ARTIK POU ÉTIDYÉ 42
KANTIK 44 Prière du petit
Anprann priyè Jéova ké tout to tchò
« Mo ka aplé to ké tout mo tchò. Réponn mo, o Jéova ! » (PS. 119:145).
SA NOU KÉ ANPRANN
Nou ké wè sa nou pouvé anprann grasa lapriyè sèrvitèr Jéova ki marké annan Labib.
1-2. a) Kisa ki pouvé anpéché nou di Jéova sa ki asou nou tchò ? b) Kouman nou savé ki Jéova ka byen kouté nou lapriyè ?
DÉTAN, ès to ka di menm bagaj-ya chak fwa to ka priyè ouben ès to ka priyè jis pou di to priyè ? Si a sa, a pa to rounso ka fè sa. Kou nou gen bokou bagaj pou fè, détan a lapriyè ki kourt nou ka fè é nou ka bliyé priyè pi lontan. Ouben pitèt sa rèd pou nou palé Jéova di sa ki annan nou tchò paské pou nou, nou pa mérité palé ké li.
2 Labib ka montré nou ki lò nou ka priyè, Jéova pa ka gadé fason nou ka palé, i lé wè nou priyè ké tout nou tchò. I ka di ki i ka « tandé lapriyè sa-ya ki ka fè yé kò toupiti » (Ps. 10:17). I ka byen kouté chak mo nou ka di paské i ka gadé pou nou (Ps. 139:1-3).
3. Ki késyon nou ké réponn annan sa artik-a ?
3 Annan sa artik-a, nou ké réponn sa késyon-yan : Poukisa nou pouvé priyè Jéova san nou pa pè ? Kisa nou divèt fè pou nou lapriyè fè nou vin pi pròch ké li ? Kisa lapriyè moun fè ké tout yé tchò é ki marké annan Labib pouvé anprann nou ? É kouman sa lapriyè-ya pouvé idé nou priyè ké tout nou tchò ? Pou fini, kisa nou pouvé fè si, afòrs nou enkyèt, nou pa savé kouman pou nou di Jéova sa ki asou nou tchò ?
PA JANMEN PÈ PRIYÈ JÉOVA
4. Kisa ki pouvé idé nou pa pè priyè Jéova ? (Psaume 119:145).
4 Si nou ka konprann ki Jéova sa roun zanmi ki fidèl é ki lé nou tchò kontan, nou pa ké pè priyè l’. Moun-an ki ékri Psaume 119-a fè tousa i té pouvé pou i té gen roun lanmityé ké Jéova ki té fò. Sa pa lé di ki i pa té ka jwenn problèm, parèkzanp, moun té ka manti asou li pou fè l’ soufri (Ps. 119:23, 69, 78). Épi détan, i té dékourajé pas i té ka fè bagaj ki pa té bon (Ps. 119:5). Magré tousa, i pa té pè louvri so tchò pou Jéova (li Psaume 119:145).
5. Poukisa nou pa divèt lésé pyès bagaj anpéché nou priyè ? Bay roun èkzanp.
5 Si Jéova ka doumandé moun ki fè péché ki grav priyè l’, nou menm, nou pa divèt lésé pyès bagaj anpéché nou priyè l’ (Is. 55:6, 7). Annou pran roun èkzanp : Imajiné roun moun pédi annan danbwa é i pa ka rivé trouvé so chimen. I ka wè roun moun ki pouvé idé l’. Ès i ké pè doumandé l’ idé l’ paské i ronté ? Non ! Menm fason-an, menmsi détan nou pa savé ki désizyon pou nou pran ouben menmsi nou fè roun péché ki grav, a pa pou nou pè priyè Jéova (Ps. 119:25, 176).
KOUMAN NOU POUVÉ LOUVRI NOU TCHÒ POU JÉOVA ?
6-7. Kisa ki pouvé idé nou di Jéova tousa ki ofon nou tchò ? Bay roun èkzanp (gadé nòt-a osi).
6 Pou nou vin pi pròch di Jéova, nou divèt di tousa ki ofon nou tchò, san nou pa séré anyen. Kisa ki ké idé nou fè sa ?
7 Réfléchi asou bèl kalité Jéova gena. Pi nou ké réfléchi asou so bèl kalité, pi nou ké alèz pou di l’ sa nou ka rousanti (Ps. 145:8, 9, 18). Annou palé di Kristine, roun sò so papa té vyolan. I ka di : « Lò mo té ka éséyé palé ké Jéova kousidiré a té ké mo papa mo té ka palé, sa té rèd pou mo. Mo té krè ki, akoz di mo défo ké bagaj mo té fè ki pa té bon, i té ké lésé mo tonbé. » Kisa ki idé l’ ? I ka di : « Mo réfléchi bokou asou lanmou fidèl Jéova-a é sa fè mo konprann ki Jéova kontan mo. Mo savé ki i pa ké janmen lésé mo. É menmsi mo ka tonbé, ké tout so lanmou, i ké idé mo lévé. Lò mo ka sonjé kouman Jéova plen ké lanmou, sa pi fasil pou mo palé ké li di sa ki ka fè mo tchò kontan ké sa ki ka fè mo enkyèt. »
8-9. Poukisa sa bon di réfléchi asou sa to ké di anvan to priyè ? Bay roun èkzanp.
