ARTIK POU ÉTIDYÉ 43
KANTIK 41 Souplé Bondjé, kouté mo lapriyè
Pa bliyé priyè pou ròt-ya
« Priyè pou zòt konpanyen […]. Lò roun moun ki jis ka priyè pou sipliyé Bondjé, a roun bagaj ki pwisan » (JACQ. 5:16).
SA NOU KÉ ANPRANN
Nou ké wè poukisa priyè pou ròt-ya, a roun bagaj ki enpòrtan é nou ké wè déztrwa lidé ki pouvé idé nou fè sa.
1. Poukisa nou pouvé di ki lapriyè nou ka fè enpòrtan pou Jéova ?
LAPRIYÈ sa roun kado ki bèl toubonnman. Réfléchi asou sa : Jéova bay zanj-ya plizyèr bagaj pou yé fè (Ps. 91:11). I bay so Pitit plizyèr bagaj enpòrtan pou i fè osi (Mat. 28:18). Mé kanta kouté lapriyè, i pa ka bay pyès moun fè sa a so plas. Labib ka di ki i sa Sa-la ki « ka tandé lapriyè-a ». Donk, a li ki ka kouté nou (Ps. 65:2).
2. Poukisa nou pouvé di ki Pòl té ka priyè pou ròt-ya, é ki èkzanp i ka bay nou annan sa zafè-a ?
2 Nou pouvé palé ké Jéova di tout problèm nou gen. Mé nou divèt priyè pou ròt-ya osi. A sa apot Pòl té ka fè. Men sa i ékri asanblé Éfèz : « Mo ka kontinyé palé di zòt annan mo lapriyè » (Éph. 1:16). I té ka priyè pou roun ran moun èspésyalman osi. I di Timoté : « Mo ka di Bondjé mèrsi, [...] é mo pa ka las sonjé zòt lò mo ka sipliyé Bondjé, lannwit kou jou » (2 Tim. 1:3). Pòl té gen sopa problèm é i té lé palé Jéova di sa (2 Cor. 11:23 ; 12:7, 8). Mé i té ka pran tan priyè pou ròt-ya.
3. Détan, poukisa nou pouvé bliyé priyè pou ròt-ya ?
3 Détan, nou pouvé bliyé priyè pou ròt-ya. Poukisa ? Roun sò yé ka aplé Sabrinaa ka di : « Lavi annan sa monn-an rèd toubonnman. Nou toujou ka kouri. Afòrs nou mété nou lidé asou nou problèm, nou pouvé koumansé priyè yenki pou nou kò. » Ès a sa ka rivé to détan ? Si a sa, sa artik-a ké pouvé idé to. Pou koumansé, nou ké wè 1) poukisa nou divèt priyè pou ròt-ya épi 2) déztrwa konsèy ki pouvé idé nou fè sa.
POUKISA NOU DIVÈT PRIYÈ POU RÒT-YA ?
4-5. Poukisa nou ka di ki lapriyè, « a roun bagaj ki pwisan » ? (Jacques 5:16).
4 Priyè pou ròt-ya, « a roun bagaj ki pwisan » (li Jacques 5:16). Lò nou ka priyè pou ròt-ya, ès sa pouvé chanjé yé sitiasyon ? Wi. Kou Jézi té savé ki apot Pyèr té ké di ki i pa té konnèt li, i di li : « Mo sipliyé Bondjé pou to, pou to lafwa pa fébli » (Luc 22:32). Pòl té savé osi ki lò nou ka priyè pou roun moun, sa pouvé chanjé so sitiasyon. Lò yé té mété l’ lajòl Ròm san i pa té fè anyen, men sa i ékri Filémon : « Mo ka èspéré ki yé ké lésé mo rouvin òbò zòt grasa tout lapriyè zòt ka fè » (Philém. 22). É a sa ki rivé : yé libéré Pòl é i roukoumansé préché.
5 Sa pa lé di ki nou pouvé sèrvi lapriyè pou fòrsé Jéova fè roun bagaj. Lò i ka wè ki roun bagaj enpòrtan pou so sèrvitèr, détan i ka désidé fè sa yé ka doumandé l’. Kou nou savé sa, sa pouvé idé nou priyè Jéova rèd parapòrta roun sitiasyon, fè l’ konfyans épi lésé tout bagaj annan so lanmen (Ps. 37:5 ; 2 Cor. 1:11).
