ARTIK POU ÉTIDYÉ 28
KANTIK 88 Fè mo konnèt koté pou mo maché
Kouman nou pouvé trapé bon konsèy ?
« Sajès-a, a di sa-ya ki ka doumandé moun bay yé konsèy » (PROV. 13:10).
SA NOU KÉ ANPRANN
Nou ké wè sa nou divèt fè pou nou profité di konsèy nou ka rousouvwè-ya.
1. Kisa ki ké idé nou pran bon désizyon épi rivé fè sa nou lé fè ? (Proverbes 13:10 ; 15:22).
NOU tout lé pran bon désizyon. É nou tout lé rivé fè sa nou lé fè. Paròl Bondjé-a ka èspliké nou kouman nou pouvé rivé fè sa dé bagaj-ya (li Proverbes 13:10 ; 15:22).
2. Kisa Jéova ka promèt nou ?
2 Pi bon moun nou pouvé alé wè pou nou gen sajès ké konsèy, a nou Papa Jéova. I ka promèt nou ki i ké la pou nou. I ka di : « Mo lé konséyé to, mo wéy asou to » (Ps. 32:8). Sa promès-a ka montré nou ki i pa ka yenki bay nou konsèy : i ka gadé pou nou chak é i ka idé nou swiv konsèy i ka bay nou.
3. Ki késyon nou ké réponn annan sa artik-a ?
3 Annan sa artik-a, nou ké sèrvi Labib pou réponn sa kat késyon-yan : 1) Ki bèl kalité mo divèt gen si mo lé profité di bèl konsèy yé ka bay mo ? 2) Kimoun ki pouvé bay mo bon konsèy ? 3) Kouman mo pouvé montré ki mo vréman lé yé bay mo konsèy ? 4) Poukisa mo pa divèt doumandé ròt-ya pran désizyon a mo plas ?
KI BÈL KALITÉ MO DIVÈT GEN ?
4. Ki bèl kalité nou divèt gen si nou lé profité di konsèy yé ka bay nou ?
4 Pou profité di konsèy yé ka bay nou, nou pa divèt fè ròklò é nou divèt rékonnèt nou limit. A pou nou rékonnèt ki détan, nou bézwen yé gidé nou pas nou pa gen asé èspéryans ouben asé konésans pou pran roun bon désizyon. Si nou ka fè ròklò é nou pa ka rékonnèt nou limit, Jéova pa ké pouvé idé nou é nou ka riské pa kouté konsèy nou ké trapé lò nou ké li so Paròl (Mich. 6:8 ; 1 Pierre 5:5). Parkont, si nou pa ka fè ròklò é si nou ka rékonnèt nou limit, nou ké kouté konsèy ki annan Labib é nou ké obéyi vitman.
5. Kisa ki té pouvé fè David gonflé so lèstomak ?
5 Annou wè sa èkzanp rwa David ka anprann nou. I té konnèt fè roun patché bagaj, mé i pa fè ròklò. Lontan anvan i divini rwa, moun-yan té savé i té byen konnèt jwé lanmizik. Yé jis doumandé l’ jwé lanmizik pou rwa-a (1 Sam. 16:18, 19). Lò Jéova chwazi li pou divini rwa, i bay li lèspri sen, é sa lèspri sen-an aji asou li é bay li fòrs (1 Sam. 16:11-13). Tout moun té savé i té sa roun vayan sòlda ; parèkzanp i té tchwé roun bi papa Filisten yé té ka aplé Golyat (1 Sam. 17:37, 50 ; 18:7). Ès i gonflé so lèstomak parapòrta tout bèl bagaj i té fè é ès i di so kò ki i pa té bézwen yé bay li pyès konsèy ? Awa. I pa fè ròklò.
