Kateimatoa Kimwareireim n te Beku Iroun Iehova
“Kam na kimareirei iroun te Uea n aki toki: ao I a manga taku, Kam na kimareirei.”—I-BIRIBI 4:4.
1, 2. Tera aron te tari-te-mwaane temanna ma ana utu ni kona n teimatoa ni kimwareirei e ngae ngke a a bua aia bwai ni kabane?
TE KRISTIAN ae James, ae ai 70 ana ririki ni maiu ae e maeka i Sierra Leone, e a kaman kakorakoraa ni mwakuri ma ngke e uarereke. Iangoa aron kimwareireina ngke e a tau ana mwane are e kaikoa, ibukin kabooan ana auti ae aua ruuna! Tabeua te tai imwin mwaingiia James ma ana utu nakon te auti anne, ao e a rina naba n riki te buaka i marenaia kaain te aba anne, ike e a kabuekaki iai ma ni kamaunaki aia auti arei. E a bua aia auti, ma e aki bua iai kimwareireiia. Bukin tera?
2 James ma ana utu a aki iaiangoi bwaai ake a bua, ma a iaiangoi bwaai ake a tiku i nanoni baiia. E kabwarabwara ni kangai James: “I nanon te tai ane e rangi ni kakamaaku anne, ti boni bobotaki naba, ti wareka te Baibara, ti uaia n tataro ao ti ibuobuoki n tibwai ara bwai ma aomata tabemwaang e ngae ngke ai bon tii tabeua ara bwai. Ti teimatoa ni kimwareirei ibukina bwa ti kaatuua ara iango i aon te iraorao ae moanibaan te raoiroi i marenara ma Iehova.” Ngkana a iaiangoi bwaai aika raraoi ake iai irouia, ao ae te kabanea n raoiroi mai buakoia bon aia iraorao ae kaan ma Iehova, Kristian aika kakaonimaki aikai a teimatoa ni “kakatonga” ni kimwareirei. (2 I-Korinto 13:11) Te koaua bwa e aki bebete irouia te nanomwaaka n aia kangaanga. Ma a aki toki ni kimwareirei iroun Iehova.
3. Tera aroia tabeman Kristian rimoa ni kakawakina kimwareireiia?
3 Kristian ake rimoa a kaaitara naba ma kataaki aika ai aron ake a riki nakon James ma ana utu. Ma e ngae n anne, te abotoro Bauro e korei taeka aikai nakoia Kristian ake I-Ebera: “Kam kimareirei naba ni katau kurian ami bwai.” (Ara bwai man reireiti.) Ao ngkanne, Bauro e kabwarabwaraa bukina ae a kimwareirei: “Ngkai kam ataingkami ba bon iai ami bwai aika raraoi riki aika aki mauna.” (Ebera 10:34) Eng, iai irouia Kristian ake a maiu n te moan tienture akekei te kaantaninga ae moan te korakora. A onimakina reken te bwai ae e aki kona n aonikaiaki—ae te bwai ae aki kona ni mauna ae “te bau are te maiu” n ana Tautaeka n Uea te Atua i karawa. (Te Kaotioti 2:10) Ni boong aikai, ara kaantaninga ni Kristian—ngkana taekan te maiu i karawa ke i aon te aonnaba—e kona ni buokira bwa ti na kimwareirei, e ngae ngkana ti kaaitara ma te kairiribai.
“Kimareirei n te Kaantaninga”
4, 5. (a) Bukin tera ngke e rangi n aitau ana reirei Bauro nakoia kaain Rom ae a na “kimareirei n te kaantaninga”? (b) Tera ae e kona ni kaira te Kristian bwa e na mwaninga taekan ana kaantaninga?
