Raona Ami Nanomwaaka N Tangiran Te Atua

Raona ami onimaki . . . n te nanomaka, raona ami nanomaka n tangiran te Atua.”​—2 BETERO 1:5, 6, BK.

1, 2. (a) E kaantaningaki bwa e na ikawai n te aro raa te ataei? (b) Tera aron kakawakin te ikawai n te onimaki?

E KAKAWAKI bwa e na ikawai raoi te ataei ma e aki nanonaki iai, tii ikawain rabwatana. E riai bwa e na ikawai naba n ana iango ao n ana kaantaninga. Imwin tabeua te tai, e na kitan arona n ataei ma n rikirake bwa te ataeinimwaane ke te ataeinnaine. E taekina aei Bauro ngke e korea ae kangai: “Ngke te tei ngai, ao I taetae n ai aron te tei, ao I uringaba n ai aron te tei, ao I iango n ai aron te tei: ngkai I a ikawai, ao I kaki bwaai n ataei.”​—1 I-Korinto 13:11.

² E reke reireiara ae moan te kakawaki ibukin te ikawai n te onimaki man ana taeka Bauro aikai. A riai Kristian n rikirake man aroia n ataei n te onimaki, ao n “ikawai nakon te atatai.” (1 I-Korinto 14:20) A riai ni kakorakoraiia ni kataia “n rota kororaoini ikawaini Kristo.” ‘Ngkanne ao ai tiaki manga ataei riki ngaiia: ao a na aki manga uouotaki n te nao, ao a na aki ukaki nako n angin taian reirei aika a oteaki n aia rabakau aomata.’​—I-Ebeto 4:13, 14, BK.

3, 4. (a) Tera ae ti riai ni karaoia bwa ti aonga n riki bwa aomata aika ikawai n te onimaki? (b) Baikara aroaro aika kakukureia nanon te Atua aika ti riai ni bwain, ao kakawaki raa aroaro aikai?

³ Ti na kanga n riki bwa aomata aika ikawai n te onimaki? N tiaki aron te rabwata ae e kona n ikawai i bon irouna, te ikawai n te onimaki e kainnanoa te kakorakora. E moan reke aei man reiakinan te atatai ae eti n ana Taeka te Atua ao ni kaboraoan anuara ma bwaai aika ti reiakin. (Ebera 5:14; 2 Betero 1:3) Karaoan aei e buokira bwa ti na bwabwain aroaro aika a na kakukureia nanon te Atua. N aron te rabwata ngkai a uaia n rikirake bwaina nako, aroaro aika mwaiti aika a na kakukureia te Atua a kona naba n uaia n rikirake i nanora. E korea ae kangai te abotoro Betero: “Ma ngaia ae kam na kabanei korakorami n raona ami onimaki n te raoiroi, ao n raona ami raoiroi n te ataibai: raona ami ataibai n te taubang, raona ami taubang n te nanomaka, raona ami nanomaka n tangiran te Atua, raona tangiran te Atua n tangiraia tarimi, ao raona tangiraia tarimi n tangiraia aomata.”​—2 Betero 1:5-7, BK.

⁴ A bane ni kakawaki aroaro aika taekinaki iroun Betero ikai ao akea teuana ae riai ni katukaki. E a manga taku riki: “Ba ngkana a reke baikanne iroumi, ao ngkana a reke ni bati, ao e na reke naba iai te marurung ma te konabai, i bukin atakin ara Uea ae Iesu Kristo.” (2 Betero 1:8, BK) Ngkai ti na kaatuua taekan riain raonakin ara nanomwaaka n tangiran te Atua.

E Kainnanoaki te Nanomwaaka

5. Bukin tera bwa ti kainnanoa te nanomwaaka?

⁵ Betero ao Bauro a kaotia bwa iai irekereken tangiran te Atua ma te nanomwaaka. (1 Timoteo 6:11, BK) E bati riki nanon te nanomwaaka nakon te teimatoa ni kaaitarai kangaanga. E nanona naba bwainan te taotaonakinnano, te ninikoria ao te nanomatoa, n aki kabuaan te onimaki ngkana ti kaaitarai kataaki, kangaanga, kariri, ke te bwainikirinaki. Ti kaantaningaia bwa ti na bwainikirinaki, kioina ngkai ti maiuakina “tangiran te Atua i nanoni Kristo Iesu.” (2 Timoteo 3:12) Ti riai n nanomwaaka bwa ti aonga ni kakoauaa tangiran Iehova iroura ao ni karikirakei aroaro aika kainnanoaki ibukin te kamaiuaki. (I-Rom 5:3-5; 2 Timoteo 4:7, 8; Iakobo 1:3, 4, 12) Ngkana akea te nanomwaaka iroura ao ti aki kona ni karekea te maiu are aki toki.​—I-Rom 2:6, 7; Ebera 10:36.

