ARTIK POU ÉTIDYÉ 23
KANTIK 2 To non a Jéova
Poukisa non Jéova-a divèt enpòrtan pou nou ?
« Men sa Jéova ka di : “Zòt sa mo témwen” » (IS. 43:10).
SA NOU KÉ ANPRANN
Nou ké wè sa nou pouvé fè pou nou sanktifyé ké défann non Jéova-a.
1-2. Kouman nou savé ki non Jéova-a enpòrtan toubonnman pou Jézi ?
NON Jéova-a enpòrtan toubonnman pou Jézi. I pa gen pyès moun ki défann sa non-an kou i fè l’. Kou nou wè l’ annan ròt artik-a, i té paré mouri pou montré ki Jéova sen é ki i toujou ka fè sa ki drèt (Marc 14:36 ; Héb. 10:7-9). É lò mil lannen-yan ké fini, i ké roubay so Papa tout otorité i té gen pas i lé Jéova gen tout laglwar (1 Cor. 15:26-28). Tousa Jézi fè pou Jéova ka montré ki i kontan l’ bokou.
2 Jézi vini asou latè-a pou di moun-yan tousa Jéova té lé yé savé (Jean 5:43 ; 12:13). I fè so disip konnèt non so Papa (Jean 17:6, 26). Lò i té ka ansényé moun é lò i té ka fè mirak, i té ka byen di yé ki a té Jéova ki té ka bay li sajès ké pwisans pou fè sa bagaj-ya (Jean 10:25). É i doumandé Jéova gadé pou so disip « akoz di [so] non » (Jean 17:11). Wi, nou pouvé di ki non Jéova-a té enpòrtan toubonnman pou li. Donk, si roun moun pa konnèt sa non-an ouben pa ka sèrvi l’, ès i pouvé di ki i sa roun vré disip Kris ?
3. Kisa nou ké wè annan sa artik-a ?
3 Nou ka fè tousa nou pouvé pou nou imité Jézi, donk non so Papa enpòrtan toubonnman pou nou osi (1 Pierre 2:21). Annan sa artik-a, nou ké wè poukisa Jéova bay sa-ya ki ka préché « bon nouvèl Rwayonm-an », so non (Mat. 24:14). Nou ké wè osi poukisa non Jéova-a divèt enpòrtan toubonnman pou nou chak.
« ROUN PÈP POU SO NON »
4. a) Kisa Jézi doumandé so disip fè anvan i routounen annan syèl-a ? b) Ki késyon nou ké réponn ?
4 Anvan i routounen annan syèl-a, Jézi di so disip : « Zòt ké rousouvwè pwisans lò lèspri sen-an ké vini asou zòt, é zòt ké sa mo témwen annan Jérizalèm, annan tout Jidé ké Samari, é jik annan koté ki pi lwen asou latè-a » (Actes 1:8). Donk, a pa annan péyi Israyèl rounso yé té ké préché bon nouvèl-a. Yé té ké fè l’ toupatou. Piti piti, moun asou tout latè té ké gen posibilité divini disip Kris (Mat. 28:19, 20). Mé Jézi di : « Zòt ké sa mo témwen. » Ès sa nouvo disip-ya té ké témwen Jézi rounso, ouben ès yé té ké divèt konnèt non Jéova-a é divini so témwen osi ? Annou wè répons-a annan Actes chapit 15.
5. Kouman apot-ya ké ansyen Jérizalèm-yan montré ki tout moun divèt konnèt non Jéova-a ? (gadé zimaj-a osi).
5 Annan lannen 49 di nou lépòk, apot-ya ké ansyen-yan di Jérizalèm rasanblé pou désidé si sa-ya ki pa té Jwif té divèt sirkonsi pou divini Krétyen. A lafen réinyon-an, Jak dimi frè Jézi di : « [Pyèr] rakonté ké tout ti détay kouman pou prémyé fwa-a, Bondjé okipé di nasyon-yan pou pran annan yé roun pèp pou so non. » Di ki non Jak té ka palé ? I di sa profèt Amos té ékri : « Konsa, sa-ya ki ka rété ké pouvé vréman chaché Jéova, yé menm ansanm ké moun tout nasyon-yan, moun ki ka poté mo non, a sa Jéova ka di » (Actes 15:14-18). Sa nouvo disip-ya, ki té ka vini di tout nasyon-yan, té ké anprann konnèt Jéova é anplis di sa, yé té ké ‘poté so non’. Sa té lé di ki yé té ké poté non Bondjé é ki moun té ké savé ki yé té ka réprézanté sa non-an.
