ARTIK POU ÉTIDYÉ 7
« Kouté sa moun ki gen sajès ka di »
« Louvri to zorè épi kouté sa moun ki gen sajès ka di » (PROV. 22:17).
KANTIK 123 Fidèlement soumis à l’ordre théocratique
KOUTWÉY ASOU SA NOU KÉ WÈa
1. Kouman nou pouvé rousouvwè roun konsèy, é poukisa nou tout bézwen konsèy ?
NOU tout bézwen konsèy tanzantan. Détan, a nou menm ki k’alé wè roun moun nou ka rèspèkté pou i bay nou roun konsèy. Mé défwa, a roun frè ki ka vini wè nou pou di nou fè atansyon paské nou ka alé fè roun « bagaj nou pa divèt fè », roun bagaj nou ké rigrété apré (Gal. 6:1). Ouben nou pouvé rousouvwè roun konsèy lò roun moun ka rouprann nou apré nou fè roun bagaj ki grav. Kèlkéswa fason nou ka rousouvwè roun konsèy, nou divèt kouté l’. Si nou ka fè sa, sa ké bon pou nou é sa ké pouvé sové nou lavi ! (Prov. 6:23).
2. Dapré Proverbes 12:15, poukisa nou divèt kouté lò yé ka bay nou roun konsèy ?
2 Sa artik-a ka apiyé asou roun vèrsé ki ka ankourajé nou ‘kouté sa-ya ki gen sajès’ (Prov. 22:17). I pa gen pyès moun ki konnèt tout bagaj. I toujou gen roun moun ki konnèt plis bagaj pasé nou ouben ki konnèt fè plis bagaj pasé nou (li Proverbes 12:15). Donk lò nou ka kouté roun konsèy, sa lé di ki nou gen imilité. Sa ka montré ki nou ka rékonnèt nou limit, é ki nou bézwen yé idé nou pou nou rivé fè sa nou prévwè. Bondjé fè rwa Salomon-an ékri : « Lò i gen roun patché moun ki ka bay nou konsèy, nou ka rivé » (Prov. 15:22).
Pou to menm, annan sa dé kalité konsèy-ya, kilès ki pi difisil pou asèpté ? (gadé paragraf 3-4).
3. Bay dé fason nou pouvé rousouvwè konsèy.
3 Roun fason nou ka rousouvwè konsèy, a lò nou ka li Labib-a ouben roun piblikasyon. Sa ka pèrmèt nou réfléchi asou sa nou ka fè, épi chanjé nou konpòrtman (Héb. 4:12). Mé nou pouvé rousouvwè konsèy rounòt fason. Parèkzanp, roun ansyen ouben rounòt krétyen ki gen èspéryans pouvé montré nou roun bagaj nou gen pou travay. Si roun moun kontan nou asé pou bay nou roun konsèy ki ka vini di Labib-a, nou divèt kouté konsèy i ka bay nou-a épi éséyé apliké l’. Konsa, nou ka montré nou gen rékonésans.
4. Dapré Ecclésiaste 7:9, kisa nou pa divèt fè lò yé ka bay nou roun konsèy ?
4 Nou pouvé trouvé sa rèd pou nou apliké roun konsèy roun moun ka bay nou. Nou pouvé yèg lò yé ka bay nou l’. Poukisa ? Paské menm si nou ka rékonnèt ki nou pa parfè, nou pouvé trouvé sa rèd asèpté roun konsèy ki ka fè nou wè roun défo nou gen (li Ecclésiaste 7:9). Pitèt nou ké éséyé chaché èskiz. Ouben pitèt nou ké di ki moun-an pa té gen bon lentansyon lò i di nou sa. Ouben nou ké pitèt di ki nou pa kontan fason yé bay nou konsèy-a. Pitèt osi nou ké kritiké moun-an li menm, nou ké di : « Kimoun i sa pou i bay mo roun konsèy ? Li menm osi i ka fè bagaj ki pa bon ! » Épi si konsèy-a pa ka alé annan nou sans, pitèt nou pa ké kouté l’ ouben nou ké alé wè rounòt moun paské nou ka èspéré i ké di nou roun bagaj nou kontan ki ka alé annan nou sans.
5. Kisa nou ké wè annan sa artik-a ?
5 Annan sa artik-a, nou ké wè èkzanp plizyèr moun annan Labib-a. Sa ki asèpté konsèy yé rousouvwè, ké ròt ki pa asèpté konsèy yé rousouvwè. Nou ké wè osi kisa ki ké idé nou asèpté roun konsèy épi profité di sa konsèy-a.