4 Te abotoro Bauro e kaungai nanoia raona n onimaki ake a mena i Rom bwa a na “kimareirei n te kaantaninga,” ae taekan te maiu are aki toki. (I-Rom 12:12) E rangi n aitau te reirei anne ibukia kaain Rom. E aki koro tebwina te ririki imwin te tai are e kororeta iai Bauro nakoia, ao a rinanon naba te bwainikirinaki ae moan te korakora, ao tabeman mai buakoia a kammarakaki ni kamateaki n ana kaetieti te Embera ae Nero. Akea te nanououa bwa onimakinan ae te Atua e na angania te bau n uea ae beritanaki nakoia, e boni kateimatoaia ngke a kammarakaki. Ao tera arora n taai aikai?
5 Kioina ngkai Kristian ngaira, ao ti kakaantaninga naba bwainikirinara. (2 Timoteo 3:12) Irarikin anne, ti ataia bwa ti bane n rotaki ni ‘bong ma aaro aika a aki ataaki.’ (Te Minita 9:11) E kona ni mate te aomata ae tangiraki iroura n te kabuanibwai. Te aoraki ae kamamate e kona n itua ara karo ke raoraora temanna ae ti rangi n tangiria. Ngkana ti aki kaatuua ara iango i aon ara kaantaninga ae boto i aon te Tautaeka n Uea, ao ti kona naba ni kabuanibwai ni kaineti ma tangiran bwaai n taamnei iroura ngkana a riki kataaki n aron aikai. Mangaia are ti karaoa ae riai ngkana ti titirakinira bwa ‘Te koaua bwa I “kimareirei n te kaantaninga”? Ai iraua au tai n iaiangoa taekana? Bon te bwai ae koaua raoi irou te Baretaiti ae na roko? N au kaantaninga, I boni kakoaua bwa N na mena iai? Te koaua bwa titeboo ingaingan nanou ngkai ni kan nora kawaekoan tokin te waaki ae ngkai, ma arou ngkoa ngke I bon moan reirei taekan te koaua?’ E riai ni karauaki n iangoaki raoi te titiraki ae te kabane aei. Bukin tera? Ibukina bwa ngkana ti marurung raoi ao e rangi n tau ara kareke mwane ibukin maiura, ao ti maiu n te aba ae aki rotaki n taiani buaka, taian rongo, ke kabuanibwai aika riiriki, te aro anne e kona ni karika te mwamwaninga iroura—e ngae ngkana e aki maan taina—ni kaineti ma ataakin kainnanoakin rokon ana aonnaba te Atua ae boou n te tai ae waekoa.
6. (a) Ngke a karawawataki Bauro ma Tira, a kaatuua aia iango i aon tera? (b) E na kanga aia katoto Bauro ma Tira ni kaungai nanora ni boong aikai?
6 Bauro e manga reireinia kaain Rom bwa a na ‘taotaon nanoia i buakon te rawawata.’ (I-Rom 12:12) E bon ataa taekan te rawawata Bauro. N te taina e nora te miitara ike te mwaane temanna e weteia bwa e na “nako Maketonia” ni buokiia kaain te aba arei n reireinia taekan Iehova. (Mwakuri 16:9) N te tai anne, Bauro, Ruka, Tira ao Timoteo, a uaia ni borau nako Eurobe. Tera are e mena imwaia mitinare aika a ingainga nanoia aikai? Taian rawawata! Ngke a a tia n tataekina te rongorongo ni kaawan Maketonia are Biribi, ao a kataereaki Bauro ma Tira ma ni kamatawarikaki n te karabuti. E teretere bwa a aki tii rawa ni bwerengaki n rongorongon te Tautaeka n Uea kaain Biribi tabeman—ma a bon rangi ni kairiribai naba iai. A bua kimwareireiia mitinare akekei ni bwaai aika a riki aikai? A aki. Bwa ngke a a tia ni batiboaki ma ni kamatawarikaki n te karabuti, ao “ngke e a nukanibong, ao a tataro Bauro ma Tira, ao a anene nakon te Atua.” (Mwakuri 16:25, 26, ara bwai manreireiti.) Te koaua bwa a aki kimwareirei Bauro ma Tira n te maraki are a namakinna ngke a batiboaki, ma tiaki ngaia anne are a kaatuua aia iango iai. A kaatuua aia iango i aon Iehova ao kakabwaiaia mairouna. Ngke a kimwareirei ‘n nanomwaaka n te rawawata,’ Bauro ma Tira a karaoa te katoto ae raoiroi nakoia tariia i Biribi ao n taabo tabeua.