6. Tera ae nanonaki n te nanomwaaka ni karokoa te toki?

⁶ E ngae ngke e nakoraoi ara moan waaki, ma e kakawaki riki bwa ti na teimatoa n nanomwaaka iai. E taku Iesu: “Ane nanomwaka ni karokoa te toki ao e na kamaiuaki.” (Mataio 24:13) Eng, ti riai n nanomwaaka ni karokoa te toki, e ngae ngkana te toki e nanona tokini maiura aei, ke tokin te waaki ae buakaka ae ngkai. Ti riai n teimatoa iai ni kakaonimaki nakon te Atua. Ma ngkana ti aki raona ara nanomwaaka n tangiran te Atua, ao ti aki kona ni kakukureia nanon Iehova ao e na aki reke iroura te maiu are aki toki. Ma tera ae nanonaki n tangiran te Atua?

Nanon Tangiran te Atua

7. Tera nanon tangiran te Atua, ao tera are e kaumakira bwa ti na karaoia?

⁷ Tangiran Iehova ae te Atua e irekereke ma karineana, taromauriana, ao te beku irouna, ma nanora ni kani boutokaa riaina n tautaeka i aon bwaai ni kabane. Ti kainnanoa te atatai ae eti ibukin Iehova ao kawaina nako, bwa ti aonga ni kona ni maiuakina tangirana. Ti riai ni kan ataa raoi te Atua. Nanora aei e na kaumakira bwa ti na karekea ara iraorao ae kaan ma ngaia, ae kakoauaki n ara mwakuri ao n anuani maiura. Ti riai ni kakorakoraira ni kataia ni katotonga aroaron Iehova ma anuana. (I-Ebeto 5:1) Tangiran te Atua iroura e kairira bwa ti na kani kakukureia nanon te Atua ni bwaai ni kabane ake ti karaoi.​—1 I-Korinto 10:31.

8. Tera irekereken tangiran te Atua ma taromauriana n tii ngaia?

⁸ Maiuakinan tangiran te Atua iroura e nanona bwa ti riai n taromauria Iehova n tii ngaia, n aki kariaia iangoan ae iai riki te bwai teuana ae kakawaki riki nakoina. E bon riai Teuare karikira, n tangiria bwa ti na moanibwaia taromauriana ao te beku irouna. (Te Tua-Kaua 4:24; Itaia 42:8) Ma e ngae n anne, e aki kairoroira Iehova bwa ti na taromauria, ma e tangiria bwa ti na toro irouna ma kukurein nanora. Tangiran te Atua ae boto i aon ataakin raoi aroarona, e kaumakira bwa ti na kaitiaki ma ni katabui maiura nakoina, ao ni kakoroa bukin ae nanonaki iai.

Karekea Am Iraorao ma te Atua

9, 10. Ti kanga ni karikirakea ma ni kateimatoaa te iraorao ae kaan ma te Atua?

⁹ Imwin kaotan katabuani maiura nakon te Atua n te babetito, ti riai ni kakorakoraa riki ara iraorao ma ngaia. Tangiran te iraorao aei iroura ao nanora ni kani kakaonimaki ni beku iroun Iehova, e kaumakira bwa ti na reita nako ara reirei n ana Taeka ma n iaiangoa nanona. E kamatoaki tangiran Iehova iroura ngkana ti kariaia taamnein te Atua bwa e na mwakuri n ara iango ao n nanora. Ti teimatoa n iangoa ara iraorao ma ngaia bwa te bwai ae kakawaki riki i aoni maiura. E riki Iehova bwa Raoraora ae ti tangiria riki ma ni kani kakukureia n taai nako. (1 Ioane 5:3) E rikirake kukureira n ara iraorao ma te Atua, ao ti kakaitau nakoina, ngkai e reireinira ma ni kaetii aroarora ma te tangira n te tai ae riai.​—Te Tua-Kaua 8:5.

¹⁰ E na totonako ara iraorao ma Iehova ngkana ti aki botumwaaka ni kamatoaa. Ngkana e riki anne ao ti aki kona ni bukina te Atua iai, kioina ngkai “E aki raroa mai roura n tabemanira nako.” (Mwakuri 17:27) Ai kukurei ra ngaira ngkai Iehova e kabebetea aron kawarana n te tataro! (1 Ioane 5:14, 15) E koaua bwa ti riai ni kakorakoraira ni kateimatoaa ara iraorao ae kaan ma Iehova. Ma e buokira bwa ti na kaan riki ma ngaia n te aro ae e anganira bwaai ni kabane ake ti kainnanoi ibukin karikirakean ao kateimatoan tangirana iroura. (Iakobo 4:8) Ti na kanga ni kabonganai raoi bwaai n ibuobuoki aikai?