6. Lò nou ka priyè pou ròt-ya, kisa sa pouvé fè nou rousanti pou yé ? (1 Pierre 3:8).
6 Lò nou ka priyè pou ròt-ya, sa ka fè nou gen « konpasyon ké tandrès » pou yé (li 1 Pierre 3:8). Lò nou gen konpasyon pou roun moun, nou ka konprann ki moun-an ka soufri é nou anvi fè roun bagaj pou soulajé l’ (Marc 1:40, 41). Men sa roun ansyen yé k’aplé Michael ka di : « Lò mo ka priyè pou sa ròt-ya bézwen, mo ka konprann yé problèm pi byen é mo kontan yé ankò plis. » Richard, ki ansyen li menm osi, ka di rounòt bon bagaj nou ka jwenn lò nou ka priyè pou ròt-ya. I ka di : « Lò nou ka priyè pou roun moun, nou anvi fè roun bagaj pou idé l’. » I ka di osi : « É lò nou ka fè roun bagaj pou idé sa moun-an, a kousidiré nou té ka bay roun lanmen pou moun-an trapé répons lapriyè nou ka fè pou li-a. »
7. Poukisa nou ka di ki lò nou ka priyè pou ròt-ya, sa ka idé nou pa rété yenki asou nou problèm ? (Philippiens 2:3, 4 ; gadé zimaj-ya osi).
7 Lò nou ka priyè pou ròt-ya, sa ka idé nou pa rété yenki asou nou problèm (li Philippiens 2:3, 4). Nou tout ka jwenn problèm annan sa monn Satan ka dirijé-a (1 Jean 5:19 ; Rév. 12:12). Lò nou gen labitid priyè pou ròt-ya, sa ka fè nou sonjé ki « fanmi frè ké sò toupatou asou tout latè-a ka pasé anba sa menm kalité soufrans-ya » (1 Pierre 5:9). Roun sò yé k’aplé Katherine ki pyonyé ka di : « Lò mo ka priyè pou ròt-ya, sa ka fè mo sonjé ki a pa mo rounso ka jwenn problèm. Sa ka idé mo pa rété yenki asou mo problèm. »
Lò nou ka priyè pou ròt-ya, sa ka idé nou pa rété asou nou problèm (gadé paragraf 7).d
YÉ BÉZWEN NOU PRIYÈ POU YÉ
8. Pou kimoun nou pouvé priyè ?
8 Pou kimoun nou pouvé priyè ? Nou pouvé priyè pou plizyèr ran moun, parèkzanp, pou sa-ya ki malad, pou nou jennjan-yan ki ka soufri pas yé kanmarad lékòl ka ari yé ouben ka mété présyon anlè yé ouben pou sa-ya ka soufri pas laj ka rantré. Anplis di sa, roun patché frè ké sò ka soufri paské yé fanmi ouben gouvèrnman yé péyi ka baré yé chimen (Mat. 10:18, 36 ; Actes 12:5). Roun ran té blijé lésé yé kaz paské bagaj-ya té vin cho annan yé koté. Ròt ankò ka soufri akoz di katastròf natirèl-ya. Pitèt nou pa konnèt tout sa frè ké sò-ya, mé lò nou ka priyè pou yé, nou ka montré ki nou ka fè sa Jézi doumandé nou fè : ‘kontan nou konpanyen’ (Jean 13:34).
9. Poukisa nou divèt priyè pou sa-ya ki ka dirijé nou épi pou yé madanm ?
9 Nou pouvé priyè pou sa-ya ki ka dirijé nou osi, sa lé di frè-ya ki annan Kolèj santral-a ké yé asistan, frè-ya ki annan komité filyal-ya, frè-ya ki rèsponsab roun sèrvis o Bétèl, rèsponsab sirkonskripsyon-yan, ansyen-yan ké asistan-yan. Roun patché annan sa frè-ya ka travay rèd pou nou menmsi yé gen yépa problèm (2 Cor. 12:15). Mark, roun rèsponsab sirkonskripsyon ka di : « Mo lwen di mo papa ké mo manman ki ja granmoun é a roun bagaj ki rèd pou mo. Yé toulédé malad. Menmsi mo sò ké so mari ka pran swen di yé, mo tris pas mo pa pouvé fè tousa mo té ké lé fè pou yé. » Ki nou savé ki nou pa savé ki problèm sa frè-ya ka jwenn, annou pa bliyé priyè pou yé (1 Thess. 5:12, 13). Nou pouvé priyè pou yé madanm osi pas yé ka idé yé é sa ka pèrmèt yé kontinyé travay pou asanblé-a.
