Ko Onimakina te Atua ni Koaua?
Te kakaae ae mwanenaki man te American Museum of Natural History e a tabe ni waaki bwa e nang ukera te aba ae mena n aonon te Arctic, are e a kaman noraki iroun Robert E. Peary itiua te ririki imwain anne, n 1906.
MAI CAPE COLGATE ae mena i meangi maeaon Amerika Meang, aongkoa e a kaman tia iai Peary n nora te maunga ae rabunaki n te tino, ae mena n te aba ae raroa. E arana te aba aei bwa Crocker, ae ingoan temanna te tia mwanena mwanangana. A bon rangi ni kukurei te koraki ake a a manga roko imwina, n noran naba mai kiraroa te aba ae tabukibuki, e mwanomwano, ao iai maungana ae rabunaki n te tino! Ma n te tai ae waekoa, ao a a kunea bwa ngaia bon akea te bwai are a noria arei, bwa bon tii tarani mataia n aron are ririki n aonon te Arctic. Te taranimata aei ae e a tia ni mwamwanaa Peary, ao te koraki ake a rimwina a a manga kabane buaka naba aia tai, korakoraia, ao kaubwaia, ibukin kakaaean te bwai ae bon akea koauana.
Ni boong aikai, a mwaiti aomata aika a kabanea nanoia ao aia tai nakoia atua ake a taku bwa a boni koaua. N aia bong ana abotoro Iesu, taian atua aika a tataromauriaki bon Tubita ao Mokure. (Mwakuri 14:11, 12) Ni boong aikai, mwaitiia atua aika a tataromauriaki irouia taian Shinto, Hindu, ao Aaro tabeua riki, e a roko n te ware ae mirion ma mirion. N te koaua ni koaua, n aron ae taku te Baibara, “a mwaiti baika a aranaki ba atua ma uea.” (1 I-Korinto 8:5, 6, BK) A kona ni bane ni koaua atua aikai?
Atua Aika “Aki Kona ni Kamaiua te Aba”
Iangoa te katoto ibukin kabonganan taiani banna ke taamnei, n te taromauri. Te koraki ake a onimakinia ke a tatataro rinanoni baikai, a kakoauaa bwa iai te mwaaka irouia taiani bouannanti ae raka riki nakon mwaakaia aomata, ae e kona ni kakabwaiaia aomata ke ni kamanoia man te kangaanga. Ma a boni kona ni kamaiua te aba? Ni kaineti ma bwaai akanne, e anene ni kangai te tia areru: “Antiia botanaomata, ake boua, bon te tirewa ma te koora, bon aia mwakuri baiia aomata. iai wiia, ma a aki tataetae; iai mataia, ma a aki nonoraba; iai taningaia, ma a aki ongongo; ao akea naba te ikeike i nanoni buuaia.” N te koaua ni koaua, boni ngaiia atua aika a “aki kona ni kamaiua te aba.”—Taian Areru 135:15-17; Itaia 45:20.
Ni koauana, taani karao bouannanti a onimakina ae iai te maiu ao te mwaaka ni bwaai ake a karaoi ni baiia akekei. Ao taan taromauri bouannanti a onimakini naba baikai. “A aonangaia [te bouannanti] n uotia,” e taekina anne te burabeti ae Itaia ma n reitia nako, “ao a kaki ni nena, ao e tei iai; e na aki mwamwae mani nena: ao e na weteia temanna, ma e aki kona ni kaeka, ma ni kamaiua naba man rawawatana.” (Itaia 46:7) Te koaua iai bwa te bouannanti e bon aki maiu e ngae ngke a ingainga nanoia nako iai te koraki ake a onimakinna. Boua aika kaaraki ao aika a kaburoaki n atoaki, bon atua aika ‘akea maneia.’—Abakuka 2:18.
Taromauriaia ao karineaia aomata n ae riaon ae riai n aroia taan takakaro, taian tautaeka, ao mataniwin Aaro, bon te waaki ae e a taabangaki ni boong aikai. A mwaiti naba aomata ngkai aika a atuana te mwane. Bwaai aika kaanga a taromauriaki aikai, a karaoaki nakon te bwai ae aongkoa ngaia, ma bon tiaki. A bon aki kona ni kakoroi bukin bwaai ni kabane ake a kaantaningaki mairouia, irouia taan onimakinia. N te katoto, uaiakinan te kaubwai e taraa n ae e na katoki kangaanga aika bati, ma ngaia e aki bwa e boni mwamwana te aba. (Mareko 4:19) E titiraki ni kangai temanna te tia kakaae: “Ti na kanga ngkanne ni kabwarabwaraa ae te bwai ae rangi n tatangiraki irouia aomata, are e kakoauaki bwa e na katoki kangaanga nako, ao ngkana e a reke, e a manga kareke kangaanga aika bati ao ni kakaiaki?” Eng, uaiakinan te kaubwai e kona n nanonaki bwa te aomata e na kaaki bwaai aika manena, n aron marurungina, kukurein maiuna ma ana utu, raoraona ake e kaan ma ngaiia, ke reitakina ae kakawaki ma te tia Karikiriki. Ma atuana aei, akea riki raoiroina nakon ‘te bwai ni kewe ae akea manena’!—Iona 2:8.
“Akea ae Kaeka te Aba”
Bon te nanobaba atongan te bwai ae aki koaua bwa e koaua. A reireinaki n anne taan taromauria Baara rinanon te kangaanga, n ana bong te burabeti ae Eria. A rangi ni kakoauaa bwa iai mwaakan Baara ni karuoa te ai mai karawa ao ni kabueka rabwatan te man ni kabane bwa te karea. Ni koauana, “a wetea arani Baara man te ingabong ma ni katawanoua, ao a kangai, Baara, ko na kaekaira.” Iai taningan Baara n te aro are e na kona n ongo, ao wina ae e na kona n taetae iai? E reitaki nako te rongorongo ni kangai: “Ma akea te bwana, ao akea ae kaeka te aba.” N te koaua ni koaua, “akea naba ae muti.” (1 Uea 18:26, 29) Tiaki te atua ni koaua Baara, e bon aki maiu, ke ni kakammwakuri.
Ai kakawaki ra bwa ti na kinaa ma n taromauria te Atua ni koaua! Ma ai antai ngaia? Ao tera kakabwaiara ae na reke ngkana ti onimakinna?
[Taamnei n iteraniba 3]
Raoraon Peary ae Egingwah e tuoa te oraitan ibukin te aba
Robert E. Peary
[Credit Lines]
Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA
[Taamnei n iteraniba 4]
A mwaiti aomata aika a mwamwanaki ni bwaai aika a taromauriaki n te aonnaba aei