Liv a Larévélasyon : kijan liv-lasa ka konsèwné-w jòdijou ?

1-2. Ni plizyè rézon pou nou entérésé-nou a sa liv a Larévélasyon ka di. Ès ou pé bay yonn ?

ÈS ON moun ja propozé-w vin gadé on albòm foto èvè-y ? Ou ka gadé sé foto-la é pli ou touné paj, pli ou ka vwè moun ou pa konnèt. Men lèwgadé, zyé a-w ka tonbé asi on foto é ou ka pran tan a-w pou gadé foto-lasa byen. Men ka foto-la ni dè èspésyal ? Ében ou ka rann-vou kont kè ou anlè-y. Alò, ou ka réfléchi pou vwè a ki moman yo pran foto-lasa é ola ou té yé. Ou ka éséyé vwè osi èvè kimoun ou té yé ? Foto-lasa ni on valè èspésyal ba-w.

² Liv a Larévélasyon ka touvé-y tibwen kon foto-lasa. Poukwa nou ka di sa ? Pou omwen 2 rézon. Prèmyé-la, sé pas yo maké liv-lasa pou nou. Prèmyé vèwsé-la menm ka di : « Révélasyon Bondyé ba Jézikri pou i montré èsklav a-y sa ki pou rivé byento » (Rév. 1:1). Sa ka montré kè sa yo maké adan liv-lasa pa ka konsèwné toutmoun men sa ka konsèwné moun ki ka sèvi Bondyé, kivédi nou. Konm nou ka sèvi Bondyé, sa pa ka étoné nou lè nou ka vwè kè nou ka jouwé on wòl adan sé bèl pwofési-la ki ka réyalizé la é kè nou ka touvé adan liv-lasa. Adan on sans, nou ka touvé-nou « asi foto la ! »

3-4. a) Dapré liv a Larévélasyon, kitan sé pwofési-la ki adan-y la té ké réyalizé ? b) Konm nou ka viv an « jou a Ségnè-la », ka sa dwèt pousé-nou fè ?

³ Dézyèm rézon-la sé parapòt a épòk-la sé pwofési-lasa dwètèt réyalizé. Lapòt Jan èspliké a ki épòk sa té ké fèt. Mi sa i maké : « Grasa lèspri sen, an touvé-mwen an jou a Ségnè-la » (Rév. 1:10). Lapòt Jan maké sé pawòl-lasa koté 96 a épòk an nou, men jou a Ségnè-la koumansé lontan apré (Mat. 25:14, 19 ; Lik 19:12). Dapré sé pwofési-la ki an Bib-la, jou-lasa koumansé an 1914, lèwvwè Jézi vin wa an syèl-la. Sé apawtiw dè 1914 kè sé pwofési-la nou ka touvé adan liv a Larévélasyon é ki ka konsèwné-nou réyalizé. Wi, épòk-la nou ka viv adan-y la sé « jou a Ségnè-la » !

⁴ Nou ka viv épòk-lasa ki èstraòwdinè toubònman é fò-nou tchenn kont dè konsèy-la nou ka touvé an Révélasyon 1:3. Sé on konsèy ki plen lanmou. Mi sa i ka di : « Tchè-kontan pou moun-la ki ka li byen ho sa ki maké adan pwofési-lasa, é pou touséla ki ka tann é ki ka fè sa ki maké adan-y, pas lè-la ki fiksé la toupré rivé. » Adan vèwsé-lasa, yo ka mandé-nou dè ‘li byen ho’ pwofési-lasa, dè ‘tann sa i ka di’, é dè ‘fè sa ki maké adan-y’. Men adan tout sé pawòl-lasa, dè kilès fò-nou tchenn kont ?

