Antai te Atua?
KO NA kanga ni kaekaa te titiraki anne? A taku aomata tabeman bwa a rangi ni kinaa raoi te Atua bwa kaanga raoraoia ni koaua. Ma tabeman a iangoa te Atua bwa kaanga aia koraki ae raroa nako mairouia. A kakoauaa ae bon iai ngaia ma e karako aia atatai ibukina. Ngkana ko kakoauaa te Atua ko na kanga ngkanne ni kaekai titiraki aika karinanaki i nano aikai?
1. Bon te aomata ni koaua te Atua ke tii te mwaaka?
2. Iai aran te Atua?
3. Bon Iesu te Atua ae Moan te Mwaaka?
4. E bon tabeakinai te Atua?
5. E boni butimwaei aeka n taromauri nako te Atua?
Ngkana ko tuangia aomata tabeman bwa a na kaekai titiraki aikai ao tao ko na boo ma kaeka aika kamimi ma ni kakaokoro nako. Maroaka are a a tia n rio karaki aika akea koauaia ao iango aika kairua ni kaineti ma te Atua.
A Rangi ni Kakawaki Kaeka
Ngke e tabe Iesu Kristo ni kataetaea te aine ae onimakina te Atua are e kaitiboo ma ngaia i etan te mwanibwa ao e katuruturua iai riain ataan te koaua ibukin te Atua. E kakoauaa te aine ae te I-Tamaria aei bwa bon te burabeti Iesu. Ma iai te bwai ae katabeaiangaa nanona. E boni kaokoro ana Aro ma ana Aro Iesu. Ngke e kaota tabeaiangana neiei ao e kaekaa Iesu ni kangai: “Kam taromauria are kam aki ataia.” (Ioane 4:19-22) E teretere man aei bwa e reirei Iesu bwa a aki bane ni kinaa te Atua aomata aika taua te Aro.
E nanonaki n ana taeka Iesu bwa akea temanna ae kona ni kinaa te Atua? Tiaki ngaia anne. Bwa e manga reitia nako riki Iesu nakon te aine aei ni kangai: “A na taromauria te Tama iai n te tamnei ma te koaua taan taromauri ni koaua: ba E tangiriia taan taromauria aika ai aroia aikai te Tama.” (Ioane 4:23) Ko mena i buakoia te koraki ake a taromauria te Atua “n te tamnei ma te koaua”?
E bon rangi ni kakawaki ibukim bwa ko na ota raoi ni kaekaan te titiraki anne. Bukin tera? Ibukina bwa e katuruturua Iesu riaini karekean te atatai ae eti ngke e tataro ni kangai: “Aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.” (Ioane 17:3) Eng, e rangi n irekereke kantaningaan te maiu ae na roko iroum ma ataakin te koaua ibukin te Atua!
E boni koaua bwa ti kona n ataa te koaua ibukin te Atua? Eng, e boni koaua! Ko na kanga ngkanne ni kakaaea? E taekina ae kangai Iesu i bon ibukina: “Boni Ngai te kawai, ao te koaua, ao te maiu: akea ane nako n te Tama, ba ti i Rou.” (Ioane 14:6) E tuangira naba ni kangai: “Akea ae ata te Tama, ma ti te Nati ae ataia, ao ane E kani kaotia te Nati nako ina.”—Ruka 10:22.
Mangaia are e reke kiingini kinaakin te Atua n ana reirei nako Iesu Kristo ae Natin te Atua. Ni koauana, e berita nakoira ni kangai Iesu: “Ngkana kam botumaka n taua au taeka, ao bon au reirei ni koaua ngkami iai; ao ane kam na ata te koaua, ao e na kainaomataingkami te koaua.”—Ioane 8:31, 32.
E na kanga ngkanne Iesu ni kaekai titiraki aika nimaua aika tabekaki mai moa?
[Taamnei n iteraniba 4]
Ko taromauria te Atua ae ko aki bati ni kinaa?