Kouman nou pouvé bay moun bon konsèy ?

1. Kimoun ki divèt bay ròt-ya konsèy, é poukisa ?

ÈS TO kontan bay moun konsèy ? I gen sa ki kontan fè l’. Mé i gen sa ki pa kontan fè l’ pas yé pa alèz. Mé nou tout blijé fè l’ tanzantan. Poukisa ? Pas Jézi di ki tout moun té ké wè kimoun ki sa so vré disip grasa lanmou yé té ké gen pou yé konpanyen (Jean 13:35). É roun fason nou pouvé montré nou frè ké sò-ya ki nou kontan yé, a lò nou ka bay yé konsèy lò yé bézwen. Paròl Bondjé-a ka di ki lò nou ka bay « roun konsèy ki sensèr » nou ka vin pi « bon zanmi » (Prov. 27:9).

2. Kisa ansyen-yan divèt konnèt fè, é poukisa ? (gadé karé-a osi : « Konsèy frè-a ki ka dirijé réinyon-an ki ka fèt anmitan simenn-an ka bay nou »).

² Ansyen-yan èspésyalman divèt konnèt kouman pou yé bay moun bon konsèy. Jéova ké Jézi bay yé rèsponsabilité pran swen di asanblé-a (1 Pierre 5:2, 3). Pou fè sa, yé ka fè diskour annan asanblé-a koté yé ka bay roun patché konsèy ki ka vin di Labib. Mé détan, yé divèt vin bay nou konsèy. É yé ka idé sa-ya ki lésé Jéova rouvini annan asanblé-a osi. Kouman ansyen-yan ké nou menm, nou pouvé bay moun bon konsèy ?

3. a) Kouman nou pouvé anprann bay moun bon konsèy ? (Isaïe 9:6 ; gadé karé-a osi : « Lò to ka bay roun konsèy, fè kou Jézi »). b) Kisa nou ké wè annan sa artik-a ?

³ Nou pouvé anprann bay bon konsèy si nou ka étidyé èkzanp moun annan Labib ki bay ròt moun konsèy. Èkzanp Jézi entérésan toubonnman paské Labib ka aplé l’ « bèl Konséyé »-a (li Isaïe 9:6). Annan sa artik-a, nou ké wè sa nou pouvé fè lò roun moun ka doumandé nou bay li roun konsèy é lò nou divèt fè l’ lò moun-an pa doumandé nou bay li pyès konsèy. Nou ké wè osi ki a pa nenpòrt kitan nou divèt bay roun konsèy. É lò nou ka fè l’, nou divèt byen fè l’.

LÒ ROUN MOUN KA DOUMANDÉ NOU BAY LI ROUN KONSÈY

4-5. Lò roun moun ka vin doumandé nou bay li roun konsèy, ki késyon nou divèt pozé nou kò ? Bay roun èkzanp.

⁴ Lò roun moun ka doumandé nou bay li roun konsèy, kouman nou divèt réyaji ? Pitèt nou nen ké gonflé é nou ké anvi idé moun-an lanmenm. Mé anvan nou idé l’, a pou nou pozé nou kò sa késyon-an : « Ès mo gen asé èspéryans pou idé moun-an annan so sitiasyon ? » Détan, pi bon bagaj nou ké pouvé fè pou idé moun-an, a chaché rounòt moun ki ké pouvé idé l’ pi byen pasé nou annan so sitiasyon.

⁵ Annou pran roun èkzanp. Imajiné to gen roun bon zanmi ki ka tonbé malad. I ka èspliké to ki i ja chaché ki rémèd yé pouvé bay li. Épi i ka doumandé to ki rémèd ki pi bon. Pitèt to menm to gen topa lidé asou sa, mé to pa dòktèr é to pa fè pyès lékòl pou sa. Annan sa sitiasyon-an, pi bon bagaj to ké pouvé fè pou to zanmi, a idé l’ trapé roun dòktèr pas a li ki konnèt swanyé moun.

6. Poukisa nou pa divèt kouri réponn roun moun ki doumandé nou roun konsèy ?

⁶ Menmsi nou ka pansé ki nou gen asé èspéryans pou bay moun-an roun konsèy ki ké idé l’ annan so sitiasyon, pitèt nou ké désidé pa réponn li lanmenm. Poukisa ? Proverbes 15:28 ka di ki « tchò roun moun ki jis ka pran tan byen réfléchi anvan i réponn ». Donk, menmsi nou ka pansé ki nou konnèt répons-a, nou ké pran tan fè réchèrch, priyè épi réfléchi anvan réponn moun-an. Konsa, sa nou ké di li ké alé ké sa Jéova ka pansé. Annou sonjé sa ki rivé profèt Natan.

