Ès sa to anprann o koumansman pouvé idé to jòdla toujou ?

1. Lò to anprann sa Labib ka di, kisa sa chanjé pou to ?

BAGAJ nou anprann lò nou koumansé étidyé Labib chanjé nou lavi nèt. Parèkzanp, lò nou vin savé ki non Bondjé, a Jéova, nou vin pi pròch di li é nou divini so zanmi (Is. 42:8). Lò nou anprann lavérité asou lanmò, nou arété doumandé nou kò si moun nou kontan ki mouri ka soufri (Eccl. 9:10). É lò nou anprann ki Bondjé ka promèt fè latè-a divini roun paradi, nou arété enkyété nou kò pou dimen. Nou vin sir ki nou ké viv lontan plis pasé 70 ouben 80 lannen, nou ké viv pou tout-tan (Ps. 37:29 ; 90:10).

2. Poukisa Pyèr fè sa-ya ki té ka adoré Jéova dipi lontan sonjé ki yé té divèt kontinyé réfléchi asou sa yé té ja anprann annan Labib ? (2 Pierre 1:12, 13).

² Nou pa janmen divèt bliyé kouman prémyé bagaj nou anprann annan Labib enpòrtan. Apot Pyèr ékri so dézyèm lèt pou krétyen ki té « byen dibout annan lavérité » (li 2 Pierre 1:12, 13). Mé sa krétyen-yan té an danjé pas aprézan, annan asanblé-a, i té gen moun ki té mové é ki té lé fè yé lésé lavérité (2 Pierre 2:1-3). Pou idé so frè ké sò-ya tchenbé épi fè yé vin pi fò, Pyèr fè yé sonjé déztrwa bagaj yé té ja konnèt. Sa bagaj-ya té ké idé yé rété fidèl jiska lafen.

3. Bay roun èkzanp ki ka montré poukisa tout krétyen divèt kontinyé réfléchi asou prémyé bagaj nou ka anprann lò nou ka étidyé Labib.

³ Menmsi nou annan lavérité dipi lontan, nou pouvé kontinyé profité di prémyé bagaj nou ka anprann annan Labib. Annou pran roun èkzanp : Roun moun ki mèt dòkò annan zafè fè manjé ké roun moun ki ka koumansé anprann fè manjé pouvé gen menm engrédyan-yan, mé sa-la ki dòkò-a ké rivé fè roun manjé ki lontan pi chwit pasé ròt-a. Menm fason-an, roun moun ki annan lavérité dipi lontan ké wè roun bagaj annan roun vèrsé ki sa-la ki koumansé étidyé Labib pa ké wè, menmsi a menm vèrsé-a yé ka li. Pitèt dipi nou batizé nou sitiasyon chanjé é nou fè roun patché bagaj pou Jéova. Lò nou ka réfléchi asou bagaj nou anprann annan Labib dipi lontan, nou ka rivé wè kouman yé pouvé idé nou annan nou sitiasyon jòdla. Annou wè aprézan kouman trwa bagaj nou anprann an prémyé annan Labib pouvé idé krétyen-yan ki ka adoré Jéova dipi lontan.

A JÉOVA KI FÈ TOUT BAGAJ

4. Lò nou vin savé ki Jéova sa Sa-la ki fè tout bagaj, kouman nou lavi chanjé ?

⁴ Nou savé ki a roun moun ki tou-pwisan é ki plen ké sajès ki fè ni latè-a, koté nou ka rété-a, ni tousa ki asou l’. A sa Labib ka di : « Sa-la ki fè tout bagaj, a Bondjé » (Héb. 3:4). Mé sa vérité-a ka anprann nou roun patché ròt bagaj. Kou a Bondjé ki fè nou, i konnèt tout bagaj asou nou. Anplis di sa, i ka gadé pou nou é i savé sa ki miyò pou nou. Donk, lò nou konprann ki a Jéova ki fè tout bagaj, nou lavi chanjé nèt é i vin gen roun sans.

