Kimwareirei Iroun te Atua ae Kukukurei

“Aio kabaneana, taari, kam na kakatonga, . . . ao E na mena i roumi te Atua are e reke mai Rouna te tangira ma te raoi.”​—2 I-KORINTO 13:11.

1, 2. (a) Bukin tera ngkai a mwaiti aomata aika a aki bati ni kimwareirei ni maiuiia? (b) Tera te kimwareirei, ao ti na kanga ni karikirakea iroura?

INANON boong aika kangaanga aikai, a mwaiti aomata aika a taku bwa a aki ataia bwa bukin tera ngkai a riai ni kakatonga ke ni kimwareirei. Ngkana a rotaki n te kabuanibwai ke e rotaki temanna ae tangiraki irouia, a bae n namakina are e namakinna naba Iobi rimoa, ngke e kangai: “Te aomata ae bungiaki mairoun te aine, ai ti tabe bong ana bong, ao e on n te rawawata.” (Iobi 14:1) A bon rorotaki naba Kristian n te rawawata ao te raraoma ae reitaki ma ‘boong aika kamamate aikai,’ ao bon anne bukina ae tabeman ana toro Iehova aika kakaonimaki a kona n namakina te bwarannano n taai tabetai.​—2 Timoteo 3:1.

² Ma e ngae n anne, a kona naba ni kakatonga ni kimwareirei Kristian, e ngae ngkana a kataaki. (Mwakuri 5:40, 41) Ibukin ataakin aron karaoan anne, e na iangoaki moa bwa tera te kimwareirei. Te kimwareirei e kabwarabwaraki bwa “te bwai ae e namakinaki i nanon te aomata ngkana e karekea ke e kakaantaninga karekean ae raoiroi irouna.”a Mangaia are ti kona naba ni kimwareirei ngkai, ngkana ti iaiangoi kakabwaia aika a a tia n reke iroura ao ake a mena imwaira n ana aonnaba te Atua ae boou.

3. N te aro ra are e kona n taekinaki bwa bon iai bwaai tabeua ae aomata ni kabane a kona ni kimwareirei iai?

³ Bon iai irouia aomata ni kabane kakabwaia tabeua ake a kona ni kakaitau iai. Tao atun te utu e kona ni kamotirawaki man ana mwakuri. Ni koauana e na bon raraoma iai. E tangiria n tabeakina maiuia ana utu aika tangiraki irouna. Ma e ngae n anne, ngkana iai irouna te marurung ao te korakora n rabwatana, e kona ngkanne ni kakaitau ibukina. Ngkana e a manga reke ana mwakuri, ao e nang kona ngkanne ni kakorakora ni mwakuri iai. N te itera are teuana, tao te aine temanna ae te Kristian e a rina n taonaki n te aoraki ae kamamaara rabwatana. Ma e ngae n anne, e kona ni kakaitau ngkai e buokaki irouia raoraona ao kaain ana utu aika tatangira, bwa e na kaaitara ma aorakina ma te ninikoria ao te nano n aine. Ao n aki ongeia bwa tera aroia Kristian ni koaua ni kabane, ma a kona ni kimwareirei ngkai a boni kinaa Iehova, ae ‘te Atua ae kukukurei’ ao Iesu Kristo ae ‘te tia Tautaeka ae na karaoiroaki ae kukukurei naba.’ (1 Timoteo 1:11; 6:15, New World Translation of the Holy Scriptures [NW]) Eng, Iehova ae te Atua ao Iesu Kristo a rangi ni kukukurei. A teimatoa ni kimwareirei e ngae ngkai bwaai aika riiriki i aon te aonnaba a rangi n raroa nako ma are kaantaningaki mairoun Iehova n te moan tai. E bati reireiara ae ti kona ni karekea man aia katoto, ibukin kateimatoan te kimwareirei iroura.

E Tuai ma ni Bua Aia Kimwareirei

4, 5. (a) Tera aron Iehova ngke a karitei ara moan aomata? (b) E a kanga Iehova ni kateimatoa irouna iangoan te botannaomata n te aro ae riai?