7. Kisa èkzanp Natan ka anprann nou ?

⁷ Lò rwa David di Natan ki i té lé fè roun tanp pou Jéova, lanmenm Natan di li ki i té pouvé fè l’. Mé profèt-a té divèt doumandé Jéova anvan i réponn David. Poukisa ? Paské Jéova pa té lé David fè roun tanp pou li (1 Chron. 17:1-4). Sa èkzanp-a ka montré nou ki, lò roun moun ka vin doumandé nou bay li roun konsèy, nou pa divèt « présé palé » (Jacq. 1:19).

8. Poukisa nou divèt fè atansyon lò nou ka bay roun moun roun konsèy ?

⁸ Annou wè rounòt bagaj ki divèt fè nou fè atansyon lò nou gen pou bay roun moun roun konsèy : si nou pa ka bay moun-an roun bon konsèy é i ka trapé problèm, a ké di nou fot osi. Donk, nou divèt pran tan byen réfléchi anvan nou bay roun moun roun konsèy.

LÒ MOUN-AN PA DOUMANDÉ NOU BAY LI PYÈS KONSÈY

9. Kisa ansyen-yan divèt vérifyé anvan yé alé wè roun frè ouben roun sò pou bay li roun konsèy ? (Galates 6:1).

⁹ Détan, ansyen-yan ké divèt alé wè roun frè ouben roun sò ki « fè roun bagaj i pa té divèt fè » (li Galates 6:1). Sa moun-an pòkò fè roun péché ki grav, mé i asou roun mové chimen. Donk, sa ansyen-yan lé, a idé moun-an rété asou chimen-an ki ka bay lavi pou tout-tan (Jacq. 5:19, 20). Mé pou yé rivé bay roun bon konsèy, yé divèt vérifyé si moun-an vréman fè roun bagaj i pa té divèt fè pas Jéova ka pèrmèt nou chak sèrvi nou konsyans pou désidé sa nou ké fè (Rom. 14:1-4). Mé annou wè sa ansyen-yan divèt fè si yé ka wè ki yé divèt alé wè roun frè ouben roun sò pou bay li roun konsèy pas i vréman fè roun bagaj i pa té divèt fè.

10-12. Bay roun èkzanp pou èspliké kouman ansyen-yan divèt fè lò yé gen pou bay roun moun ki pa doumandé yé anyen roun konsèy ? (gadé zimaj-ya osi).

¹⁰ Sa pa fasil pou ansyen-yan lò yé divèt alé wè roun moun pou bay li roun konsèy alòr ki i pa doumandé yé anyen. Poukisa ? Apot Pòl èspliké ki roun moun pouvé fè roun bagaj i pa té divèt fè san i pa menm randé so kò kont. Donk, pou koumansé, ansyen-yan divèt idé moun-an pou i rivé asèpté konsèy-a.

¹¹ Lò to k’alé bay roun moun ki pa doumandé to anyen roun konsèy, a kousidiré to té ka éséyé planté roun plant annan roun latè ki rèd. Anvan roun moun koumansé sonmen, i divèt rabouré latè-a. Konsa, sa ké pi fasil pou i planté roun bagaj. Apré sa, i ka planté grenn-yan. Pou fini, i ka rozé yé pou yé pousé. Menm fason-an, si roun ansyen divèt bay roun moun ki pa doumandé li anyen roun konsèy, i ké divèt préparé moun-an pou i asèpté konsèy-a. Parèkzanp, i pouvé antann bon moman-an pou alé wè l’ pou di li ki i ka gadé pou li. Si moun-an ki ka bay konsèy-a sa roun moun ki kontan ròt-ya é ki bon, sa ké pi fasil pou yé asèpté roun konsèy ki ka vini di li.

¹² Lò ansyen-an ké kozé ké moun-an, i ké pouvé kontinyé « préparé latè-a » lò i ké di moun-an ki nou tout ka fè bagaj ki pa bon é ki nou tout bézwen roun moun bay nou roun konsèy tanzantan (Rom. 3:23). I ké palé jantiman ké bokou rèspè é i ké sèrvi Labib pou montré moun-an ki bézwen konsèy-a ki i fè roun bagaj i pa té divèt fè. Lò moun-an ké konprann ki i fè roun bagaj ki pa té bon, ansyen-an ké « planté grenn-an », sa lé di ki i ké èspliké l’ di roun fason ki senp sa i divèt fè pou i ranjé so sitiasyon. Pou fini, i ké « rozé grenn-an », sa lé di ki i ké félisité moun-an é i ké priyè ké li (Jacq. 5:15).