FÒ OU SÈTEN KÈ ADORASYON-LA OU KA BA JÉOVA LA KA FÈ-Y PLÉZI

5. Poukwa Jézi ba sé prèmyé krétyen-la déotwa ti konsèy ?

⁵ Dépi lèwvwè nou ka li prèmyé chapit a Larévélasyon, nou ka rann-nou byen kont kè Jézi konnèt tousa ki ka pasé adan sé lasanblé-la (Rév. 1:12-16, 20 ; 2:1). Lè nou ka gadé sé mésaj-la i voyé ba sé 7 lasanblé-la ki té ka touvé-yo an Azi Minè, nou ka vwè sa byen. Adan sé mésaj-lasa, i ka ba sé krétyen-la ki té ka viv o 1^é syèk déotwa ti konsèy pou adorasyon-la yo ka ba Jéova la pé sa fè-y plézi. É sé konsèy-lasa valab osi pou tout sèwvitè a Jéova jòdijou. Ka sa ka aprann-nou ? Jézi konnèt byen si nou bon bon zanmi èvè Jéova. I ka dirijé-nou, i ka pwotéjé-nou é i pa’a pèd on may adan sa ki ka pasé. I sav osi ka pou nou fè pou nou kontinyé fè Jéova plézi. An-nou vwè déotwa adan sé konsèy-la i ba sé lasanblé-la.

6. a) Dapré Révélasyon 2:3, 4, ki pwoblèm lasanblé a Éfèz té ka jwenn ? b) Ka sa ka aprann-nou ?

⁶ (Li Révélasyon 2:3, 4.) Fò pa nou pèd lanmou-la nou té ni la odépa. Mésaj-la Jézi ba sé krétyen-la ki té ka rété Éfèz la ka montré kè yo té ka kontinyé andiré é kè yo té ka kontinyé sèvi Jéova magré tout sé éprèv-la yo té ka jwenn la. Men pwoblèm-la sé kè yo té pèd lanmou la yo té ni la odépa. Fò yo té woukoumansé sèvi Jéova kon avan. Si yo pa té ka fè sa, adorasyon-la yo té ka ba Jéova la pa té ké fè-y plézi ankò. Sé menm biten-la pou nou jòdila. Fò pa nou kontanté-nou dè andiré jis pou andiré men fò-nou andiré pou sé bon rézon-la. A pa yenki sa nou ka fè ki ka konté pou Jéova men sa ki ka pousé-nou aji enpòwtan ba-y osi. I vlé nou adoré-y pas nou enmé-y é pas nou ni rèkonésans pou-y (Pwov. 16:2 ; Mawk 12:29, 30).

7. a) Ki pwoblèm lasanblé a Sawd té ka jwenn ? (Révélasyon 3:1-3). b) Ka pou nou fè ?

⁷ (Li Révélasyon 3:1-3.) Fò-nou kontinyé rété véyatif. Lasanblé a Sawd pa té ni menm pwoblèm ki ta Éfèz. Avan, yo té ka pòté bon mannèv pou sèvi Jéova. Men konnyéla la, yo pa té ka fè sa ankò. Sé pousa, Jézi di yo « lévé ». Ka sa ka aprann-nou ? Menmsi Jéova pé’é jan oubliyé sa nou ja fè ba-y, fò pa nou di konsa kè nou ja fè asé pou Jéova (Ébr. 6:10). Pétèt nou pé pa fè tousa nou té ka fè avan, men fò-nou kontinyé pòté bon mannèv adan « travay a Ségnè-la » é fò-nou rété véyatif joustan lafen rivé (1 Kor. 15:58 ; Mat. 24:13 ; Mawk 13:33).

8. An Révélasyon 3:15-17, Jézi palé ba sé frè é sè Laodisé la. Ka sa i di-yo la ka aprann-nou ?

⁸ (Li Révélasyon 3:15-17.) Fò-nou adoré Jéova èvè onlo balan é fò-nou fè sa èvè tout tchè an nou. Mésaj-la Jézi ba sé krétyen Laodisé la té ka montré kè yo té ni ondòt pwoblèm ankò. Yo té ka adoré Jéova, men yo té on ti jan « tyèd ». É konm sé konsa yo té yé, Jézi di-yo kè yo anmizè é kè lè yo ka gadé-yo sa ka fè moun lapenn. Fò-yo té woupran balan a yo pou adoré Jéova (Rév. 3:19). Ka sa ka aprann-nou ? Si nou pa ni balan kon avan pou adoré Jéova, fò-nou fè tousa nou pé pou nou pé sa ni plis rèkonésans pou sa Jéova é sa òwganizasyon a-y ka ban-nou (Rév. 3:18). Dépawfwa, ni dé moun ki tèlman anvi viv alèz a yo kè yo ka travay rèd é yo pa’a mèt Jéova prèmyé douvan adan vi a yo. Fò pa nou aji kon sa.