⁴ N te oo-n-aroka are Eten, Atam ao Nei Ewa a kukurei ni marurungin raoi rabwataia ao kororaoin aia iango. Bon iai te mwakuri ae manena ae a na karaoia, ao e rangi n tikiraoi naba aia tabo are a na mwakuri iai. Ma ae te kabanea n raoiroi riki, a bon anganaki te kakabwaia ae a kona ni katoa tai ni mamaroro ma Iehova. Bon ana kaantaninga te Atua bwa a na kukurei nakon taai aika imwaia. Ma a aki rauaki nanoia ara moani karo ni bwaai n tituaraoi aika raraoi aikai; ao a manga iraea te uanikai are tabuaki man “te kai n ata te raoiroi ma te buakaka.” Te mwakuri n aki-ongeaba aei e karika te aki kukurei iroura n taai aikai, ngkai ti riki mairouia.​—Karikani Bwaai 2:15-​17; 3:6; I-Rom 5:12.

⁵ Ma Iehova e aki kariaia aroia Atam ma Nei Ewa n ribuaka nakoina, bwa e na kimoaa te kimwareirei mai rouna. E onimakinna ae e na bae n iai natina tabeman ake a na tangiria ni kani beku irouna. E rangi n onimakina anne n te aro are ngke a tuai ni karika aia moan nati Atam ma Nei Ewa, ao e a taekina naba ana kaantaninga are e na manga kamaiuiia natiia aika ongeaba! (Karikani Bwaai 1:31; 3:15) I nanon tienture ake imwin anne, angiia aomata a toua mwin mwanekaia Atam ma Nei Ewa, ma Iehova e aki kaaka taekan te botannaomata, e ngae ngke e a taabangaki te aki-ongeaba. Ma e kaatuua riki ana iango i aoia mwaane ao aine ake a ‘kakukureia nanona,’ ake aomata ake a kakorakoraia ni kakukureia nanona ibukina bwa a bon tangiria.​—Taeka N Rabakau 27:11; Ebera 6:10.

6, 7. Baikara bwaai aika a buoka Iesu bwa e na teimatoa ni kimwareirei?

⁶ Ma tera aron Iesu​—e a kanga ngaia ni kateimatoa kimwareireina? Ngke te taamnei ae mwaaka Iesu i karawa ngkoa, e a reke ana tai ni mataku n aia mwakuri mwaane ao aine ake i aon te aonnaba. E teretere aron aki-kororaoiia irouna, ma e bon tangiriia naba Iesu. (Taeka N Rabakau 8:31) E aki naba bita ana iango imwina, ngke e a roko i aon te aonnaba ma ni ‘maeka i buakoia aomata.’ (Ioane 1:14) E a kanga Natin te Atua ae kororaoi ni kona ni kateimatoaki irouna iangoaia aomata aika bubure n te aro ae rangi n raoiroi?

⁷ Te moani bwai, e aki riaon ae riai ana iango Iesu ni kaineti ma bwaai ake e kakaantaningaia mairouna ao mairouia aomata tabemwaang. E a kaman ataia ae e na aki kona ni bita aroia kaain te aonnaba ni kabane. (Mataio 10:32-39) Mangaia are e kimwareirei ngkana iai te aomata ae tii temanna ae e butimwaea rongorongon te Tautaeka n Uea. E ngae ngke aroaroia ao aia iango taan rimwina a aki kororaoi n taai nako, ma Iesu e ataia bwa a bon tangiria ni kan karaoa nanon te Atua, ao e bon tangiriia ibukin aroaroia anne. (Ruka 9:46; 22:24, 28-32, 60-62) E kakawaki ataakin ae ngke e tataro Iesu nakon Tamana are i karawa, e taekin anuani maiuia taan rimwina aika raraoi ake a a tia ni maiuakin ni karokoa te tai anne n te aro aei: “A kawakina am taeka.”​—Ioane 17:6.