10-11. Lò nou ka priyè pou plizyèr frè ké sò anmenmtan, ès nou ka fè Jéova plézi ?
10 Souvan, nou ka priyè pou plizyèr frè ké sò anmenmtan. Parèkzanp, menmsi nou pa ka sonjé roun moun èspésyalman, nou pouvé doumandé Jéova idé nou frè ké sò-ya ki lajòl ouben konsolé sa-ya ki pédi roun moun yé kontan. Roun ansyen yé k’aplé Donald ka di : « I gen tèlman frè ké sò asou latè ki gen problèm ki, détan, nou ka doumandé Jéova idé tout sa ki ka soufri. »
11 Ès sa kalité lapriyè-ya ka fè Jéova plézi ? Asiré ! Pas nou pa savé sa chak frè ké sò bézwen. Donk, a roun bon bagaj lò nou ka priyè pou plizyèr frè ké sò anmenmtan (Jean 17:20 ; Éph. 6:18). Sa kalité lapriyè-ya ka montré ki nou « kontan tout frè ké sò-ya » (1 Pierre 2:17).
LÒ TO KA PRIYÈ POU ROUN MOUN ÈSPÉSYALMAN
12. Poukisa lò nou ka chaché wè pou kimoun èspésyalman nou pouvé priyè, a roun bon bagaj ?
12 Chaché wè pou kimoun to pouvé priyè. Lò nou ka priyè pou plizyèr ran frè ké sò, a roun bon bagaj. Mé a pou nou nonmen non sèrten frè ké sò osi. Ès roun moun annan to asanblé ka briga pas i gen roun maladi ki grav ? Ès roun jennjan annan to asanblé dékourajé pas yé ka mété présyon asou li lékòl ? Ès i gen roun papa ouben roun manman ka fè tousa i pouvé pou i lévé so timoun li rounso « soulon prensip ké avèrtisman Jéova ka bay » ? (Éph. 6:4). Si to ka pran tan byen gadé frè ké sò-ya annan to asanblé, to ké kontan yé ankò plis, to ké konprann yé pi byen é sa ké bay to anvi priyè pou yéb (Rom. 12:15).
13. Ès nou pouvé priyè pou roun moun nou pa konnèt ? Èspliké.
13 Nonmen non to frè ké sò-ya lò to ka priyè pou yé. To pouvé fè sa menmsi to pa janmen wè yé. Parèkzanp, sonjé nou frè ké sò-ya ki lajòl an Krimé, an Éritré, Larisi ké Sengapour. To pouvé trapé non sa-ya ki lajòl asou jw.orgc. Brian, roun rèsponsab sirkonskripsyon, ka di : « Mo wè ki lò mo ka marké non roun frè ki lajòl é mo ka di so non, sa ka idé mo pa bliyé priyè pou li. »
14-15. Kisa ki ké idé nou savé ki bagaj èspésyalman nou pouvé doumandé Jéova pou nou frè ké sò ?
14 Chaché wè ki bagaj èspésyalman to pouvé doumandé Jéova pou to frè ké sò. Michael, nou palé anvan, ka di : « Lò mo ka li istwè frè-ya ki lajòl asou jw.org, mo ka éséyé imajiné sa mo té ké rousanti si a mo ki té lajòl. Mo savé ki mo té ké enkyèt pou mo madanm é ki mo té ké lé yé byen okipé di li. Donk, sa ka idé mo savé ki bagaj èspésyalman mo pouvé doumandé Jéova pou frè-ya ki lajòl é ki maryé ». (Héb. 13:3, nòt).
