A na Tautaeka Aomata Tabeman, A na Kakabwaiaaki Aomata Aika Mwaiti
NI MOA man aia bong abotoro, e a tia te Atua n rineia mai buakoia botannaomata te mwaiti ae tianaki aika Kristian ake a kakaonimaki bwa a na natinaki irouna. Ibukina bwa a rinanon te bitaki ae tabwanin raoi te koraki ake a natinaki irouna, e a kabwarabwaraaki ngkanne te bitaki aei n Ana Taeka te Atua bwa bon te manga bungiaki. Te kantaninga n aei boni katauraoaia ana toro te Atua aika manga bungiaki bwa a na riki bwa taan tautaeka i karawa. (2 Timoteo 2:12) A boni kautaki man te mate nakon te maiu are i karawa bwa a aonga n riki bwa taan tautaeka. (I-Rom 6:3-5) Ao mai karawa ngkanne a na “tauu taeka i aonaba” ma Kristo.—Te Kaotioti 5:10; 11:15.
Ma e taekinaki n Ana Taeka te Atua bwa iai tabemwaang riki i rarikin te koraki aika manga bungiaki ake a na karekea te kamaiuaki n aki totoki. E taekinaki n te Baibara (n te Koroboki ae Tabu n te Taetae n Ebera n ikotaki naba ma te Koroboki ni Kristian ae Tabu n te Taetae ni Kuriiti) bwa e na kamaiuia uakoraki te Atua ni kaineti ma ana kantaninga. E karako mwaitiia te korakina ake taan tautaeka aika a maiu i karawa, nakon are te korakina aika rangi ni mwaiti ake a maeka i aon te aonnaba, ake a tautaekanaki irouia aika karako mwaitiia. N te katoto, taraa ae koreaki iroun te abotoro Ioane nakoia raona n te onimaki aika a a tia n rinanon te manga bungiaki. E taekina ae kangai ni kaineti ma Iesu: “Boni Ngaia te kareanraoi ni kabara ara bure, ao tiaki ti ara bure [ae te koraki ae karako mwaitiia], ma aia bure naba kaain aonaba ni kabaneia [ae te koraki ae rangi ni mwaiti].”—1 Ioane 2:2.
N aron anne e korea ae kangai te abotoro Bauro: “Ba bwaai ni kabane aika karikaki [ae te koraki ae rangi ni mwaiti] a ingainga ni kaantaninga kaotaia natin te Atua [ae te koraki ae karako mwaitiia].” (I-Rom 8:19-21) A na kanga n ota aomata n taeka akanne ake mairoun te abotoro Ioane ao Bauro? N te aro aei: Te koraki aika manga bungiaki a na riki bwa taan tautaeka i karawa. Tera te kantaninga ae a na kakororaoia i karawa? A na karekei kakabwaia aika akea tokia nakoia aomata aika mirion ma mirion mwaitiia. A na aantaeka aomata aikai nakon ana tautaeka te Atua bwa a na maeka i aon te aonnaba. Ngaia are e reireinia taan rimwina Iesu bwa a na tataro ni kangai: “E na roko ueam. E na tauaki am taeka i aonaba, n ai aron tauana i karawa.”—Mataio 6:10.
E kona naba n noraki te koaua aei n te Koroboki ae Tabu n te Taetae n Ebera ni kaineti ma te kamaiuaki ae a anganaki koraki aika uakoraki. Nora te katoto n te baere e taekinna Iehova nakon ana bakatibu Iesu ae Aberaam ni kangai: “A na bane botanaomatan aonaba [ae te koraki ae rangi ni mwaiti] ni kabaia iroun am kariki [ae te koraki ae karako mwaitiia].” (Karikani Bwaai 22:18) Eng, a na karekei kakabwaiaaia natannaomata ni kabane rinanon ana “kariki” Aberaam.
Antai te “kariki” anne? Bon Iesu Kristo ao n raonaki irouia te koraki ake a a tia n rinanon te manga bungiaki aika natinaki iroun te Atua. E kabwarabwaraa ni kangai te abotoro Bauro: “Ngkana ana bwai Kristo ngkami, ao ana kariki naba Aberaam ngkami.” (I-Karatia 3:16, 29) Ao baikara kakabwaia aika a reke nakoia aomata mai buakoia natannaomata ni kabane rinanon te “kariki”? Bon te mwioko ae rine bwa a akoaki iroun te Atua ao a karekea te maiu n aki totoki i aon te aonnaba ae bwaretaiti. E taetae ni burabeti te tia areru ae Tawita ni kangai: “A na abana te aba akana raoiroi, Ao a na mamaeka iai n aki toki.”—Taian Areru 37:29; Itaia 45:18; Te Kaotioti 21:1-5.
E koaua bwa e katauraoaki te tautaeka i karawa ibukia tabeman bwa taan tautaeka iai, ma a na mwaiti aika a na karekea te kakukurei man te tautaeka anne, ae te maiu n aki totoki i aon te aonnaba ae irianaki ma kakabwaia ni kabane. Ko bia mena ngkoe ma am utu i buakoia te koraki aika a na karekei kakabwaia aika aki totoki ake e na karokoi Ana Tautaeka n Uea te Atua.
[Taamnei n iteraniba 12]
A na karekea te maiu n aki totoki i aon te aonnaba aomata aika mirion ma mirion mwaitiia. Ko na mena naba ngkoe i buakoia?