Annan 1é syèk-a, pannan roun réinyon kolèj santral-a fè, frè-ya konprann ki krétyen-yan divèt sa roun pèp pou non Bondjé-a (gadé paragraf 5).
6-7. a) Poukisa Jézi vini asou latè-a ? b) Pou ki ròt bagaj ki té pi enpòrtan Jézi vini asou latè-a ?
6 Non Jézi lé di « Jéova ka sové ». Jéova ka sèrvi Jézi pou sové sa-ya ki ka montré yé gen lafwa. Jézi vini asou latè-a pou bay so lavi pou moun-yan (Mat. 20:28). Konsa, Jéova té pouvé pardonnen yé péché é sa bay yé posibilité viv pou tout-tan (Jean 3:16).
7 Mé poukisa nou té bézwen roun moun sové nou ? Akoz di sa ki rivé annan jarden Édèn-an. Kou nou wè l’ annan ròt artik-a, Adan ké Èv tounen yé do bay Jéova é yé ké yé pitit pédi posibilité yé té gen di viv pou tout-tan (Gen. 3:6, 24). Mé Jézi vini asou latè-a pou fè roun bagaj ki té pi enpòrtan pasé sové pitit Adan ké Èv. Satan té sali non Jéova-a (Gen. 3:4, 5). Donk, moun-yan té bézwen savé ki Jéova pa té fè pyès mové bagaj é ki so non sen. É a Jézi ki té pi byen plasé pou montré sa, pas i té ka réprézanté Jéova é i fè tousa Jéova té lé i fè di roun fason ki té parfè.
Si roun moun pa konnèt non Jéova-a é pa ka sèrvi l’, ès i pouvé di ki i sa roun vré disip so Pitit ?
8. Kisa tout sa ki ka swiv Jézi divèt konprann ?
8 Tout krétyen-yan té ké divèt rékonnèt ki a té Papa Jézi, Jéova, rounso ki té pouvé sové yé (Jean 17:3). Yé té ké poté non Jéova-a kou Jézi té poté l’. É yé té ké divèt konprann poukisa sa enpòrtan di sanktifyé sa non-an. Yé té bézwen fè sa pou Bondjé asèpté yé é pou yé gen lavi pou tout-tan (Actes 2:21, 22). Donk, tout disip Jézi té divèt anprann konnèt li épi anprann konnèt Jéova osi. A pou sa, annan Jean chapit 17, Jézi fini so lapriyè konsa : « Mo fè yé konnèt to non é mo ké fè yé konnèt li, konsa, lanmou to gen pou mo ké asou yé osi, é mo menm, mo ké ansanm ké yé » (Jean 17:26).
« ZÒT SA MO TÉMWEN »
9. Kouman nou pouvé montré ki non Jéova-a enpòrtan pou nou ?
9 Donk pou swiv èkzanp Jézi, nou divèt sanktifyé non Jéova-a (Mat. 6:9, 10). Pou nou, non Jéova-a divèt pi enpòrtan pasé pyès ròt non. É nou divèt montré sa annan sa nou ka fè ké sa nou ka di. Mé kouman nou pouvé sanktifyé non Bondjé-a, sa lé di montré ki sa Satan di asou li, a manti mantò ?
10. Di kisa yé ka palé annan Isaïe chapit 42 jik 44 ? (Isaïe 43:9 ; 44:7-9 ; gadé zimaj-a osi).
10 Annan Isaïe chapit 42 jik 44, nou ka anprann sa nou pouvé fè pou sanktifyé non Jéova-a. Annan sa chapit-ya, Jéova ka doumandé moun ki pa ka adoré l’ montré ki yé bondjé ka èkzisté vré. Kou annan roun tribinal, i ka doumandé si i gen moun ki pouvé montré sa. Mé pyès moun pa pouvé fè l’ ! (li Isaïe 43:9 ; 44:7-9).
