« Chwazi zòt menm kimoun zòt ké adoré »

1. Kisa nou divèt fè pou nou tchò kontan, é poukisa ? (Isaïe 48:17, 18).

NOU Papa ki annan syèl-a kontan nou é i lé nou tchò kontan jòdla é dimen osi (Eccl. 3:12, 13). Fason i kréyé nou bèl toubonnman. Grasa li, nou pouvé fè bokou bèl bagaj, mé zafè dirijé nou pròp kò ké désidé sa ki bon ké sa ki pa bon, nou pa pouvé (Eccl. 8:9 ; Jér. 10:23). I savé ki pou nou tchò kontan nou divèt adoré l’ é obéyi l’ (li Isaïe 48:17, 18).

2. Kisa Satan lé fè nou krè, é kisa Jéova fè pou montré ki i ka manti ?

² Satan lé fè nou krè ki nou tchò pouvé kontan menmsi nou pa ka adoré Jéova. I lé nou krè ki nou pouvé dirijé nou pròp kò (Gen. 3:4, 5). Pou montré ki Satan sa roun mantò, Jéova pèrmèt moun-yan dirijé yé pròp kò pannan roun tan. É nou pouvé wè ki fason moun-yan ka dirijé pa ka maché. Parkont, Labib ka palé di roun patché mouché ké madanm ki rivé gen roun bèl lavi pas yé té ka adoré Jéova. Pi bèl èkzanp nou gen, a Jézi. Nou ké wè poukisa i chwazi adoré Jéova. Apré sa, nou ké wè poukisa nou Papa ki annan syèl-a mérité nou adoré l’. É pou fini, nou ké sonjé déztrwa bagaj ki fè nou désidé adoré Jéova.

POUKISA JÉZI CHWAZI ADORÉ JÉOVA

3. Kisa Satan propozé Jézi, é kisa Jézi désidé fè ?

³ Lò i té asou latè-a, Jézi té divèt chwazi kimoun i té ké adoré. Roun tibi tan apré so batenm, Satan di ki i té ké bay li tout rwayonm-yan asou latè si i té ka adoré l’ rounsèl fwa. Mé Jézi réponn li : « Soti la, Satan, paské men sa ki ékri : “A Jéova to Bondjé to divèt adoré, é a li rounso to divèt bay roun sèrvis sakré” » (Mat. 4:8-10). Annou wè poukisa Jézi chwazi adoré Jéova.

4-5. Poukisa Jézi chwazi adoré Jéova ?

⁴ Jézi chwazi adoré Jéova pas i kontan l’. Anyen pa pouvé fè l’ arété kontan Jéova (Jean 14:31). Jézi ka adoré l’ osi pas a sa i divèt fè (Jean 8:28, 29 ; Rév. 4:11). I savé ki a Jéova ki kréyé nou, ki nou pouvé l’ fè l’ konfyans, é ki i ka bay nou roun patché bèl bagaj (Ps. 33:4 ; 36:9 ; Jacq. 1:17). Jéova toujou di li lavérité é a li ki bay li tousa i gen (Jean 1:14). Parkont, Satan, a roun mantò. I ka manti pas i toujou lé gen plis é i ka gadé yenki pou so douvan lèstomak. A di so fot si tout moun asou latè ka mouri jòdla (Jean 8:44). Kou Jézi savé sa, i pa jen sonjé imité Satan épi tounen so do bay Jéova (Phil. 2:5-8).

⁵ Anplis di sa, si Jézi chwazi adoré Jéova, a pas i té savé bèl bagaj sa té ké bay (Héb. 12:2). I té savé ki grasa so fidélité i té ké sanktifyé non so Papa é ki grasa li, tout soufrans Djab-a mennen té ké disparèt.

POUKISA JÉOVA MÉRITÉ NOU ADORÉ L’

6-7. a) Jòdla, poukisa bokou moun pa ka adoré Jéova ? b) Poukisa Jéova mérité nou adoré l’ ?