Kateimatoa Tangiran Bwaai n Taamnei

11. Tera aroarora tabeua are ti kaotiotia iai tangiran te Atua iroura?

¹¹ Tangiran te Atua ae matoatoa iroura e na kaumakira bwa ti na kaotiota korakoran ara tangira, n aron are e taekina Bauro: “Kekeiaki ni kaotiko i matan te Atua ba te aomata ae e a tia ni kakoauaki raoiroina, ao te tia makuri ae e aki mama n ana makuri, ae e tataekina te koaua n te aro ae e eti.” (2 Timoteo 2:15, BK) Kakororaoan aei e kainnanoira bwa ti na kakaonimaki nakon ara babaire ibukin waakinan ara ukeuke n reirei n te Baibara, kaakaean ara botaki, ao te iriri n te mwakuri ni minita. Ti kona ni kawakina ara iraorao ae kaan ma Iehova ngkana ti “aki toki n tataro.” (1 I-Tetaronike 5:17, BK) Te tataro bon te taetae ae nako mai nanora nakon te Atua, ae ti kaota iai tangirana iroura. E na kamamaaraki ara onimaki ao ti na kai mwane n ana kuneman Tatan ngkana ti kakeaa teuana mai buakon bwaai aikai.​—1 Betero 5:8.

12. Ti na kanga n tokanikai i aon taiani kataaki?

¹² Ngkana ti kateimatoa ara onimaki bwa e na korakora ao ngkana ti kammwakuria, ti na buokaki iai bwa ti na tauraoi imwain kataaki nako aika roko iroura. A kona n rangi ni karawawataira taiani kataaki. E kona ni kangaanga riki te nanomwaaka i aan te aki-bwerengaki irouia aomata, te kairiribai, ao te bwainikirinaki, ngkana a riki baikai mairouia ara utu ni kaan, ara koraki, ke kaain rarikira. Raora ni mwakuri ke n reirei, a kona ni kataia n imanonoira bwa ti na urua arora ni Kristian. Te bwarannano, te aoraki, ao te rawawatannano, a kona ni kamamaarai rabwatara, ao e na kangaanga riki iroura te nanomwaaka n taiani kataaki. Ma ti kona n tokanikai i aon kataaki ni kabane ngkana ti teimatoa ni “maeka n itiaki ma n tangira te Atua, ni kaantaninga rokon ana bong te Atua ma ni barekia.” (2 Betero 3:11, 12) Ti kona ni karaoa aei ma te kukurei n aki nanououa bwa e na boni kakabwaiara te Atua.​—Taeka N Rabakau 10:22.

13. Tera ae ti riai ni karaoia bwa ti aonga n teimatoa n tangira te Atua?

¹³ E ngae ngkana Tatan e buakania riki akana maiuakina tangiran te Atua, ma ti aki riai ni maaku iai. Bukin tera? Ibukina bwa “e ataki iroun te Uea te aro ae E na kamaiuia man te kaririaki akana tangiria.” (2 Betero 2:9) Ti riai n “rarawa nakon aki-tangiran te Atua, . . . ao ti na kabane ara bongi ni maiu ni wanawana ma n raoiroi ma n tangira te Atua i aon te aba,” bwa ti aonga n nanomwaaka i aan taiani kataaki ma ni kamaiuaki iai. (Tito 2:12) Ngaira aika Kristian, ti riai n tarataraira raoi bwa e na aki uruaki ke ni kauarerekeaki tangiran te Atua iroura n te mamaara ni kaineti ma tangiran te kaibwabwaru. Ti na iangoi ngkai kataaki tabeua ni kaineti ma aei.