5. Kouman sa nou ka li annan Isaïe 45:9-12 pouvé idé nou fè nou kò toupiti ?

⁵ Vérité-a ki ka di ki Jéova sa Sa-la ki fè tout bagaj ka anprann nou ki nou divèt fè nou kò toupiti osi. Annou palé di Jòb. Pannan roun tan, Jòb di bagaj ki pa té vré asou Jéova. I bliyé sa ki té vréman enpòrtan, i mété so lidé asou so kò rounso é i éséyé montré ki i té gen rézon. Mé Jéova fè li sonjé ki a li ki sa Kréyatèr ki tou-pwisan-an (Job 38:1-4). I fè l’ sonjé sa pou idé l’ konprann ki fason i ka fè bagaj-ya pi rot pasé fason moun-yan ka fè bagaj-ya. A sa profèt Izayi di : « Ès latè gra ké di Moun-an ki ka travay li-a : “Kisa to ka fè ?” » (li Isaïe 45:9-12).

6. Kitan èspésyalman nou divèt réfléchi asou sajès ké grandèr Sa-la ki fè nou-a ? (gadé zimaj-ya osi).

⁶ Pi roun krétyen ka vin gen èspéryans, pi i pouvé koumansé konté asou so pròp entélijans pasé i chaché konsèy Jéova ka bay annan so Paròl (Job 37:23, 24). Mé si i ka pran tan réfléchi asou sajès ké grandèr Jéova-a, kisa i ké anvi fè ? (Is. 40:22 ; 55:8, 9). I ké konprann ki sa Jéova ka di pi enpòrtan pasé sopa lidé é sa ké idé l’ fè so kò toupiti.

7. Kisa Rahela fè pou i asèpté roun chanjman ki fèt annan òrganizasyon-an ?

⁷ Rahela, ki ka rété Slovéni, rivé asèpté roun chanjman ki fèt annan òrganizasyon-an lò i sonjé ki a Jéova ki fè tout bagaj. I ka di : « A pa tout tan mo ka rivé asèpté désizyon frè-ya ki ka dirijé nou ka pran. Parèkzanp, menmsi mo té ja wè Nouvèl di Kolèj santral n^o 8 pou lannen 2023, mo rété ababa lò mo wè roun frè ki té ka fè so diskour ké so barb. Donk, mo doumandé Jéova idé mo asèpté sa chanjman-an. » Rahela vin konprann ki si a Jéova ki fè syèl-a ké latè-a, i pouvé gidé so òrganizasyon asou bon chimen-an. Si to pa ka rivé asèpté roun chanjman annan òrganizasyon-an, to pouvé pran tan réfléchi asou sajès ké pwisans Sa-la ki fè nou-a gen (Rom. 11:33-36).

POUKISA BONDJÉ KA PÈRMÈT SOUFRANS-YA

8. Lò nou konprann poukisa nou ka soufri, kisa sa fè nou ?

⁸ Poukisa Bondjé ka pèrmèt soufrans-ya ? Roun ran moun ki pa rivé trapé répons-a faché ké Bondjé ouben yé ka pansé ki i pa ka èkzisté (Prov. 19:3). Mé to, to anprann ki a péché Adan bay nou-a ka fè si nou ka soufri, a pa Jéova ! To vin savé osi ki pasyans Jéova pèrmèt roun patché moun anprann konnèt li épi konprann ki i ké fin ké soufrans-ya pou tout-tan (2 Pierre 3:9, 15). Sa vérité-ya rasiré to é fè to vini pi pròch di li.

9. Annan ki sitiasyon nou divèt sonjé poukisa Jéova ka pèrmèt soufrans-ya ?

⁹ Nou ka konprann ki, toupannan nou ka antann Jéova fin ké soufrans-ya, nou divèt pran pasyans. Mé si roun moun nou kontan ka mouri, ouben si nou ouben moun nou fanmi ka trapé problèm ouben yé ka malmennen nou san nou pa fè anyen, pitèt nou ké doumandé nou kò poukisa Jéova pa ka mété lanmen pi vit (Hab. 1:2, 3). Si sa ka rivé nou, a pou nou réfléchi asou poukisa Jéova ka pèrmèt moun ki jis soufria (Ps. 34:19). Nou pouvé sonjé osi ki sa i lé, a fin ké soufrans-ya pou tout-tan. É nou pouvé pran tan réfléchi asou so projè.