8. Taekin aaro tabeua ake ti kona ni katotonga aron Iehova ao Iesu iai ni kaineti ma kateimatoan te kimwareirei iroura.

⁸ Akea te nanououa bwa ti na bane ni kakabwaiaki man iaiangoan aia katoto Iehova ae te Atua ma Kristo Iesu n te aro anne. Ti kona ni katotonga riki Iehova, tao n te aro ae ti aki rangi n ra­rao­ma ngkana e aki nakoraoi ara babaire n aron are ti kaantaningaia? Ti kona ni kakairi riki ni mwanekan Iesu n te aro ae ti kateimatoa iroura iangoan arora ae ti mena iai ngkai n te aro ae raoiroi, ma ni bwaina naba te iango ae e aki riaon ae riai ni kaineti ma bwaai ake ti kaantaningaia i bon ibukira ao ibukiia naba aomata tabemwaang? Ti na noria ngkai bwa a na kanga reirei aika tabeua ni kona ni kamanenaki n te aro ae manena, ni kaineti ma te mwakuri ae e tatangiraki irouia Kristian aika tataningamarau n taabo nako​—ae te mwakuri ni minita.

Kateimatoa Iangoan te Mwakuri ni Minita n te Aro ae Riai

9. E a kanga ni manga kakimwareireiaki Ieremia, ao tera buokara ae e kona n reke man ana katoto?

⁹ Iehova e tangirira bwa ti na kimwareirei ngkana ti beku irouna. Kimwareireira aei e aki riai ni kabotoaki i aon uaan ara mwakuri ake a rereke iroura. (Ruka 10:17, 20) Te burabeti are Ieremia e tataekina te rongorongo i nanon ririki aika mwaiti n te tabo ae e aki bati n uaana. E bua kimwareireina ngke e kaatuua ana iango i aon aroia aomata aika a aki kani butimwaea te rongorongo. (Ieremia 20:8) Ma ngke e iaiangoa raoiroin te rongorongo are e taekinna, ao e a manga kimwareirei. E kangai Ieremia nakon Iehova: “A reke am taeka, ao I kang; ao au kimareirei ma kakatongan nanou am taeka nako: ba I aranaki n aram, Ngkoe ae Iehova.” (Ieremia 15:16) Eng, e kakatonga ni kimwareirei Ieremia ni kabwaiana ae te kona n tataekina ana taeka te Atua. Ngaira naba ti kona ni karaoa anne.

10. Ti na kanga ni kateimatoa kimwareireira n ara mwakuri ni minita e ngae ngkai e aki bati uaan te mwakuri n te tabo are ti mena iai?

¹⁰ E ngae ngkana angiia aomata a rawa ni butimwaea te euangkerio, ma iai bukina aika mwaiti aika ti kona ngaira ni kateimatoa arora ni kimwareirei ni kakaraoa ara mwakuri ni minita. Uringa naba aron Iehova ngkoa ngke e onimakina raoi ae e na iai aomata tabeman aika a na kairaki bwa a na kani beku irouna. N ai aron Iehova, a aki riai ni bwara nanora ni kaantaningaia bwa e na iai aomata tabeman ake a na karekea ootaia iai ma ni butimwaea rongorongon te Tautaeka n Uea. Ti aki riai ni mwaninga bwa a kona naba ni bitaki aroni maiuia aomata. Ngkana a kaaitara ma te kabuanibwai teuana ae aki kaantaningaki, te aomata naba ae e rangi n rau aroni maiuna mai mwaina, e kona ni moanna n iangoa manenan te maiu aei. Ko na bon tauraoi ni buoka te aeka n aomata aei ngkana e a moanna n reke irouna ataakin ‘kainnanona ni kaineti ma bwaai n taamnei’? (Mataio 5:3) Tao iai temanna n am tabo ae e na tauraoi n ongora nakon te euangkerio ngkana ko a manga kawaria n te tai are imwina!

11, 12. Tera are e riki n te kaawa teuana, ao tera reireiara mai iai?

¹¹ A kona naba ni bibitaki aomata aika a mena n ara tabo. Iangoa te katoto aei. N te kaawa ae uarereke teuana, bon iai te koraki n taanga n ataei ma natiia aika a rangi n i tangitangiri. Ngke a kakawaraki irouia Ana Tia Kakoaua Iehova, ao a aki toki n tuangiia aomata aikai ni kabane ni kangai: “Ti aki kan ongo!” Ngkana kaanga, e nang moana ongorana temanna, n rongorongon te Tautaeka n Uea teutana mai buakoia, ao kaain rarikina a waekoa naba ni manga tuangnga bwa e na aki manga maroro ma taani Kakoaua. Te koaua bwa e boni kangaanga tataekinan te rongorongo n te tabo anne. Ma e ngae n anne, a aki bwara nanoia taani Kakoaua iai; a teimatoa n tataekina te rongorongo. Ao tera uaana?