6. Kouman nou savé ki David té ka kouté lò yé té ka bay li konsèy ? (gadé zimaj-a osi).
6 Lò David divini rwa, i kontinyé chwazi moun ki té pouvé bay li konsèy (1 Chron. 27:32-34). Menm anvan i vin rwa, i toujou té ka kouté konsèy yé té ka bay li. Lò a mouché ki té ka bay li konsèy, i té ka kouté. Mé i asèpté kouté konsèy roun madanm yé té ka aplé Abigayil té bay li osi. Nabal, mari sa madanm-an, pa té ka rèspèkté pyès moun, i té engra é i té ka gadé yenki pou so douvan lèstomak. Mé David li menm pa fè ròklò, i kouté bon konsèy Abigayil té bay li é sa anpéché l’ fè roun mové bagaj (1 Sam. 25:2, 3, 21-25, 32-34).
David pa fè ròklò, i kouté konsèy Abigayil bay li (gadé paragraf 6).
7. Kisa èkzanp David ka anprann nou ? (Ecclésiaste 4:13 ; gadé zimaj-ya osi).
7 Nou pouvé anprann roun patché bagaj grasa èkzanp David. Si nou konnèt fè roun bagaj ouben nou gen roun ti moso otorité, a pa pou nou krè ki nou konnèt tout bagaj é ki nou pa bézwen yé bay nou konsèy. É kou David, nou divèt kouté konsèy yé ka bay nou, kèlkéswa moun-an ki ka bay nou l’ (li Ecclésiaste 4:13). Konsa nou pa ké fè pyès gro bétiz, nou pa ké trapé problèm pou nou kò é nou pa ké fè ròt-ya trapé problèm nonplis.
Nou divèt kouté konsèy yé ka bay nou kèlkéswa moun-an ki ka bay nou l’c (gadé paragraf 7).
KIMOUN KI POUVÉ BAY MO BON KONSÈY ?
8. Poukisa Jonatan té pouvé bay David bon konsèy ?
8 Ki ròt bagaj èkzanp David ka anprann nou ? David té ka kouté konsèy moun ki té gen roun lanmityé ké Jéova ki té fò é anplis di sa, ki té ka byen konprann so sitiasyon. Parèkzanp, lò i té ka chaché savé si i té ké pouvé viré byen ké rwa Sayil, i kouté konsèy Jonatan, pitit Sayil, bay li. Poukisa Jonatan té pouvé bay li bon konsèy ? Pas so lanmityé ké Jéova té fò é pas i té byen konnèt so papa (1 Sam. 20:9-13). Kisa sa ka anprann nou ?
9. Lò nou bézwen yé bay nou konsèy, kimoun nou divèt alé chaché ? (Proverbes 13:20).
9 Lò nou bézwen yé bay nou konsèy, annou chaché roun moun ki gen roun lanmityé ki fò ké Jéova é anplis di sa, ki gen asé èspéryans pou idé nou annan nou sitiasyona (li Proverbes 13:20). Imajiné roun frè ka chaché roun moun pou i maryé. Kimoun ki pouvé bay li bon konsèy annan sa zafè-a ? Roun di so zanmi ki pa maryé pouvé idé l’ si i ka sèrvi Labib pou bay li konsèy. Mé frè-a ké jwenn pi bon konsèy si i k’alé wè roun frè ké so madanm ki byen konnèt li é ki ka sèrvi Jéova ansanm ké tchò kontan dipi roun bon moman. Yé ké pouvé montré l’ kouman i pouvé fè sa Labib ka di, mé anplis di sa, yé ké di l’ sa yé menm yé anprann dipi yé maryé.
10. Kisa nou ké wè aprézan ?
10 Nou wè dé bèl kalité nou divèt gen é nou wè kimoun ki pouvé bay nou bon konsèy. Aprézan, nou ké wè kouman nou pouvé montré ki nou vréman lé yé bay nou konsèy, é poukisa nou pa divèt doumandé ròt-ya pran désizyon a nou plas.
KOUMAN MO POUVÉ MONTRÉ KI MO VRÉMAN LÉ YÉ BAY MO KONSÈY ?
11-12. a) Détan, kisa nou pitèt anvi fè ? b) Kisa Roboam fè lò i té gen roun désizyon enpòrtan pou pran ?
11 Détan, yé té ké di ki roun moun ka chaché konsèy, mé pannan sa tan-an, i ja pran so désizyon é sèl bagaj i lé, a tandé sa ki k’alé annan so sans. Nou pa pouvé di ki sa moun-an vréman lé yé bay li roun konsèy ! Annou wè sa èkzanp rwa Roboam ka anprann nou.
