ARTIK POU ÉTIDYÉ 41
KANTIK 108 L’amour fidèle de Dieu
Lanmou Bondjé ka rété pou tout-tan
« Di Jéova mèrsi, paské i bon — paské so lanmou fidèl ka rété pou tout-tan » (PS. 136:1).
SA NOU KÉ ANPRANN
Nou ké wè ki si nou ka wè lanmou Jéova gen pou nou kou roun bagaj enpòrtan Labib ka anprann nou, sa ké bay nou kouraj lò nou ké annan roun sitiasyon ki rèd.
1-2. Ki problèm roun patché krétyen gen ?
IMAJINÉ i gen roun bato anmitan roun gro tanpèt. Vag-ya ka bat bato-a. Si to wè yé pa ka mété lank-a, vag-ya ké mennen bato-a alé. A lank-a rounso ki pouvé anpéché bato-a pédi a lanmè.
2 Lò gro problèm ka malmennen to, to pouvé santi kousidiré to té annan sa bato-a. Pitèt to pouvé byen épi rounsèl kou, to pa byen ankò. Jòdla to sir ki Jéova kontan to é ki i ka idé to, épi dimen to ka doumandé to kò si i vréman savé ki problèm to gen (Ps. 10:1 ; 13:1). Épi roun jou, roun zanmi ka vini ankourajé to é to ka santi to kò pi byen pannan roun tan (Prov. 17:17 ; 25:11). Mé apré sa, to ka roukoumansé douté ki Jéova ka idé to. Pitèt menm to ka pansé ki i pa kontan to ankò. Ki kalité « lank » pouvé idé to lò to gen problèm ? Sa lé di, kisa ki pouvé idé to sir ki Jéova kontan to é ka idé to, épi kisa ki pouvé idé to pa janmen gen pyès dout asou sa ?
3. a) Annan Psaume 31:7 ké Psaume 136:1, kisa « lanmou fidèl » lé di ? b) Poukisa nou pouvé di ki moun-an ki gen plis lanmou fidèl, a Jéova ? (gadé zimaj-a osi).
3 Pou éprèv-ya pa jité to atè, to pa divèt bliyé ki lanmou Jéova gen pou nou, a roun lanmou ki fidèl (li Psaume 31:7 ; 136:1). Annan Labib, lò yé ka di « lanmou fidèl », yé ka palé di lanmou roun moun gen pou rounòt moun. I kontan l’ bokou é i fidèl ké li. Moun-an ki gen plis lanmou fidèl, a Jéova. Labib ka di ki i « plen ké lanmou fidèl » (Ex. 34:6, 7). I ka di osi : « To plen ké lanmou fidèl pou tout sa ki ka aplé to » (Ps. 86:5). Réfléchi asou sa sa lé di : Jéova pa janmen ka lésé tonbé so sèrvitèr-ya ki fidèl ! Si to ka sonjé ki Jéova fidèl, sa pouvé idé to rété byen dibout lò roun éprèv ka malmennen to (Ps. 23:4).
Menm fason lank roun bato ka anpéché l’ pédi a lanmè lò i gen roun tanpèt, lò nou sir ki Jéova kontan nou, nou pa ka lésé pyès éprèv jité nou atè (gadé paragraf 3).
A POU TO WÈ LANMOU FIDÈL JÉOVA-A KOU ROUN BAGAJ ENPÒRTAN LABIB KA ANPRANN NOU
4. Bay déztrwa bagaj enpòrtan Labib ka anprann nou, é èspliké poukisa nou ka krè annan sa bagaj-ya rèd.
4 Pou éprèv-ya pa jité to atè, a pou to wè lanmou Jéova-a kou roun bagaj enpòrtan Labib ka anprann nou. Lò to ka tandé « bagaj enpòrtan Labib ka anprann nou », kisa to ka wè ? Pitèt to ka wè plizyèr bagaj to anprann annan Labib. Parèkzanp, to anprann ki non Bondjé, a Jéova, ki Jézi, a sèl Pitit Bondjé, ki moun mouri-ya pa savé anyen é ki titalò latè-a ké divini roun paradi koté moun-yan ké viv pou tout-tan (Ps. 83:18 ; Eccl. 9:5 ; Jean 3:16 ; Rév. 21:3, 4). Kou to vin sir ki sa bagaj-ya vré, to pa ka lésé pyès moun fè to krè rounòt bagaj. Poukisa ? Pas to wè ki sa bagaj-ya ka apiyé asou bagaj ki vré. Menm fason-an, si to ka wè lanmou Jéova gen pou nou kou roun bagaj enpòrtan Labib ka anprann nou, sa ké idé to pa krè ki Jéova pa ka wè ki problèm to gen ouben ki i pa mélé ké sa. Annou wè poukisa nou ka di sa.