9. Dapré sé mésaj-la Jézi voyé ba sé krétyen Pèwgam la é sé krétyen Tiyati la, ki danjé pou nou évité ?

⁹ Fò pa nou kouté sa sé apòsta-la ka anségné. Jézi tonbé an zo a sèwten krétyen Pèwgam pas yo té ka fè dé lidé ki pa té ka sòti an Bib-la monté é désann adan lasanblé-la é yo té ka mèt zizanni adan lasanblé-la (Rév. 2:14-16). Pawkont, i félisité sé krétyen Tiyati-la ki pa té ka suiv « biten a Satan ki fon ». Anplisdisa, i ankourajé-yo kenbé é pa lagé lavérité (Rév. 2:24-26). Fò sé frè é sè la ki té adan sé 2 lasanblé-lasa é ki té lésé sé fò ansègnman-la kouyonné-yo té rèpanti-yo. Ka sa ka aprann-nou ? Lèwvwè on ansègnman pa k’ay an sans a sa Jéova ka pansé, fò-nou ba-y do. Menmsi sé apòsta-la ka « sanm sa yo enmé Bondyé », sa yo ka fè, ka montré kè sé pawòl an bouch (2 Tim. 3:5). Si nou ka pran tan étidyé Labib byen konm i fo, sa ké édé-nou rèkonnèt sé fo ansègnman-la pli fasilman é nou pé ké suiv-yo nonplis (2 Tim. 3:14-17 ; Jid 3, 4).

10. Ki dòt biten sé mésaj-la Jézi té voyé ba sé krétyen Pèwgam la é Tiyati la ka aprann-nou ?

¹⁰ Fò-nou ba tout kalité péché sèksyèl do é fò pa nou soutiré moun ki ka fè sa nonplis. Adan lasanblé a Pèwgam é adan lasanblé a Tiyati té ni ondòt pwoblèm ankò. Jézi fè sèwten moun ki té adan sé 2 lasanblé-lasa rèpwòch pas yo pa té ka kondanné moun ki té ka fè péché sèksyèl (Rév. 2:14, 20). Ka sa ka aprann-nou ? Si nou ka fè péché sèksyèl, fò pa nou mèt an tèt an nou kè Jéova ké pasé asi sa pas sa ka fè plizyè lanné kè nou ka sèvi-y oben paskè nou ni rèsponsabilité adan lasanblé-la (1 Sam. 15:22 ; 1 Pyè 2:16). Jéova vé kè nou rèspèkté prensip a-y ki ho toubònman, menmsi sé moun-la ki an mond-la ka fè dé biten ki dè plizanpli mové (Éféz. 6:11-13).

11. Ka nou aprann dépi nou koumansé ègzaminé awtik-lasa ? (gadé ti karé-la « Ka sa ka aprann-nou jòdijou ?).

¹¹ Ka nou aprann dépi nou koumansé ègzaminé awtik-lasa ? Nou aprann kè fò-nou sèten kè adorasyon-la nou ka ba Jéova la ka fè-y plézi. Si nou ka fè on biten ki pa’a fè Jéova plézi, fò-nou fè chanjman adan vi an nou onfwa-onfwa (Rév. 2:5, 16 ; 3:3, 16). Men Jézi palé dè ondòt biten adan sé mésaj-la i voyé ba sé lasanblé-la. Ki biten ésa ?