¹² Imwin tabeua te tai, a a ikawai ataein te kaawa anne, a mare, ao a manga katei utu iai. Ibukina bwa a ataia bwa aroaroni maiuia e aki karika te kukurei ni koaua nakoia, tabeman mai buakoia te koraki aika a ataei riki aikai a moanna ni kakaaea taekan te koaua. A a kunea ngke a butimwaea te euangkerio ae tataekinaki irouia taani Kakoaua. Mangaia are imwin ririki aika mwaiti, e a moanna n rikirake mwaitiia kaain te ekaretia ae uarereke, ae mena n te tabo anne. Iangoa aron kimwareireia taan uarongorongoa te Tautaeka n Uea ake a aki bwara nanoia iai rimoa! Ti bia kimwareirei naba n arora ni botumwaaka n tataekina rongorongon te Tautaeka n Uea ae moanibaan te raoiroi!

A na Buokiko Raao n Onimaki

13. Antai ae ti kona ni kawaria ngkana ti namakina te bwarannano?

¹³ Ngkana e a rikirake am kangaanga ke iai te kabuanibwai ae riki, antai ae ko kona n onimakinna ibukin kabebetean nanom? Mirion ma mirion mai buakoia ana toro Iehova ake a tia ni katabuaki nakoina ake a na bae ni kawara moa Iehova n te tataro, ao imwina ngkanne, a nang kawariia tariia ao mwaaneia ni Kristian. Ngke e mena i aon te aonnaba Iesu, e rangi ni kakawaki irouna buokana mairouia taan rimwina. N te tairiki are imwain matena, e taetae nakoia ni kangai, “ngkami bon aika kam memena ma Ngai ni kaririakiu.” (Ruka 22:28) Te koaua bwa a aki kororaoi taan rimwin Kristo akekei, ma e kabebeteaki nanon Natin te Atua n aroia ni kakaonimaki. Ngaira naba ti kona ni kakorakoraki irouia raora n taromauri.

14, 15. Tera are e buoka te taanga teuana ngke a rawawata ibukin maten natia, ao tera reireiam man rongorongoia aei?

¹⁴ Te taanga ni Kristian teuana aika Michel ao Nei Diane, a reiakina kakoauan aron manenan te ibuobuoki mairouia taari-mwaane ao taari-aine aika Kristian. Iai natia te mwaane ae arana Jonathan ae ai 20 ana ririki ni maiu ao bon te Kristian teuaei ae rangi n tangira te maiu ma ni kakaantaninga karaoan mwakuri aika mwaiti, ma te kangaanga, bwa e ituaki n te aoraki ae te kaentia ni kaburorona. A rangi ni kekeiaki mwaaka taokita ni kataia ni kamaiua, ma e tabe ni kekerikaki marurungin Jonathan ni karokoa ae e a matu nako ni mate n te tanimaeaontai teuana. A rangi n nanokawaki Michel ao Nei Diane iai. A ataia bwa e a kani bwara te Botaki Ibukin te Uarongorongo are baireaki ibukin te tairiki anne. Ma ibukina bwa a rangi ni kainnanoa kabebetean nanoia, a butiia te unimwaane ae e memena irarikiia bwa e na airi ma ngaiia nakon te Maneaba n Uea. A roko raoi n te tai are e kaongoaki iai te ekaretia taekan maten Jonathan. Imwin te botaki, kaaro aika tang nanoia aikai a otabwaniniaki irouia tariia ao mwaaneia n taamnei, ake a a irabati ma ngaiia ao a taetae ni kabebetei nanoia. E kangai Nei Diane: “Akea angin nanora ngke ti roko n te tabo ni botaki, ma ai raoiroi ra kabebetean nanora ae ti anganaki mairouia tarira​—ao ai unga ra nanora irouia! E ngae ngke a aki kona ni katoka te uruaki n nano ae ti namakinna, ma a buokira n kananomwaakaira i aan rawawatara!”​—I-Rom 1:11, 12; 1 I-Korinto 12:21-​26.