12 Lò Roboam divini rwa apré so papa Salomon, pèp-a té rich. Mé yé té ka trouvé ki Salomon té doumandé yé travay tròp. Donk, yé alé wè Roboam. Yé doumandé l’ bay yé roun ti chans. Roboam doumandé yé bay li roun tibi tan pou i réfléchi. I fè roun bon bagaj, i alé doumandé grannonm-yan ki té travay pou so papa, konsèy (1 Rois 12:2-7). Mé i pa kouté yé. Poukisa ? Ès i té ja pran so désizyon épi ès i té ka chaché roun moun ki té k’alé annan so sans ? Si a sa, i trapé sa i té ka chaché koté so zanmi ki té pi jenn (1 Rois 12:8-14). I kouté konsèy so zanmi té bay li-a é i alé di pèp-a sa yé té di l’. Dipi sa jou-a, pèp-a séparé an dé é Roboam trapé yenki problèm (1 Rois 12:16-19).
13. Kouman nou pouvé savé si nou vréman lé yé bay nou roun konsèy ?
13 Kisa sa ki rivé Roboam ka anprann nou ? Lò nou ka doumandé roun moun bay nou roun konsèy, nou divèt montré ki nou vréman lé i bay nou sa konsèy-a. Kouman nou pouvé savé si nou vréman lé yé bay nou roun konsèy ? Annou doumandé nou kò : « Lò mo ka doumandé roun konsèy, ès mo ka mété l’ asou koté lanmenm lò i pa k’alé annan mo sans ? » Annou pran roun èkzanp.
14. Kisa nou pa divèt bliyé lò yé ka bay nou roun konsèy ? Bay roun èkzanp (gadé zimaj-ya osi).
14 Imajiné yé ka propozé roun frè roun travay ki ké fè l’ touché roun bon soumaké. Anvan i asèpté sa travay-a, i ka doumandé roun ansyen bay li roun konsèy. I ka di l’ ki si i ka pran sa travay-a, i ké oblijé rété lwen di so fanmi pannan roun bon moman. Atò, ansyen-an ka fè l’ sonjé prensip-a ki annan Labib ki ka di ki a li pou bay so fanmi tousa i bézwen pou i rété pròch ké Jéova (Éph. 6:4 ; 1 Tim. 5:8). Si, lanmenm, frè-a pa dakò ké ansyen-an é k’alé doumandé ròt moun sa yé ka pansé jiktan i trapé roun moun pou di l’ sa i anvi tandé, ès nou pouvé di ki i té ka chaché roun konsèy ? Ès i pa ja pran so désizyon é i ka chaché roun moun ki dakò ké li ? Annou pa bliyé ki nou tchò trèt (Jér. 17:9). Détan, konsèy nou plis bézwen-an, a sa-la nou pa anvi tandé-a.
Ès nou vréman lé yé bay nou roun konsèy ouben ès a chaché nou ka chaché roun moun ki dakò ké nou ? (gadé paragraf 14).
ÈS MO DIVÈT DOUMANDÉ RÒT-YA PRAN DÉSIZYON A MO PLAS ?
15. Kisa nou pa divèt fè, é poukisa ?
15 A chak moun ki pou pran désizyon pou so kò (Gal. 6:4, 5). Kou nou wè l’, roun moun ki gen sajès ka chaché konsèy annan Paròl Bondjé-a é k’alé wè krétyen ki gen èspéryans anvan i désidé sa i ké fè. Mé a pou nou panga doumandé ròt-ya pran désizyon a nou plas. A sa roun ran moun ka fè lò yé ka yenki pozé roun moun yé ka fè konfyans sa késyon-an : « Si a té to, kisa to té ké fè ? » Ròt ankò pa ka pran tan réfléchi, yé ka yenki kopyé sa ròt-ya ka fè.
