Tera Aroni Karawa?

A iangoia aomata tabeman bwa e aki kona n ataaki aroni karawa bwa akea ae e a tia n ruo mai iai ao ni kona n tuangira taekana. Tao a mwaninga are e kangai Iesu: “I ruo mai karawa.” (Ioane 6:38) E taetae naba nakoia mataniwi n Aaro tabeman ni kangai: “Kaain naano ngkami, kaain eta ngai.” (Ioane 8:23) Tera ana taeka Iesu ibukini karawa?

E kamatoaa n taekinna Iesu bwa karawa bon ana tabo ni maeka Iehova. E wetea te Atua ni kangai: “Tamau are i karawa.” (Mataio 12:50) Ma e kakamanena te taeka ae “karawa” Iesu n aaro aika bati. N te katoto, e taekina “karawa” bwa annang ngke e kangai: “Taraiia raoi mannikiba i annang.” (Mataio 6:26) Ma e ngae n anne, e maeka Iehova i etan riki annang. E taekinaki ae kangai n te Baibara: “Boni Ngaia ae tekateka i etani mronron n aonaba.”​—Itaia 40:24, BG.

E maeka i buakon itoi te ‘Tama are i karawa’? E atongaki naba te iuniweeti ae kona n noraki n te Koroboki ae Tabu bwa “karawa.” N te katoto, e korea ae kangai te tia areru: “Ngkana I taratarai am karawa ake ana makuri tabonibaim, Ma namakaina ma itoi, ake Ko motiki aroia; Ao tera te aomata, ngkai Ko ururingnga?”​—Taian Areru 8:3, 4, BG.

Ai ngaia are, e bon aki maeka Iehova ae te Atua i nanon te iuniweeti are e karaoia, n aron naba ae e aki maeka te kabentaa i nanon te kabwate ae e karaoia. Mangaia are, ngke e katabua te tembora ibukin Iehova te Uea ae Toromon i Ierutarem ao e taku: “E na boni maeka te Atua i aon te aba? Noria, e aki kona karawa, ma karawa ni karawa ni kamwaneauako; ao ai karako ra riki mwaneauam n te auti aei ae I a tia ni kateia!” (1 Uea 8:27, BG) Ngkana e aki maeka Iehova n te karawa ae ti kona n noria, karawa ngkanne ae nga ae e maeka iai?

E ngae ngke a a tia aomata ni kamatebwaia karawa ni bwaai ni kataratara aika mwaakaroiroi ao a mwananga tabeman nako tinanikun te aonnaba, ma e teimatoa ni koaua te bae taekinaki n te Baibara ae kangai: “Akea te aomata ae e a tia n nora te Atua n te tai teuana.” (Ioane 1:18) E kamataataa bukin anne Iesu ni kangai: “Bon te Taamnei te Atua.”​—Ioane 4:24.

Bon te aeka ni maiu ae rangi n rine riki te taamnei nakoni maiun te aomata. E aki karaoaki te taamnei mani baika kona n noraki ao n ringaki n aron te iriko ao te raraa. Ngaia are, ngke e taekinna Iesu bwa e taneiai ni maeka i rarikin Tamana i “karawa,” e nanonna bwa e taneiai ni maiu ngkoa n te aeka ni maiu ae mimitong riki nakon te maiu n rabwata. (Ioane 17:5; I-Biribi 3:20, 21) E aranaki n te Baibara te tabo are e mamaeka iai Iesu ngke te taamnei bwa “karawa.” Tera aron te tabo aei? Tera ae riiriki iai?