8 Réfléchi asou sa to ké di. Anvan to priyè, to pouvé pozé to kò déztrwa késyon. Parèkzanp, doumandé to kò : « Ki problèm mo gen atchèlman ? Ès mo gen pou pardonnen roun moun ? Ès mo bézwen Jéova idé mo pas roun bagaj chanjé annan mo lavi ? » (2 Rois 19:15-19). Anplis di sa, nou pouvé pran èkzanp asou fason Jézi anprann so disip priyè épi réfléchi asou sa nou pouvé di Jéova parapòrta so non, so rwayonm ké so volonté (Mat. 6:9, 10).
9 Lò roun sò yé ka aplé Aliska vin savé ki so mari té gen roun kansèr annan so sèrvo, i pa té ka rivé priyè. I ka di : « Tèlman mo tchò té krazé, lò mo té ka koumansé priyè, mo pa menm té savé sa pou mo té di. » Kisa ki idé l’ ? I ka di : « Anvan mo priyè, mo ka pran roun ti tan pou mo réfléchi asou sa mo ké di. Konsa, a pa di mo ké di maladi mo mari rounso mo ka palé. Lò mo ka fè sa, mo pi kalm é mo pi alèz pou priyè Jéova. »
10. Poukisa nou divèt pran nou tan pou nou priyè ? (gadé zimaj-ya osi).
10 Pran to tan lò to ka priyè. Lapriyè ki kourt pouvé idé nou vin pròch di Jéova, mé si nou ka priyè pi lontan, nou ké pouvé di Jéova plis bagaj asou sa nou ka rousantib. Men sa Élijah, mari Aliska, ka èspliké : « Mo ka éséyé priyè plizyèr fwa pannan lajournen-an, mé mo ka santi ki mo pi pròch di Jéova lò mo ka pran tan priyè l’ lontan. Lò mo ka priyè, i pa présé mo fini, donk mo pouvé pran mo tan. » Éséyé sa : Chwazi roun moman ké roun koté to ké pouvé priyè san anyen pa déranjé to, roun koté to ké pouvé priyè lontan, pitèt menm tou fò. Épi pran labitid priyè konsa souvan.
Trapé roun tan ké roun koté ki ké pèrmèt to priyè lontan (gadé paragraf 10).
SA LAPRIYÈ MOUN FÈ KÉ TOUT YÉ TCHÒ É KI MARKÉ ANNAN LABIB POUVÉ ANPRANN NOU
11. Poukisa a roun bon bagaj si nou ka étidyé lapriyè moun fè ké tout yé tchò é ki marké annan Labib ? (gadé karé-a osi : « Ès to ka rousanti menm bagaj ké yé ? »).
11 Roun bagaj ki pouvé idé to, a réfléchi asou sa sèrvitèr Jéova annan lépòk Labib té ka di lò yé té ka priyè. To pouvé réfléchi osi asou yé chanté pou louwé Jéova. Lò to ké étidyé fason yé palé ké li di sa yé té gen annan yé tchò, sa ké bay to anvi louvri to tchò pou li to menm osi. Pitèt to ké wè ròt bagaj to pouvé di ankò lò to ka priyè. É to ké wè ki sa yé di annan yé lapriyè ka sanblé ké sa ki ka rivé to ouben ké sa to ka rousanti.
12. Ki késyon nou pouvé pozé nou kò lò nou ka réfléchi asou roun lapriyè ki annan Labib ?
12 Lò to ka réfléchi asou roun lapriyè ki annan Labib, doumandé to kò : « Kimoun ki fè sa lapriyè-a é annan ki sitiasyon i té fika ? Ès sa i di ka sanblé ké mopa sitiasyon ? Kisa sa lapriyè-a pouvé anprann mo ? » Pitèt to ké divèt fè déztrwa réchèrch pou réponn sa késyon-yan, mé to ké anprann bokou bagaj ! Annou wè déztrwa èkzanp aprézan.