Annan sa nou ka fè ké sa nou ka di, nou ka montré ki Jéova sa sèl vré Bondjé-a (gadé paragraf 10-11).
11. Dapré Isaïe 43:10-12, kisa Jéova ka di so sèrvitèr ?
11 (Li Isaïe 43:10-12.) Jéova ka di so sèrvitèr : « Zòt sa mo témwen, […] é a mo ki Bondjé ». Épi i ka doumandé yé réponn sa késyon-an : « Ès i gen rounòt Bondjé si a pa mo ? » (Is. 44:8). Donk, Bondjé ka bay nou lònò réponn sa késyon-an. Annan sa nou ka fè ké sa nou ka di, nou pouvé montré ki Jéova sa sèl vré Bondjé-a é ki so non pi rot pasé pyès ròt non. Kèlkéswa présyon Satan ka mété anlè nou, annan fason nou ka viv nou ka montré ki nou kontan Jéova é ki nou lé rété fidèl. Wi, nou pouvé fè roun bagaj pou sanktifyé so non !
12. Kouman profési ki annan Isaïe 40:3, 5 fèt ?
12 Izayi di osi ki roun moun té ké « trasé [ouben préparé, dapré nòt-a] chimen Jéova-a » (Is. 40:3). Kouman sa fèt ? Janbatis préparé chimen-an pou Jézi ki vini asou latè-a é ki di moun-yan sa Jéova té lé di yé (Mat. 3:3 ; Marc 1:2-4 ; Luc 3:3-6). Sa menm profési-a té ka di : « Laglwar Jéova ké parèt » (Is. 40:5). Kouman i parèt ? Lò Jézi té asou latè-a, i réprézanté Jéova di roun fason ki té tèlman parfè, ki a té kousidiré Jéova té la (Jean 12:45). Lò nou ka défann non Jéova-a, sa lé di so répitasyon, nou ka imité Jézi.
13. Kouman nou pouvé imité Jézi ?
13 Kou Jézi, nou sa dé témwen Jéova. Nou ka poté non Jéova-a é nou ka palé tout moun di tout bèl bagaj i ka fè. Mé, pou nou sa roun bon témwen Jéova, nou divèt fè tout moun savé sa Jézi fè pou sanktifyé non Jéova-a (Actes 1:8). I pa gen roun pi gran Témwen Jéova pasé Jézi é nou ka swiv so èkzanp (Rév. 1:5). Mé ki ròt bagaj nou divèt fè pou montré ki non Jéova-a enpòrtan pou nou ?
RÒT BAGAJ NOU DIVÈT FÈ POU MONTRÉ KI NON JÉOVA-A ENPÒRTAN POU NOU
14. Dapré Psaumes 105:3, kisa nou ka rousanti parapòrta non Jéova-a ?
14 Nou fyèr di non Jéova-a (li Psaumes 105:3). Lò nou ka di tout moun kouman nou fyèr di so non, sa ka fè l’ plézi toubonnman (Jér. 9:23, 24 ; 1 Cor. 1:31 ; 2 Cor. 10:17). Nou ka fè l’ paské i sa nou Bondjé é nou fyèr di sa. Nou tèlman kontan pas nou pouvé bay so non lònò épi défann so répitasyon. Annou pa janmen ronté di nou kolèg, nou kanmarad lékòl, nou vwazen ouben ròt moun ki nou Témwen Jéova ! Djab-a té ké lé ki nou arété palé di non Jéova-a (Jér. 11:21 ; Rév. 12:17). Anfèt, li ké so fo profèt té ké lé fè moun bliyé non Bondjé (Jér. 23:26, 27). Mé nou menm, kou nou kontan sa non-an, nou lé louwé l’ « tout lajournen » (Ps. 5:11 ; 89:16).