10. Kisa ki ka konsolé Anne dipi so manman mouri ?

¹⁰ Lò nou savé poukisa Bondjé ka pèrmèt soufrans-ya, sa pouvé idé nou tchenbé. Men sa Anne, roun sò ki ka rété Mayòt, ka rakonté : « Mo manman mouri i gen plizyèr lannen, é dipi sa jou-a, mo tris bokou. Mé souvan, mo ka sonjé ki a pa fot Jéova si nou gen malò. I présé fin ké tout soufrans-ya épi fè moun nou kontan rouvini. Lò mo ka réfléchi asou sa, mo gen lapè annan mo tchò é sa ka ankourajé mo, menmsi mo tris pas mo manman mouri. »

11. Poukisa nou pouvé di ki lò nou savé poukisa Jéova ka pèrmèt soufrans-ya, sa pouvé idé nou kontinyé préché ?

¹¹ Lò nou savé poukisa Jéova ka pèrmèt soufrans-ya, sa pouvé idé nou kontinyé préché. Pyèr èspliké ki Jéova ka pran pasyans pas i lé moun-yan répanti pou yé sové. I di osi kisa nou menm nou té divèt fè : « Réfléchi asou ki kalité moun zòt divèt sa, dé moun ki gen roun konpòrtman ki sen é ki ka fè bagaj ki ka montré ki yé lé kontinyé adoré Bondjé » (2 Pierre 3:11). Annan « bagaj ki ka montré ki [nou] lé kontinyé adoré Bondjé » i gen prédikasyon-an. Kou nou Papa, nou kontan moun-yan é nou lé yé viv annan monn nouvo-a koté i ké gen lajistis. Réfléchi asou sa : Jéova ka pran pasyans é i ka bay moun annan to téritwar posibilité adoré li. É to menm, to gen roun bèl lònò pas to pouvé travay ansanm ké li é idé plis moun posib konnèt li anvan lafen-an rivé ! (1 Cor. 3:9).

NOU KA VIV « DÈRNYÉ JOU-YA »

12. Di kisa nou sir dipi nou anprann sa Labib ka di asou « dèrnyé jou-ya » ?

¹² Labib byen di kouman moun-yan té ké fika pannan « dèrnyé jou-ya » (2 Tim. 3:1-5). Lò nou ka gadé sa ki ka pasé, nou ka wè profési-ya ka fèt douvan nou wéy : pi sa k’alé pi moun ka fè mové bagaj. Nou ankò plis sir ki sa Paròl Bondjé ka di, toujou vré (2 Tim. 3:13-15).

13. Dapré Luc 12:15-21, kisa nou divèt doumandé nou kò ?

¹³ Kou nou savé ki nou ka viv dèrnyé jou-ya, sa ka idé nou byen sèrvi nou tan. Èkzanp Jézi pran annan Luc 12:15-21 ka montré nou poukisa sa enpòrtan (li). Poukisa yé ka di ki mouché-a annan èkzanp-a té « sòt » ? A pa paské i té rich, mé a paské i pa té ka mété so lidé asou sa ki té pi enpòrtan. I té ka ‘mété roun trézòr asou koté pou li menm, mé i pa té rich pou Bondjé’. Poukisa i té divèt chanjé vitman ? Bondjé di li : « Aswè-a menm to ké pédi to lavi. » Kou lafen sa monn-an tou pròch rivé, nou divèt doumandé nou kò : « Ès sa mo ka fè ka montré ki mo ka mété mo lidé asou sa ki pi enpòrtan ? Kisa mo ka ankourajé mo timoun fè ? Ès mo ka sèrvi mo fòrs, mo tan ké mo soumaké pou mo mété roun trézòr asou koté pou mo kò pasé mo mété roun trézòr asou koté annan syèl-a ? »