13. Kisa lapriyè Ann fè ka anprann nou ? (1 Samuel 1:10, 11 ; gadé zimaj-a osi).
13 (Li 1 Samuel 1:10, 11.) Lò Ann fè sa lapriyè-a, i té gen dé gro problèm : i pa té pouvé fè timoun é dézyèm madanm so mari té ka fè l’ wè mizè (1 Sam. 1:4-7). Si to annan roun problèm ki pa ka fini, kisa lapriyè Ann pouvé anprann to ? I trapé roun soulajman paské i priyè Jéova lontan é i di l’ tousa i té gen asou so tchò (1 Sam. 1:12, 18). Nou menm osi, nou pouvé trapé roun soulajman si nou ka ‘jité tout nou traka asou Jéova’, sa lé di si nou ka di li tout problèm nou gen ké tousa nou ka rousanti (Ps. 55:22).
Ann té tris toubonnman paské i pa té pouvé fè timoun é anplis di sa, dézyèm madanm so mari té ka ari di so tèt toulong. Atò, Ann di Jéova tousa i té gen asou so tchò (gadé paragraf 13).
14. a) Ki ròt bagaj lapriyè Ann ka anprann nou ? b) Poukisa lò nou ka réfléchi asou sa Labib ka di, sa ka idé nou wè ki ròt bagaj ankò nou pouvé di lò nou ka priyè ? (gadé nòt-a).
14 Ann fè Samiyèl, é déztrwa lannen apré sa, i mennen li pou granprèt Éli (1 Sam. 1:24-28). I priyè Jéova é i di li ki i té sir ki i sa roun Bondjé ki ka protéjé é ki ka pran swen di so sèrvitèr ki fidèlc (1 Sam. 2:1, 8, 9). Pitèt i té gen problèm annan so fanmi toujou, mé i té ka mété so lidé asou fason Jéova té béni l’. Kisa sa ka anprann nou ? Nou ké pouvé tchenbé magré nou problèm si nou ka mété nou lidé asou fason Jéova ja idé nou jik aprézan.
15. Kisa lapriyè Jérémi fè ki annan Jérémie 12:1, ka anprann nou ?
15 (Li Jérémie 12:1.) Roun jou, Jérémi té dékourajé pas i té ka wè ki lavi moun méchan té bèl toubonnman. Rounòt bagaj ki té ka dékourajé l’, a fason ròt Israyélit-ya té ka malmennen l’ (Jér. 20:7, 8). Nou menm osi, nou pouvé dékourajé lò nou ka wè ki tout bagaj ka roulé ron pou moun ki malonnèt ouben lò yé ka ari di nou tèt. Menmsi Jérémi di kouman sa té ka fè l’ lapenn, i pa di ki Jéova pa té jis. É lò i wè Jéova korijé so pèp, i té dèt pi sir ankò ki Jéova sa roun Bondjé ki jis (Jér. 32:19). Nou menm osi, annou di Jéova kouman nou ka soufri lò moun ka malmennen nou. Mé anmenmtan, annou di li ki nou sir ki i ké mété lanmen o bon moman pou ranjé tout problèm nou ka jwenn.
16. Kisa lapriyè roun Lévit fè pouvé anprann nou ? (Psaume 42:1-4 ; gadé zimaj-ya osi).
16 (Li Psaume 42:1-4.) A roun Lévit ki fè sa chanté-a. I pa té pouvé adoré Bondjé annan tanp-a ansanm ké ròt israyélit-ya. Annan sa psaume-an, i di sa i té ka rousanti. Pitèt nou ka rousanti menm bagaj ké li si nou pa pouvé soti di nou kaz ouben si nou lajòl akoz di nou lafwa. Détan, i gen montan ké pèrdan, mé a pou nou di Jéova tousa nou ka rousanti. Sa ké idé nou konprann pi byen sa ki annan nou tchò épi sonjé sa ki vréman enpòrtan. Parèkzanp, Lévit-a konprann ki i té pouvé louwé Jéova rounòt fason (Ps. 42:5). Épi i réfléchi asou fason so Bondjé té ka pran swen di li (Ps. 42:8). Lò nou ka priyè Jéova ké tout nou tchò, sa pouvé idé nou konprann pi byen sa nou ka rousanti, viré gen lapè annan nou tchò épi gen fòrs pou tchenbé.
Lévit-a ki ékri Psaume 42-a vidé so tchò pou Jéova. Lò nou ka di sa nou ka rousanti annan nou lapriyè, sa pouvé idé nou sonjé sa ki vréman enpòrtan (gadé paragraf 16).
17. a) Kisa lapriyè Jonas fè ka anprann nou ? (Jonas 2:1, 2 ; gadé nòt-a). b) Poukisa a roun bon bagaj si nou ka anprann vèrsé ki annan Labib ? (Jonas 2:1, 2 ; gadé nòt-a).