¹⁵ Te rawawata anne are e a kairiia Michel ma Nei Diane bwa a na kaania riki ma tariia. E kakorakora riki naba aia iraorao i bon i marenaia. E kangai Michel: “I a reireiaki iai bwa N na tangira riki buu. Ngkana e a roko iroura te bwarannano, ao ti uaia ni maroroakin koaua man te Baibara ao aron te kateimatoaki ae rereke mairoun Iehova.” E reitia ni kangai Nei Diane: “E a kakawaki riki iroura ngkai te kaantaninga ibukin te Tautaeka n Uea.”

16. Bukin tera ngkai moan te kakawaki bwa ti na kaongoia tarira taekan kainnanora?

¹⁶ Eng, tarira ao mwaanera ni Kristian a kona n riki bwa ‘bwaai n ibuobuoki’ nakoira, ni kaineti ma kangaanga n te maiu aei, ma ni buokira ni kawakina kimwareireira. (I-Korote 4:11) Te koaua bwa a aki kona n ataa kanoan ara iango. Mangaia are ngkana ti kainnanoa buokara, ao e raoiroi bwa ti na kaongoia. Ao ngkanne, ti kona ni kaota ara kaitau ibukin kabebetean nanora ae e reke mairouia tarira, ma n iangoia naba bwa e bon roko mairoun Iehova.​—Taeka N Rabakau 12:25; 17:17.

Tara Am Ekaretia

17. Baikara kangaanga ake a kaaitara ma te tina temanna ae akea buna, ao tera aron tarakiia aomata aika ai aron neierei iroura?

¹⁷ Ngkana ko taraia raoi raom n onimaki, ao e na korakora riki iai tangiraia iroum, ao ko na kukurei riki n iraorao ma ngaiia. Taraia kaain am ekaretia. Tera ae ko noria iai? Iai te karo temanna ae akea raona are e kekeiaki ni kaikawaia natina i nanon te koaua? Ko a tia n iaiangoa ana katoto ae raoiroi are e tabe ni karaoia? Kataia n iangoi kangaanga tabeua ake a kaaitara ma ngaia. Te tina ae akea raona ae arana Nei Jeanine e taekin tabeua mai buakon aikai: te maroaa ae irianaki n te uringaba, kataakina irouia mwaane n ana tabo ni mwakuri, ao uarereken ana mwane. Ma e taku bwa ae kangaanga riki irouna, bon tabeakinan kainnanoia natina ni kaineti ma aron aia iango ao aia namakin, kioina ngkai a kakaokoro nako aroia ataei. Iai riki te kangaanga teuana ae taekinaki iroun Nei Jeanine: “E kangaanga n tabetai taonan nanom nakon iangoan ae natim te mwane e riai n riki bwa te tia kairiri n te utu, kioina ngkai akea te mwaane iai. Bon iai natiu te aine, ao e kangaanga uringan ae N na aki riai ni karawawataa n te aro are I karika natiu anne bwa raoraou ae I kakaoti au kangaanga nakoina.” N aroia kaaro aika akea buuia aika ngaa ma ngaa mwaitiia ake a mamaaka te Atua, Nei Jeanine e mwakuri ibukin maiuna ni kabwanina ana tai iai, ao e tabeakinia naba kaaini mwengana. E kaira naba te reirei n te Baibara ma natina, e kataneiaia n te mwakuri ni minita, ao e kairiia nakon bobotakin te ekaretia. (I-Ebeto 6:4) Ai kukurei ra Iehova ni katoa bong ngke e taraa aia kekeiaki te utu aei, n teimatoa ni kakaonimaki! Tiaki te koaua bwa a kimwareirei nanora ngkai ti ataia bwa iai naba aekakia aomata aikai i buakora? Boni ngaia.

18, 19. Kaotia bwa ti na kanga ni kona ni kakorakora riki tangiraia kaain ara ekaretia iroura.