7. Bukin tera bwa ti riai naba ni kakaitau ngkana ti tataro?
7 E korea ae kangai Bauro: “Botumwaka n tataro.” (I-Rom 12:12) Ko tatataro ngkana ko raraoma ibukin te bwai teuana? Baikara bwaai aika ko tataroi? Tao ko karaua ni kaota raoi am kangaanga ma ni bubutii buokam mairoun Iehova. Ma ko kona naba ni kaitau ibukin kakabwaia aika ko a tia n anganaki. Ngkana iai kangaanga aika a riki, iaiangoan raoiroin ana mwakuri Iehova nakoira e buokira bwa ti na kona ni “kimareirei n te kaantaninga.” E korea ae kangai Tawita, ae e bati ana kangaanga i nanoni maiuna: “Iehova, a bati am makuri aika kamimi aika Ko karaoi, ma nanom aika kaeti nako ira; A aki konaki ni baireaki ni warekaki nako Im. Ngkana I kani kaoti baikai ma n taekin, ao a maiti riki nakon aika konaki ni warekaki.” (Taian Areru 40:5) Ngkana ti katotonga aron Tawita ao ti katoa tai n iaiangoi kakabwaiara aika a rereke mairoun Iehova, ao ti na noria iai bwa e aki kona n riki ae ti na aki-kimwareirei.
Kawakina Iroum te Nano ae Raoiroi
8. Tera ae e buoka te Kristian bwa e na kukurei e ngae ngkana e rinanon te bwainikirinaki?
8 Iesu e kaungai nanoia taan rimwina bwa a na kakawakina irouia te nano ae raoiroi, ngkana a boo ma taiani kataaki. E kangai: “Kam a kabaia, ngkana a taetaebuakaingkami aomata, ma ni bainikiriningkami, ma n atonga te taetae ae buakaka ni kabanea, n uaraoingkami, i bukiu.” (Mataio 5:11) Tera bukina ae ti riai ni kukurei iai? Arora ni kona n tei imwain te kairiribai e kakoaua aron menan taamnein Iehova i aora. Te abotoro Betero e tuangia ngkoa raona ni Kristian ake a maiu n ana tai ni kangai: “Ngkana kam taetaebuakaki i bukin arani Kristo, ao kam a kabaia; ba E mena i aomi Tamnein te neboaki ma Tamnein te Atua.” (1 Betero 4:13, 14) Rinanon taamneina, Iehova e na buokira naba n nanomwaaka, ao ibukin anne e na kateimatoa naba kimwareireira.
9. Tera ae e buokiia taari tabeman ni kakaaea bukina ae a na kimwareirei iai, ngke a karabutinaki ibukin aia onimaki?
9 Iai naba bukina ae ti na kimwareirei iai, e ngae ngkana a kakaiaki arora. E nora koauan anne te Kristian ae arana Adolf. E maiu n te aba are e katabuakaki iai aia mwakuri Ana Tia Kakoaua Iehova i nanon ririki aika mwaiti. Adolf ma raoraona tabeman a katikaki irouia bureitiman ao a kabureaki n te tai ae maan, ibukina bwa a rawa ni kakeaa aia koaua aika boto i aon te Baibara. E rawawata te maiu n te karabuti irouia, ma n ai aroia Bauro ma Tira, Adolf ao raoraona a nori naba bwaai tabeua aika a riai ni kaitaua te Atua iai. A noria bwa menaia n te karabuti e buokiia ni kakorakora riki aia onimaki ma ni karikirakei aroaro ni Kristian aika kakawaki, n aron te nano n tituaraoi, te atataiaomata, ao te itangitangiri n tari. N aron anne, ngkana e reke iroun te bure temanna te batia mairouia ana koraki, ao e tibwatibwaa kanoana nakoia raona n onimaki, ake a iangoi bwaai aika raka aikai bwa bwaai aika a roko mairoun Iehova ae te tia Anga “angabwai aika raraoi ma bwaai n tituaraoi aika moan raraoi.” Mwakuri n akoi n aron aikai a karika te kimwareirei iroun te tia anga, ao irouia naba akana a anganaki aia bwai. Mangaia ae te bwai are e karaoaki nakoia ae aongkoa e na uruana aia onimaki e bon kakorakoraiia riki!—Iakobo 1:17; Mwakuri 20:35.