5. Èspliké kouman roun moun pouvé arété krè bagaj ki pa vré.
5 Lò to koumansé étidyé Labib, kisa ki idé to arété krè bagaj ki pa vré ? Roun bagaj ki dèt idé to, a lò to konparé sa yé té anprann to annan to rélijyon ké sa Labib ka di. Annou imajiné sa : To té ka krè ki a Jézi ki té sa Bondjé Tou-Pwisan-an. Mé lò to étidyé Labib, to doumandé to kò si sa té vré. To randé to kò kont ki Labib ka byen di ki a pa vré. Alòr, to arété krè sa bagaj-a ki pa vré é to koumansé krè sa vérité-a ki annan Labib : Jézi sa « prémyé-a ki fèt annan tousa Bondjé kréyé », « sèl Pitit Bondjé » (Col. 1:15 ; Jean 3:18). A vré, détan, bagaj ki pa vré pouvé « byen dibout » annan to tèt é détan, sa pouvé rèd pou to arété krè sa bagaj-ya (2 Cor. 10:4, 5). Mé lò to anprann lavérité, to pa roukoumansé krè bagaj to té krè ki pa té vré (Phil. 3:13).
6. Annan Psaume 136, poukisa yé ka répété plizyèr fwa ki « lanmou fidèl [Jéova-a] ka rété pou tout-tan » ?
6 Pitèt to ké divèt fè menm bagaj-a si, akoz di roun éprèv, to ka pansé ki Jéova pa kontan to. Doumandé to kò : « Ès a konsa mo divèt wè bagaj-ya ? » Apré sa, konparé sa to ka pansé ké sa Psaume 136:1 ka di. A asou sa vèrsé-a sa artik-a ka apiyé. Poukisa Jéova ka di ki so lanmou « fidèl » ? Poukisa yé ka di ki « so lanmou fidèl ka rété pou tout-tan » 26 fwa annan sa psaume-an ? Kou nou wè l’, lanmou Jéova gen pou so sèrvitèr, a roun bagaj enpòrtan Labib ka anprann nou kou ròt vérité ki annan Labib to asèpté san problèm. Donk si to ka pansé ki to pa gen pyès valò pou Jéova é ki to pa mérité i kontan to, a pa vré menm ! A pa pou to asèpté krè sa, menm fason to pa té ké jen asèpté krè rounòt bagaj ki pa vré !
7. Bay déztrwa vèrsé annan Labib ki ka pèrmèt nou sir ki Jéova kontan nou.
7 I gen roun patché ròt vèrsé annan Labib ki ka pèrmèt nou sir ki Jéova kontan nou. Parèkzanp, Jézi di so disip : « Zòt gen plis valò pasé roun patché mwano » (Mat. 10:31). É Jéova li menm di so pèp : « Mo ké randé to fò. Wi, mo ké idé to ; mo ké vréman idé to ké mo lanmen drèt, mo lanmen ki ka fè sa ki jis » (Is. 41:10). Sa klè kou dlo ròch ! Jézi pa di : « Pitèt zòt gen plis valò », é Jéova pa di : « Mo paré pou idé to ». Yé di : « Zòt gen plis valò » épi « Mo ké idé to ». Si, akoz di roun éprèv, to ka pansé ki Jéova pa kontan to, sa vèrsé-yaa pouvé idé to santi to kò pi byen. Mé yé pouvé fè plis ki sa. Yé pouvé idé to sir ki to Bondjé kontan to. Sa vèrsé-ya ka palé di bagaj ki vré. Si to ka priyè Jéova pou di li ki dout to gen é si to ka pran tan réfléchi asou sa vèrsé-ya, to ké pouvé di sa ki marké annan 1 Jean 4:16 : « Nou anprann konnèt lanmou Bondjé gen pou nou é nou anprann krè annan sa lanmou-a. »