Tarataraira man Kataaki Aika Urua Tangiran te Atua

14. Tera ae ti riai n uringnga ngkana ti kaririaki n te kanibwaibwai?

¹⁴ A mwane aomata aika mwaiti n te kanibwaibwai. Ti kona ni mwamwanaira i bon iroura n “taku ba te bwai ni kareke bwaai tangiran te Atua.” Te iango aei e kona ni kairira bwa ti na kabongana onimakinara irouia raora n te onimaki n te aro ae aki riai. (1 Timoteo 6:5) Ti kona ni kairua n iangoia bwa e raoiroi ae ti na kairoroa raora ni Kristian temanna ae kaubwai bwa e na kariaia ara tango mwane irouna, e ngae ngkana tao ti na aki kona ni kabwara ara taarau irouna. (Taian Areru 37:21) Bon tangiran te Atua ao tiaki kabatiaan te kaubwai, ae “manena . . . ngkai iai taekana n akoi, ae bon ana bwai te maiu aei, ao te maiu are e na roko.” (1 Timoteo 4:8) Kioina ngkai “ti aki ua bwai nako aon te aba, ba ti aki kona te ua-bwai mai aon te aba,” ti riai ni uaiakina riki ‘tangiran te Atua ma te nano ae rau,’ ao “ngkana iai karara ma karabara, ao a na rau nanora iai.”​—1 Timoteo 6:6-​11.

15. Tera ae ti kona ni karaoia ngkana uaiakinan te kakukurei e a moanna ni karibwaa tangiran te Atua iroura?

¹⁵ Uaiakinan moa te kakukurei e kona ni karibwaa tangiran te Atua iroura. Iai ara kangaanga n te itera aei ae ti riai ni waekoa ni kaetia? E koaua bwa iai bonganan te kamarurung ao te kakibotu. Ma, akea bonganan taiani kakabwaia ake a na reke man bwaai aikai ngkana a kabotauaki ma te maiu are aki toki. (1 Ioane 2:25) Ni boong aikai, a mwaiti “taan tangira riki te maie nakon te Atua; taani bakan tangira te Atua, ma a kaakea mwakan tangirana,” ao ti riai ni kararoaira mairouia aomata aikai. (2 Timoteo 3:4, 5) Aomata aika moanibwaia tangiran te Atua a “kaikoa aia tania ae e raoiroi i bukin te tai ae e na roko, ba a aonga ni karekea iai te maiu ni koaua.”​—1 Timoteo 6:19, BK.

16. Tangiran buure raa ae e kona n tuka maiuakinan ana raoiroi te Atua iroura, ao ti na kanga n tokanikai i aon tangiran baikai?

¹⁶ Kabonganan bwaai ni kamanging n te aro ae aki riai, te wene ni bure, ao tangiran te kaibwabwaru, a kona n urua tangiran te Atua iroura. E na katokaki maiuakinan ana kaetieti te Atua ae raoiroi iroura ngkana ti a reke nako ni kakaraoan bwaai aikai. (1 I-Korinto 6:9, 10; 2 I-Korinto 7:1) E nanomwaaka naba Bauro ni buakana rabwatana ae tangira te bure. (I-Rom 7:21-​25) Ti riai ni kakorakoraira ni kamaunaa tangiran te kaibwabwaru mairoura. Ti riai ni kamatoai nanora bwa ti na teimatoa n rarawa nakon te wene ni bure. E tuangira Bauro ni kangai: “Kam na kamate bwain rabatami akana bwain aon te aba, aika te wene ni bure, te kamaira, te kaibabaru, te tangira ae buakaka, ao te mataai ni kanibwaibwai, ae bon taromauriani boua.” (I-Korote 3:5) Kamatean rabwatara nakoni baikai e nanona bwa ti na kakorakorai nanora ni kani kamaunai mairoura. Te botumwaaka n tataro ni bubutii ana ibuobuoki te Atua iai e na buokira n rarawa nakon tangiran te kaibwabwaru, ma ni buokira bwa ti na uaiakina te raoiroi ao tangiran te Atua, e ngae ngkai ti maiu n te aonnaba ae buakaka.

17. Tera ae ti riai n iangoia ibukin te reirei ni kaetieti?

¹⁷ Te bwarannano e kona ni kamamaara nanora n nanomwaaka, ma ni katotonakoa tangiran te Atua iroura. A a tia n rotaki n te bwarannano ana toro Iehova aika mwaiti. (Warekaia Iteraera 11:11-​15; Etira 4:4; Iona 4:3) E kona n rangi ni kakaiaki riki te bwarannano iroura ngkana e irianaki n te marakinnano, ibukina bwa aongkoa ti a kabwainrangaki ke ngkana ti boaaki ke ti anganaki te reirei ni kaetieti ae matoatoa. Ma te boaaki ke te kaetaki boni kaotan tangirara ao tabeakinara iroun te Atua. (Ebera 12:5-7, 10, 11) Ti aki riai n iangoia bwa te reirei ni kaetieti boni karekean kaira, ma ti na iangoia bwa kataneiakira n te raoiroi. Ngkana ti nanorinano, ao ti na butimwaea te reirei ni kaetieti ma n ataa manenana, ngkai ti ataia bwa “te aro ni kamaiu boaa n reirei.” (Taeka N Rabakau 6:23) Te iango aei e na buokira bwa ti na rikirake n te onimaki, ao n uaiakina tangiran te Atua.