17 (Li Jonas 2:1, 2.) Profèt Jonas fè sa lapriyè-a lò i té annan vant roun gro poson. I té sir ki, menmsi i té dézobéyi Jéova, Jéova té ké kouté l’. Lò i priyè, i roupran roun patché bagaj ki marké annan Psaumes-yand. Donk, nou pouvé pansé ki i té byen konnèt sa psaumes-yan. Kou i té réfléchi asou sa vèrsé-ya, i té sir ki Jéova té ké idé l’. Nou menm osi, a pou nou fè tousa nou pouvé pou nou anprann vèrsé ki annan Labib. Konsa, lò nou ké priyè Jéova pas nou annan roun sitiasyon ki rèd, nou ké sonjé sa vèrsé-ya é yé ké konsolé nou.
KONTINYÉ PRIYÈ POU TO VIN PRÒCH KÉ JÉOVA
18-19. Si détan, nou pa ka rivé di sa nou lé di lò nou ka priyè, ki lidé annan Romains 8:26, 27 pouvé rasiré nou ? Bay roun èkzanp.
18 (Li Romains 8:26, 27.) Détan, nou pouvé tèlman enkyèt ki nou pa ka rivé di Jéova sa nou ka rousanti. Mé Jéova ka idé nou. Lò a konsa, so lèspri sen ka « sipliyé » pou nou. Kouman i ka fè sa ? Grasa so lèspri, Jéova fè moun marké roun patché lapriyè annan so Paròl. Lò nou pa ka rivé di sa nou lé di, Jéova pouvé pran lapriyè ki annan Labib épi fè kousidiré a té nou ki té priyè. Konsa, i pouvé réponn nou lapriyè.
19 A pa ti konsolé sa lidé-a konsolé roun sò di Larisi yé ka aplé Yelena. Yé arété l’ pas i té priyè é i té li Labib. Tèlman i té enkyèt, i pa té ka rivé priyè. I ka di : « Mo sonjé ki lò mo ka santi ki mo pa pouvé ankò é mo pa savé sa pou mo di Jéova, Jéova ka pran lapriyè so sèrvitèr tan-lontan fè [...] épi i ka fè kousidiré a té lapriyè mo menm mo té ké lé fè […]. A sa ki rasiré mo bokou pannan sa tan-an ki té rèd menm. »
20. Lò nou enkyèt bokou, kouman nou pouvé préparé nou kò anvan nou priyè ?
20 Lò nou ka priyè épi nou enkyèt bokou, pitèt sa rèd pou nou lidé rété asou nou lapriyè. Détan, nou ka koumansé réfléchi asou ròt bagaj. Kisa ki pouvé idé nou ? Pou nou préparé nou kò, nou pouvé kouté Psaumes-yan anvan nou priyè. Épi nou pouvé fè kou rwa David, nou pouvé ékri sa nou lé di (Ps. 18, 34, 142 ké paròl ki marké anvan koumansman sa psaumes-yan). To pa blijé fè konsa lò to ka éséyé préparé to kò anvan to priyè. A chak moun ka wè kouman i ké fè (Ps. 141:2). Fè sa ki miyò annan to sitiasyon.
21. Poukisa nou pouvé priyè ké tout nou tchò ?
21 Nou tchò kontan toubonnman lò nou savé ki Jéova ka konprann sa nou ka rousanti anvan menm nou di li pyès bagaj (Ps. 139:4). Mé, a pa ti kontan i kontan lò nou ka di li ki nou ka fè li konfyans. A pou sa, pa pè priyè to Papa ki annan syèl-a. Sèrvi lapriyè ki marké annan so Paròl. Priyè l’ ké tout to tchò. Di li tousa ki ka fè to plézi ké tousa ki ka fè to lapenn. Jéova sa roun bon zanmi, i ké toujou la pou to !
KANTIK 45 « Sa mo ka réfléchi annan mo tchò »
a Gadé parti « Quelques qualités impressionnantes de Jéhovah » annan parti « Jéhovah » annan liv Versets pour la vie chrétienne.
b Souvan, lapriyè frè-ya ka fè pou asanblé-a kourt.
c Lò Ann priyè, i di bagaj ki ka sanblé ké sa Moyiz marké. Dapré sa nou ka wè, i dèt té ka pran tan réfléchi asou Ékritir-ya (Deut. 4:35 ; 8:18 ; 32:4, 39 ; 1 Sam. 2:2, 6, 7). Lontan pita, lò Mari, manman Jézi, louwé Jéova, i di bagaj ki té ka sanblé ké sa Ann di (Luc 1:46-55).
d Annan lapriyè Jonas fè ki annan Jonas 2:3-9, gadé kouman i sèrvi sa psaumes-yan roun dèyè ròt : Psaume 69:1 ; 16:10 ; 30:3 ; 142:2, 3 ; 143:4, 5 ; 18:6 ké 3:8.