13. Kisa roun ansyen pouvé fè pou i savé si moun-an byen konprann konsèy i bay li-a ?

¹³ Détan, sa to ka di, a pa sa ròt-a ka konprann. Kisa roun ansyen pouvé fè pou i sir ki moun-an byen konprann sa i di-a ? I pouvé pozé li késyon (Eccl. 12:11). Sa moun-an ké réponn ké pèrmèt li savé si i byen konprann konsèy i bay li-a.

KITAN NOU DIVÈT BAY KONSÈY-A É KOUMAN NOU POUVÉ BYEN FÈ L’

14. Poukisa nou pa divèt bay pyès moun konsèy lò nou faché ?

¹⁴ Kou nou pa parfè, détan nou tout ka di ouben ka fè bagaj ki ka nèrvé nou frè ké sò (Col. 3:13). Labib ka di ki détan, nou jis pouvé faché épi fè ròt-ya faché osi (Éph. 4:26). Mé a pa lò nou faché nou divèt bay ròt-ya konsèy. Poukisa ? Paské « lò roun moun kòlè, i pa ka fè sa ki jis douvan Bondjé » (Jacq. 1:20). Si nou ka bay roun moun roun konsèy lò nou faché, a déga nou ké fè. Sa pa lé di ki nou pa jen divèt di roun moun ki nèrvé nou sa nou ka pansé ké sa nou ka rousanti. Mé nou divèt antann nou kalmé nou kò anvan nou alé palé ké li. Annou wè kouman Éliyou bay Jòb bon konsèy.

15. Kisa èkzanp Éliyou ka anprann nou ? (gadé zimaj-a osi).

¹⁵ Pannan plizyèr jou, Éliyou kouté Jòb défann so kò kont sa-ya ki té vin konsolé l’ swadizan. I pran so lapenn. Mé i faché ké li osi pas kou i té ka éséyé défann so kò, i di bagaj asou Jéova ki pa té vré. Magré sa, Éliyou antann anvan i palé. I rété kalm é i montré Jòb ki i té gen bokou rèspè pou li lò i bay li konsèy i té pou bay li-a (Job 32:2 ; 33:1-7). Èkzanp Éliyou ka anprann nou roun bagaj enpòrtan : miyò nou bay roun konsèy o bon moman épi di roun bon fason, sa lé di ké rèspè épi ké lanmou (Eccl. 3:1, 7).

KONTINYÉ BAY RÒT-YA KONSÈY ÉPI ASÈPTÉ KONSÈY RÒT-YA KA BAY TO

16. Kisa Psaume 32:8 ka anprann nou ?

¹⁶ Vèrsé sa artik-a ka apiyé asou-a ka di ki Jéova ka ‘konséyé nou, so wéy asou nou’ (li Psaume 32:8). Sa lé di ki i ké toujou soutni nou. I ka bay nou konsèy é i ka idé nou swiv yé. A pa ti bèl èkzanp i ka bay nou ! Lò nou divèt bay roun moun roun konsèy, annou imité Jéova : annou ankourajé moun-an épi annou idé l’ pran bon désizyon.

17. Ké kisa ansyen-yan ka sanblé lò yé ka bay nou bon konsèy ki ka vini di Labib ? (Isaïe 32:1, 2)

¹⁷ Jòdla plis pasé anvan, nou bézwen bay ròt-ya konsèy é nou bézwen ròt-ya bay nou konsèy osi (2 Tim. 3:1). Ansyen-yan ki ka bay nou bon konsèy ki ka vin di Labib « kou ti larivyè annan roun latè ki sèk » (li Isaïe 32:1, 2). É lò nou zanmi ka di nou sa nou bézwen tandé, pasé yé di nou sa nou lé tandé, yé ka fè nou roun bèl kado. Konsèy yé ka bay nou « kou ponm fèt ké lò annan roun résipyan an arjan » (Prov. 25:11). Annou tout kontinyé gen plis sajès pou bay ròt-ya bon konsèy é pou asèpté konsèy ròt-ya ka bay nou !