Kaaniko Ma Te Atua
“N na Aki Manuokiko”
E RANGI ni mwannanoia ana aomata Iehova? Ngkana ngaia anne, tera aroni korakoran tabeakinaia irouna? Tii teuana te kawai ae ti kona iai n atai kaekaan titiraki akanne, bwa rinanoni kaotaraeana iroun te Atua. E kaota ana namakin Iehova n te Baibara n te aro ae mataata. Iangoi taeka aika n Itaia 49:15, BG.
Ibukini kabwarabwaraan ana namakin ae korakora Iehova ibukia ana aomata, e a taekina teuana ana katoto ae rangi n ringa te nano ae ti kona n iaiangoia. E moanna man tabekan te titiraki ae kammwakura te iango ae kangai: “E kona te aine ni manuoka natina ae mamma, ba e na aki nanoanga natini birotona?” E taraa ni mataata kaekaana ni moan iangoana. E na kanga te tina ni mwanuoka natina ae mamma? E boto maiun natina ni kabane irouna n te ngaina ao n te tairiki ao e tang ngkana e kainnanoa tabeakinana! Ma iai te bwai ae kakawaki riki n ana titiraki Iehova anne.
E aera ngkai e tararuaa natina te tina ao n tabeakini baike e kainnanoi? E karaoa anne tii ibukini katokan tangina? Tiaki ngaia anne. N etina, iai te nanoanga iroun te tina ke e nanoangaaea “natini birotona.” E kona ni kairiri te taetae anne nakon iangoan te atataiaomata nakoia aika akea korakoraia ke akea aia konabwai. Ana atataiaomata te tina nakon natina ae mamma bon teuana mai buakon te mwakuri n tangira ae moan te korakora ae ti kona n iangoia.
Ma e kananokawaki bwa a aki bane tiina n nanoangaia natiia ake a kani mamma. E taku Iehova: “A boni kona aine ni manuokiia natiia.” Ti a mena ngkai n te aonnaba ae a bati iai mwaane ma aine aika “aki kakaonimaki nakoia raoia, [ao] taan aki tatangira.” (2 Timoteo 3:1-5) N tabetai, ti kona n ongoraea taekaia tiina aika bakaineia natiia aika a tibwa bungia, a karaoi mwakuri n iowawa nakoia ke a kitania. E mwaneweaki kanoan Itaia 49:15 n te boki teuana ae kabwarabwaraa te Baibara ni kangai: “A aki kororaoi tiina ao n tabetai e a taonakinako aia tangira ni mwakuri aika buakaka. E boni kona naba ni kabwaka aia tangira ae moan te korakora aomata.”
E karau nanora Iehova ni kangai: “Ao Ngai N na aki manuokiko.” Ti a kona ngkai ni moanna n ota ni kakawakin te titiraki are e tabekia Iehova ae taekinaki n Itaia 49:15, BG. Te bwai ae e kamataataa ikai, boni kaitaraana. N aroia tiina aika aki kororaoi ake a kona ni kabwaka ni kaota te atataiaomata nakoia natiia aika akea korakoraia, e kaokoro Iehova bwa akea te tai ae e kabwaka iai ni kaota te atataiaomata nakoia taan taromauria aika a kai nanoia. E a tonu raoi te kabwarabwara are mwaneweaki i eta ibukin Itaia 49:15 ae kangai: “Aio te nanoanga ae te kabanea ni korakora, ke boni kaotan ana tangira te Atua ae moan te korakora n te O Tetemanti.”
E aki ngkanne kabebetenano reiakinan “ana atataiaomata ae bati Atuara”? (Ruka 1:78) E aera ko aki reiakina arom ni kaaniko riki ma Iehova? E karau nanoia taan taromauria te Atua ae tatangira aei ni kangai: “N na bon aki kaakiko ao N na bon aki kitaniko.”—I-Ebera 13:5.