16. Ki késyon krétyen Korent pozé yé kò, é ki rèsponsabilité yé chak té gen ? (1 Corinthiens 8:7 ; 10:25, 26).
16 Annou wè sa ki rivé asanblé Korent annan 1é syèk-a annan zafè manjé vyann moun té pitèt sakrifyé pou zidòl. Men sa Pòl ékri krétyen-yan ki té Korent : « Nou savé ki roun zidòl pa gen pyès valò é ki i gen rounsèl Bondjé » (1 Cor. 8:4). A pou sa sèrten désidé ki i pa té gen pyès problèm si yé té ka manjé vyann yé té achté annan roun marché menmsi moun té pitèt sakrifyé sa vyann-an pou zidòl. I gen ròt ki désidé pa manjé sa kalité vyann-yan paské yé konsyans pa té ka pèrmèt yé fè l’ (li 1 Corinthiens 8:7 ; 10:25, 26). A chak moun ki té pou désidé sa i té ké fè. Pòl pa janmen di Korentyen-yan di ròt-ya sa yé té divèt fè ouben kopyé désizyon ròt-ya té ka pran. Yé té divèt ‘randé Bondjé kont pou yé menm’ (Rom. 14:10-12).
17. Kisa ki pouvé rivé si nou ka yenki kopyé désizyon ròt-ya ka pran ? Bay roun èkzanp (gadé zimaj-ya osi).
17 Kouman sa menm bagaj-a pouvé rivé nou jòdla ? Annou palé di zafè fraksyon disan. A chak krétyen ki pou désidé, parapòrta so konsyans, si i ké asèpté ouben si i pa ké asèpté sa fraksyon-yanb. Pitèt nou pa ka konprann tout bagaj asou sa, mé a pou nou pran nou pròp désizyon ; sa ka fè parti di charj nou chak divèt poté-a (Rom. 14:4). Si nou ka yenki kopyé désizyon ròt-ya ka pran, nou pa ké janmen divini roun moun ki saj. Sèl fason pou nou divini dé moun ki saj, a si nou ka sèrvi Labib pou nou pran nou pròp désizyon (Héb. 5:14). Atò, kisa nou divèt fè anvan nou alé doumandé roun krétyen ki gen èspéryans roun konsèy ? Nou divèt fè réchèrch é si nou pa ka rivé konprann kouman nou pouvé apliké prensip-ya annan nou sitiasyon, a sa moman-an nou ké alé wè roun krétyen ki gen èspéryans.
A sèlman si nou ja fè réchèrch ki nou divèt alé wè roun moun pou i bay nou roun konsèy (gadé paragraf 17).
KONTINYÉ DOUMANDÉ RÒT-YA BAY TO KONSÈY
18. Kisa Jéova ka fè pou nou ?
18 Jéova ka fè nou konfyans, a pou sa i ka pèrmèt nou pran nou pròp désizyon. I bay nou so Paròl Labib, é i ka bay nou zanmi ki plen ké sajès é ki pouvé idé nou réfléchi asou prensip-ya ki annan Labib. I ka fè sa pas a roun papa ki kontan nou (Prov. 3:21-23). Kouman nou pouvé di l’ mèrsi ?
19. Kouman nou pouvé kontinyé fè tchò Jéova kontan ?
19 Réfléchi asou sa : Papa ké manman-yan kontan wè yé timoun grandi é divini dé sèrvitèr Jéova ki gen sajès é ki ka idé ròt-ya. Menm fason-an, nou Papa ki annan syèl-a kontan lò i ka wè nou divini dé pi bon krétyen lò nou ka doumandé ròt-ya bay nou konsèy é lò nou ka pran désizyon ki ka fè l’ plézi.
KANTIK 127 Quel genre de personne je dois être !
a Détan, annan zafè soumaké, nou lasanté ouben ròt bagaj konsa, pitèt nou ké divèt alé wè roun moun ki pa ka adoré Jéova pas i gen èspéryans annan sa domenn-yan.
b Pou anprann plis bagaj asou sa, gadé pwen 5 ké parti « Sa ou pouvé trapé osi » annan liv Viv ké tchò kontan pou tout-tan !, léson 39.
c MEN SA NOU KA WÈ ASOU ZIMAJ-A : Roun ansyen ka bay rounòt ansyen, ki pi gran pasé li, roun konsèy asou fason i palé pannan roun réinyon ansyen.