E Kaotaraeaki Ana Tangira Te Atua N Ana Tangira Te Tina
“E kona te aine ni manuoka natina ae mamma, ba e na aki nanoanga natini birotona? Eng, a boni kona aine ni manuokiia natiia, ao Ngai N na aki manuokiko.”—ITAIA 49:15.
E KARAUAKI ni mwanokaaki te merimeri ao ni kammammaaki iroun tinana. Aio te iango are e oti naba iai te akoi ao te tangira. E taekina ae kangai te tina temanna ae Nei Pam: “Ngke I moani koona natiu i nanoni baiu, ao I a namakina te tangira ae korakora ao te mwioko ae boou ibukin natiu.”
A kakoauaa raoi taan rabakau bwa e rangi n irekereke ana tangira te tina ma rikiraken natina. E taekinaki ae kangai n te rongorongo ae nako man te botaki ae te World Health Organization Programme on Mental Health: “A a tia ni kuneaki n ukeuke aika bati bwa ataei aika a bakaineaki ao ni maenako ma tinaia, a aki toki n rotaki n te nanokawaki, te uruakinnano, ao n tabetai a bon rotaki n te maaku ae korakora.” E taekinaki naba n te rongorongo anne bwa ataei ake a tangiraki ao ni mwannanoaki raoi irouia aia karo mani uarerekeia, a noraki bwa e bati riki wanawanaia ni kabotauaki ma ataei ake a bakaineaki.
E taetae temanna te tia rabakau i aoni bwainnaorakian te iango, man te reirei ae te UCLA School of Medicine n te United States ae Alan Schore, ni kaineti ma kakawakin ana tangira te tina ni kangai: “Bwa reitakin te tei ma tinana boni ngaia anne te moan iraorao are e karekea te tei, ao te iraorao naba anne are e kona n rooti aron ana iraorao te tei ma aomata rimwi riki.”
Ma e kananokawaki bwa e kona te tina ni “mwanuoka natina ae mamma” ngkana e taonaki n te uruakinnano, te aoraki ao kangaanga riki tabeua. (Itaia 49:15) Ma e ngae anne, e boni burenibwai rikin aei. Ao ni koauana, n taraana e a kaman baireaki te tina bwa e na tangira natina. A a tia ni kunea taani kakae bwa n tain te bung ao e birirake mwaitin te bwai teuana ae e a aranaki bwa te oxytocin i nanon rabwatan te tina, are e kakorakoraa mwatiretin ana kai te aine bwa e aonga ni kona n otinako te tei, ao e kaotinakoa naba te rannimamma. E kona ni kuneaki te bwai aei irouia mwaane ao aine, ao e kakoauaki bwa ngaia are e kairia aomata bwa a na itangitangiri ao e kaira naba te tina bwa e na karaoa ae riai nakon natina.
E Riki Mai Ia te Tangira?
Te koraki ake a kakoauaa bwa a bon rikirake bwaai i bon irouia, a taku bwa te tangira ae aki bangaomata, n aron are iroun te tina ma natina, e bon riki naba i bon irouna, ao a teimatoa ni kaotiotia tabeman kioina bwa a kakabwaiaki iai. N te katoto, e taekina ae kangai te maekatin n te Internet ae te Mothering Magazine: “Moan iteran ara kaburoro are e rikirake imwin iteran ara kaburoro are e riki mai irouia maan, bon te limbic system ae irekereke ma ara namakin. Ao ngaia anne iteran ara kaburoro are e a karekea rikiraken te itangitangiri i marenan te tina ma natina.”
Ao e boni koaua, bwa a tia n taekinna taani kakaae bwa iteran ara kaburoro anne, e irekereke ma ara namakin. Ma te koaua ngkanne, bwa e taraa naba n eti iroum ae ana tangira te tina nakon natina, e manennanti rikina kioina bwa e moan riki mai irouia maan?
Iangoa kabwarabwarana teuana riki. E kabwarabwaraa te Baibara bwa a karikaki aomata ni katotongan te Atua, are nanona bwa a kona ni katotonga aroarona. (Karikani Bwaai 1:27) Aroaron te Atua ae rangi n rianako bon te tangira. E korea ae kangai te abotoro Ioane: “Ane akea te tangira i rouna, ao e aki ata te Atua.” Bukin tera? “Ba te Atua bon te tangira.” (1 Ioane 4:8) Ma uringnga bwa e aki kangai te kibu aei bwa iai ana tangira te Atua, ma e kangai bwa te Atua bon te tangira. Boni ngaia Nibwan te tangira.
E kabwarabwaraa te tangira te Baibara ni kangai: “E taotaona nanona te tangira, e atataiaomata; e aki babakantang te tangira; e aki kamoamoa te tangira, e aki kainikatonga, e aki karaoa ae aki riai. E aki ukoukori ana bwai, e aki kakaiun, e aki mutiakina te karawawataki. E aki kimareirei n te buakaka, ma e kimareirei n te koaua. E taotaona nanona nakoni bwaai ni kabane, e onimakini bwaai ni kabane, e kaantaningai bwaai ni kabane, e nanomwaka nakoni bwaai ni kabane. E bon aki bwaka te tangira.” (1 I-Korinto 13:4-8) Te koaua ngkanne bwa e boni manennanti n riki te aroaro ae rangi n rine aei?
Tera Aron Rotakim Iai?
Ngkana ko wareka kabwarabwaraan te tangira n te barakirabe ae imwain aei, ko aki ngkanne tangira te aomata temanna ae e na kaotiota te aeka n tangira aei nakoim? Bon anne te bwai ae e na bon riai n riki. Bukin tera? Ibukina bwa “kanoan te Atua ngaira.” (Mwakuri 17:29) Ti karikaki bwa ti na karekea ao ni kaotiota te aeka n tangira anne. Ao ti bon aki nanououa bwa e bon rangi n abwabwaki ana tangira te Atua ibukira. (Ioane 3:16; 1 Betero 5:6, 7) Te kibu are e mwaneweaki ni moan te kaongora aei, e katerea bwa ana tangira te Atua ibukira, e rangi ni korakora, ao e teimatoa riki nakon ana tangira te tina nakon natina!
Ma tao ko kona n iango ni kangai: ‘Ngkana ngaia bwa e wanawana te Atua, e rangi ni mwaaka, ao e tatangira, ao e aera bwa e aki katoka te rawawata? Bukin tera ngkai e kariaia bwa a na mate ataei, e na waakinako te ribuaka, ao uruakan te aonnaba aei irouia aomata aika a aki tarabwai ao ni bangaomata?’ Aikai titiraki aika rangi n tamaroa, ao e riai kaekaaia.
Ti boni kona ni karekei kaeka aika karaunano nakon titiraki aikai, n aki ongeia bwa tera aia taeka te koraki ake a nanououa bwa iai te Atua ke akea. Mirion ma mirion aomata n aaba aika mwaiti ake a a tia ni karekei kaekaan titiraki aikai, imwin aia reirei n te Baibara ma Ana Tia Kakoaua Iehova. A kaungako taani boreetia te maekatin aei bwa ko na karaoa naba aron anne. Ngkana e tabe n rikirake am atatai i aon te Atua, man te reirei n Ana Taeka ao man ana karikibwai, ane ko na noria iai ngkanne bwa e a rangi ni kaan ma ngaira ao ti boni kona naba ni kinaa. Ao ko na bon aki nanououa bwa te Atua e bon “aki raroa mai roura n tatabemanira nako.”—Mwakuri 17:27.
[Kabwarabwaraan n iteraniba 8]
E teimatoa riki ana tangira te Atua ibukira nakon ana tangira te tina nakon natina