MOANAKIN TE MARORO
REIREI 4
Te Nanorinano
Te boto n reirei: “Kam na nanorinano n iangoia bwa a kakawaki riki tabemwaang nakoimi.”—IBir. 2:3.
Te Baere E Karaoia Bauro
1. Mataku n te TAAMNEI, ke wareka Mwakuri 26:2, 3. Imwina ao nori titiraki aikai:
E kangaa Bauro ni kaotiota te nanorinano ngke e taetae nakon te Uea are Akeriba?
E kangaa Bauro ni kaira ana iango teuaei nakon Iehova ao te Baibara, ao tiaki nakoina?—Nora Mwakuri 26:22.
Tera Reireiara Mairouni Bauro?
2. E na anainano riki ara rongorongo ngkana ti bwaina te nanorinano ao te karinerine.
Kakairi Irouni Bauro
3. Taetae ma te karinerine. Tai taetae n te aro ae ko kaotia bwa ko atai bwaai ni kabane ao te aomata are temanna akea te bae e ataia. Taetae nakoina ma te karinerine.
4. Kamataataa ae koaua ake ko tibwai a boni boto man te Baibara. E kona Ana Taeka te Atua n ringi nanoia aomata ma aia iango. Ngkana ti kamanena, ti a karikirakea aia onimaki ae boto i aan te onimaki ae eti.
5. Teimatoa n nimamannei. Tai kataia n imanonoa kaotan ae ko bon eti. Ti aki kani kauntaeka. Bwaina te nanorinano n arom n teimatoa n rau ao n ataa am tai n nako. (TaeRab. 17:14; Tit. 3:2) E kona te kaeka ma te nimamannei ni karekea angan te maroro ae uaana n te tai teuana.