FÒ OU PARÉ A ANDIRÉ PÈWSÉKISYON

12. Ka sé mésaj-la Jézi voyé la ba sé krétyen Èsmiwn la é sé krétyen Filadèlfi la ka aprann-nou ? (Révélasyon 2:10).

¹² Aprézan, an-nou gadé sé mésaj-la Jézi voyé ba sé krétyen Èsmiwn la é ba sé krétyen Filadèlfi la. I èspliké-yo kè fò pa yo pè kè yo pèwsékité-yo paskè siwvwè yo rété fidèl yo ké ni on bèl rékonpans (li Révélasyon 2:10 ; 3:10). Ka sa ka aprann-nou ? Fò-nou mèt an tèt an nou kè nou ké sibi pèwsékisyon é fò-nou paré pou nou pé sa andiré-yo (Mat. 24:9, 13 ; 2 Kor. 12:10). Poukwa sa enpòwtan kè nou sonjé sa ?

13-14. Kijan sé évènman-la yo ka palé an Révélasyon chapit 12 ka aji asi sèwvitè a Bondyé ?

¹³ Liv a Larévélasyon té ka anonsé kè yo té’é pèwsékité sèwvitè a Bondyé pannan « jou a Ségnè-la ». Sa vlé di kè sa té’é fèt a épòk an nou. Adan chapit 12 la, yo ka èspliké kè ni on lagè ki té’é fèt an syèl-la é évènman-lasa té’é rivé jous apré Bondyé mèt Wayòm a-y anplas. Michèl, kivédi Jézikri lè i viré an syèl-la, é zanj a-y ké goumé épi Satan é démon a-y (Rév. 12:7, 8). Jézikri é zanj a-y té’é gannyé-yo é té’é jété-yo asi latè (Rév. 12:9, 12). Kifè, moun ki si latè té’é soufè bon soufè la. Men ka ki té’é rivé pèp a Bondyé a moman-lasa ?

¹⁴ Liv a Larévélasyon ka di jan Satan té’é réyaji aprésa. Konm i pa té’é pé viré an syèl-la ankò, i té’é pasé raj a-y asi sé krétyen wen la, pas sé yo Bondyé chwazi pou yo rèprézanté wayòm a-y asi latè é pas sé yo Bondyé mandé bay témwagnaj asi Jézi (Rév. 12:17 ; 2 Kor. 5:20 ; Éféz. 6:19, 20). Kijan pwofési-lasa réyalizé ?

15. Adan Révélasyon chapit 11, yo ka palé dè « 2 témwen ». Kimoun yo yé é ka ki rivé-yo ?

¹⁵ Satan pousé lènmi a Bondyé ataké sé frè-la ki wen la é ki té ka dirijé travay a prédikasyon-la. Pawmi yo ni sa ki té ni rèsponsabilité ki té enpòwtan é sé yo ki té sé ‘2 témwen-la’ yo té’é tchouyé la dapré liv a Larévélasyonb (Rév. 11:3, 7-11). An 1918, yo manti asi 8 frè ki té antèt a òwganizasyon-la é yo kondanné-yo, kifè, yo ba-yo enpé lanné lajòl. A moman-lasa, onlo moun té’é pé pansé kè travay-la sé wen-la té ka fè la té arété.

16. Ki biten ki rivé an 1919 kè ponmoun pa’a té jan imajiné ? Ka Satan ka kontinyé fè dépi 1919 ?

¹⁶ Chapit 11 a liv a Larévélasyon ka di kè on ti moman apré, sé ‘2 témwen-la’ té’é wouviv. Pwofési-lasa réyalizé mwens ki on lanné apré yo té mèt sé frè-la lajòl. É sa fèt on mannyè ponmoun pa té’é jan imajiné. An maws 1919, yo libéré-yo é kèlkètan apré yo anilé tout kondannasyon yo té ba sé frè-la. Libéré yo libéré-yo, sé frè-la woupran balan adan prédikasyon-la. Men apapousa Satan ba sèwvitè a Bondyé on favè. Okontrè, dépi sa, i ka ba-yo bon gaz pas i ka pèwsékité-yo kon ponp (Rév. 12:15). « Sé a moman-lasa pou [noutout] ni andirans é ni fwa » (Rév. 13:10).

