ou ka gadé sa ou té ka fè avan é sa ou pé fè alèla, sa ka dékourajé-w. Si sé sa ou ka rèsanti ka ki pé édé-w ni tchè-kontan ?
KA JÉOVA VÉ OU FÈ ?
Mandé-w : « Ka Jéova vé an fè ? » Sa ki maké an Détéwonòm 6:5 pé ankourajé-w. Mi sa i ka di : « Fò ou enmé Jéova, Dyé a-w, èvè tout tchè a-w, èvè tout nanm a-w, é èvè tout fòs a-w. »
Vèwsé-lasa ka di kè Jéova vé kè ou sèvi-y èvè tout tchè a-w, tout nanm a-w, é tout fòs a-w. Sa pé édé-w pou ou pa konparé sa ou ka fè èvè sa lézòt ka fè oben pou ou pa konparé sa ou té ka fè lè ou té jenn èvè sa ou ka rivé fè jòdla.
Pran on ti tan pou réfléchi asi sa : Lè ou té jenn, sèten ou té ka ba Jéova sa ou té ni dè méyè, pa vré ? É alè ? Ou pa’a ba-y sa ou ni dè méyè ? Si ou gadé byen, ou ké rann-vou kont kè ayen pa chanjé : lè ou té jenn ou té ka ba Jéova sa ou té ni dè méyè é alèla ou ka kontinyé ba-y sa ou ni dè méyè.
Ou ba Jéova sa ou té ni dè méyè lè ou té jenn é ou ka kontinyé ba-y sa ou ni dè méyè menmsi ou ja ni on bèl laj.
SA OU APRANN ADAN VI A-W PÉ ÉDÉ LÉZÒT
Ni ondòt biten pou-w sonjé : olyé ou rété ka réfléchi asi sa ou pé pa fè, sonjé kè konm ou ni on bèl laj, ni onlo biten ou pé fè pou édé lézòt. Lè ou byen gadé, ni sèwten biten ou pa té pé fè lè ou té pi jenn kè ou pé fè alèla. Ki biten ésa ?
Pawtajé èvè lézòt sa ou aprann. An-nou réfléchi asi 2 vèwsé :
Wa David : « An té jenn, é aprézan an vyéyi, men an pa jen vwè Bondyé lagé on moun ki jis é an pa jen vwè timoun a-y ka chèché manjé » (Sòm 37:25).
Joziyé : « Aprézan kouté ! Talè an kay mò. Zò sav byen dè tout tchè a zòt é dè tout nanm a zòt kè, pawmi tout sé bèl pwomès-la Jéova, Bondyé a zòt, fè-zòt, pa menm onsèl pawòl pa rété atè. I réyalizé tout sé pwomès-lasa ba zòt. Pa menm onsèl pawòl pa rété atè » (Joz. 23:14).
David é Joziyé té ka sèvi Jéova dépi bon enpé lanné. Yo té byen plasé pou di sèwten biten pas yo té ja ni onlo èkspéryans. Pétèt kè lè ou té pi jenn ou di dé biten pou ankourajé lézòt. Men alèla, konm ou ni plis èkspéryans, sa ou ka di la ka ankourajé lézòt plis ankò.
Si sa ja ka fè bon enpé tan ou ka sèvi Jéova, vou osi ou pé palé dè sa Jéova ja fè ba-w oben dè sa i ja fè ba dòt moun. Ès ou ka sonjé on biten èspésyal Jéova fè pou édé pèp a-y ? Pa pè palé sa èvè dòt moun ! Sa pé fè-yo dibyen toubònman. Sa pé rann fwa a frè é sè a-w pi fò, é sa pé ba-w onlo jwa (Wom. 1:11, 12).