18. Tera tabera ni kaineti ma te aki-nakoraoi i marenara?

¹⁸ Te itabarara ao te aki-nakoraoi i marenara e kona n rota buaka tangiran te Atua iroura. Bwaai aikai a kona ni karawawataira ke ni kairira bwa ti na rawa n iraorao ma raora n te onimaki, ae te aro ae aki wanawana. (Taeka N Rabakau 18:1) Ma ti riai n uringnga ae kaiboan te un ke te kairiribai nakoia aomata tabeman, e kona ni kamamaaraa ara iraorao ma Iehova. (Nakoaia Ibonga 19:18) E boni koaua bwa “ane aki tangira tarina ae e a tia n noria, ao e aki kona n tangira te Atua ae e tuai n noria.” (1 Ioane 4:20) E katereterea Iesu n ana Kabwarabwara i aon te Maunga, ae e rangi ni kakawaki bwa ti na waekoa ni kaetii kangaanga ake a riki i marenara ma aomata. E tuangia taan ongora irouna ni kangai: “Ma ngaia aei, ngkana ko uota am karea nakon te baonikarea, ao ngkana tao ko uringa tarim iai, ba iai ana bwai ae e kanaeng i roum iai, ao ko na kitana am karea iai i rarikin te baonikarea, naako moa, raoiakina tarim, ao rimwi ko na oki n anga am karea.” (Mataio 5:23, 24) Te kabwara bure e kona ni kabebetea te kangaanga ae riki man taeka ke mwakuri aika kammarakinano. E kona n reke te iooki ngkana ti kabwara ara bure ma ni kariaia ae ti a tia ni karaoa ae aki riai. Iai riki ana reirei Iesu ni kaineti ma kaetan te aki-nakoraoi. (Mataio 18:15-​17) Ai kukurei ra ngaira ngkana ti tokanikai ni kaeta te aki-nakoraoi!​—I-Rom 12:18; I-Ebeto 4:26, 27.

Kairaki n Ana Banna ni Katoto Iesu

19. Bukin tera ngkai e kakawaki bwa ti na kakairi n ana katoto Iesu?

¹⁹ Ti na bae n rotaki n taiani kataaki, ma a aki riai ni kabwakaira man te kaboo birimwaaka ibukin te maiu are aki toki. Uringnga ae Iehova e kona ni kamaiuira man taiani kataaki. Ngkana ti “kaki rawawatara ni kabane,” ma ni “botumwaka ni biribiri n te kabobirimwaka ae kamenaki i mwaira,” ao ti “na tarataraa Iesu are te tia karika ara onimaki, ao te tia kakoroa.” (Ebera 12:1-3) Ti na buokaki bwa ti na kabatiaa tangiran te Atua ma maiuakinana ngkana ti nenera raoi ana katoto Iesu ma ni mwakuri korakora ni kataia ni katotonga ana taeka ao aroarona.

20. Tera kakabwaiara ae kona n reke man nanomwaakara ao tangiran te Atua?

²⁰ A uaia ni buokanibwai te nanomwaaka ao tangiran te Atua ni kamatoa kamaiuara. Ngkana ti kaotiotii aroaro aika kakawaki aikai, ti na buokaki bwa ti na kakaonimaki ni beku iroun te Atua. E ngae ngkana ti kataaki, ma ti na boni kukurei ngkai ti namakina tangirara ao kakabwaiakira iroun Iehova, ibukina bwa ti a tia n nanomwaaka ao ti a maiuakinan tangirana iroura. (Iakobo 5:11) E karaua nanora Iesu ni kangai: “Kam na nanomaka, ao kam na kamaiuaki.”​—Ruka 21:19, BK.

Tera Am Kaeka?

• Bukin tera bwa e kakawaki te nanomwaaka?

• Tera nanon tangiran te Atua, ao e na kanga ni kaotiotaki?

• Ti na kanga ni karekea ma ni kateimatoaa te iraorao ae kaan ma te Atua?

• Baikara bwaai tabeua ake a kona n urua tangiran te Atua iroura, ao ti na kanga ni kararoaira mai iai?

[Taamnei n iteraniba 20]

E kaotiotaki tangiran te Atua n aaro aika mwaiti

[Taamnei n iteraniba 22]

Tarataraiko man bwaai aika a kona n urua tangiran te Atua iroum