15. Kisa aplé non Jéova-a lé di ?
15 Nou pa ka arété aplé non Jéova-a (Joël 2:32 ; Rom. 10:13, 14). Aplé non Jéova-a, a pa jis konnèt sa non-an épi sèrvi l’. Sa lé di anprann konnèt moun-an ki ka poté sa non-an, fè l’ konfyans épi doumandé l’ idé nou é bay nou konsèy (Ps. 20:7 ; 99:6 ; 116:4 ; 145:18). Sa lé di osi palé ròt-ya di so non ké di so bèl kalité pou idé yé répanti épi fè tousa yé pouvé pou yé fè l’ plézi (Is. 12:4 ; Actes 2:21, 38).
16. Kouman nou pouvé montré ki Satan sa roun mantò ?
16 Nou paré soufri pou non Jéova-a (Jacq. 5:10, 11). Lò nou ka rété fidèl ké Jéova lò nou annan roun éprèv, nou ka montré ki Satan sa roun mantò. Annan lépòk Jòb, Satan akizé tout sa ki ka adoré Jéova, i di : « Roun moun ké bay tousa i gen pou so lavi » (Job 2:4). Dapré Djab-a, tout sa ki té ka adoré Jéova té ka fè l’ jis paské tout bagaj té ka roulé ron pou yé é si yé té ka vin gen roun éprèv, yé té ké lésé l’ tonbé. Kou i rété fidèl, Jòb byen montré ki Satan té ka manti. Nou menm osi, nou gen lònò montré ki Satan ka manti. Kouman nou pouvé fè sa ? Annou pa janmen tounen nou do bay Jéova kèlkéswa éprèv Satan pouvé mété asou nou chimen. A pou nou sir ki Jéova ké kontinyé véyé asou nou ‘akoz di so non’ (Jean 17:11).
17. Dapré 1 Pierre 2:12 ki ròt bagaj nou pouvé fè pou nou glorifyé non Jéova-a ?
17 Nou ka montré ki nou ka rèspèkté non Jéova-a (Prov. 30:9 ; Jér. 7:8-11). Kou nou ka réprézanté Jéova é nou ka poté so non, soulon sa nou ka fè, nou pouvé louwé so non ouben sali l’ (li 1 Pierre 2:12). A pou sa nou lé fè tousa nou pouvé pou nou louwé Jéova annan sa nou ka fè ké sa nou ka di. Konsa, menmsi nou pa parfè nou ké bay so non lònò.
18. Ki ròt bagaj nou pouvé fè pou montré ki non Jéova-a enpòrtan pou nou ? (gadé nòt-a osi).
18 Pou nou, non Jéova-a pi enpòrtan pasé nou répitasyon (Ps. 138:2). Poukisa sa enpòrtan ? Paské souvan, lò nou ka fè bagaj Jéova kontan, moun-yan pa kontan sa é yé pouvé mal palé noua. Jézi té paré mouri kou roun kriminèl pou bay so Papa lònò. É i « pa té mélé ké pyès ronté », sa lé di ki i pa té mélé ké sa moun té ka di asou li (Héb. 12:2-4). I té byen désidé fè volonté so Bondjé (Mat. 26:39).
19. Lò to ka sonjé non Jéova-a, kisa sa ka fè to é poukisa ?
19 Nou fyèr di non Jéova-a. Nou nen ka gonflé lò yé ka aplé nou Témwen Jéova ! A pou sa nou ka kontinyé louwé l’ menmsi moun ka méprizé nou, paské pou nou, non nou Bondjé pi enpòrtan pasé nou répitasyon. Donk, annou kontinyé louwé so non menmsi Satan ka éséyé baré nou chimen. Konsa, kou Jézi, nou ké montré ki non Jéova-a pi enpòrtan pou nou pasé pyès ròt bagaj.
KANTIK 10 Louons Jéhovah, notre Dieu !
a Menm Jòb, ki té sa roun moun ki té fidèl, koumansé enkyété so kò tròp parapòrta sa ròt-ya té ka di asou li. Lò i pédi so timoun ké tousa i té gen, i « pa péché é i pa akizé Bondjé di fè pyès mové bagaj » (Job 1:22 ; 2:10). Mé, lò yé akizé l’, yé di ki i té fè roun mové bagaj, i « palé san réfléchi ». I koumansé défann sopa répitasyon pasé i sanktifyé non Bondjé, sa lé di so répitasyon (Job 6:3 ; 13:4, 5 ; 32:2 ; 34:5).