Aia Titiraki Taani Wareware . . .
Ko riai ni kakoauaa te Temanna n teniman ngkana ko kan riki bwa te Kristian?
▪ Ni bokin te kauarinan n reirei ae te World Religions in Denmark ae boreetiaki n 2007 ao a kabwarabwaraaki iai Ana Tia Kakoaua Iehova bwa bon te botaki ni Kristian ae karako mwaitiia ake a maiuakina raoi ana reirei te Baibara. Ni koauana, bon te katenua n Aro ni Kristian Ana Tia Kakoaua Iehova ae rangi ni bubura i Denmark.
Ma e ngae n anne, e korakora kabuakakaan ana iango te tia korea te boki n reirei aei iroun te ebikobo man te Aro ae te Danish National Church, ngkai e karina taekaia taani Kakoaua i nanon te boki aei. Bukin tera? E taku te ebikobo aei: “I tuai mani kaitiboo ma te tia rabakau i aon te Baibara ae taekinia [Ana Tia Kakoaua Iehova] bwa Kristian. A kakewea te Temanna n teniman ae te koaua ae nibwan te onimaki n te Aro ni Kristian.”
E katerea raoi te tia korea te boki aei ae te tia rabakau i aoni waakin te Aro ae Nei Annika Hvithamar, bwa ngkana a titirakinaki aomata bwa e aera ngkai a iangoiia bwa Kristian ngaiia ao a burenibwai n kaeka bwa iai irekereken anne ma kakoauaan te Atua ae te Temanna n teniman. Irarikina, n te mwakoro teuana n te boki n reirei ae atunaki n “Bon te Kristian Ngkoe?” ao e taekinaki iai ae kangai: “Te reirei ae te Temanna n teniman bon teuana mai buakon aia reirei Kristian aika rangi ni kangaanga.” E a manga tomaia ni kangai: “E kangaanga n taai nako te kabwarabwara nakoia Kristian aika tuai n rin n reirein te Aro bwa bukin tera ngkai Atuaia Kristian bon tii temanna ao tiaki teniman.”
E rangi ni mataata ao ni bebete ana reirei te Baibara ibukin te Atua ao Iesu. E kai ota te aba iai. Bon akea te taeka ae “Temanna n teniman” ke te aeka n rongorongo anne n Ana Taeka te Atua. E kamatataaki n te Baibara bwa Iesu Kristo bon Natin te Atua ae te moanibung. (I-Korote 1:15) E taekinaki naba iai bwa Iesu bon “te tia raoi i marenan te Atua ma aomata.” (1 Timoteo 2:5) E taekinaki ae kangai n te Baibara ibukin te Tama: ‘Ngkoe ae Iehova aram, bon tii Ngkoe Teuare Moan te Rietata i aonnaba ni bane.’—Taian Areru 83:18, BG.
A kakoauaa Ana Tia Kakoaua Iehova bwa e rangi ni kakawaki onimakinan Iesu. (Ioane 3:16) Ibukin aei, a a mutiakina ana kaetieti Iesu ae kangai: “E koreaki ae kangai, ‘Ko riai n taromauria Iehova ae Atuam, ao ko riai n toro irouna n tii ngaia.’” (Mataio 4:10) Ni koauana, e kona n atongaki bwa te Kristian ane e kakorakoraa n ongeaba n ana kaetieti Iesu.
[Kabwarabwaraan n iteraniba 8]
“Te reirei ae te Temanna n teniman bon teuana mai buakon aia reirei Kristian aika rangi ni kangaanga”