A na Bane Aomata Aika Raoiroi n Nako Karawa?
Imwin ana kabanea n tai n amwarake Iesu ma ana abotoro n te tairiki are imwain tiringana, e berita nakoia bwa e na angania kaniwangaia ae aia tabo ni maeka i karawa. E taku: “A mwaiti taabo ni maeka n ana auti Tamau. N na aki tuangingkami ngke arona bwa tiaki te koaua, ma e boni koaua ibukina bwa N nangi nako ni katauraoa te tabo ibukimi.” (Ioane 14:2) E aera ngkai e na katauraoa aia tabo Iesu i karawa? Tera ae a na karaoia ikekei?
Iai te mwioko ae okoro ae e iangoia Iesu ibukia taan rimwina. E taku n te tairiki naba anne: “Boni ngkami aika kam memena ma ngai i buakoni kataakiu, ao I karaoa te berita ma ngkami ibukin te tautaeka n uea, n ai aron Tamau ni karaoa te berita ma ngai.” (Ruka 22:28, 29) E berita te Atua nakon Iesu bwa e na riki bwa te Uea ae na katauraoa te bwai teuana ae moan te kainnanoaki irouia botannaomata, ae bon te tautaeka ae raoiroi. E na kainaomataia aomata man te rawawata Iesu ao ni kamaunaia ake a babakanikawaiia. E ngae ngke a na buta “nako tabon aonaba” aomata aika aantaeka iroun Iesu, ma e na boni mena ana kaintokanuea i karawa.—Taian Areru 72:4, 8, BK; Taniera 7:13, 14.
E ngae n anne, e na aki tautaeka Iesu n tii ngaia. Mangaia are, e berita nakoia ana abotoro ibukin aia tabo i karawa. Boni ngaiia aika moan rineaki bwa a na “kairiri bwa ueea n tautaekana te aonnaba.”—Te Kaotioti 5:10.
Iraman aika a na nako karawa? N aron ae noraki n tautaeka nako, a karako naba taan tautaeka n ana Tautaeka n Uea te Atua i karawa ni kabotauaki ma aomata nako aika mena i aani mwaakana ni kairiri. E taku Iesu nakoia ake e na tautaeka ma ngaiia: “Tai maaku ngkami ae te nanai ae uarereke, bwa e a tia ni kariaia Tamami bwa e na anganingkami te tautaeka n uea.” (Ruka 12:32) N tokina, mwaitiia kaain te “nanai ae uarereke” anne bon 144,000. (Te Kaotioti 14:1) E karako te mwaiti anne ngkana e kabotauaki ma mirion ma mirion ake a na karekea te maiu ae akea tokina i aon te aba, bwa aomata aika kakaonimaki n aantaeka nakon te Tautaeka n Uea.—Te Kaotioti 21:4.
Mangaia are, a bon aki bane aomata aika raoiroi n nako karawa. E kamataataa taekan te Uea ae raoiroi ae Tawita te abotoro Betero ni kangai: “E aki rierake nako karawa Tawita.” (Mwakuri 2:34) Bon te mwaane ae raoiroi Ioane te tia Bwabetito. Ma e ngae n anne, e kaotia Iesu bwa e na aki karietataaki bwa e na tautaeka bwa te uea i karawa. E taku Iesu: “E tuai ni kaoti mai buakoia aomata aika bungiaki, temanna ae kakannato riki nakon Ioane te tia Bwabetito. Ma e kakannato riki nakoina ane moan te mangori n te tautaeka n uea ae bwaini karawa.”—Mataio 11:11.
E na Reke Iroum Kaniwangaia Aomata Aika Raoiroi?
Tera ae e riai ni karaoia te aomata ibukini karekean te kaniwanga ae te maiu n aki toki i aon te aba? E taku Iesu: “E rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.” (Ioane 3:16) Noria bwa e kairaki te Atua n tangiraia kaain te aonnaba bwa e na katauraoa te maiu ae aki toki nakoia aomata nako, ma tii ake a “onimakinna” aika a na reke irouia te kaniwanga anne.
E riai ni boto i aon te atatai ae eti te onimaki. (Ioane 17:3) Ko kona ni kaotiko bwa ngkoe te aomata ae raoiroi ngkana ko reiakina ae bati riki n ana kantaninga Iehova ibukia aomata. Kariaia onimakinan te bae ko reiakinna bwa e na kairiko ni karaoa te mwakuri. Ao karaua nanom bwa e tauraoi ibukim te kawai nakoni karekean te maiu ae akea tokina.
[Te Bwaoki n te iteraniba 7]
Tera ae Taekinaki n te Baibara?
Titiraki:
Tera ae riki nakoia aomata aika raoiroi ni mateia?
Kaekaana:
“A bon aki ata te bwai teuana akana mate.”—TE MINITA 9:5, BG.
Titiraki:
Tera aia kantaninga aomata aika raoiroi ibukin taai aika imwaia?
Kaekaana:
“E na roko te tai are a na bane iai n ongo bwanaana aomata ake a mena i nanon taian ruanimate ao a na otinako.”—IOANE 5:28, 29.
Titiraki:
A na maeka ia angia aomata aika raoiroi?
Kaekaana:
“A na abana te aba akana raoiroi, Ao a na mamaeka iai n aki toki.”—TAIAN ARERU 37:29, BG.