Ondòt jan ou pé ankourajé frè é sè a-w, sé lè ou ka vin adan sal di Wayòm la pou pran sé réinyon-la. Lè ou ka fè sa, nonsèlman ou ka ankourajé lézòt, men voumenm sa ka ankourajé-w. Mi sa Connie ka di ankò : « Lèwvwè an k’ay réinyon, sé frè é sè la ka ban-mwen lanmou. Èvè tousa lanmou, kijan ou vé an dékourajé ! An ka fè-yo dé ti kado pou an montré-yo rèkonésans an mwen. É an ka fè ansòt pou an kontinyé préché é ay réinyon èvè frè é sè an mwen. »
JÉOVA KONTAN VWÈ TOUSA OU KA FÈ BA-Y
Adan Labib ou ka touvé onlo ègzanp a moun kè Jéova té enmé magré sé moun-lasa pa té pé fè granzafè. Sonjé Siméon on Israélit ki té ni on bèl laj lè Jézi fèt. Lè i té k’ay an tanp-la, sèten i té ka vwè onlo jennboug ki té ka pòté mannèv. É li aprézan ? Pétèt Siméon té pé pansé kè konm i pa té pé fè onlo biten kon sé jennboug-la, i té ontijan initil. Men a pa konsa Jéova té ka vwè-y. Pou Jéova, Siméon sé té on nonm ki « pa té ni ayen a rèpwoché-y » é i ba-y on bèl lonnè. I pèwmèt-li vwè Jézi lè i té tibébé. Jéova jous pèwmèt-li anonsé kè Jézi té’é vin Mési-la ! (Lik 2:25-35). Jéova pa rété gadé kè Siméon pa té ni fòs ankò pas i té ni on bèl laj. Okontrè sa i té ka gadé sé kè Siméon té ni on fwa ki té solid é kè « lèspri sen [...] té ka gidé-y ».
Jéova ba Siméon on bèl lonnè. I pèwmèt-li vwè Jézi tibébé é i pèwmèt-li anonsé kè Jézi té’é vin Mési-la.
Vou osi ou pé sèten Jéova ka ba sa ou ka fè ba-y onlo valè menmsi ni sèwten biten ou pé pa fè ankò. Lè on moun ka fè on sakrifis « parapòt a sa i ni é pa parapòt a sa i pa ni, sa ka fè Bondyé plézi toubònman » (2 Kor. 8:12).
Kifè konsantré-w asi sa ou pé fè. Pa ègzanp, ki biten ou té’é pé fè pou préché menmsi a pa pou lontan ? É pou frè é sè a-w, ès ou té’é pé kriyé-yo oben ès ou té’é pé voyé on kat ba yo pou ankourajé-yo ? » Dé ti biten tousenp konsa ka montré on moun kè ou enmé-y é sa pé ankourajé-y toubònman, siwtou si i ka vwè sa ka vin dè on moun kon vou, ki ka sèvi Jéova dépi bon enpé lanné.
Menmsi ou pé pa fè tousa ou té’é anvi fè, ni onlo biten ou pé fè pou Jéova. Sé sa on sè ki ka rété an Afrik konstaté. Ou ké touvé ègzanp a-y adan ti karé-la « Sa sové vi a-y ».
Ja ka fè bon enpé lanné ou ka sèvi Jéova, kè ou fidèl a-y é kè ou ka andiré. Sonjé kè bèl ègzanp a-w pé ankourajé lézòt. Ou pé sèten kè « Bondyé pa enjis pou oubliyé sa zò fè é lanmou-la zò montré la pou non a-y lè zò té ka sèvi lésen é lè zò ka kontinyé sèvi-yo » (Ébr. 6:10).
KONTINYÉ FÈ TOUSA OU PÉ POU ÉDÉ LÉZÒT
Sèwten rèchèch yo fè ka montré kè lèwvwè on moun ki ja ni on bèl laj ka fè dé biten pou édé lézòt, santé a-y ka pibon, i ka rivé réfléchi pibyen é i ka viv pi lontan.
Men apapousa sa ké tiré tout pwoblèm ou ni akòz dè laj-la. Sé enki wayòm a Bondyé ki ké woté sa ki ka fè-nou vin vyé é sa ki ka fè si nou ka mò, kivédi péché-la (Wom. 5:12).
Si ou ka kontinyé fè sa Jéova ka mandé-w, kon pa ègzanp édé lézòt konnèt-li, sa ké édé-w kwè adan sé pwomès-la Jéova fè la plis ankò é sé pé on bon biten pou santé a-w. Frè é sè ki ja ni on bèl laj, sonjé kè tousa zò ka fè pou sèvi Jéova ni onlo valè ba-y é konm zò ni onlo fwa, zò ni onlo valè pou lasanblé-la !