Pou idé madanm-yan yé ka malmennen
« TOUPATOU asou latè-a, yé ka maltrété milyon fanm ké tifi. Ès ou sa roun annan yé ? Gadé poukisa ou sékirité gen enpòrtans pou Bondjé é sa i ké fè pou fini ké méchansté yé ka fè fanm-yan. »
A konsa artik « Sékirité fanm-yan : sa Labib-a ka di » ka koumansé asou jw.org. Annan bout sa artik-a, i gen roun lyen pou to télécharjé l’ an PDF épi apré sa, to pouvé enprimé l’ pou to pliyé l’ kou roun dépliyan. Men sa Stacy, roun sò ki ka rété Ozétazini ka di : « Mo enprimé plizyèr dépliyan, épi apré sa, mo ké roun sò, nou poté sa dépliyan-yan annan roun fwayé annan mo téritwar koté yé ka okipé di madanm-yan yé ka malmennen. »
Roun madanm ki ka travay annan sa fwayé-a doumandé si i té pouvé gen plis dépliyan pou bay madanm-yan ki té ka rété annan fwayé-a. A konsa, anplis di sa yé té ja bay, sò-ya bay 40 dépliyan ké 30 kart jw.org. Apré sa, dirèktris fwayé-a doumandé sò-ya si yé té pouvé montré madanm-yan annan fwayé-a kouman roun léson biblik ka pasé.
Stacy ké dé ròt sò alé annan rounòt fwayé. Yé bay senk dépliyan é yé doumandé yé mennen plis bay yé. Roun madanm ki ka travay annan sa fwayé-a di : « Sa dépliyan-an ké pouvé idé madanm-yan nou ka rousouvwè isi-a bokou. » I di osi : « A sa menm nou bézwen ». Rounòt jou, plizyèr madanm ki té ka rété annan fwayé-a rasanblé pou gadé kouman roun léson biblik ka pasé. Dé annan yé di ki yé té ké vini annan prochen réinyon-an ki té ké fèt a lafen simenn-an annan sal di Rwayonm-an.
Stacy ka di : « Nou kontan toubonnman lò nou ka wè kouman moun-yan kontan lò yé ka li sa bèl artik-a. Lò to ka enprimé l’, sa artik-a sa roun bon zouti pou idé madanm-yan yé ka malmennen konnèt mésaj Rwayonm-an. Sa touché nou lò nou wè kouman yé réyaji é nou présé wè kouman Jéova ké béni tout éfòr nou ka fè pou kontinyé préché bon nouvèl-a pou sa madanm-yan. »