14. Kou èkzanp Miki ka montré l’, poukisa nou divèt réfléchi asou tousa ki ka montré ki nou ka viv dèrnyé jou-ya ?

¹⁴ Fason nou ka wè lavi-a pouvé chanjé nèt lò nou ka réfléchi asou tousa ki ka montré ki nou ka viv dèrnyé jou-ya. A sa ki rivé roun sò yé ka aplé Miki. I ka di : « Lò mo fin lékòl, mo té lé fè roun fòrmasyon pou gen roun travay ki té ké pèrmèt mo étidyé kouman zannimo-ya ka viv. Mé anmenmtan mo té lé divini pyonyé pèrmanan épi alé préché koté yé té bézwen plis moun. Plizyèr frè ké sò annan mo asanblé di mo byen réfléchi pou wè si mo té pouvé fè travay mo té lé fè-a é anmenmtan divini pyonyé pèrmanan ouben alé koté yé bézwen plis moun pou préché. Yé fè mo sonjé ki sa sistèm-an ké fini titalò é ki, annan monn nouvo-a, mo ké gen tan étidyé kouman tout zannimo-ya ka viv pas mo ké viv pou tout-tan. Donk, mo désidé fè roun fòrmasyon ki té ka pran mwens tan é ki té ké pèrmèt mo gen roun travay lanmenm. A konsa mo trapé roun travay ki pèrmèt mo divini pyonyé pèrmanan é pita, mo alé préché an Ékwatèr koté yé té bézwen plis moun pou préché. » Jòdla, Miki ké so mari annan sèrvis sirkonskripsyon-an annan sa péyi-a.

15. Bay roun èkzanp ki ka montré ki moun-yan pouvé chanjé épi asèpté bon nouvèl-a (gadé zimaj-ya osi).

¹⁵ Nou pa divèt dékourajé si lò nou ka palé di bon nouvèl-a, moun-yan pa lé kouté nou. Yé pouvé chanjé. Sonjé Jak, dimi frè Jézi. I wè so gran frè grandi, divini Mési-a épi ansényé moun kou pyès moun pa té janmen fè l’. Pourtan, pannan plizyèr lannen, i pa swiv li. A sèlman lò Jézi résisité i divini so disip. É i préché ké bokou balanb ! (Jean 7:5 ; Gal. 2:9). Donk, pa arété préché pou moun to fanmi ki pòkò asèpté lavérité-a é osi pou tout ròt moun ki pòkò asèpté l’. Pa bliyé ki kou nou ka viv dèrnyé jou-ya, prédikasyon to ka fè-a enpòrtan toubonnman. Sa to ka di moun to fanmi ouben moun annan to téritwar jòdla ké pouvé fè yé chanjé lidé pita, pitèt menm lò gran tribilasyon-an ké ja koumanséc.

A POU TO TOUJOU GEN RÉKONÉSANS POU SA JÉOVA KA FÈ TO SONJÉ

16. Ki bon bagaj to ka jwenn grasa sa Jéova ka fè to sonjé ? (gadé karé-a osi : « Itilizé yé pou idé ròt-ya »).

¹⁶ Roun parti annan manjé èspirityèl nou òrganizasyon ka bay fèt pou sa-ya ki pa Témwen é ki pa konnèt bokou bagaj asou sa Labib ka di. Parèkzanp, i gen diskour piblik-a yé ka fè chak simenn, sèrten artik ké sèrten vidéyo ki asou jw.org ké nou journal pou sa-ya ki pa Témwen. Mé sa manjé-a bon pou nou osi, sa ka idé nou sonjé sa nou ja konnèt. Grasa sa, nou kontan Jéova ankò plis, nou lafwa annan so Paròl ka vin pi fò é sa ka idé nou vin pi vayan lò nou ka ansényé ròt-ya sa Labib ka di (Ps. 19:7).

17. Annan ki sitiasyon èspésyalman to divèt réfléchi asou prémyé bagaj-ya nou ka anprann lò nou ka étidyé Labib ?

¹⁷ Nou ki ka adoré Jéova, nou kontan toubonnman lò yé ka idé nou konprann roun ansèyman annan Labib pi byen. Mé nou toujou ka di nou Bondjé mèrsi pou prémyé bagaj-ya i anprann nou annan Labib é ki fè nou vin pròch di li. Si nou anvi fè bagaj-ya kou nou lé pasé nou kouté sa òrganizasyon-an ka di nou fè, a pou nou fè nou kò toupiti. Épi a pou nou sonjé ki a li ki ka dirijé l’, sa-la menm ki fè tout bagaj, ki tou-pwisan é ki plen ké sajès. Si moun nou fanmi ouben nou menm nou gen éprèv, annou pran pasyans épi annou pran tan byen réfléchi asou poukisa Jéova ka pèrmèt soufrans-ya. É anvan nou désidé kouman nou ké sèrvi nou tan ké tousa nou gen, annou sonjé ki nou ka viv dèrnyé jou-ya é ki nou prédikasyon enpòrtan toubonnman. A pou tousa Jéova ka fè nou sonjé kontinyé fè nou vin pi fò, fè nou gen plis sajès épi idé nou kontinyé adoré l’ ké fidélité !