10, 11. Tera aron te tari-te-aine temanna ni kaaitara ma te kakairoroaki n titirakinaki [irouia bureitiman] ae akea tokina, ae rimwiaki ni kabureana n te karabuti n te tai ae rangi ni maan?
10 Nei Ella are e maeka naba n te aba are e a kaman katabuakaki iai te mwakuri ibukin te Tautaeka n Uea, e katikaki irouia bureitiman ngke e tataekina ana kaantaninga ni Kristian nakoia aomata tabemwaang. E rinanon te kakairoroaki n titirakinaki [irouia bureitiman] ae rangi ni matoatoa ae waakinaki n akea tokina i nanon namwakaina aika wanua. Ngke e kateaki n te kaboowi, ao e a reke n are te kabureaki i nanon tebwina te ririki, n te karabuti teuana ae akea iai taan taromauria Iehova. Ai bon tibwa 24 ana ririki ni maiu Nei Ella n te tai anne.
11 Te koaua bwa e bon aki kukurei Nei Ella n iangoan ae e na kabanea ana tai n ataei n te karabuti. Ma kioina ngkai e aki kona ni bita te bwai are e na riki nakoina arei, ao e a iangoia bwa e nang bita ana kaantaninga iai. Ngkanne, e a moanna n iangoa te karabuti anne bwa bon oin ana tabo are e kona n tataekina te rongorongo iai. “E rangi ni bati te mwakuri ae riai ni karaoaki n tataekinan te rongorongo” e taku, “ma a waekoa ni bwaka nako taian ririki.” Imwin nimaua tabun te ririki e a manga kairoroaki n titirakinaki riki Nei Ella [irouia bureitiman]. Ngke a a noria taan titirakina neiei bwa e tuai ma n uruaki ana onimaki ni kainakina n te karabuti, ao a manga tuangnga riki: “Ti aki kona ni kanakoko man te karabuti; bwa e tuai ma ni bitaki am kaantaninga.” “Ma I a bon tia ni bitaki!” e kamatoa Nei Ella. “E a unga riki nanou ngkai nakon are ngke I moan rin n te karabuti, ao e a rangi ni korakora riki au onimaki ngkai!” Ao e reitia ni kangai: “Ngkana kam aki kani kanakoai ao N na tiku ikai ni karokoa te tai are e taku Iehova bwa e na kainaaomataai.” E aki kimoaki kimwareirein Nei Ella ni kabureana i nanon nimaua ao te iterana te ririki! E reiakinaki aron karauan nanona n aki ongea bwa tera ae e riki nakoina. Iai reireiam ae ko kona ni karekea man ana katoto neiei?—Ebera 13:5.