AN NOU FÈ TRAVAY-LA JEOVA BAN-NOU FÈ LA AFON

17. Pannan Satan té ka ataké sèwvitè a Bondyé, yo édé-yo on mannyè ponmoun pa’a té jan imajiné. Ki èd yo risivwè ?

¹⁷ Adan chapit 12 a liv a Larévélasyon, yo ka di osi kè yo té’é édé sèwvitè a Bondyé on mannyè kè ponmoun pa’a té jan imajiné. É liv a Larévélasyon ka èspliké kè latè té’é valé rivyè a pèwsékisyon-la (Rév. 12:16). É sé ègzaktèman sa ki pasé. Délè sé sèwten biten menm ki adan mond a Satan, kon sèwten tribinal pa ègzanp ki aji on mannyè ki jis é yo pòté pèp a Bondyé sèkou. É souvantfwa menm, yo gannyé douvan tribinal é sa pèwmèt-yo sèvi Jéova pli fasilman. Kijan yo sèvi èvè libèté-lasa ? Yo pwofité dè tout lokazyon yo té ni pou fè travay-la Jéova té ba-yo fè la (1 Kor. 16:9). Men ka ki travay-lasa ojis ?

18. Ki mésaj enpòwtan pou sé krétyen-la préché pannan sé dènyé jou-la ?

¹⁸ Jézi té anonsé kè disip a-y té’é préché ‘bon nouvèl a Wayòm a Bondyé toupatou asi latè’ é yo té’é fè sa avan lafen rivé (Mat. 24:14). Lèwvwè yo ka préché, ni on zanj oben on gwoup zanj ki ka ba-yo on pal. Sé zanj-lasa ni « on bon nouvèl ki étèwnèl pou [yo] anonsé toutmoun asi latè, tout nasyon, tout tribi, tout lang é tout pèp » (Rév. 14:6).

19. Ki dòt mésaj fò moun ki enmé Jéova préché ?

¹⁹ A pa bon nouvèl a Wayòm-la tousèl pou sèwvitè a Bondyé préché. Fò-yo pawtisipé adan ondòt travay kè sé zanj-la ka fè. É Révélasyon chapit 8 a 10 ka palé-nou dè travay-lasa. Sé zanj-la ka anonsé plizyè malè ki ké rivé asi moun ki pa ka soutyenn wayòm a Bondyé. Kifè, Témwen a Jéova ka anonsé on mésaj a jijman é mésaj-lasa kon lagrèl é kon difé. É adan mésaj-lasa yo ka palé dè ki pinisyon Bondyé ké ba chak pawti a mond a Satan (Rév. 8:7, 13). Moun ki asi latè bizwen sav kè lafen toupré rivé pou yo pé sa fè chanjman adan vi a yo é pou yo rété vivan lè jou-lasa ké rivé (Sof. 2:2, 3). Men yo pa gè enmé tann mésaj-lasa. Sé pousa, fò-nou ni kouraj pou nou pé sa préché. É kanta mésaj-la nou ké ni a préché la pannan gwo tribilasyon-la, i ké chouboulé sé moun-la plis ankò (Rév. 16:21).

TCHENN KONT DÈ SA KI MAKÉ ADAN PWOFÉSI-LASA

20. Ka nou ké vwè adan sé 2 awtik-la ki ka vin la ?

²⁰ « Sa ki maké adan pwofési-lasa » ka konsèwné-nou é sa pa’a konsèwné-nou a dèmi. Alò fò-nou tchenn kont dè sé pawòl-lasa (Rév. 1:3). Men ka ki ké ban-nou fòs pou nou andiré sé pèwsékisyon-la nou ké jwenn la é pou nou kontinyé préché mésaj-lasa èvè kouraj ? Fò-nou fè 2 biten : prèmyèwman, fò-nou pran tan gadé ka liv a Larévélasyon ka di asi lènmi a Bondyé é dézyèmman, fò-nou réfléchi asi sé bénédisyon-la nou ké jwenn la si nou rété fidèl. Sé sa nou ké vwè adan sé 2 awtik-la ki ka vin la.