⁶ Jòdla, bokou moun pa ka adoré Jéova pas yé pa konnèt bèl kalité i gen é yé pa savé tousa i fè pou yé. Yé kou moun Atèn Pòl té préché pou yé. Yé menm osi, yé pa té konnèt Bondjé (Actes 17:19, 20, 30, 34).

⁷ Pòl èspliké moun Atèn ki vré Bondjé-a « ka bay tout moun lavi ké souf ké tout bagaj ». I di dèyè sa : « A grasa li nou ka viv, nou ka boujé é nou la. » A Jéova ki kréyé nou. « Ké rounsèl wonm, i fè tout nasyon-yan. » Donk, i mérité nou adoré l’ (Actes 17:25, 26, 28).

8. Kisa Jéova pa ké janmen fè ? Èspliké.

⁸ Kou Jéova kréyé nou é kou i sa Chèf tout bagaj, i té ké pouvé fòrsé moun adoré l’. Mé i pa ké janmen fè sa. Pasé sa, i ka montré yé ki i ka èkzisté é ki i kontan yé chak. I lé tout moun divini so zanmi pou tout-tan (1 Tim. 2:3, 4). Donk, i ka fòrmé nou pou anprann moun-yan so projè é pou èspliké yé kouman i ké fè sa i prévwè (Mat. 10:11-13 ; 28:19, 20). Anplis di sa, i ka bay nou roun asanblé koté nou pouvé adoré l’ é koté ansyen-yan ki plen ké lanmou pouvé idé nou (Actes 20:28).

9. Kouman Jéova ka montré i kontan tout moun ?

⁹ Fason Jéova kontan tout moun bèl toubonnman. I ka montré i kontan yé annan fason i ka fè ké sa-ya ki pa lé krè annan li. Dipi nanninannan, rounlo ké roun patché moun ka désidé viv soulon sa yé menm désidé ki bon ouben ki mové, pasé yé obéyi Jéova. Magré sa, Jéova ka bay yé sa yé bézwen pou viv é yé jis pouvé profité di yé lavi (Mat. 5:44, 45 ; Actes 14:16, 17). Grasa li, yé pouvé gen zanmi ké roun fanmi ki kontan yé. Yé pouvé fè timoun, yé pouvé travay épi profité di yé lavi (Ps. 127:3 ; Eccl. 2:24). Sa ka byen montré ki nou Papa ki annan syèl-a kontan tout moun (Ex. 34:6). Aprézan, annou wè poukisa nou ka adoré Jéova é ki bénédiksyon nou ka jwenn pas nou ka adoré l’.

POUKISA NOU CHWAZI ADORÉ JÉOVA

10. a) Poukisa nou ka adoré Jéova ? (Matthieu 22:37). b) Kouman Jéova montré to ki i pran pasyans ké to ? (Psaume 103:13, 14).

¹⁰ Kou Jézi, nou ka adoré Jéova pas nou kontan l’ bokou (li Matthieu 22:37). So bèl kalité ka bay nou anvi vin òbò li. Parèkzanp, nou kontan l’ pas i ka pran pasyans ké nou. Lò Israyélit-ya té ka dézobéyi l’, i té ka sipliyé yé, i té ka di yé : « Souplé, lésé mové chimen zòt pran-an épi rouvin » (Jér. 18:11). I ka sonjé ki nou pa parfè, ki nou sa lapousyè (li Psaume 103:13, 14). Lò to ka réfléchi asou pasyans ké ròt bèl kalité Jéova gen, ès to pa anvi adoré l’ pou tout-tan ?

11. Ki ròt bagaj fè nou chwazi adoré Jéova ?

¹¹ Épi nou ka adoré Jéova paské nou savé ki a sa nou divèt fè (Mat. 4:10). Anplis di sa, nou savé ki lò nou ka adoré Jéova, sa ka mennen bon bagaj. Nou ka fè tchò nou Papa kontan, nou ka sanktifyé so non é nou ka montré ki Djab-a sa roun mantò. Pou fini, lò nou ka chwazi adoré Jéova jòdla sa ka bay nou posibilité adoré l’ pou tout-tan ! (Jean 17:3).