YÉ PA ASÈPTÉ KONSÈY YÉ ROUSOUVWÈ
6. Kisa fason rwa Roboam réyaji lò yé bay li roun konsèy ka anprann nou ?
6 Annou palé di Roboam. Pèp-a vini doumandé li tiré annan kantité travay so papa Salomon té bay yé fè. Anvan i réponn yé, Roboam alé wè ansyen Israyèl-ya. A té roun bon bagaj. Sa mouché-ya di rwa-a fè sa pèp-a té ka doumandé li, konsa yé té ké soutni li (1 Rois 12:3-7). Dapré sa nou ka wè, sa konsèy-a pa té ka alé annan sans Roboam, paské apré sa, i alé wè mouché-ya ki té lévé ké li. Sa mouché-ya té gen apéprè 40 lannen (2 Chron. 12:13). Donk yé dèt té gen roun tibi èspéryans. Mé yé pa bay Roboam bon konsèy. Yé di li bay pèp-a plis travay ankò (1 Rois 12:8-11). Kou yé té bay li dé konsèy diféran, Roboam té pouvé priyè Jéova é doumandé li ki konsèy i té divèt swiv. Mé, i désidé asèpté konsèy i té pi kontan-an, sa lé di sa mouché-ya ki té pi jenn té di li fè. A pa ti malò sa mennen pou Roboam ké pou pèp Israyèl-a. Menm fason-an, détan, yé ka bay nou roun konsèy mé a pa sa nou lé tandé. Mé si i ka vini di paròl Bondjé-a, nou divèt asèpté li.
7. Kisa èkzanp rwa Ozyas ka anprann nou ?
7 Rwa Ozyas non plis pa asèpté roun konsèy. I antré annan roun koté annan tanp Jéova-a koté prèt-ya sèlman té pouvé alé, é i éséyé boulé lansan. Atò Prèt-ya di li : « To pa gen drwa boulé lansan pou Jéova. A prèt-ya rounso ki gen drwa boulé lansan ». Kouman Ozyas réyaji ? Si i té asèpté konsèy-a ké imilité é i té soti annan tanp-a lanmenm, Jéova té ké pitèt pardonnen li. Pasé i fè sa, « Ozyas [...] lévé faché ». Poukisa i pa asèpté konsèy-a ? I té ka santi ki kou i té rwa, i té gen drwa fè sa i té lé. Mé Jéova pa asèpté sa. Pas i fè roun bagaj i pa té gen drwa fè, Jéova fè l’ trapé lalèp é i « rété ké so lalèp jis jou i mouri » (2 Chron. 26:16-21). Èkzanp Ozyas ka anprann nou ki kèlkéswa moun nou sa, si nou pa ka asèpté roun konsèy ki ka vini di Labib-a, nou ké pédi favèr Jéova-a.
YÉ ASÈPTÉ KONSÈY YÉ ROUSOUVWÈ
8. Kouman Jòb réyaji lò yé bay li roun konsèy ?
8 Labib-a ka palé osi di plizyèr moun ki rousouvwè bénédiksyon paské yé asèpté konsèy yé bay yé-a. Annou palé di Jòb. Menm si i té lé fè Bondjé plézi, i pa té parfè. Lò i té anba bon présyon, i di sèrten bagaj ki té ka montré ki fason i té ka pansé-a pa té bon. A pou sa, ni Éliyou ni Jéova palé ké li franchman. Kouman Jòb réyaji ? I asèpté konsèy-a ké imilité, i di : « Mo [...] palé san mo pa té konprann [...] Mo ka tiré sa mo di é mo ka répanti annan lapousyè ké annan sann-an. » Jéova béni Jòb paské i réyaji ké imilité (Job 42:3-6, 12-17).
9. Kouman Moyiz réyaji lò i rousouvwè roun konsèy, é poukisa a roun bon èkzanp pou nou ?
9 Moyiz osi ka bay nou roun bon èkzanp : apré i fè roun péché grav, i asèpté Bondjé korijé l’. Roun jou, i pa tchenbé so kò é i pa bay Jéova lònò. Akoz di sa, Moyiz pédi privilèj antré annan Latè Bondjé té promèt-a (Nomb. 20:1-13). Lò Moyiz doumandé Jéova chanjé désizyon i té pran-an, Jéova di li : « Pa jen rouvin palé mo di sa ankò » (Deut. 3:23-27). Moyiz pa faché pou sa, i pito asèpté désizyon Jéova té pran é Jéova kontinyé itilizé li pou dirijé so pèp (Deut. 4:1). Ni Jòb ni Moyiz, yé toulédé sa dé bon èkzanp pou nou swiv. Jòb chanjé fason i té ka pansé-a : i pa chaché pyès èskiz pou so kò. Moyiz montré ki i té ka asèpté konsèy Jéova-a : i rété fidèl menm si i té pédi roun privilèj ki té gen bokou valò pou li.