Nneni Mwakuri Aika Kakukurei

E kabwarabwaraaki karawa n te Baibara bwa te tabo ae rangi ni bati te mwakuri iai. E taekinaki naba bwa a maeka iai mirion ma mirion anera aika kakaonimaki. (Taniera 7:9, 10) A kakaokoro aroaroia anera aikai n tatabemania nako. Ti kanga n ataa anne? N taiani karikibwai aika kona n noraki ni kabane ao a aki kona n titeboo raoi baika maiu aika uoua, ngaia are ti a kona ni kakoauaa ae e korakora naba te kakaokoro i karawa. E kamimi bwa a katiteuanaaki ni mwakuri kaaini karawa aikai ni kabane, ae te aro ae rianako kaokorona ma te aonnaba ni boong aikai ae a burenibwai ni mwakuri iai aomata ma te boonnano.

Nora kamatataan te mwakuri i karawa n te Baibara. “Karaoiroa Iehova, ngkami aika ana anera: Ngkami aika kam bati ni korakora, aika kam taua ana taeka, N ongo bwanan ana taeka. Kam na bane ni karaoiroa Iehova, ngkami aika ana taanga; Ngkami aika tabonibaina, aika kam karaoa ae E tangiria.” (Taian Areru 103:20, 21, BG) Mangaia are, a rangi ni bati mwakuri aika karaoaki i karawa. Ti kona ni kakoauaa raoi bwa bon te mwakuri ae karaunano.

Iai rongorongoia anera bwa a a kamani kukukurei ni beku imwain naba karikan aonnaba. N aron ae taekinaki n te Baibara, a “botaki n anene ni kimareirei” ao n “takaakaa ni kakatonga” natin te Atua, ngke e kawenea aan aonnaba Iehova. (Iobi 38:4, 7, BG) E kakabwaiaaki temanna mai buakoia natin te Atua i karawa bwa e kaai ni karikii nikirani bwaai ni kabane ma te Atua. (I-Korote 1:15-17) Tao a kona n rio am titiraki ibukini karawa ao te botannaomata man te kabwarabwara ae anainano ni kaineti ma te mwakuri ae kakukurei i karawa.

A Karikaki Aomata Bwa A na Nako Karawa?

E teretere raoi bwa a aki karikaki te moani mwane ao n aine bwa a na kabatiai aia kariki i karawa, kioina ngke a a kamani beku anera ibukin te Atua i karawa imwaini kawenean aan te aonnaba. Ma e kangai te Atua nakon te moan taanga anne: “Kam na bati ni kariki, ao kam na kabatiaingkami, ao kaona aonaba.” (Karikani Bwaai 1:28, BG; Mwakuri 17:26) Bon Atam ae moani karikaki ma te aeka ni maiu ae boou i aon te aba, ao e kona n ataa te Atua ao ni kakaonimaki ni beku irouna. E na bon riki bwa tamaia botannaomata aika aia tabo ni maeka te aonnaba. “Taiani karawa bon ana karawa Iehova; Ma E angania natiia aomata aonaba.”​—Taian Areru 115:16, BG.

N aron ae riiriki, a aki kani mamate aomata kioina ngkai a aki karikaki bwa a na mate. E atonga te mate te Atua ngkoa nakon Atam bwa tuuaana tii ibukin ana aki ongeaba. E na bon aki mate Atam ngke arona bwa e ongeaba.​—Karikani Bwaai 2:17; I-Rom 5:12.

Ma ti aki mimi ngkai akea te bae e taekinna te Atua nakon Atam ibukin te nako karawa. Ngaia are, te aonnaba bon tiaki te tabo ae a na tuoaki iai aomata bwa a tau ibukin te maiu i karawa. E karikaki te aomata bwa e na maeka n aki toki n te aonnaba, ao e nang kakororaoaki ana kantaninga te Atua anne n taai aika imwaira. E beritanaki ae kangai n te Baibara: “A na abana te aba akana raoiroi, Ao a na mamaeka iai n aki toki.” (Taian Areru 37:29, BG) E teretere iai bwa ni moani karikaia aomata ao a aki karikaki bwa a na nako karawa. Ma e aera ngke e beritana te maiu i karawa Iesu nakoia ana abotoro? E nanonna Iesu bwa a na bane aomata aika raoiroi n nako karawa?