Ko Ataia?

Tera te tua ibukin te karemrem, ao antai ake a kakabwaiaaki iai?

▪ A katabuaki taan ununiki n te Tua Rinanoni Mote bwa a na kababanei uaan abaia n tain te tai. A riai te koraki ake a taia abaia n aki kababanea maninganingan aia tawaana. A riai naba te koraki ake a taia uaan aia kureebe n aki ikotii ake a maenako ke n okiri uaa ake a tuai n tai ni moan rokoia. Ao te koraki ake a ororei kaai ake oriwa, a riai ni katikui uaa ake a tuai ni bwaka. (Nakoaia Ibonga 19:9, 10; Te Tua-Kaua 24:19-21) A a kona ngkanne ni karemrem ke n rikorikoi nikiran uaa n tain te tai aomata aika maiu ni kainnano, aine ake a a tia ni mate buuia, ao ianena.

A bane ni kakabwaiaaki I-Iteraera n te tua ibukin te karemrem aei. A kaungaaki iai taan ababa bwa a na tituaraoi, a na aki bangaomata, ao a na onimakina ana kakabwaia te Atua. E karikirakeaki te mwakuri korakora irouia ake a karemrem, bwa bon te mwakuri ae kangaanga karaoana. (Ruta 2:2-17) E kakoauaaki raoi n te karemrem bwa a na aki baki ake a maiu ni kainnano ke n riki bwa karawawataaia kaain te tabo anne. E totokoa naba namakinan ae akea uaaia ngkai a bububutii ke ni boto maiuia i aoni bwaai n tangira.