8. Kisa to pouvé fè si détan, to ka pansé ki Jéova pa kontan to ?
8 Kisa to pouvé fè si détan, to ka kontinyé pansé ki Jéova pa kontan to ? Konparé sa to ka rousanti ké sa to savé. Miyò to konté asou bagaj to savé ki vré pasé to konté asou sa to ka rousanti. Men roun bagaj ki vré : Jéova kontan nou. A sa Labib ka anprann nou. Si nou ka pansé ki Jéova pa kontan nou, nou ka bliyé ki i sa lanmou, ki so kalité ki pi enpòrtan, a lanmou (1 Jean 4:8).
RÉFLÉCHI ASOU SA : « JÉOVA KONTAN TO KÉ TOUT SO TCHÒ »
9-10. Di kisa Jézi té ka palé ké so disip lò i di : « Papa-a li menm kontan zòt ké tout so tchò » ? (Jean 16:26, 27 ; gadé zimaj-a osi).
9 Nou pouvé anprann plis bagaj asou lanmou Jéova gen pou nou si nou ka byen gadé sa Jézi di so disip : « Papa-a li menm kontan zòt ké tout so tchò » (li Jean 16:26, 27). Jézi pa di so disip sa jis pou yé santi yé kò byen. Lò nou ka gadé larèstan kozé-a, nou ka wè ki i pa té ka palé di sa yé té ka rousanti. Jézi té ka palé di rounòt bagaj, i té ka palé di lapriyè.
10 Jézi té fin èspliké so disip ki yé té divèt priyè annan so non, yé pa té divèt priyè li (Jean 16:23, 24). Yé té divèt konprann sa, sa té enpòrtan. Lò Bondjé résisité Jézi, pitèt disip-ya té pouvé anvi priyè Jézi pas yé té anprann konnèt li é i té divini yé zanmi. Yé té pouvé di yé kò ki kou Jézi té kontan yé, i té ké kouté sa yé té gen pou doumandé épi i té ké doumandé so Papa idé yé. Mé Jézi fè yé konprann ki yé pa té divèt réfléchi konsa. Poukisa ? Men sa i èspliké yé : « Papa-a li menm kontan zòt ké tout so tchò. » Sa ka fè parti di bagaj enpòrtan-yan Labib ka anprann nou asou lapriyè. Réfléchi asou sa sa lé di pou to : Kou to étidyé Labib, to anprann konnèt Jézi é to vin kontan l’ (Jean 14:21). Mé kou disip-ya, to pouvé priyè Bondjé san to pa pè paské ‘li menm kontan to ké tout so tchò’. Chak fwa to ka priyè Jéova, to ka montré ki to ka krè ki i kontan to (1 Jean 5:14).
Lò to ka priyè Jéova, to pouvé sir ki ‘li menm kontan to ké tout so tchò’b (gadé paragraf 9-10).
SA KI POUVÉ FÈ TO KRÈ KI JÉOVA PA KONTAN TO
11. Poukisa Satan té ké byen kontan si nou té ka pansé ki Jéova pa kontan nou ?
11 Kisa ki pouvé fè nou krè ki Jéova pa kontan nou ? Labib ka di nou ki Satan ka ‘chaché manjé nou’, é ki i lé nou krè ki Jéova pa kontan nou (1 Pierre 5:8). A lanmou ki fè Jéova bay nou ranson-an é Satan té ké lé nou krè ki nou pa mérité sa ranson-an (Héb. 2:9). Mé kimoun ki kontan si nou ka pansé ki Jéova pa kontan nou ? Satan. É kimoun ki kontan si nou ka lésé Jéova tonbé pas nou gen roun éprèv ? A toujou Satan. I lé fè nou krè ki Jéova pa kontan nou, mé a pa vré. A li Jéova pa kontan ankò. Mé roun « trap » i ka sèrvi, a fè nou krè ki a nou Jéova pa kontan é ki a nou i ka kondané (Éph. 6:11). Si nou ka byen konprann kisa nou lèlmi, Djab-a, ka éséyé fè, nou ké ankò pi désidé ‘pa bay li pyès chans’ (Jacq. 4:7).