12-13. Kisa sa ki rivé Jane ké Pam ka anprann nou ?

¹² Menm roun timoun pouvé kontan Jéova bokou. Ké tan-an, sa lanmou-a pouvé vin pi fò. A sa ki rivé dé sò, Jane ké Pama. Jane té gen 11 lannen é Pam té gen 10 lannen lò yé koumansé étidyé Labib. Yé manman ké yé papa pa té lé étidyé Labib, mé yé pèrmèt yé tifi frékanté Témwen Jéova-ya si yé té k’alé Légliz ké yé. Jane ka èspliké : « Sa mo anprann annan Labib ké Témwen Jéova-ya idé mo tchenbé lò mo kanmarad lékòl té ka mété présyon asou mo : mo pa pran ladròg é mo pa fè pyès bagaj sèksyèl malpròp. »

¹³ Déztrwa lannen apré sa, Jane ké Pam divini proklamatris. Pita, yé divini pyonyé toupannan yé té ka okipé di yé papa ké yé manman ki té granmoun. Lò yé ka sonjé sa ki rivé yé, Jane ka di : « Mo wè kouman Jéova ka pran swen di so zanmi. É mo wè ki, kou 2 Timothée 2:19 ka di l’, i “konnèt sa-ya ki di li”. » Wi, Jéova ka pran swen di sa-ya ki ka désidé kontan l’ ké adoré l’ !

14. Kouman nou pouvé défann Jéova ? (gadé zimaj-ya osi).

¹⁴ Nou lé moun-yan savé ki vyé bagaj yé tandé asou Jéova pa vré. Imajiné sa : To gen roun bon zanmi, é sa zanmi-a janti, i kontan bay, i ka konprann sa ròt-ya ka rousanti é i ka idé yé. Roun jou, to ka tandé roun moun di ki to zanmi, a roun moun ki mové é ki malonnèt. Kouman to ké réyaji ? To ké défann li ! Menm fason-an, lò nou ka tandé moun malpalé Jéova, nou ka défann li. Nou ka di lavérité asou li (Ps. 34:1 ; Is. 43:10). Annan sa nou ka di ké sa nou ka fè, nou ka montré ki nou lé adoré Jéova é ki nou kontan l’.

15. Ki bénédiksyon Pòl jwenn lò i chanjé bagaj annan so lavi ? (Philippiens 3:7, 8).

¹⁵ Nou paré chanjé bagaj annan nou lavi pou fè Jéova plézi ouben pou fè plis bagaj pou li. A sa Pòl fè. I té sa roun moun enpòrtan annan rélijyon Jwif-ya, mé i lésé sa rélijyon-an pou divini roun disip Kris épi pou adoré Jéova (Gal. 1:14). Paské i fè sa, i jwenn roun patché bénédiksyon é Jéova bay li roun bèl lònò : dirijé latè-a ké Jézi annan syèl-a. I chwazi adoré Jéova é i pa janmen rigrété é nou menm osi, nou pa ké janmen rigrété sa (li Philippiens 3:7, 8).