10. a) Kisa Proverbes 4:10-13 ka di asou bénédiksyon nou ka rousouvwè lò nou ka asèpté roun konsèy ? b) Ki bon konpòrtman sèrten montré lò yé rousouvwè roun konsèy ?
10 Nou ka jwenn bénédiksyon lò nou ka imité èkzanp moun fidèl kou Jòb ké Moyiz (li Proverbes 4:10-13). A sa roun patché annan nou frè ké sò-ya wè. Men sa roun frè yé ka aplé Emmanuelb é ki ka rété o Kongo ka di : « Plizyèr frè ki gen èspéryans annan mo asanblé wè ki mo té ka alé gaté mo rélasyon ké Jéova, é yé éséyé idé mo. Mo apliké konsèy yé bay mo-a é sa idé mo chapé anba roun patché problèm. » Men sa Megan, roun sò ki pyonyé o Kanada ka di asou konsèy yé bay li : « A pa té toujou sa mo té lé tandé, mé a té toujou sa mo té bézwen tandé. » Pou fini, Marko, roun frè ki ka rété an Kroasi ka di : « Mo pédi roun rèsponsabilité annan asanblé-a mé lò mo ka gadé dèyè, mo ka randé mo kò kont ki konsèy mo rousouvwè-a idé mo fè mo rélasyon ké Jéova rouvin fò. »
11. Kisa frè Karl Klein di asou fason nou divèt réyaji lò yé ka bay nou roun konsèy ?
11 Frè Karl Klein osi, ki té annan Kolèj santral-a, rivé profité di roun konsèy yé bay li. Annan istwè so lavi, i ka rakonté ki roun jou, Jozèf Rutherford ki té sa so bon zanmi, bay li roun konsèy ki té rèd. Frè Klein rékonnèt ki o koumansman, i pa byen réyaji. I di : « Lò [frè Rutherford] wè mo apré, i di mo jantiman “bonjou Karl !”. Mé kou mo té faché toujou, mo jis bougonnen roun ti bonjou. Lanmenm i di : “Panga, Karl ! Djab-a dèyè to !” Mo té tou jennen, mo réponn li : “Pa gadé, a pa anyen frè Rutherford.” Mé i té savé mo té faché ké li, é i répété sa i té di mo : “Pa gen problèm. Mé véyé to kò kanmenm. Djab-a dèyè to.” I té gen rézon. Lò nou ka tchenbé roun frè ouben roun sò asou nou tchò, èspésyalman paské i di roun bagaj i té gen drwa di nou [...], nou ka lésé lapòt-a gran louvri pou Djab-ac » (Éph. 4:25-27). Frè Klein asèpté konsèy frè Rutherford bay li, é yé rété bon zanmi.
KISA KI POUVÉ IDÉ NOU ASÈPTÉ ROUN KONSÈY ?
12. Kouman imilité-a pouvé idé nou asèpté roun konsèy ? (Psaume 141:5).
12 Kisa ki pouvé idé nou asèpté roun konsèy ? A pou nou gen imilité. Épi a pou nou sonjé ki nou pa parfè, é ki détan, nou pa ka réfléchi anvan nou fè roun bagaj. Kou nou wè l’, fason Jòb té ka wè bagaj-ya pa té bon. Mé apré, i chanjé fason i té ka pansé-a é Jéova béni li pou sa. Poukisa i chanjé fason i té ka wè bagaj-ya ? Paské i té gen imilité. I montré ki i té gen imilité lò i asèpté konsèy Éliyou bay li, menm si Éliyou té lontan pi jenn pasé li (Job 32:6, 7). Imilité-a ké idé nou osi apliké roun konsèy menm si nou ka santi ki nou pa mérité yé bay nou l’, ouben lò moun-an ki ka bay nou l’ pi jenn pasé nou. Roun ansyen o Kanada ka di : « Kou nou pa ka wè nou kò kou ròt-ya ka wè nou, kouman nou ké fè progrè si pyès moun pa ka bay nou konsèy ? » Nou tout bézwen travay pou nou pouvé kontinyé gen kalité frwi lespri sen-an ka bay, é pou nou vin pi vayan annan prédikasyon-an ké ansèyman-an (li Psaume 141:5).