12-13. Poukisa, akoz di péché-a, nou pouvé krè ki Jéova pa kontan nou ?
12 Rounòt bagaj pouvé fè nou krè ki Jéova pa kontan nou. A kisa ? A péché-a (Ps. 51:5 ; Rom. 5:12). Péché-a gaté lanmityé moun té gen ké Bondjé. I gaté fason nou ka réfléchi, sa nou ka rousanti ké nou lasanté osi.
13 A pa ti déga péché-a fè asou nou. Parèkzanp, akoz di péché-a, nou konsyans ka bat nou, nou ka enkyété nou kò, nou ka krè ki nou pa vo anyen épi nou ka ronté. A sa ka rivé nou lò nou ka péché. Mé menm lò nou pa fè pyès péché, nou pouvé rousanti sa pas nou tout ka fèt ké péché-a. Nou annan roun sitiasyon ki pa k’alé ké fason Bondjé té fè nou o koumansman (Rom. 8:20, 21). Menm fason roun loto so rou krévé pa pouvé roulé vit, nou menm nonplis, kou nou pa parfè, nou pa pouvé fè tousa Jéova té prévwè nou fè si nou té parfè. Donk, sa nòrmal si détan nou pa ka rivé krè ki Jéova kontan nou. Lò sa ka rivé nou, annou sonjé ki i sa « Bondjé-a ki gran é ki tout moun divèt krenn, […] ki ka montré so lanmou fidèl pou sa-ya ki kontan l’ é ki ka obéyi so koumannman-yan » (Néh. 1:5).
14. Si nou ka réfléchi asou ranson-an, kouman sa pouvé idé nou arété krè ki Jéova pa ké janmen kontan nou ? (Romains 5:8 ; gadé karé-a osi : « Pa bliyé ki “péché-a ka bloublou moun” »).
14 Détan, nou pouvé krè ki nou pa mérité Jéova kontan nou. Pou byen di, nou pyès pa mérité i kontan nou é a sa ka fè ki so lanmou bèl toubonnman. Nou pa pouvé fè anyen pou nou mérité i kontan nou. Parkont, ranson-an ka kouvri nou péché é si Jéova péyé ranson-an, a pas i kontan nou (1 Jean 4:10). Sonjé osi ki Jézi vini asou latè-a pou sové moun ki ka péché. I pa vini pou sové moun ki parfè (li Romains 5:8). Nou tou ka péché é Jéova pa ka doumandé nou pou nou parfè. Si nou ka byen konprann ki akoz di péché-a, nou pouvé krè ki Jéova pa kontan nou, nou ké fè tousa nou pouvé pou nou pa krè sa (Rom. 7:24, 25).
A POU TO DÉSIDÉ RÉTÉ FIDÈL
15-16. Di kisa nou pouvé sir si nou ka rété fidèl ké Jéova, é poukisa ? (2 Samuel 22:26).
15 Jéova lé nou pran bon désizyon-an, i lé nou « rété maré ké li » (Deut. 30:19, 20). Si nou ka fè sa, nou pouvé sir ki i pa ké janmen lésé nou tonbé (li 2 Samuel 22:26). É si nou ka rété fidèl ké li, nou pouvé sir ki i ké idé nou kèlkéswa sa ki pouvé rivé nou.
16 Kou nou wè l’, nou pouvé sir ki Jéova kontan nou é sa ka pèrmèt nou pa lésé pyès éprèv jité nou atè. Nou savé ki i kontan nou é ki i ka idé nou paské a sa Labib ka anprann nou. Si détan, nou ka pansé ki Jéova pa kontan nou, annou réfléchi asou bagaj nou savé ki vré pasé nou konté asou sa nou ka rousanti. Wi, a pou nou sir ki lò Labib ka di ki lanmou fidèl Jéova-a ka rété pou tout-tan, a lavérité.
KANTIK 159 Gloire à toi, ô Jéhovah !
a Gadé Deutéronome 31:8, Psaume 94:14 ké Isaïe 49:15 osi.
b MEN SA NOU KA WÈ ASOU ZIMAJ-A : Roun frè so madanm malad ka doumandé Jéova idé l’ pran swen di li, byen jéré yé soumaké épi idé yé tifi kontan so Papa ki annan syèl-a.