12. Tera ae e kona ni karaua nanon te Kristian ae kaaitara ma taian rawawata?
12 Tai taku bwa tao iai te bwai n tituaraoi ae rangi ni kaokoro iroun Nei Ella are e kona iai ni kaaitara ma aeka ni kangaanga aikai. E kaota ae kangai Nei Ella ni kaineti ma te tai are e kakairoroaki iai n titirakinaki [irouia bureitiman]: “I uringnga bwa e a ruru mwangaiu ibukin maakuu, ao I namakinna bwa kaanga ai aron te mannikiba ae uarereke ae kimamaaku ngai.” Ma e korakora onimakinan Iehova iroun Nei Ella. E reiakina aron mwiokoan te Atua irouna. (Taeka N Rabakau 3:5-7) Ibukin anne, te Atua e a riki bwa te aomata ae koaua riki nakoina nakon are mai mwaina. E kabwarabwaraa ni kangai: “Ni katoa tai ngkana I kairaki nakon te ru are I kakairoroaki iai bwa N na anga au rongorongo, ao ai aron ae I namakina te rau ae waerakeai. . . . Ngkana e a taraa ni kakamaaku riki, ao ai aron ae te rau, e a korakora riki irou.” Iehova bon nibwan te rau anne. E kabwarabwaraa ni kangai te abotoro Bauro: “Kam na tai iangoa te bwai teuana n raraomaeakinna; ma a na kaotaki ami bubuti nakon te Atua ni bwaai ni kabane, n te tataro ma te bubuti ma te katituaraoi. Ao te rau are mairoun te Atua, are te rau are aki konaki n ataki teutana, e na kawakin nanomi ao aia iango nanomi i nanoni Kristo Iesu.”—I-Biribi 4:6, 7.
13. Tera ae kakoaua nakoira bwa ti na kakorakoraki bwa ti aonga ni kona n nanomwaaka, ngkana ti kaaitara ma taian rawawata?
13 E teimatoa ni kimwareirei Nei Ella e ngae ngke e rinanon te rawawata, ao e a tia ni kainaaomataki ngkai. E aki karaoa aei n oin korakorana, ma n te korakora are e karekea Iehova nakoina. Boni ngaia naba aron te abotoro Bauro, are e korea ae kangai: “Moan te kukurei ngai ni kamoamoaai ni mamarau, ba e aonga ni memena mwakani Kristo i aou. . . . ba ngkana I mamara, ao I a korakora iai.”—2 I-Korinto 12:9, 10.
14. Kaotia bwa e na kanga te Kristian ni bwaina te iango ae raoiroi ni kaineti ma te kangaanga teuana, ao uaana ae e kona n reke mai iai.
14 Taian rawawata aika ko kaaitara ma ngaai n taai aikai, tao a kona ni kaokoro ma bwaai ake ti a tibwa tia n rinanoi ikai. Ma n aki ongeia bwa baikara rawawata aika taonira, ma e boni kangaanga te kaaitara ma ngaai. N aron anne, tao am tia kamwakuri e kona n rangi ni waea aron am mwakuri—n te aro ae korakora riki nakon waean aia mwakuri taani mwakuri irouna ake kaain Aaro tabeua. Ao tao ko a aki kona ni kakaaea riki am mwakuri teuana. Ko na kanga n teimatoa ni kimwareirei iai? Uringa taekan Adolf ma raoraona, ake a reireinaki i nanon te karabuti aron karikirakean aroaro aika kakawaki irouia. Ngkana ko kakorakorako ni kakukureia nanon am tia kamwakuri—e ngae ngkana e “unun”—ko na karikirakea iroum aroaro ni Kristian n aron te nanomwaaka ao te taotaonaki n nano. (1 Betero 2:18, Te Baibara ni Katorika [BK]) Irarikin anne, ko na riki bwa te tia mwakuri ae mwaatai riki, ae te bwai ae e kona ni buokiko ni karekea te mwakuri ae e na rauaki riki nanom iai n te tai teuana. Ti na maroroakin aaro tabeua ngkai aika ti kona iai n teimatoa ni kimwareirei ni beku iroun Iehova.
Kabebetean Riki Aroni Maium E Karika te Kimwareirei
15-17. Tera te bwai ae e kona ni kabebetei naano, ae ataaki iroun te taanga teuana, e ngae ngke e bon aki kona ni kamaunaki aan karawawataaia ni kabane?
