E Kakawaki Ataakin Nanon Taiani Kanikina!

“N te moantai ao n au iango bon tii te maraki n atu are e itua natira te mwaane ae Andreas. Ma e a waekoa n aki rin kanana, ao e a rangi ni korakora kabuebuena. E a rikirake n rangi ni korakora riki marakin atuna, ao I a moanna n raraoma. Ngke e a oki kainnabau, ti a uota Andreas nakon te taokita. E tuoi baika riki nakoina te taokita, ao e karina Andreas n te oo-n-aoraki n te tai naba anne. E a kakaiaki riki aorakina nakon are tii te maraki n atu. E a reke irouna aorakin te kaburoro ae kamamate ae te meningitis. E bwainnaorakiaki ao e a manga marurung.”​—Akanne ana taeka tinan Andrea ae Nei Gertrud mai Tiaman.

TITEBOO te bwai are e riki nakon Nei Gertrud ma te bwai ae e riiriki nakoia kaaro aika mwaiti. A nori kanikina aika a kaotia bwa tao e aoraki natiia. E ngae ngke a aki bane ni kakaiaki aoraki ni kabane, ma a na kaaitara ma te nanokawaki kaaro ngkana a kakeai bongan kanikina aika kaotia bwa a aoraki natiia. Norakin te kanikina ao karaoan ae riai iai, e kona ni karekea te ibuobuoki nakon are e aoraki. E kakawaki karaoan anne.

E rangi ni koaua aei ni kaineti naba ma bwaai riki tabeua i rarikin te aoraki. Te katoto teuana ae kaineti raoi ma aei, bon te kabuanibwai n te tsunami are e riki n Ritembwa 2004 n aaba ake a iekaki ake a mena n uakaan ma te marawa ae te Indian Ocean. A kunea n aia kakaae botaki n tautaeka n aaba aika Aotiteria ao Hawaii bwa e a riki mwaeiein te aba ae moan te korakora i Sumatra, ao a kanamakina ae e na reke te kangaanga ae korakora mai iai. Ma e ngae n anne, ao bon akea te kawai n itoman ma aomata ake a maeka n taabo ake e na riki iai te kabuanibwai anne, ibukin kauringakiia. Ao n tokina, e raka i aon 220,000 mwaitiia aomata aika bua maiuiia iai.

Kanikina Aika Rangi ni Kakawaki Riki

Ni menan Iesu Kristo i aon te aba ao e reireinia taan ongora irouna, aroia are a na karaoia n te tai are a nori iai kanikina tabeua. E taekina te bwai ae rangi ni kakawaki. E taekina ae kangai te Baibara: “Ao a roko Baritaio ma Tarukaio ni kataia, ao a butia ba E na kaota te kanikina teuana mai karawa nako ia. Ao E kaekaia ni kangai, Ngkana e a tairiki, ao kam kangai, E na raoi, ba e uraura rarikini karawa. Ao ngkana e a tiba ingabong, ao kam kangai, E na buaka te bong aei, ba e uraura rarikini karawa, ao e roro. Taani mamana-te-aba, kam kona n atai kanikinaeani matani karawa; ma kam aki kona n atai kanikinaeani boong aikai.”​—Mataio 16:1-3.

N taekinan “kanikinaean boong aikai,” e kaotia Iesu bwa a riai taan ongora aika I-Iutaia n te moan tienture, n ataa kakawakin te tai are a maeka iai. E a kaan te tai are e nang kaaitara iai te waaki n Iutaia ma te kabuanibwai ae korakora. Tabeua te bong imwain maten Iesu, ao e taekina te kanikina riki teuana ae kanikinaean menana irarikia aomata. E rangi ni kakawaki te bwai are e taekinna n te tai arei, ibukia aomata ni kabane ni boong aikai naba.