13. Kouman nou divèt wè konsèy nou ka rousouvwè ?
13 Wè konsèy-a kousidiré a Bondjé ki ka di to i kontan to. Jéova lé sa ki pi bon pou nou (Prov. 4:20-22). I ka montré nou ki i kontan nou lò i ka sèrvi so Paròl, roun piblikasyon ki ka apiyé asou Labib-a, ouben roun krétyen ki gen èspéryans pou bay nou roun konsèy. Hébreux 12:9, 10 ka di ki « i ka korijé nou pou nou byen ».
14. Asou kisa nou divèt rété lò yé ka bay nou roun konsèy ?
14 Gadé konsèy-a, pa gadé fason yé ka bay to l’. Détan nou pouvé santi ki fason yé ka bay nou konsèy-a pa bon. A vré, sa-la ki ka bay konsèy-a divèt fè tousa i pouvé pou konsèy-a fasil pou asèptéd (Gal. 6:1). An tout sans, a pou nou rété asou mésaj-a, menm si nou ka pansé ki moun-an té pouvé di nou sa pi byen. Annou doumandé nou kò : « Menm si mo pa kontan fason yé bay mo konsèy-a, ès i gen roun bagaj ki vré annan sa yé di mo ? Ès mo pouvé pasé asou défo moun-an, épi rété asou konsèy-a li menm ? » Annou trouvé roun fason pou nou profité di tout konsèy yé ka bay nou. Sa ké montré ki nou gen sajès (Prov. 15:31).
DOUMANDÉ YÉ BAY TO KONSÈY É TO KÉ JWENN BÉNÉDIKSYON
15. Poukisa sa byen pou nou chaché yé bay nou konsèy ?
15 Labib-a ka di nou chaché gen konsèy. Proverbes 13:10 ka di : « Sajès-a, a di sa-ya ki ka doumandé moun bay yé konsèy. » A vré menm ! Sa-ya ki ka chaché moun bay yé konsèy ka pran pi bon désizyon pasé sa-ya ki ka antann moun vini bay yé konsèy ouben ki pa jen ka doumandé konsèy. Donk, annou pran douvan pou nou doumandé konsèy !
Poukisa jenn sò-a ka doumandé roun sò ki gen èspéryans konsèy ? (gadé paragraf 16).
16. Annan ki sitiasyon nou pouvé doumandé konsèy ?
16 Kitan nou pouvé alé wè roun frè ouben roun sò pou i bay nou roun konsèy ? Men déztrwa sitiasyon : 1) Roun sò ka doumandé rounòt proklamatèr ki gen èspéryans vini ké li annan roun étid é apré sa, i ka doumandé li bay li konsèy asou sa i pouvé fè pou i vin pi vayan annan zafè ansényé-a. 2) Roun sò ki pa maryé lé achté roun pantalon. I ka doumandé roun sò ki gen èspéryans di li franchman sa i ka pansé di sa i chwazi. 3) Roun frè ké fè so prémyé diskour. I ka doumandé roun frè ki abitchwé fè diskour, byen kouté li é bay li déztrwa konsèy pou i vin pi fò. Mé menm si roun frè abitchwé fè diskour dipi lontan, sa bon pou i doumandé ròt frè ki ka fè diskour bay li konsèy é apliké yé.
17. Kouman nou pouvé profité di konsèy nou ka rousouvwè ?
17 Annan simenn ouben mwa ka vini-ya, nou tout ké rousouvwè konsèy. Roun konsèy roun moun ké bay nou, ouben roun konsèy nou ké trapé lò nou ké li Labib-a ouben roun piblikasyon. Lò sa ké rivé nou, annou sonjé sa nou fin wè-a. A pou nou gen imilité. A pou nou rété asou konsèy-a, a pa pou nou rété asou fason yé ka bay nou l’. Épi a pou nou apliké konsèy nou rousouvwè-a. Nou pyès pa fèt ké sajès dipi nou toupiti. Mé Paròl Bondjé-a ka promèt nou ki si ‘nou ka kouté konsèy-ya ké disiplin-an, nou ké divini saj’ (Prov. 19:20).
KANTIK 124 Soyons fidèles
a Sèrvitèr Jéova-ya savé ki sa enpòrtan pou yé kouté épi apliké konsèy-ya ki annan Labib-a. Mé an menm tan, a pa tout tan sa fasil pou asèpté roun konsèy. Poukisa ? É kisa ki pouvé idé nou profité di tout konsèy nou ka rousouvwè ?
b Yé chanjé déztrwa non.
d Annan ròt artik-a, nou ké wè kouman nou pouvé bay konsèy roun bon fason.