15 Si nou ka éséyé imajiné kouman lavi frè ké sò-ya ki lajòl fika, nou ké savé ki ròt bagaj nou pouvé doumandé Jéova pou yé. Parèkzanp, nou pouvé priyè pou gardyen lajòl-ya janti ké yé é pou sa-ya ki gen roun otorité lésé yé adoré Jéova (1 Tim. 2:1, 2). Anplis di sa, nou pouvé priyè pou èkzanp sa-ya ki lajòl ankourajé ròt-ya ki annan yé asanblé. Épi nou pouvé priyè pou yé bon konpòrtman bay sa-ya ki pa Témwen anvi kouté nou mésaj (1 Pierre 2:12). Nou pouvé fè menm bagaj-a lò nou ka priyè pou nou frè ké sò ki ka jwenn ròt kalité éprèv. Si nou ka chaché wè pou kimoun nou pouvé priyè, si nou ka nonmen non nou frè ké sò-ya é si nou ka chaché wè ki bagaj èspésyalman nou pouvé doumandé Jéova pou yé, nou ké montré ki nou ‘kontan nou konpanyen toubonnman’ (1 Thess. 3:12).
A POU TO WÈ LAPRIYÈ KOU JÉOVA KA WÈ L’
16. Menmsi nou lapriyè pouvé chanjé sitiasyon roun moun, kisa nou pa divèt bliyé ? (Matthieu 6:8).
16 Kou nou wè l’, grasa lapriyè, sitiasyon roun moun pouvé chanjé. Mé a pou to wè lapriyè kou Jéova ka wè l’. A pa pou nou bliyé ki nou pa bézwen fè Jéova savé sa ki ka pasé kousidiré i pa té o kouran é i pa bézwen nou bay li pyès konsèy asou pi bon fason pou i okipé di roun sitiasyon. I savé sa so sèrvitèr-ya bézwen anvan menm yé savé ouben anvan nou menm nou konprann sa yé bézwen (li Matthieu 6:8). Atò, poukisa nou divèt priyè pou ròt-ya ? Anplis di tousa sa artik-a èspliké asou sa, lò nou ka priyè pou ròt-ya, nou ka montré ki nou kontan yé. A nou lanmou pou nou konpanyen ka bay nou anvi priyè pou yé. É Jéova kontan lò i ka wè nou imité fason i ka montré so lanmou.
17-18. Bay roun èkzanp ki ka montré poukisa nou divèt priyè pou ròt-ya.
17 Menmsi yé té ké di nou lapriyè pa ka chanjé sitiasyon nou frè ké sò, sa ka montré ki nou kontan yé é Jéova ka wè sa. Imajiné roun fanmi ki gen dé timoun : roun tibolonm ké roun tifi. Tibolonm-an kouché malad. Tifi-a k’alé wè so papa é ka sipliyé l’ : « Souplé, fè roun bagaj pou mo frè. A pa ti malad i malad ! » Papa-a ja ka fè roun bagaj pou so tibolonm ; i kontan l’ é i ka pran swen di li. Mé i dèt kontan toubonnman lò i ka wè ki so tifi kontan so frè tèlman ki i ka doumandé l’ idé l’ !
18 Jéova ka ankourajé nou gadé pou nou konpanyen épi priyè pou nou konpanyen. Lò nou ka priyè pou ròt-ya, nou ka montré ki nou ka gadé pou yé, é Jéova ka wè sa (2 Thess. 1:3 ; Héb. 6:10). Anplis di sa, kou nou wè l’, lò nou ka priyè pou roun moun, sa pouvé fè so sitiasyon chanjé. Atò, annou pa janmen bliyé priyè pou ròt-ya !
KANTIK 101 Annou travay ansanm
a Yé chanjé déztrwa non.
b Gadé vidéyo « Takeshi Shimizu : Jéova, a li ki ka tandé lapriyè-a » asou jw.org.
c Pou to trapé non frè ké sò-ya ki lajòl, alé asou paj « Témoins de Jéhovah emprisonnés en raison de leur foi (par pays) » asou jw.org.
d MEN SA NOU KA WÈ ASOU ZIMAJ-A : Plizyèr frè ké sò ki gen yépa problèm ka priyè pou yé konpanyen.