¹⁸ Taraia riki kaain am ekaretia. Ko kona n noriia mwaane ao aine aika kakaonimaki ake a a tia ni mate buia, ake a ‘aki kona n tiku’ man taiani botaki. (Ruka 2:37) A boni maroaa n uringaba n taai tabetai? Eng. A bon nanokawaki ngkai akea raoia! Ma a katabetabeia ni beku iroun Iehova ao a tabeakinia naba aomata tabemwaang. Aia iango ae teimatoa ma n raoiroi e kabatiaa riki te kimwareirei n te ekaretia! Te Kristian ae e a tia ni kabwanina ana tai n te mwakuri ni minita i nanon 30 tabun te ririki e taekina ae kangai: “Te bwai ae kabatiaa riki te kimwareirei nakoiu, bon norakin aroia ni kakaonimaki taari-mwaane ao taari-aine aika a kara, aika a teimatoa ni bebeku iroun Iehova ngkai, e ngae ngke a a tia n rinanon kataakiia aika mwaiti!” Eng, Kristian aika kara aika mena i buakora a riki bwa kaungan nanoia aomata aika ataei riki.

¹⁹ Tera aroia aomata aika boou ake a tibwa moanna n iraorao ma te ekaretia? Tiaki te koaua bwa a unga nanora ngkana a taekina aia onimaki n taiani botaki? Iangoa aron rikirakeia ma ngke a moan reirei n te Baibara. E na bae n rangi ni kukurei Iehova irouia. Ao ngaira ti kukurei naba irouia? Ti boni kaota kukureira iai, ma ni kamoamoaia ibukin aia kekeiaki?

20. Bukin tera ngkai e kona n taekinaki bwa kaain te ekaretia n tatabemania nako a karaoa te mwakuri ae kakawaki n te ekaretia?

²⁰ Iai buum ke akea, ke tao te karo ngkoe ae akea raom? Bon te nati ae akea tamam (ke akea tinam) ngkoe, ke te aomata ae e a tia ni mate buuna ngkoe? Ko a tia n iraorao ma te ekaretia i nanon ririki aika mwaiti, ke ko a tibwa moana am iraorao iai? Karaua nanom n ataakin ae a kaungaki nanora ni kabaneira n aron am kakaonimaki. Ao ngkana ko buoka anaakin te anene ibukin te Tautaeka n Uea, ke ngkana ko kaeka te titiraki ke ni karaoa te reirei n Ana Kuura ni Minita te Atua, ao e a kabatiaaki riki kimwareireira iai. Ao ae kakawaki riki, karaoan aei e kakukureia nanon Iehova.

21. Tera aroarora ae ti na karaoia, ni kaineti ma bukina aika a mwaiti, ma baikara titiraki ake a na riki mai iai?

²¹ Eng, e ngae ngkai ti maiu n taai aika kangaanga aikai, ma ti kona ni kimwareirei ngkai ti taromauria Atuara ae kukukurei. A mwaiti bukina ae ti na butimwaea ana kaungaunga Bauro ae kangai: “Kam na kakatonga, . . . ao E na mena i roumi te Atua are e reke mai Rouna te tangira ma te raoi.” (2 I-Korinto 13:11) Ma tera ngkana ti kaitaraki ma te kabuanibwai teuana, te bwainikirinaki, ke te kangaanga ae korakora ni kaineti ma aki-taun ara mwane? Ti kona ngkanne n teimatoa ni kimwareirei iai? Iangoa anne ngkana ko rinanon te kaongora are imwin aei.

[Kabwarabwara ae nano]

Ko Kona ni Kaekaa?

• Tera aron kabwarabwaran te kimwareirei?

• E na kanga kawakinan te iango ae riai iroura ni kona ni buokira n teimatoa ni kimwareirei?

• Tera ae e kona ni buokira ni bwaina te iango ae riai ni kaineti ma ana tabo ni mwakuri ara ekaretia?

• Baikara aroaro aika kaotaki irouia kaain am ekaretia aika a kairiko bwa ko na tangiriia?

[Taamnei n iteraniba 10]

Aomata aika a mena n ara tabo a kona naba ni bitaki