16. Kisa sa ki rivé Julia ka anprann nou ? (gadé zimaj-ya osi).

¹⁶ Si nou ka mété nou sèrvis pou Jéova an prémyé annan nou lavi, nou ké jwenn roun patché bénédiksyon jòdla ké dimen. Annou wè sa ki rivé roun sò yé ka aplé Julia. Lò i té timoun, i té ka chanté annan koral so Légliz. Kou i té ka chanté byen, yé koumansé antréné l’ pou i divini roun chantèr opéra. É lò to konprann, tout moun té ja konnèt li é i té ka chanté annan plizyèr koté. Lò i té annan roun lékòl pou i anprann byen chanté, roun zélèv palé li di Bondjé, é i montré l’ ki non Bondjé, a Jéova. Roun tibi tan apré sa, i koumansé étidyé Labib dé fwa chak simenn. Apré sa, i désidé sèrvi so tan ké so fòrs pou adoré Jéova pasé i divini roun chantèr opéra. A pa ti rèd sa té rèd ! I ka di : « Roun patché moun té ka di ki mo té gen roun don é ki mo té sòt pas mo pa té ka sèrvi sa don-an. Mé sa mo té lé, a té mété mo sèrvis pou Jéova an prémyé annan mo lavi. » Jòdla, lò i ka sonjé désizyon i pran i gen pasé 30 lannen, men sa i ka di : « Mo byen kontan mo chwazi adoré Jéova é mo sir ki roun jou, i ké bay mo tousa mo lé » (Ps. 145:16).

KONTINYÉ ADORÉ JÉOVA

17. Kisa sa Pòl di parapòrta lafen sa monn-an lé di pou sa-ya ki déja chwazi adoré Jéova é pou sa-ya ki pòkò fè l’ ?

¹⁷ Lafen sa monn-an tou pròch rivé. Pòl ékri : « “Roun tibi tan” ankò, é “sa-la ki ka vini ké rivé, é i pa ké an rétar” » (Héb. 10:37). Kisa sa lé di ? Sa lé di ki i pa ka rété bokou tan pou moun-yan désidé si yé ké adoré Jéova ouben si yé pa ké adoré l’ (1 Cor. 7:29). É si nou ja chwazi adoré Jéova, nou pouvé sir ki tout problèm nou ka jwenn jòdla, a pou « roun tibi tan » rounso.

18. Kisa Jézi ké Jéova lé nou fè ?

¹⁸ Jézi ankourajé so disip swiv li, mé anplis di sa i ankourajé yé kontinyé swiv li (Mat. 16:24). A pou sa, si nou ka adoré Jéova dipi roun bon moman, annou byen désidé kontinyé fè l’. I lé nou travay rèd pou nou kontinyé adoré l’. Pitèt sa pa ké fasil, mé si nou ka fè l’ nou ké jwenn roun patché bénédiksyon dipi aprézan ! (Ps. 35:27).

19. Kisa sa ki rivé Gene ka anprann nou ?

¹⁹ I gen sa ka pansé ki pou adoré Jéova to divèt fè tròp sakrifis. Si to sa roun jennjan, ès to ka pansé ki adoré Jéova ka anpéché to profité di lavi ? Men sa roun jenn frè yé ka aplé Gene ka di : « Pou mo, kou mo té Témwen Jéova, sa té ka anpéché mo profité di mo lavi. Mo té ka wè tout sa-ya mo té konnèt fè lafèt, yé té gen yé djal épi yé té ka jwé jévidéyo ki té vyolan. Pannan sa tan-an, mo menm, a té yenki préché ké alé lasal. » Kou a sa i té gen annan so tèt, kisa i fè ? Gene ka di : « Mo koumansé fè sèrten bagaj ròt-ya té ka fè, é pannan roun tan mo byen anmizé. Mé mo pa pouvé di ki mo tchò té kontan. Mo sonjé sa mo té anprann annan Labib é ki mo té mété asou koté, é mo désidé adoré Jéova ké tout mo tchò. Dipi sa jou-a, mo ka santi ki Jéova ka réponn chak lapriyè mo ka fè. »

20. Kisa nou divèt byen désidé fè ?

²⁰ Men sa moun-an ki ékri Psaume 65-a chanté pou Jéova : « Sa-la to ka chwazi é to ka fè vini pou i rété annan to lakou, so tchò kontan ! » (Ps. 65:4). Donk, a pou nou byen désidé adoré Jéova. Kou Joziyé, annou di : « Kanta mo menm ké mo fanmi, a Jéova nou ké adoré » (Jos. 24:15).