15 Tao ko aki kona n rinea te mwakuri ae ko tangiria ni kani karaoia, ke te tabo ae ko na mwakuri iai, ma tao iai anuani maium tabeua aika iai mwaakam iai ni bairei. Iangoa te rongorongo aei.
16 A kaoa te unimwaane nakon mwengaia te taanga ni Kristian teuana bwa e na amwarake ma ngaiia. N te tairiki anne, te tari aei ma buna a kaotia nakon te unimwaane arei bwa a moanna n namakina taonakiia n raraomaeakinan bwain te maiu aei. E ngae ngke a uaia ni mwakuri n taabo aika a tangiraki iai korakoraia ma aia tai ae bati, ma a aki kona ni kakaaea aia mwakuri ae kaokoro. A tia n iangoia bwa e na maanra riki te tai ni karokoa ae a na boni bwara nanoia iai.
17 Ngke e butiaki bwa e na anga ana reirei n ibuobuoki iai, e kaeka te unimwaane arei ni kangai, “Kabebetea riki aroni maiumi.” N te aro ra? Te mwaane anne ma buuna a kabanea tenua aia aoa ni katoa bong ni mwanangaia nakon aia tabo ni mwakuri ao n oki. E kinaiia raoi te taanga aei te unimwaane aei, n te aro are e a taekinna bwa tao a kona ni mwaing nakon te tabo ae kaan riki ma aia tabo ni mwakuri, bwa e aonga n uarereke riki aia tai ni mwananga ni katoa bong. Te tai ae reke mai iai e kona ni kabonganaki ibukin karaoan bwaai aika kakawaki riki—ke tao rawean te motirawa. Ngkana e tabe ni kimoa kimwareireim rawawatan te maiu aei, bukin tera bwa ko aki taraia bwa e na kona ni kabebeteaki riki uotam ngkana ko karaoi bitaki tabeua?
18. Bukin tera ngkai moan te kakawaki te karaurau moa n iango raoi imwain ae ti karaoi motinnano?
18 Te anga teuana riki ae e kona ni kabebeteaki rawawatara iai ngkana ti karaurau n iango raoi moa imwain karaoan ara motinnano. N aron anne, te Kristian temanna e iangoa katean te auti. E rinea taamnein ana auti teuaei ae rangi ni kangaanga karaoana, e ngae ngke e tuai kakatea te auti mai imwaina. E a ataia ngkai bwa e na uarereke riki ana kangaanga ngke arona bwa “e tarataraa aron nakonakona” ngke e rinea taamnein ana auti are e na kateia. (Taeka N Rabakau 14:15) Te Kristian temanna e kariaia bwa e na riki bwa te tia kaboa mwin ana taarau raona n onimaki. I aan te boraraoi anne, ngkana arona bwa te tia taarau e aki kona ni kabwara ana taarau, ao te tia kaboa mwin ana taarau e na riai ni kaitiaka te taarau anne. E nakoraoi n te moan tai, ma imwin tabeua te tai, e a moanna n aki kakaonimaki ni kabwaka ana taarau te tia taarau. E a moanna n raraoma iai te tia kataarau, ao e a kamatoa n tuatua bwa te tia kaboa mwin te taarau e na kaitiaka te taarau ni kabane. Te aro anne ae e na rangi ni karawawata te tia kaboa mwin te taarau. Te koaua bwa e kona ni kararoaki te rawawata anne, ngke arona bwa e karaua moa n iangoi bwaai ni kabane imwain ae e kariaia bwa e na riki bwa te tia kaboa mwin te taarau ke tiaki?—Taeka N Rabakau 17:18.
