Karekea Reireiam Man Ana Taeka Te Atua

Bukin Tera Bwa Iai Ana Botaki te Atua ae Baireaki Raoi?

Iai titiraki n te kaongora aei aika ko bae n tia n tabeki ao a kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.

1. Bukin tera bwa e botiia ao ni baireia raoi I-Iteraera te Atua?

E botiia ao ni baireiia raoi kanoan te baatua are Aberaam te Atua nakon te natannaomata teuana ao e angania tuua aika bati. E arana te natannaomata anne bwa Iteraera ao e mwiokoia ibukini kamanoan te taromauri ae koaua, ma ana Taeka ae te Koroboki ae Tabu. (Taian Areru 147:19, 20) Mangaia are a bane ni kakabwaiaaki natannaomata nako.—Wareka Karikani Bwaai 22:18.

E rineiia I-Iteraera te Atua bwa taani kakoaua ibukina. A kakabwaiaaki n ongeabaia n ana tua te Atua. (Te Tua-Kaua 4:6) Ti kona n atai baika bati riki ibukin te Atua ae koaua n neneran rongorongoia I-Iteraera rimoa.—Wareka Itaia 43:10, 12.

2. Bukin tera bwa a botakaki ao ni baireaki raoi Kristian?

Imwin tabeua te tai, e a bua akoaia I-Iteraera iroun te Atua ao e a onea mwin te natannaomata anne n te ekaretia ni Kristian. (Mataio 21:43; 23:37, 38) Bon taani kakoaua ibukin te Atua I-Iteraera n taai ake rimoa. Ni boong aikai, a a beku bwa taani kakoaua ibukin Iehova Kristian ni koaua.—Wareka Mwakuri 15:14, 17.

E botiia ao ni baireia raoi taan rimwina Iesu bwa a na uarongorongoa taekan Iehova ao ni karekeia taan rimwini Kristo mai buakoia natannaomata nako. (Mataio 10:7, 11; 24:14; 28:19, 20) E nang roko n tokina te mwakuri aei. N taai aikai ao Iehova e katiteuanaia n te taromauri ae koaua mirion ma mirion mai buakoia natannaomata nako. (Te Kaotioti 7:9, 10) A botakaki naba ao ni baireaki raoi Kristian ni koaua bwa a aonga n ikaungaunga ao n ibuobuoki i marenaia. Iai aia kaetieti ibukin te reirei n te Baibara ae tii te arona n aia botaki ni katobibia te aonnaba.—Wareka I-Ebera 10:24, 25.

3. E kanga ni moan tei te botaki ae Ana Tia Kakoaua Iehova n taai aikai?

E moan tei te botaki ae Ana Tia Kakoaua Iehova ae baireaki raoi n taai aikai n 1870 tabun. A moana manga kakaaeani koaua man te Baibara ake a a maan ni bua, te botaki ae uarereke ae kaaina taan reirei n te Baibara. A ataia ae Iesu e botiia ao ni bairea raoi te ekaretia ni Kristian ibukin te uarongorongo. Ngaia are a a moana iai te mwakuri n uarongorongo ae okoro ibukin te Tautaeka n Uea ni katobibia te aonnaba. N 1931 a a butimwaea te ara ae Ana Tia Kakoaua Iehova.—Wareka Mwakuri 1:8; 2:1, 4; 5:42.

4. A kanga ni botakaki ao ni baireaki raoi Ana Tia Kakoaua Iehova ni boong aikai?

N te moan tienture, a kakabwaiaaki ekaretia ni Kristian n aaba aika bati man te rabwata n tautaeka, ake a ataia bwa Iesu bon Atun te ekaretia. (Mwakuri 16:4, 5) N aron naba anne, a ataia ni boong aikai Ana Tia Kakoaua Iehova ae Iesu bon aia tia Kairiri. (Mataio 23:9, 10) A kakabwaiaaki naba man ana kairiri te Rabwata n Tautaeka ae kaainaki irouia unimwaane aika mwaatai, ake a kakatauraoi reirei ni kaungaunga man te Baibara ao te kairiri ibukin ekaretia aika e raka mwaitiia i aon 100,000. A beku mwaane aika a tau n ekaretia ni kabane bwa unimwaane ke mataniwi. A tararuaa ana nanai te Atua ma te tangira mwaane aikai.—Wareka 1 Betero 5:2, 3.

A botakaki ao ni baireaki raoi Ana Tia Kakoaua Iehova ibukin tataekinan te rongorongo ae raoiroi ao karekeaia taan rimwini Kristo. Ibukini buokaia aomata n taabo nako, a rairi, a boreeti ao a tibwatibwai nako booki aika buoka te ukeuke n reirei n te Baibara n taetae aika raka i aon 500. A uarongorongo man te auti teuana ma teuana n aroia abotoro. (Mwakuri 20:20) A anganano ibukini kairan reirei n te Baibara ma aomata ake a tangira raoi te koaua. Kioina ngkai a kaatuua n aia iango kakukureian te Atua ao buokaia aomata nako, boni kaain te botaki ngaiia ae kakukurei ae baireaki raoi.—Wareka Taian Areru 33:12; Mwakuri 20:35.

[Taamnei n iteraniba 31]

Ibukin rongorongona riki, nora mwakoro 19 n te boki aio ae boreetiaki irouia Ana Tia Kakoaua Iehova.

[Taamnei n iteraniba 31]

TERA ANA REIREI ni Koaua TE BAIBARA?