19. Baikara aaro tabeua ake ti kona iai ni kauarerekea te rawawata i nanoni maiura?
19 Ngkana ti taonaki n te kua, ti na aki taku bwa ti kona ni kabebetea rawawatara ma ni manga namakina te kimwareirei ngkana ti a kauarerekea riki karaoan ara wareware n te Baibara i bon iroura, ara mwakuri ni minita, ke kakaaean taiani botaki. Bwa bwaai aikai bon aaro aika moan te kakawaki ae ti kona iai ni karekea taamnein Iehova ae raoiroi iroura, are uaana mai iai bon te kimwareirei. (I-Karatia 5:22) E boni kamaiu karaoan mwakuri ni Kristian n taai nako, ao n angiin te tai, a aki rangi ni kakua te aba. (Mataio 11:28-30) N etina, e bati riki namakinan te kua man ara mwakuri ibukin maiura ao karaoan aaro ni kaki botu, nakon te kua ae e reke man karaoan mwakuri n taamnei. Te taneiai ni motirawa ni matu imwain bwakanakon te tai e na kakorakoraira riki. E kona n rangi ni manena kamaanan riki ara tai ni motirawa. N. H. Knorr, are e kaaina aia Rabwata n Tautaeka Ana Tia Kakoaua Iehova ni karokoa matena, e aki toki n tuangia mitinare ni kangai: “Te moani bwai ae kam na karaoia ngkana kam namakina te bwarannano, kam bon riai ni matu teutana. Ko na mimi n noria bwa e na taraa n uarereke riki am kangaanga ni kabane ngkana ko a uti imwin te matu raoi n te bong!”
20. (a) Kabwarabwarai aaro tabeua ake ti kona ni kateimatoa iai kimwareireira. (b) Baikara bukina aika ko kona n iangoi ae ti riai ni kimwareirei iai? (Nora te bwaoki n iteraniba 15.)
20 A kakabwaiaki Kristian ngkai a kona ni beku iroun “te Atua ae kukukurei.” (1 Timoteo 1:11, New World Translation of the Holy Scriptures [NW]) N aron ae ti a tia n noria, ti kona n teimatoa ni kimwareirei e ngae ngkana ti taonaki ni kangaanga aika kakaiaki. Ti bia teimatoa n iaiangoa te kaantaninga ae reitaki ma te Tautaeka n Uea, ni kaetieta ara iango ngkana e riai, ma ni kabebetea riki aroaroni maiura. Ao ngkanne, n aki ongea bwa tera aroarora, ma ti nang iri ngkanne nanon ana taeka te abotoro Bauro aikai: “Kam na kimareirei iroun te Uea n aki toki: ao I a manga taku, Kam na kimareirei”!—I-Biribi 4:4.
Iangoi Raoi Titiraki Aikai:
• Bukin tera ngkai Kristian a riai n aki toki n iaiangoa raoi te kaantaninga ae reitaki ma te Tautaeka n Uea?
• Tera ae e kona ni buokira bwa ti na teimatoa ni kimwareirei, e ngae ngkai ti taonaki n taian rawawata?
• Bukin tera ngkai ti riai ni kabebetea riki aroaroni maiura?
• Tera aaro tabeua ake aomata tabeman a a tia ni kabebetea aroaroni maiuia iai?
[Te Bwaoki/Taamnei n iteraniba 15]
Bukina Tabeua Riki ae Ti Kona ni Kimwareirei Iai:
Kioina ngkai Kristian ngaira, a mwaiti bwaai aika ti kona ni kimwareirei iai. Iangoi aikai:
1. Ti kinaa Iehova.
2. Ti a tia n reiakinaki te koaua man Ana Taeka te Atua.
3. A kona ni kabwaraki ara bure rinanon onimakinan ana karea Iesu iroura.
4. Ana Tautaeka n Uea te Atua e a tautaeka ngkai—ao e nang roko ngkai te aonnaba ae boou!
5. Iehova e a tia ni kairira nakon te baretaiti n taamnei.
6. Ti kukurei ngkai ti kona n iraorao ma Kristian aika raoiroi.
7. Ti kakabwaiaki ngkai ti kona ni buoka tataekinan te rongorongo.
8. Ti maiu ngkai, ao iai korakorara ae tau teutana.
Tera riki bukina aika ko riai ni kimwareirei iai, aika ko kona n taekin?